1, 2. Omurumendu umwe omukambure wa muna tjike ohunga noupanga we kuna Jehova, nu eye wa tjita vi ohunga notjiṋa ho?

ROBERT wa papitisiwa tja ri nozombura 15, posi yokutja kaa vara ouatjiri wOmbeibela otjotjiṋa otjinanḓengu tjinene mehupo re. Eye wa tja: “Ami hee tjiti oviṋa ovivi, posi yokutja oviṋa mbyee tjiti otjomukarere wa Jehova, ee tjiti mena rokutja ovandu varwe aave tjiti. Okukara pozombongarero azehe zombongo, nokukarera otjomukandjira omuvatere ovikando tjiva mombura, aa ku tjiti kutja mbi munike otjomundu ngu mbi noupanga ouwa kuna Jehova. Posi yokutja pa ri otjiṋa tjee hepa okutjita.”

² Robert kena pa muna kutja ouzeu wa ri pi, ngandu kombunda tja kupa. Eye nomukazendu we povikando tjiva aave nyanda enyando rokupurasana omapuriro ohunga nomapu wOmbeibela. Omukazendu we ngwa ri noupanga womasa kuna Jehova, kari nouzeu wokuzira omapuriro ngo, posi yokutja Robert aa ṱohoṋi mena rokutja kaa tjiwa omaziriro. Eye wa tja: “Ami mba ri tjimuna omundu ngu mbi ha tjiwa otjiṋa oparukaze. Ami mbe ripura kutja, ‘Tji me vanga okuhongorera omukazendu wandje moviṋa oviyapuke, okutja me hepa okutjita omarundurukiro.’” Nu Robert wa tjita nao. Eye wa tja: “Ami mba konḓonona Ombeibela oukoto, nu e konḓonona nokukonḓonona rukwao. Ami mba uta okuzuva oviṋa nawa, nu tjinenenene mba uta okutumbuka popezu na Jehova.”

3. (a) Matu rihongere ko tjike kotjihorera tja Robert? (b) Omapu yeṋe omananḓengu ngu matu kakonḓonona nai?

³ Matu yenene okurihonga oviṋa ovinanḓengu tjinene kehungi ra Robert. Mape ya atu kara nondjiviro yOmbeibela, poo atu kara pozombongarero  zombongo aruhe, nokukara norupa motjiungura tjokuzuvarisa. Posi yokutja, okutjita oviṋa mbi, kaku tjiti kutja tu rire ovandu mbe noupanga ouwa kuna Jehova. Poo rumwe twa ungura oukukutu okuhara oumune wa Jehova ohunga noviṋa, posi yokutja tji twa haama atu rikonḓonona nawa, tu muna kutja pe noviṋa mbi matu hepa okuungurira ko. (Fil. 3:16) Okutuvatera kutja tu kayende komurungu okukurisa oupanga wetu kuna Jehova, morupa ndwi matu katara komapuriro 3 omananḓengu. (1) Otjikwaye tji matji tu vatere okutjiwa kutja tu noumune wa Jehova ohunga noviṋa poo indee? (2) Matu yenene vi okukurisa oupanga wetu kuna Jehova? (3) Oupanga womasa kuna Jehova mau yenene vi okutuvatera mehupo retu?

4. Eronga ndi ri mOvaefese 4:23, 24 ri ṱuna kovandu veṋe?

⁴ Indu tji twa rira ovakarere va Mukuru, twa tjita omarundurukiro. Omarundurukiro ngu twa tjita nga, ya ṱuna kehupo retu arihe. Nu nandarire tji twa za nokupapitisiwa, aatu hepa okutjita omarundurukiro. Ombeibela i tu raera kutja, “omitima vyeṋu nomeripuriro weṋu vi sokuyarurwa koupe.” (Ef. 4:23, 24) MOtjigrike, omambo nga ‘okuyarurwa koupe’ ye raisa otjiṋa tji tji kayenda komurungu. Okutja, matu sokukayenda komurungu okuyarurwa koupe momitima nomeripuriro wetu. Mena rokutja kaweṱe ohomonena, atuhe tu hepa okukayenda komurungu okutjita omarundurukiro aruhe. Nangarire imba mba karera Jehova oruveze orure, ve hepa okukayenda komurungu okukurisa oupanga wawo kuna Jehova.—Fil. 3:12, 13.

