1, 2. a) ¿Ndáaña ndo̱ʼo iiin ta̱ hermano? b) ¿Ta ndáaña ke̱ʼéra?

TA̱ Robert nda̱kuchira tá ndíka̱a̱ra ki̱ʼva 15 ku̱i̱ya̱, soo kǒo níxindi̱ʼi̱ va̱ʼa inira xa̱ʼa chiñu Ndióxi̱. Ta káchira: “Kǒo ni iin ña̱ kini níkeʼíi̱ nu̱ú Jehová, soo chiñu ña̱ xi̱keʼíi̱ va̱ása níxindayáʼviña nu̱úi̱. Nu̱ú inkana sana iin ta̱ espiritual xi̱kui̱, saáchi xi̱xa̱ʼi̱n ndiʼi reunión, ku̱a̱ʼá yichi̱ nu̱ú ku̱i̱ya̱ xi̱kui̱ precursor auxiliar. Soo íyo iin ña̱ xi̱kuma̱ní nu̱úi̱ túvii̱”.

² Nda̱a̱ tá ti̱ndaʼa̱ra na̱kunda̱a̱-inira ndáaña kúú ña̱ xi̱kuma̱ní nu̱úra. Sava yichi̱ xi̱sisíkíra xíʼin ñá síʼíra ña̱ xi̱keʼéna pregunta xíʼin táʼanna ña̱ va̱xi nu̱ú Biblia. Ñá síʼíra iin ñaʼá espiritual kúúñá va̱ʼaní xi̱ndakuiinñá. Soo miíra ni loʼo va̱ása kúchiñura ndakuiinra xi̱kukaʼankaví nu̱úra. Tasaá nda̱kanixi̱níra: “Tá yi̱ʼi̱ kúú ta̱ xíniñúʼu kuniʼi yichi̱ nu̱ú ñá síʼíi̱, xíniñúʼu chika̱i̱ ndée”. Tasaá ndixa i̱xaara. Ta káchira: “Ki̱xaʼíi̱ káʼvii̱ Biblia ndiʼi ki̱vi̱, ta saá ku̱a̱ʼa̱n na̱kunda̱a̱-inii̱ xíʼinña”. Ni̱xa̱a̱ra na̱kunda̱a̱ va̱ʼa inira xíʼinña, ta ki̱xaʼára kítáʼan va̱ʼara xíʼin Jehová.

3. a) ¿Ndáaña sákuaʼayó xíʼin ña̱ ndo̱ʼo ta̱ Robert? b) ¿Ndáa pregunta sakuaʼayó xa̱ʼa?

³ Ku̱a̱ʼáníña sákuaʼayó xíʼin ña̱ ndo̱ʼo ta̱ Robert. Sana xa̱a̱ xíni̱va loʼoyó xa̱ʼa Biblia, xáʼa̱nyó ndiʼi reunión ta kéeyó nátúʼunyó xa̱ʼa  Ndióxi̱. Soo su̱ví ña̱yóʼo kúni̱ kachiña ña̱ kúúyó iin na̱ yiví espiritual. Sana xa̱a̱ xa̱ʼnu loʼoyó xíʼin tu̱ʼun Ndióxi̱, soo tá ná koto va̱ʼayó ña̱ kéʼéyó sana kuniyó ña̱ kúma̱níkava loʼo nu̱úyó (Filip. 3:16). Ña̱ kivi chindeé táʼan xíʼinyó ña̱ va̱ʼa kuaʼnukayó xíʼin tu̱ʼun Ndióxi̱ kúú u̱ni̱ pregunta ña̱ sakuaʼayó xa̱ʼa nu̱ú artículo yóʼo. Ña̱ nu̱ú, ¿ndáaña chindeé miíyó ña̱ va̱ʼa kunda̱a̱-iniyó á kúúyó na̱ yiví espiritual? Ña̱ u̱vi̱, ¿ndáaña kivi keʼéyó ña̱ va̱ʼa kuukayó na̱ yiví espiritual? Ña̱ u̱ni̱, ¿nda̱saa chindeéña miíyó tá ná kuukayó na̱ yiví espiritual?

4. ¿Ndáana kúú na̱ xíniñúʼu kundiku̱n ña̱ káʼa̱n Efesios 4:23, 24?

