1, 2. Tadikaka ta dekenai dahaka ia vara, bona dahaka ia karaia?

ROBERT ena mauri lagani be 15 neganai, bapatiso ia abia, to ia ese hereva momokani ia laloa bada lasi. Ia gwau: “Kerere ta lau karaia lasi, to Iehova hesiai henia karana dekenai lau bisi sibona. Toana be egu hetura karana Iehova ida be ia goada, badina hebou ibounai dekenai lau lao bona hua haida ai lau heduru painia. To gau ta lau reaia.”

² Robert be unai ia diba lasi ela bona ia headava murinai. Nega ta ia bona ena adavana be ta ta dekenai Baibel ena henanadai idia gwauraia. Iena adavana be Baibel ia diba namonamo dainai, henanadai edia haere maorodia ia henia, to nega momo Robert ia hemarai, badina henanadai edia haere ia diba lasi. Ia gwau: “Unai be hegeregere lau be gau ta lau diba lasi. Sibona dekenai lau gwau, ‘Bema lau be egu adavana ena kwarana, gau ta lau karaia be namo.’” Bona unai ia karaia. Ia gwau: “Baibel lau stadilaia loulou, bena Baibel ena hereva lau lalopararalaia matamaia. To, mai anina bada gauna be egu hetura karana Iehova ida ia goada.”

3. (a) Robert ena sivarai amo dahaka ita dibaia? (b) Inai stadi ai edena henanadai toi do ita haerelaia?

³ Robert ena sivarai amo mai anina bada gauna ita dibaia. Ena  be ta be Baibel ena hereva ia lalopararalaia, bona nega ibounai Keristani heboudia dekenai ia lao, to unai ese ia hahedinaraia lasi ia be Dirava ena lauma ese ia hakaua. Danu, ena be ta be ia goada, to sibona ia sekea loulou be namo, unai amo gau haida ia hanamoa diba. (Fili. 3:16) Ita goada ita lao noho totona, inai stadi ai inai henanadai toi do ita haerelaia: (1) Edena bamona do ita diba ita be Dirava ena lauma ese ia hakaua? (2) Dahaka ita karaia diba, unai amo Dirava ena lauma ese ita do ia hakaua noho? (3) Bema Dirava ena lauma ese ita ia hakaua, dahaka namo do ita davaria?

4. Efeso 4:23, 24 ena sisiba be daidia totona?

⁴ Dirava ita hesiai henia matamaia neganai, iseda mauri ai gau momo ita haidaua. Ita bapatiso murinai, unai ita karaia noho. Baibel ia gwau: “Emui lalona do umui hamatamataia noho.” (Efe. 4:23, 24) Ita be goevadae lasi dainai, iseda lalona ita hamatamataia noho be namo. Lagani momo lalonai Iehova idia hesiai henia taudia danu be unai idia karaia be namo.​—⁠Fili. 3:12.

5. Sibona dekenai dahaka henanadai do ita henia?

⁵ Dirava ena lauma ese ita ia hakaua totona, mai momokani ida sibona ita sekea be namo. Herevana ita be matamata o buruka, sibona ita nanadaia diba: ‘Gau haida do lau haidaua, unai amo lo Keristani tauna ai lau lao diba, a? Egu kara be Keriso ena bamona, a? Egu kara Keristani heboudia dekenai ese ia hahedinaraia lau be lo Keristani tauna, a? Egu hereva ese edena dala ai egu ura ia hahedinaraia? Egu stadi karana, dabua bona toana ese dahaka idia hahedinaraia? Lau abia sisiba be edena bamona lau lalodia? Hahetoho negadiai, dahaka lau karaia? Lau be lo Keristani tauna ai lau lao vadaeni, a?’ (Efe. 4:13) Unai henanadai edia haere amo do ita diba bema ita be ita goada ita lao eiava lasi.