5. Omapuriro yeṋe ngu maye tu vatere okurikonḓonona oveni?

⁵ Kutja tu kayende komurungu okukurisa oupanga wetu kuna Jehova, matu sokurikonḓonona oveni nawa. Kutja oweṱe ovaṱiṱi poo ovanene, matu yenene okuripura oveni omapuriro nga: ‘Hapo ami mbi muna omarundurukiro mu ami omuini, nge raisa kutja owami omundu ngu mbi noumune wa Jehova ohunga noviṋa? Hapo ami mbi raisa ovikaṋena tjimuna ovya Kristus? Ongaro yandje nomuano mu mbi ritjinda pozombongarero zombongo vi raisa tjike ohunga noupanga wandje kuna Jehova? Omahungi wandje kuna varwe ye raisa tjike ohunga nozonḓero zandje? Hapo omuano wandje wokukonḓonona Ombeibela, nomuano mu mbi rihwikika, nongaro ndji mbi raisa tji mba pewa omaronga, vi raisa tjike ohunga na ami? Hapo mbi ritjinda vi indu tji mba rorwa okutjita otjiṋa otjivi? Hapo mba rira Omukriste ngu noupanga ouwa kuna Jehova?’ (Ef. 4:13) Okuripurira komaziriro womapuriro nga, maku tu vatere okutara kutja oupanga wetu kuna Jehova u ri pondondo iṋe.

6. Ovikwaye vyarwe mbi mavi yenene okutuvatera okumuna kutja tu noumune wa Jehova ohunga noviṋa?

⁶ Povikando tjiva tu hepa ombatero okuza ku varwe, okutjiwa kutja tu noumune wa Jehova ohunga noviṋa poo indee. Omuapostele Paulus wa kahurura kutja omundu ngu hi noumune wa Jehova ohunga noviṋa, ke rimunu omuini kutja omuano mbwe hupa kau tjata ku Mukuru. Posi yokutja omundu ngu noumune wa Jehova ohunga noviṋa, u tjiwa nawa oumune wa Mukuru mozongaro pekepeke. Eye wina u tjiwa kutja Mukuru kayakura omuano wokuhupa otja kozonḓero zouye mbwi. (1 Kor. 2:14-16; 3:1-3) Ovanene vombongo mbe nOmbepo ya Kristus, aruhe ve yenena okumuna indu omukambure mombongo tji ma raisa ovikaṋena vyongaro youndu, nu ave kondjo okumuvatera. Indu omunene wombongo tje ku rongo, hapo ove u yakura omaronga nga, nu orundurura ongaro yoye? Indu tji twa tjiti nao, eṱe tu raisa kutja tu vanga okukurisa oupanga wetu kuna Jehova.—Omuzuv. 7:5, 9.

7. Matu tjiwa vi kutja ondjiviro yOmbeibela aiyerike kamaai tu vatere okukara noumune wa Jehova ohunga noviṋa?

⁷ Tjiwa kutja okutjiwa Ombeibela akuyerike, kaku hee kutja oove omundu ngu noumune wa Jehova ohunga noviṋa. Ombara Salomo ya ri nondjiviro onyingi ohunga na Jehova. Nu omambo wounongo nga hungira ya tjangwa mOmbeibela. Posi yokutja kombunda oupanga we kuna Jehova wa ngundipara, neye kena pa ṱakama ku Jehova. (1 Ozomb. 4:29, 30;  11:4-6) Matu hepa okuweza ko tjike kondjiviro yOmbeibela ndji tu na yo? Matu sokukayenda komurungu okukurisa oupanga wetu kuna Jehova. (Kol. 2:6, 7) Ihi matu yenenisa vi?

8, 9. (a) Otjikwaye tji matji tu vatere kutja ongamburiro yetu i zikame? (b) Matu sokukara nondando iṋe, indu tji matu rihongo omirari vyOmbeibela nokuripurira ko oukoto? (Tara kotjiperendero pomautiro worupa ndwi.)