⁴ Ña̱ va̱ʼa ni̱xa̱a̱yó ndásakáʼnuyó Ndióxi̱, ku̱a̱ʼá ña̱ʼa sa̱ndákooyó á na̱samayó miíyó. Ta saátu vitinva ni xa̱a̱ nda̱kuchiyó násamakavayó miíyó. Ña̱ Biblia káʼa̱nña xíʼinyó: ʻÑa̱ xíniñúʼu nasamayó ndiʼi ña̱ ndákanixi̱níyóʼ (Efes. 4:23, 24). Ña̱yóʼo kúni̱ kachiña ti̱xin ña̱ tu̱ʼun griego ña̱ va̱ása sandákooyóña ná ndakundeékayó nasamayó miíyó. Xa̱ʼa ña̱ kúúyó na̱ yiví ku̱a̱chi, ndiʼiyó xíniñúʼu chika̱a̱yó ndée ña̱ nasamakayó miíyó. Nda̱a̱ na̱ xa̱a̱ ku̱a̱ʼání ku̱i̱ya̱ ndásakáʼnu Jehová xíniñúʼu kundaana miína (Filip. 3:12, 13).

5. ¿Ndáa pregunta kúú ña̱ chindeé miíyó ña̱ va̱ʼa kunda̱a̱-iniyó á kúúyó na̱ yiví espiritual?

⁵ Ña̱ va̱ʼa ná kuaʼnukayó xíʼin tu̱ʼun Ndióxi̱ á ña̱ kuukayó na̱ yiví espiritual xíniñúʼu koto va̱ʼayó ña̱ kéʼéyó. Ni na̱ válí kúúyó á na̱ xa̱a̱ chée kúúyó, ndiʼiyó xíniñúʼu nda̱ka̱tu̱ʼunyó ña̱yóʼo miíyó: “Ki̱vi̱ tá ki̱vi̱ ña̱ yáʼa ¿á ndeéka kúi̱ na̱ yiví espiritual? ¿Á táki̱ʼva kéʼé ta̱ Cristo saá kéʼíi̱? Chiñu ña̱ kéʼíi̱ ti̱xin reunión, ¿ndáaña káʼa̱nña xa̱ʼíi̱? Tu̱ʼun ña̱ nátúʼi̱n, ¿ndáaña káʼa̱nña xa̱ʼíi̱? Ki̱ʼva ña̱ káʼvii̱ tu̱ʼun Ndióxi̱, xíʼin ki̱ʼva ña̱ ndíxii̱ ti̱ko̱to̱ á ndásaviíi̱ miíi̱, xíʼin ki̱ʼva ña̱ ndákiʼi̱n consejo, ¿ndáaña káʼa̱n ña̱yóʼo xa̱ʼíi̱? Tá va̱xi iin prueba nu̱úi̱, ¿ndáaña kéʼíi̱? ¿Á xa̱a̱ xa̱ʼnu va̱ʼi̱ xíʼin tu̱ʼun Ndióxi̱ ta ni̱xa̱i̱ ku̱i̱ iin ta̱ cristiano ta̱ xu̱xa?” (Efes. 4:13). Tá ná ndakanixi̱níyó xa̱ʼa pregunta yóʼo chindeéña miíyó ña̱ kunda̱a̱-iniyó á xíniñúʼu kuaʼnukayó xíʼin tu̱ʼun Ndióxi̱.

6. Ña̱ va̱ʼa kuniyó ndáaña kúma̱níka nu̱úyó, ¿ndáaña xíniñúʼu keʼéyó?

⁶ Ña̱ va̱ʼa kuniyó ndáaña kúma̱níka nu̱úyó, sava yichi̱ xíniñúʼu ka̱ʼa̱n inka na̱ hermano xíʼinyó. Ta̱ apóstol Pablo ni̱ka̱ʼa̱nra na̱ yiví na̱ kǒo kúú espiritual kǒo kíʼinna kuenta xíʼin ña̱ kéʼéna ta kǒo kútóo Ndióxi̱ ña̱yóʼo. Soo na̱ yiví espiritual ndákanixi̱nína táki̱ʼva ndákanixi̱ní Ndióxi̱ ta kúndasí nu̱úna ña̱ʼa ña̱ íyo ñuyǐví yóʼo chi kúnda̱a̱-inina ña̱ kúndasí Ndióxi̱ ña̱yóʼo (1 Cor. 2:14-16; 3:1-3). Na̱ anciano ndákanixi̱nína táki̱ʼva ndákanixi̱ní ta̱ Cristo, ta sava yichi̱ kamaní kíʼinna kuenta tá iinna kǒo ndiku̱nna yichi̱ Ndióxi̱. Tá saá ná ndoʼoyó ta ná ka̱ʼa̱n na̱ anciano xíʼinyó, ¿á kundiku̱nyó consejo ña̱ taxina ndaʼa̱yó? Tá ná kundiku̱nyó consejona, kúni̱ kachiña ña̱ kúni̱yó kuukayó na̱ yiví espiritual (Ecl. 7:5, 9).