6. Edena bamona do ita diba ita be ita goada ita lao?

⁶ Nega haida ma haida edia heduru ita noia diba, unai amo do ita diba bema ita be ita goada ita lao. Aposetolo Paulo ese ia hahedinaraia, sibona ena ura ese ia hakaua tauna be do ia laloparara lasi iena kara amo ia be Dirava ia hamoalea lasi. To, Dirava ena lauma ese ia hakaua tauna be Dirava ena lalohadai ia diba, bona ia diba tauanina ena ura ese ia hakaua tauna be ia kerere. (1 Kor. 2:14-16; 3:1-3) Elda taudia be Keriso ena laloa dalana idia badinaia dainai, sibona ena ura ia badinaia tadikaka o taihu idia durua diba. Ita dekenai unai idia herevalaia neganai, edia sisiba do ita abia dae bona badinaia, a? Bema unai ita karaia, ita hahedinaraia ita ura lo Keristani taudia ai ita lao.​—⁠Had. 7:5, 9.

7. Dahaka dainai Baibel amo diba maoromaoro ita abia sibona be hegeregere lasi?

⁷ Laloatao, Dirava ena lauma ese ita ia hakaua totona, Baibel amo diba maoromaoro ita abia sibona be hegeregere lasi. King Solomona be Iehova ena dala ia diba namonamo. Iena hereva be gabeai Baibel lalonai idia torea. To gabeai, Iehova abidadama henia karana ia rakatania. (1 Kin. 4:29, 30; 11:4-6) Unai dainai Baibel sibona ita diba be hegeregere lasi, to dahaka ita karaia danu be namo? Oibe, iseda abidadama ita hagoadaia noho be namo. (Kol. 2:6, 7) To, edena bamona unai ita karaia diba?

8, 9. (a) Lo Keristani taudia ai ita lao totona, dahaka ita karaia diba? (b) Ita stadi bona laloa dobu neganai, iseda tahua gauna be dahaka? (Laulau ginigunana herevalaia.)

⁸ Paulo ese Keristani taudia ginigunadia ia  hagoadaia do ‘idia hekwarahi noho lo taudia ai idia lao totona.’ (Heb. 6:1) Paulo ena sisiba ita badinaia totona, dahaka ita karaia diba? Mai anina bada gauna ta be Dirava Ena Lalokau Lalonai Do Umui Noho bukana ita stadilaia. Unai buka stadilaia karana ese oi do ia durua emu mauri ai Baibel ena hakaua herevadia oi badinaia totona. Bema unai buka oi stadilaia haorea vadaeni, emu abidadama do ia hagoadaia buka ta oi stadilaia diba, a? (Kol. 1:23) Oi stadilaia gaudia be emu mauri ai do oi badinaia dalana be mai guriguri ida oi laloa dobu, a?

⁹ Laloatao, ita stadi bona laloa dobu neganai, namona be ita ura Iehova ita hamoalea bona ena taravatu ita badinaia. (Sal. 40:8; 119:97) Bona danu, ita hekwarahi iseda hesiai gaukara idia koua gaudia ita dadaraia totona.​—⁠Tito 2:11, 12.

10. Matamata taudia be lo Keristani taudia ai idia lao totona, dahaka idia karaia diba?

¹⁰ Bema oi be matamata tauna ta, Dirava hesiai henia karana dekenai tahua gaudia oi atoa, a? Betele ai ia gaukara tadikaka ta be sekit hebouheboudia dekenai ia lao neganai, vaia bapatiso idia abia gwauraia matamata taudia ida ia herevahereva. Idia atoa tahua gaudia ia henanadailaia. Momo edia haere ese ia hahedinaraia idia ura vaira nega ai Iehova idia hesiai henia​—⁠reana ful-taina hesiai gaukara ta o pablisa momo lasi gabudia dekenai idia lao. To matamata taudia haida be idia haere lasi. Reana badina edia kudouna ai do idia atoa tahua gauna idia do lalohadailaia lasi. Bema oi be matamata tauna, sibona oi nanadaia: ‘Egu tama sina edia ura dainai, hebou bona haroro dekenai lau lao, a? Eiava lau sibona egu ura dainai Dirava lau tura henia, a?’ Momokani, matamata taudia sibona ese tahua gaudia idia atoa lasi. Bema ita ibounai ese tahua gaudia ita atoa, lo Keristani taudia ai ita lao diba.​—⁠Had. 12:1, 13.

11. (a) Lo Keristani tauna ai ita lao totona, dahaka ita karaia be namo? (b) Baibel lalonai daika ena haheitalai ita tohotohoa diba?