⁸ Paulus wa tunduuza Ovakriste veserewondo etenga kutja ve “ryame komurungu komayeneneno waindji ombuze.” (Hebr. 6:1) Kokutja tu yenenise erakiza ra Paulus ndino, omikambo viṋe mbi matu sokutoora? Omukambo umwe omunanḓengu mbu matu sokutoora, okukonḓonona embo ndi “Riṱizireye morusuvero rwaMukuru.” Tji wa konḓonona embo ndi okumana, maku ku vatere kutja u yenene okutjiwa okuṱakamisa omirari vyOmbeibela mehupo roye. Tjinangara wa mana rukuru okukonḓonona embo ndi, pe nomambo warwe ngu mo yenene okukonḓonona, ngu maye ku vatere okuzikamisa ongamburiro yoye. (Kol. 1:23) Eṱe wina matu hepa okuripurira ko oukoto koviṋa mbi matu rihongo, nokuningira Jehova kutja me tu vatere okuviṱakamisa mehupo retu.

⁹ Otja tji mo rihongo nokuripurira ko oukoto, zemburuka kutja ondando yetu, i sokurira oyokuyorokisa omutima wa Jehova nokuṱakamisa omatwako we. (Eps. 40:8; 119:97) Nu wina, tu sokukondja okunakaura oviṋa mbi mavi ngundiparisa oupanga wetu kuna Jehova.—Tit. 2:11, 12.

10. Omitanda mavi sokutjita vi, kutja vi kare noupanga womasa kuna Jehova?

¹⁰ Tji u ri omutanda, ove hapo u nozondando motjiungura tja Jehova? Omurumendu omukambure ngu ungura poBetel, aruhe aa hungire ku nomitanda mbyaavi sokupapitisiwa pomaworonganeno worukondwa, nokuvepura kutja ve nozondando zaye motjiungura tja Jehova. Otjingi tjawo ve yandja omaziriro nge raisa kutja owo ve tjiwa kutja mave vanga okukarera Jehova momiano viṋe. Tjiva va tya okuungurira Jehova oruveze aruhe, poo okukavatera koṋa ku ku nouhepe wovazuvarise vOuhona. Posi yokutja, povikando tjiva pe kara tjiva mbe ha tjiwa kutja mave vanga okutjita vi. Hapo ihi tji raisa kutja owo ngunda kave hepa okukara nozondando zokuungurira Jehova? Tji u ri omutanda, ripura omuini kutja, ‘Hapo ami mbi yenda kozombongarero zombongo nokupita motjiungura tjokuzuvarisa, mena rokutja ovanene vandje ve vanga kutja mbi tjite nao? Poo mbi noupanga wandje omuini kuna Jehova?’ Otjiperi kutja atuhe matu sokukara nozondando motjiungura tja Jehova, kutja oweṱe ovaṱiṱi poo ovanene. Okukara nozondando nḓa, maku tu vatere kutja tu kare noupanga womasa kuna Jehova.—Omuzuv. 12:1, 13.

11. (a) Matu hepa okutjita vi kutja tu kurise oupanga wetu kuna Mukuru? (b) Ovihorera viṋe vyOmbeibela mbi matu yenene okuhorera ko?

¹¹ Indu tji twa munu kutja matu sokutjita omarundurukiro, matu sokuuta okutjita nao. Okukara noupanga ouwa kuna Jehova otjiṋa otjinanḓengu tjinene. Orondu ombu u ku raisira kutja meyuva esenina mo yandekwa, poo mo munu omuinyo waaruhe. (Rom. 8:6-8) Nungwari, kaku nakuheya kutja matu sokurira ohomonena, kutja tu kare noupanga ouwa kuna Jehova. Ombepo ya Jehova ondjapuke mai yenene okutuvatera kutja tu tjite omarundurukiro ngu maye heperwa po. Posi yokutja eṱe wina matu hepa okuungura oukukutu. Mbuti John Barr ngwa ri okaṋepo kOrutu Orunane, wa hungirira ketjangwa ra Lukas 13:24 na tja: “Ovandu ovengi kave yenene okukurisa oupanga wawo kuna Jehova, mena rokutja kave kondjo oukukutu okutjita nao.” Eṱe matu sokukara tjimuna Jakob ngwa rwa ku nomuengeli ngandu tja muna ondaya ye. (Gen. 32:26-28) Nandarire kutja tu muna ondjoroka momakonḓononeno wetu wOmbeibela, eṱe katu sokuundjira ko kutja Ombeibela i kare tjimuna embo rovihambarere ndi tupa onyuṋe. Eṱe matu sokutjita ozongondjero kutja tu mune ovihuze mOmbeibela mbi mavi tu vatere.