7. ¿Nda̱chun va̱ʼa kunda̱a̱-iniyó ña̱ su̱ví kuití ña̱ kuxini̱yó xa̱ʼa Biblia kúni̱ kachiña ña̱ kúúyó na̱ yiví espiritual?

⁷ Ná ndakaʼányó chi su̱ví kuití ña̱ kuxini̱yó xa̱ʼa ña̱ Biblia kúni̱ kachiña ña̱ kúúyó na̱ yiví espiritual. Ta̱ rey Salomón xi̱xini̱ va̱ʼara xa̱ʼa Jehová. Nda̱a̱ sava tu̱ʼun ña̱ ni̱ka̱ʼa̱nra ni̱ka̱ʼyi̱ña nu̱ú Biblia. Soo ni̱xa̱a̱ra ke̱ʼéra ña̱ kǒo kútóo Jehová (1 Rey. 4:29, 30; 11:4-6). Ña̱kán, su̱ví kuití ña̱ kuxini̱yó xa̱ʼa ña̱ Biblia ta xa̱a̱ va̱ʼaví chi xíniñúʼu kuaʼnukayó xíʼin tu̱ʼun Ndióxi̱ (Col. 2:6, 7). ¿Ndáa ki̱ʼva keʼéyóña?

8, 9. a) ¿Ndáaña chindeé miíyó ña̱ kuuyó na̱ yiví espiritual? b) ¿Ndáa xa̱ʼa kúú ña̱ káʼviyó tu̱ʼun Ndióxi̱ ta ndákanixi̱níyó xíʼinña? (Koto na̱ʼná ña̱ va̱xi chí xa̱ʼa).

⁸ Ta̱ Pablo ni̱ka̱ʼa̱nra xíʼin na̱ xi̱ndoo tá ya̱chi̱ ña̱ xíniñúʼu chika̱a̱na ndée ña̱ kuaʼnuna xíʼin tu̱ʼun Ndióxi̱ (Heb. 6:1). Saátu vitin xíniñúʼu keʼéyó ña̱ ni̱ka̱ʼa̱n ta̱ Pablo. Xíniñúʼu kaʼviyó  libro“Manténganse en el amor de Dios”. Tá ná kaʼviyóña chindeéña miíyó ña̱ sakuaʼayó keʼékayó ña̱ káʼa̱n tu̱ʼun Ndióxi̱. Tá xa̱a̱ sa̱ndíʼiyó ka̱ʼviyóña, kivitu kaʼviyó inkaka tutu ña̱ kivi chindeé miíyó ña̱ ndakúka koo ña̱ kándíxayó Ndióxi̱ (Col. 1:23). Saátu xíniñúʼu keʼéyó oración nu̱ú Ndióxi̱ ta ná ndakanixi̱níyó ndáa ki̱ʼva keʼéyó ña̱ sákuaʼayó.

⁹ Xa̱ʼa ña̱ kúni̱yó kaʼviyó tu̱ʼun Ndióxi̱ ta ndakanixi̱níyó xíʼin ña̱ káʼviyó kúúña xa̱a̱yó kutáʼan va̱ʼayó xíʼin Jehová ta sakusi̱íyó-inira (Sal. 40:8; 119:97). Ta saátu xíniñúʼu sakuaʼayó kundasí nu̱úyó ña̱ʼa ña̱ kǒo táxi kuaʼnuyó xíʼin tu̱ʼun Ndióxi̱ (Tito 2:11, 12).

10. ¿Ndáaña xíniñúʼu keʼéka na̱ va̱lí ña̱ va̱ʼa xa̱a̱na kuuna na̱ yiví espiritual?