¹¹ Bema iseda kara haida do ita hanamoa, unai ita karaia haraga be namo. Dirava ena lauma ese ita ia hakaua be mai anina bada. Bema unai ita karaia lasi, ita mase diba. (Roma 8:6-8) Momokani, ita goevadae lasi taudia be lo Keristani taudia ai ita lao diba. Bona Iehova ena lauma ese ita ia durua diba. To, unai ia vara totona ita hekwarahi be namo. Tadikaka John Barr, guna Hakaua Oreana ena memba ta, be lagani haida gunanai Luka 13:24 ia herevalaia neganai, ia gwau: “Momo idia kwalimu lasi badina idia goada totona idia hekwarahi lasi.” Namona be Iakobo bamona ita kara, ia be aneru ia rakatania lasi ela bona ia amo hanamoa ia abia. (Gen. 32:26-28) Ena be Baibel stadilaia karana ita moalelaia, to namo lasi stori bukana ta bamona Baibel ita duahia. Namona be ita gaukara goada ita idia hagoadaia hereva momokani ita tahudia totona.

12, 13. (a) Edena dala ai “Keriso Iesu ena laloa dalana” do ita abia? (b) Aposetolo Petero ena haheitalai bona sisiba ese edena dala ai ita ia durua? (c) Lo Keristani tauna ai oi lao totona, dahaka do oi karaia? (Maua ladana “ Lo Keristani Tauna ai Oi Lao Dalana” itaia.)

¹² Bema ita hekwarahi lo Keristani tauna ai ita lao totona, lauma helaga ese ita do ia durua, iseda laloa dalana ita hanamoa totona. Lauma helaga ena heduru amo, ita be Keriso ena laloa hegeregerena ita laloa diba. (Roma 15:5) Danu, ita do ia durua tauanina ena ura ita dadaraia bona Dirava ia moalelaia karadia ita hahedinaraia totona. (Gal. 5:16, 22, 23) Bema ita mamia ita be kohu o tauanina ena ura gaudia ita laloa bada, ita hesiku haraga lasi. Lauma helaga ena  heduru ita noia noho bona Iehova ese do ia henia, unai amo gau maorodia sibona do ita laloa diba. (Luka 11:13) Aposetolo Petero mani ita laloa. Ia be nega haida lo Keristani tauna bamona ia kara lasi. (Mat. 16:22, 23; Luka 22:34, 54-62; Gal. 2:11-14) To ia hesiku lasi. Iehova ena heduru amo, gabeai ia be Keriso ena laloa dalana ia abia. Unai ita karaia diba danu.

¹³ Petero be do ita karaia gaudia ia herevalaia danu. (2 Petero 1:5-8 duahia.) Namona be ita “hekwarahi” sibona ita biagua totona, ita haheauka, bona tadikaka ita lalokau henidia, bema unai ita karaia, ita be lo Keristani taudia ai ita lao diba. Dina ta ta ai, sibona ita nanadaia, ‘Lo Keristani tauna ai lau lao totona, hari dina ai edena kara do lau hanamoa?’

14. Keriso ena laloa dalana abia karana ese edena bamona ita ia durua?

¹⁴ Bema Keriso ena laloa dalana ita abia, iseda herevahereva dalana bona iseda kara moni gaukara ai, sikuli ai, bona dina ta ta ai ita karaia abia hidi ai unai do ia hedinarai. Ita karaia abia hidi ese do idia hahedinaraia ita ura Keriso murinai ita raka. Ita be lo Keristani tauna dainai, ita ura lasi gau ta ese iseda hetura karana iseda guba Tamana ida ia hadikaia. Hahetoho ita davaria neganai, do ita dadaraia haraga, Keriso ia karaia bamona. Abia hidi ita karaia neganai, inai henanadai do ita lalodia dobu: ‘Baibel lalonai edena hakaua herevana ese lau do ia durua abia hidi maorona lau karaia totona? Inai bamona negadiai, Keriso be dahaka do ia karaia? Iehova be edena bamona abia hidi ia moalelaia?’ Unai laloa dalana ita abia totona, mani haheitalai haida ita laloa. Inai haheitalai ta ta ai Baibel ena hakaua herevana ia noho, unai ese ita do ia durua abia hidi maorona ita karaia totona.