12, 13. (a) Otjikwaye tji matji tu vatere okuṱakamisa etjangwa rOvaroma 15:5? (b) Omaronga notjihorera tjomuapostele Petrus mavi tu vatere vi? (c) Ove mo yenene okutjita vi kutja u kare noupanga ouwa kuna Jehova? (Lesa okaongo nga “ Omikambo mbi mo yenene okutoora kutja u kare noupanga ouwa kuna Jehova.”)

¹² Otja tji matu kayenda komurungu okukurisa oupanga wetu kuna Mukuru, ombepo ondjapuke mai tu pe omasa okurundurura omeripura  wetu. Nombatero yombepo ondjapuke, kouṱiṱiṱiṱi eṱe matu utu okuripura otja Kristus. (Rom. 15:5) Oyo wina mai tu vatere okunakaura ozonḓuma zouvi, nokukara novikaṋena mbi tjata ku Mukuru. (Gal. 5:16, 22, 23) Indu tji twa munu kutja omeripura wetu maye tu hingi kutja tu ripurire kokuvanga oviṋa vyouye, poo koviṋa ovivi, katu sokurihahiza. Kayende komurungu okuningira ombepo ondjapuke, nu Jehova me ku vatere kutja u rundurure omeripura woye nu u ripurire koviṋa ovisemba. (Luk. 11:13) Zemburuka kutja omuapostele Petrus povikando tjiva, kaa raisa ongaro omundu ngu noupanga ouwa kuna Jehova ndji ma sokuraisa. (Mat. 16:22, 23; Luk. 22:34, 54-62; Gal. 2:11-14) Posi yokutja eye kena pe rihahiza, nu Jehova we mu vatera. Kouṱiṱiṱiṱi Petrus we rihonga okuripura tjimuna Kristus. Nu eṱe wina matu yenene okutjita nao.

¹³ Petrus kombunda wa tamuna ovikaṋena mbi mavi yenene okutuvatera. (Lesa 2 Petrus 1:5-8.) Otja tji matu ‘kondjo tjinene’ okukara novikaṋena tjimuna omeritjaerero, onḓaro orure, norusuvero kovakambure ovakwetu, maku tu vatere okurira ovandu mbe noumune wa Jehova ohunga noviṋa. Eyuva arihe ripura omuini kutja, ‘Otjikaṋena tjiṋe tji me sokuungurira ko ndino, tji matji ndji vatere okukurisa oupanga wandje kuna Jehova?’

14. Okurira omundu ngu noumune wa Jehova ohunga noviṋa, maku ṱunu vi kehupo retu?

¹⁴ Indu tji tu noumune wa Kristus, maku ṱunu komuano mbu tu hungira nokuritjinda tji tu ri poviungura poo poskole, nomuano mbu tu tjita ozondando eyuva arihe. Ozondando zetu nḓo maze raisa kutja tu kondja okuhorera ku Kristus poo indee. Otjovandu mbu tu noumune wa Jehova ohunga noviṋa, kamaatu vanga kutja pe kare otjiṋa tji matji teya oupanga wetu kuna Tate wetu womeyuru. Indu tji twa rorwa okutjita oviṋa ovivi, okuraisa ongaro Kristus ndjaa raisa, maku tu vatere kutja tu pirukire omarorero ngo. Ngunda atu hiya tjita ozondando, rutenga matu sokuripurira komapuriro nga: ‘Omirari viṋe vyOmbeibela mbi mavi yenene okundjivatera? Kristus atja tjita vi mongaro otja indji? Omukambo uṋe mbu mau yorokisa omutima wa Jehova?’ Kutja tu yenene okurihonga okuripura momuano mbwi, ngatu katare kovihorera tjiva. Motjihorera atjihe, matu katara komurari wOmbeibela mbu mau tu vatere okutoora omukambo omusemba.

15, 16. Yandja ovihorera mbi mavi raisa kutja okuripura tjimuna Kristus, maku tu vatere vi okutoora omikambo omisemba ohunga (a) nokutoorora epanga rorukupo. (b) nokutoorora omapanga wetu.