¹⁰ Tá iin ta̱ loʼo kúún á iin ñá loʼo kúún, ¿á xa̱a̱ xíni̱ún ndáa chiñu kúú ña̱ keʼún nu̱ú Jehová? Iin ta̱ hermano ta̱ káchiñu Betel tá xáʼa̱nra asamblea ña̱ circuito nátúʼunra xíʼin na̱ va̱lí na̱ ndakuchi. Ta ndáka̱tu̱ʼunrana ndáa chiñu kúú ña̱ kúni̱na keʼéna nu̱ú Jehová. Tu̱ʼun ña̱ ndákuiin savana yuʼúra náʼa̱ña ña̱ xa̱a̱ káxiní xíni̱na ndáa chiñu kúú ña̱ kúni̱na keʼéna nu̱ú Jehová. Savana kúni̱na kachíñuna ndiʼi tiempo nu̱ú Jehová á ku̱ʼu̱nna inka ñuu nu̱ú kúma̱níka na̱ natúʼun xa̱ʼa Ndióxi̱. Soo savatu íyo na̱ va̱lí na̱ kǒo xíni̱ ndáa chiñu keʼéna nu̱ú Ndióxi̱. ¿Á kúni̱ kachiña ña̱ su̱ví ña̱ ndeéví kúúña nu̱úna ña̱ ndákanixi̱nína xa̱ʼa iin chiñu ña̱ keʼéna nu̱úra? Xa̱ʼa ña̱yóʼo, na̱ va̱lí xíniñúʼu nda̱ka̱tu̱ʼunna miína: “¿Á xáʼi̱n reunión ta kéi̱ nátúʼi̱n xa̱ʼa Ndióxi̱ xa̱ʼa ña̱ káʼa̱n na̱ yivái̱ xíʼi̱n? ¿Á va̱ʼaní kítáʼi̱n xíʼin Jehová?”. Ndiʼiyó, kúúyó na̱ válí á na̱ xa̱a̱ chée, xíniñúʼu chika̱a̱yó ndée ña̱ ndaka̱xinyó iin chiñu keʼéyó nu̱ú Jehová. Ña̱yóʼo chindeé miíyó ña̱ kuaʼnukayó xíʼin tu̱ʼun Ndióxi̱ (Ecl. 12:1, 13).

11. a) ¿Ndáaña xíniñúʼu keʼéyó ña̱ va̱ʼa kuaʼnukayó xíʼin tu̱ʼun Ndióxi̱? b) ¿Ndáana kundiku̱nyó yichi̱?

¹¹ Tá xa̱a̱ na̱kunda̱a̱-iniyó ña̱ kúma̱níka sava ña̱ʼa nu̱úyó keʼéyó, xíniñúʼu chika̱a̱yó ndée xíʼinña. Ña̱ xa̱a̱yó kuuyó na̱ yiví espiritual ndáyáʼviní ña̱yóʼo, chi kivi kuviyó á kutakuyó (Rom. 8:6-8). Ña̱ xa̱a̱yó kuuyó na̱ yiví espiritual va̱ása kúni̱ kachiña ni iinka ki̱vi̱ kǒo keʼéyó ña̱ va̱ása va̱ʼa. Jehová táxira espíritu santo ndaʼa̱yó ña̱ chíndeé táʼanra xíʼinyó. Soo xíniñúʼu chika̱a̱tu miíyó ndée. Xa̱a̱ ku̱a̱ʼá ku̱i̱ya̱ ni̱ka̱ʼa̱n iin ta̱ cuerpo gobernante ta̱ naní John Barr, xa̱ʼa ña̱ káʼa̱n Lucas 13:24 ña̱ sava na̱ hermano ndákavana chi kǒo kíʼin va̱ʼana kuenta xíʼin ña̱ kéʼéna. Xíniñúʼu keʼéyó táki̱ʼva ke̱ʼé ta̱ Jacob, sa̱ndákoora ña̱ ka̱ni táʼanra xíʼin iin ángel nda̱a̱ tá ta̱xi ta̱yóʼo iin bendición ndaʼa̱ra (Gén. 32:26-28). Sana liviníva ña̱ kaʼviyó Biblia. Soo va̱ása va̱ʼa kaʼviyóña táki̱ʼva káʼviyó inka libro ña̱ i̱xava̱ʼa na̱ ñuyǐví, ña̱ ná ya̱ʼa kuití loʼo tiempo nu̱úvayó. Xíniñúʼu nandukú va̱ʼayó xa̱ʼaña, ña̱ va̱ʼa ná kuaʼnukayó xíʼin tu̱ʼun Ndióxi̱.