15, 16. Bema Keriso ena laloa dalana ita abia, unai ese edena bamona ita ia durua, (a) ita ura adavaia tauna ita abia hidi neganai? (b) bamodia ita abia hidi neganai?

¹⁵ Oi ura adavaia tauna oi abia hidi neganai. Baibel ena hakaua herevana be 2 Korinto 6:14, 15 dekenai ia noho. (Duahia.) Paulo ia gwau abidadama tauna bona abidadama lasi tauna be idia hakapua hebou diba lasi. Ta ia ura headava neganai, unai hakaua herevana be edena bamona do ia badinaia?

¹⁶ Hebamo karadia. Baibel ena hakaua herevana 1 Korinto 15:33 dekenai mani ita laloa. (Duahia.) Dirava ia badinaia tauna be ena tomadiho karadia idia hadikaia diba taudia ia bamoa lasi. Sibona dekenai edena bamona henanadai oi henia diba? Hegeregere, intanet lau gaukaralaia neganai, unai hakaua herevana be edena bamona do lau badinaia? Bema lau diba lasi tauna ta be lau ia noia ia ida intanet amo ai gadara totona, dahaka do lau karaia?

17-19. Bema Dirava ena lauma ese oi ia hakaua, edena bamona (a) anina lasi karadia do oi dadaraia? (b) tahua gaudia do oi atoa? (c) hepapahuahu do oi hamaoromaoroa?

¹⁷ Iseda tomadiho karana idia hadikaia diba gaudia. Paulo ese Keristani taudia dekenai  ia gwauraia herevana be hadibaia herevana ta. (Heberu 6:1 duahia.) Ita dadaraia “mase karadia” be dahaka? Idia be anina lasi bona iseda abidadama idia durua lasi karadia. Unai hakaua herevana ese ita do ia durua inai henanadai ita haerelaidia totona, hegeregere: ‘Inai kara be “mase karadia” ta, a? Moni momo tahua karadia lalonai lau vareai, a? Dahaka dainai inai tanobada ena hekwakwanai idia ura hanamoa oreadia do lau durua lasi?’

¹⁸ Ita atoa tahua gaudia.  Iesu ese Ororo Harorona ai ia henia herevana ese ita ia durua tahua gaudia maorodia ita atoa totona. (Mat. 6:33) Dirava ena lauma ese ia hakaua tauna be ena mauri ai Basileia ia atoa guna. Inai hakaua herevana ese ita ia durua inai henanadai ita haerelaidia totona: ‘Edukeisen badana do lau tahua, a? Moni gaukara ta do lau abia dae sibona, a?’

¹⁹ Hepapahuahu. Hepapahuahu ia vara neganai, Paulo ese Roma kongrigeisen dekenai ia henia sisiba ese edena bamona ita ia durua? (Roma 12:18) Ita be Keriso ena murinai ita raka dainai, ita ura “taunimanima ibounai ida maino ai do [ita] noho.” Hepapahuahu ia vara neganai, dahaka ita karaia? Ma haida edia hereva do ita abia dae lasi o nega ibounai ita ura maino ita karaia?​—⁠Iam. 3:18.

20. Dahaka dainai oi ura lo Keristani tauna ai oi lao?

²⁰ Unai haheitalai ese idia hahedinaraia, bema Baibel ena hakaua herevadia ita badinaia, lo Keristani tauna bamona do ita laloa bona abia hidi maorodia do ita karaia. Danu, iseda mauri do ita moalelaia bona do ita noho namo. Matamanai ita herevalaia tadikakana, Robert, ia gwau: “Egu hetura karana Iehova ida ia goada neganai, egu adavana bona natudia lau naria namonamo. Kohu lau lalohekwarahilaia lasi bona lau moale.” Unai bamona hahenamo ita moalelaia diba, bema lo Keristani taudia ai ita lao. Unai ia vara neganai, iseda mauri do ita moalelaia hari bona vaira nega ai “mauri korikorina” do ita abia.​—⁠1 Tim. 6:19.