¹⁵ Okutoorora epanga rorukupo. Omurari wOmbeibela ohunga nepu ndi, matu u vaza 2 Ovakorinte 6:14, 15. (Lesa.) Omuapostele Paulus wa raisa oukahu kutja omundu ngu noumune wa Jehova ohunga noviṋa, wa panguka tjinene ku ingwi ngu hina oumune wa Jehova ohunga noviṋa. Nu hapo omurari mbwi mau yenene vi okutuvatera okutoorora epanga rorukupo?

¹⁶ Okutoorora omapanga wetu. Yandja ombango komurari wOmbeibela mbu ri mo 1 Ovakorinte 15:33. (Lesa.) Omundu ngu noumune wa Jehova ohunga noviṋa kamaa rire epanga novandu mbu mave ngundiparisa ongamburiro ye. Ripura kutja mo yenene vi okuungurisa omurari mbwi, mozongaro pekepeke. Otjotjihorera, mau ku vatere vi okutoora omikambo ohunga nomahakaeneno womorungovi? Poo mo sokutjita vi indu tji wa ningirwa  okunyanda omanyando womorungovi ku novandu mbu u hina okutjiwa?

17-19. Okukara noumune wa Jehova ohunga noviṋa, maku ku vatere vi (a) okunakaura ovitjitwa mbi mavi ngundiparisa oupanga woye kuna Jehova? (b) okutwapo ozondando mehupo? (c) okuzengurura ozondjakaha?

¹⁷ Ovitjitwa mbi mavi ngundiparisa oupanga wetu kuna Jehova. Omuapostele Paulus wa yandja erakiza enanḓengu kOvakriste ovakwao. (Lesa Ovaheberi 6:1.) Oviungura viṋe ‘vyongarero ndji twara konḓiro’ mbi matu sokunakaura? Ovyo ovitjitwa mbi tjita kutja atu ha kara noupanga ouwa kuna Mukuru. Omurari mbwi mau tu vatere okuzira omapuriro nga: ‘Hapo ovitjitwa mbi, mavi ndji etere ouwa waye? Hapo hi kare norupa mongetjefa ndji? Ongwaye tji mbi ha sokukara norupa motjimbumba tji tji kondja okurundurura ozongaro mouye?’

¹⁸ Ozondando zokukarera Jehova. Jesus wa yandja omirari omiwa ohunga nokutwapo ozondando, mOmazuvarisiro we wOkondundu. (Mat. 6:33) Omundu ngu noupanga ouwa kuna Jehova u twapo Ouhona wa Mukuru outenga mehupo re. Omurari mbwi mau tu vatere okuzira omapuriro otja inga: ‘Hapo me sokukerihonga komurungu tji mba mana oskole? Hapo hi yakure otjiungura ngamwa atjihe?’

¹⁹ Ozondjakaha. Eronga ra Paulus kombongo yOvaroma mari tu vatere vi okuzengurura ozondjakaha? (Rom. 12:18) Otjovakongorere va Kristus, tu kondja okukara “nohange novandu avehe.” Indu tji pa kara ozondjakaha, tu raisa ongaro iṋe? Hapo ku rira ouzeu ku eṱe okuyakura oumune wa varwe? Poo tu tjiukwa otjovandu “ovanahange”?—Jak. 3:18.

20. Ongwaye tji mo vanga okukayenda komurungu okukurisa oupanga woye kuna Jehova?

²⁰ Ovihorera mbi mavi raisa kutja, omirari vyOmbeibela mavi yenene vi okutuvatera okutoora omikambo mbi mavi raisa kutja tu hongorerwa i yombepo ya Mukuru. Okukara noumune wa Jehova ohunga noviṋa maku tu vatere kutja tu kare nondjoroka mehupo retu. Robert, ngwa tamunwa pomautiro worupa ndwi, wa tja: “Tji mba hara oupanga watjiri kuna Jehova, mba rira omurumendu omusemba komukazendu wandje, na ihe omusemba kovanatje vandje. Mba ri nohange nu mba ri nondjoroka.” Tji matu kondjo nomasa okukurisa oupanga wetu kuna Jehova, matu yorokere ozondaya otjingezo nḓo. Otjovandu mbe noupanga ouwa kuna Jehova, matu kara nondjoroka mehupo retu nai, ‘nomuinyo watjiri’ moruyaveze.—1 Tim. 6:19.