12, 13. a) ¿Ndáaña chindeé miíyó ña̱ “ndakanixi̱níyó táki̱ʼva nda̱kanixi̱ní ta̱ Cristo”? b) ¿Nda̱saa chíndeé ejemplo ta̱ Pedro miíyó xíʼin consejo ña̱ ta̱xira? c) ¿Ndáaña keʼékayó ña̱ va̱ʼa kuukayó na̱ yiví espiritual? (Koto recuadro “ Ndáaña keʼéyó ña̱ va̱ʼa kuaʼnuyó xíʼin tu̱ʼun Ndióxi̱”).

¹² Tá chíka̱a̱yó ndée ña̱ kuuyó na̱ yiví espiritual, espíritu santo Ndióxi̱ chíndeéña miíyó ña̱ va̱ʼa násamayó ña̱ ndákanixi̱níyó. Loʼo tá loʼo xáa̱yó ndákanixi̱níyó táki̱ʼva ndákanixi̱ní ta̱ Cristo (Rom. 15:5). Espíritu santo yóʼo chíndeétuña miíyó ña̱ sandákooyó ña̱ va̱ása va̱ʼa, ta kixaʼáyó keʼéyó ña̱ va̱ʼa ña̱ kútóo Ndióxi̱ (Gál. 5:16, 22, 23). Tá kíʼinyó kuenta ña̱ kútóoyó ña̱ ku̱i̱ká á ña̱ʼa ña̱ íyo ñuyǐví yóʼo, ná kǒo sandákavayó-iniyó ná chika̱a̱kayó ndée. Ná ndukúkayó espíritu santo, Jehová chindeéra miíyó ña̱ ndakanixi̱níyó xa̱ʼa ña̱ va̱ʼa (Luc. 11:13). Ná ndakaʼányó xa̱ʼa ta̱ apóstol Pedro. Sava yichi̱ va̱ása níkeʼéra tá kéʼé iin na̱ yiví espiritual (Mat. 16:22, 23; Luc. 22:34, 54-62; Gál. 2:11-14). Soo chi̱ka̱a̱níra ndée. Ndióxi̱ chi̱ndeé táʼanra xíʼinra ña̱ loʼo tá loʼo ki̱xaʼára ndákanixi̱níra táki̱ʼva ndákanixi̱ní ta̱ Cristo. Saátu kivi keʼé miíyó.

 ¹³ Ni̱ya̱ʼa tiempo ta̱ Pedro ni̱ka̱ʼa̱nra xa̱ʼa ña̱ xíniñúʼu kuumiíyó tá kúú ña̱ ka̱ʼnu̱ xíʼin miíyó, ndakú ná koo iniyó, ña̱ kuni̱yó kuni táʼanyó (kaʼvi 2 Pedro 1:5-8). * Tá ná chika̱a̱yó ndée ña̱ kuumiíyó ña̱yóʼo, saá kúú ña̱ kuaʼnukayó xíʼin tu̱ʼun Ndióxi̱. Va̱ʼaní tá ndiʼi ki̱vi̱ ná nda̱ka̱tu̱ʼunyó miíyó: “¿Ndáaña kivi keʼíi̱ ki̱vi̱ vitin ña̱ kuukai̱ na̱ yiví espiritual?”.

14. ¿Nda̱saa chindeéña miíyó tá ná kuuyó na̱ yiví espiritual?

¹⁴ Tá ndákanixi̱níyó táki̱ʼva ndákanixi̱ní ta̱ Cristo chindeéña miíyó ti̱xin escuela, xíʼin tu̱ʼun ña̱ káʼa̱nyó xíʼin ña̱ ndaka̱xinyó keʼéyó ki̱vi̱ tá ki̱vi̱. Xíʼin ña̱yóʼo na̱ʼa̱yó ña̱ ndixa ndíku̱nyó ta̱ Cristo. Tá kúúyó na̱ yiví espiritual va̱ása taxiyó ni iin ña̱ʼa sákuxika miíyó nu̱ú Jehová. Tá kíxaʼá kúni̱yó keʼéyó ña̱ va̱ása va̱ʼa ndi̱ku̱n kama ndakaʼányó ña̱ xíniñúʼu kundasí nu̱úyóña. Tá ndáka̱xinyó keʼéyó iin ña̱ʼa, xíniñúʼu nda̱ka̱tu̱ʼunyó miíyó: “¿Ndáa texto kúú ña̱ kivi chindeé yi̱ʼi̱ ña̱ va̱ʼa ndaka̱xi̱n ndáaña keʼíi̱? ¿Ndáaña keʼé ta̱ Cristo tá saá ná ndoʼora? Ña̱ ndaka̱xi̱n keʼíi̱, ¿á sakusi̱íña-ini Jehová?”. Saá kúú ña̱ xíniñúʼu sakuaʼayó ndakanixi̱níyó. Ná ka̱ʼa̱nyó xa̱ʼa sava ejemplo. Xíʼin iin iin ña̱yóʼo ka̱ʼa̱nyó xa̱ʼa iin texto ña̱ kivi chindeé miíyó ña̱ ndaka̱xinyó ndáaña keʼéyó.

15, 16. Ka̱ʼa̱n xa̱ʼa sava ejemplo, nda̱saa chíndeéña miíyó ña̱ ndakanixi̱níyó táki̱ʼva ndákanixi̱ní ta̱ Cristo: a) tá ndaka̱xinyó na̱ tindaʼa̱ xíʼinyó; b) tá ndaka̱xinyó na̱ kutáʼan xíʼinyó.

¹⁵ Tá ndaka̱xinyó na̱ tindaʼa̱ xíʼinyó. Ña̱ kivi chindeé táʼan xíʼinyó kúú 2 Corintios 6:14, 15 (kaʼviña). * Ña̱ ni̱ka̱ʼa̱n ta̱ Pablo náʼa̱ káxiña nu̱úyó ña̱ va̱ása va̱ʼa tindaʼa̱yó xíʼin na̱ yiví na̱ kǒo kéʼé ña̱ káʼa̱n Ndióxi̱. ¿Ndáaña keʼéyó ña̱ va̱ʼa kundiku̱nyó consejo yóʼo tá ndaka̱xinyó na̱ tindaʼa̱ xíʼinyó?

¹⁶ Tá ndaka̱xinyó na̱ kutáʼan xíʼinyó. Ná kotoyó ña̱ káʼa̱n 1 Corintios 15:33 (kaʼviña). * Na̱ yiví na̱ kúú espiritual va̱ása kítáʼanna xíʼin na̱ yiví na̱ sákuxíka miína nu̱ú Ndióxi̱. Ná ndakanixi̱níyó nda̱saa va̱ʼa kuniñúʼuyó ña̱ káʼa̱n texto yóʼo. Tá kúú tá ndaka̱xinyó kuniñúʼuyó Internet á tá káʼa̱n iin na̱ yiví na̱ va̱ása xíniyó ña̱ kusíkíyó xíʼinna nu̱ú Internet.

17-19. a) ¿Ndáaña kǒo keʼéyó tá kúúyó na̱ yiví espiritual? b) ¿Ndáaña kundi̱ʼi̱ka-iniyó xa̱ʼa tá kúúyó na̱ yiví espiritual? c) Xa̱ʼa ña̱ kúúyó na̱ yiví espiritual, ¿nda̱saa chíndeé ña̱yóʼo miíyó tá káku ku̱a̱chi xíʼin iinna?

¹⁷ Chiñu ña̱ kǒo táxi kuaʼnuyó xíʼin tu̱ʼun Ndióxi̱. Ña̱ ni̱ka̱ʼa̱n ta̱ Pablo xíʼin na̱ xi̱ndoo xi̱naʼá, íyo iin ña̱ʼa sánáʼa̱ña miíyó Hebreos 6:1 (kaʼviña). * Tá ni̱ka̱ʼa̱n ta̱ Pablo ña̱ “ná kǒo ndikóyó  keʼéyó ña̱ xa̱a̱ sa̱ndákooyó” kúni̱ kachiña ná kǒo keʼéyó ña̱ kǒo chindeé miíyó ña̱ kuaʼnuyó xíʼin tu̱ʼun Ndióxi̱. Ña̱yóʼo kivi chindeéña miíyó ña̱ ndakuiinyó sava ña̱ ndáka̱tu̱ʼunyó miíyó: “¿Á chíndeé loʼo chiñu ña̱ kéʼíi̱ yóʼo yi̱ʼi̱, á ña̱ sándiʼi-xa̱ʼaka yi̱ʼi̱va kúúña? ¿Á va̱ʼa kachíñui̱ chiñu yóʼo ña̱ va̱ʼa koo ku̱a̱ʼáka xu̱ʼúi̱n? ¿Nda̱chun va̱ása ndakitáʼi̱n xíʼin na̱ xíka nu̱ú ku̱a̱chi na̱ kúni̱ nduvií ñuyǐví yóʼo?”.

¹⁸ Chiñu ña̱ kivi keʼéyó nu̱ú Ndióxi̱. Chí nu̱ú iin yuku̱ ni̱ka̱ʼa̱nndosó ta̱ Jesús ta ni̱ka̱ʼa̱nra ña̱ xíniñúʼuní kundi̱ʼi̱-iniyó xa̱ʼa chiñu Ndióxi̱ (Mat. 6:33). Na̱ yiví na̱ kúú espiritual siʼnaka chiñu Ndióxi̱ ndíʼi̱-inina xa̱ʼa. Tá ná ndakanixi̱níyó xa̱ʼa ña̱ káʼa̱n texto yóʼo, kivi chindeéña miíyó ña̱ ndaka̱xinyó ndáaña keʼéyó: “¿Á ku̱ʼu̱nyó kaʼvi va̱ʼayó iin escuela á va̱ása ku̱ʼu̱nyó? ¿Á ki̱ʼviyó iin chiñu kachíñuyó á va̱ása ki̱ʼviyó?”.

¹⁹ Tá kǒo kíndo̱o-iniyó xíʼin ña̱ kéʼé inkana. Iin ña̱ kivi chindeé miíyó tá káku ku̱a̱chi xíʼin inkana kúú consejo ña̱ ta̱xi ta̱ Pablo ndaʼa̱ na̱ congregación ñuu Roma (Rom. 12:18). Miíyó na̱ ndíku̱n ta̱ Cristo chíka̱a̱yó ndée ʻña̱ va̱ʼa kutáʼanyó xíʼin ndiʼi na̱ yivíʼ. ¿Ndáaña keʼéyó tá káku ku̱a̱chi xíʼin iinna? ¿Á íxayo̱ʼvi̱ña xíʼinyó ña̱ nandosóyó xa̱ʼa ña̱ ke̱ʼéna xíʼinyó? ¿Á ndiʼina xíni̱ miíyó ña̱ va̱ʼa íxakáʼnu-iniyó xa̱ʼa inkana? (Sant. 3:18).

20. ¿Nda̱chun kúni̱kaún kuaʼnún xíʼin tu̱ʼun Ndióxi̱?

²⁰ Táki̱ʼva náʼa̱ ejemplo ña̱ xi̱niyó yóʼo, tá ná ndakanixi̱níyó xa̱ʼa ña̱ káʼa̱n tu̱ʼun Ndióxi̱, chindeéña miíyó ña̱ va̱ʼa ndaka̱xinyó ña̱ keʼéyó ta xíʼin ña̱yóʼo na̱ʼa̱yó ña̱ kúúyó na̱ yiví espiritual. Ta chindeétuña miíyó ña̱ si̱íka kooyó. Ta̱ Robert, ta̱ xa̱a̱ ni̱ka̱ʼa̱nyó xa̱ʼa nu̱ú artículo yóʼo, káchira: “Tá ki̱xaʼíi̱ va̱ʼaka kítáʼan xíʼin Jehová, va̱ʼaka ki̱xaʼá chíndeé táʼi̱n xíʼin ñá síʼíi̱ xíʼin na̱ va̱lí se̱ʼi̱. Ta vitin kúsi̱íní-inii̱”. Ku̱a̱ʼánítu ña̱ va̱ʼa ndakiʼin miíyó tá ná chika̱a̱yó ndée ña̱ kuaʼnuyó xíʼin tu̱ʼun Ndióxi̱. Si̱íní kundooyó tiempo vitin ta chí nu̱únínu xa̱a̱yó kutakuyó ndiʼi tiempo (1 Tim. 6:19).