1, 2. 1) ¿Toni kiitak se tokniuj ke monekia kichiuas? 2) ¿Keniuj kiyektalij kuejmol tein kipiaya?

ROBERT moauij keman kipiaya 15 xiujmej, sayoj ke amo kitayekanaltiaya tamachtilis tein melauak. Yejua kijtoua: “Amo keman nikchiuak teisa tein amo kuali, sayoj ke niktekitiliaya Jiova porin ijkon nimomattoya. Moitaya ke kuali nimouikaya iuan Dios, porin niyaya nochi nechikolmej uan nimochiuaya niprecursor auxiliar miakpa itech xiuit. Sayoj ke teisa nechpolouaya”.

² Kiajsikamatik kuejmol tein kipiaya hasta keman monamiktij. Kemansa, inamik uan yejua mochiuiliayaj netajtanilmej ika tein Biblia tamachtia. Inamik kuali kiixmatia Biblia uan niman kinankiliaya. Sayoj ke Robert miakpa amo kimatia tanankilil uan mopinaujmatia. Yejua ika kinemilij: “Komo nikixyekanati nonamik itech totaueyichiualis, moneki nikchiuas teisa”. Uan ijkon kichiuak. Peuak motelmachtia Biblia uan okachi kiajsikamatik. Nejin kipaleuij maj okachi kiajsikamatini tamachtilis tein melauak, uan tein okachi moneki, maj kipia se kuali uikalis iuan Jiova.

3. 1) ¿Toni techmachtia tein kipanok Robert? 2) ¿Toni netajtanilmej tiknankiliskej?

³ Tein kipanok Robert techmachtia miak taman tein motelneki. Xa tepitsin tikixmatij tein Biblia tamachtia, tiyouij nochi nechikolmej uan titanojnotsaj. Sayoj ke nejin amo kijtosneki ke  chikauak tokuali uikalis iuan Dios. Xa no timochikaujkej okachi titanemiliskej kemej Jiova, sayoj ke komo tikitaj tein tikchiujtokej, xa tikajsikamatiskej ke moneki okachi tikyekchiuaskej teisa (Filip. 3:16). Itech nejin tamachtilis, tiknankiliskej eyi netajtanilmej tein motelnekij. Yekinika, ¿toni techpaleuis maj tikmatikan ox chikauak tokuali uikalis iuan Dios? Ojpatika, ¿keniuj uelis okachi tikchikauaskej totakuaujtamatilis uan timotokiskej iuan Dios? Uan expatika, ¿keniuj techpaleuis mojmostaj komo chikauak tokuali uikalis iuan Dios?

4. ¿Akonimej moneki kitakamatiskej tein kijtoua Efesios 4:23, 24?

⁴ Keman peuak tiktekitiliaj Dios, tikpatakej miak taman. Uan satepan ke timoauijkej tiksentokaj timopataj. Biblia kijtoua: “Moneki ximoyankuikatalijtiyakan [...] tech namotanemililisuan” (Efes. 4:23, 24). Itech Biblia, tajtol griego “ximoyankuikatalijtiyakan” kinextia ke nejin se taman tein se kisentoka se kichiua. Kemej titajtakouanij, tinochin moneki tiksentokaskej timopatatoskej. Hasta akin miak xiujmejya kitekitilijtokej Jiova moneki kisentokaskej kichikaujtoskej inintakuaujtamatilis (Filip. 3:12, 13).

5. ¿Toni netajtanilmej uelis techpaleuiskej maj tikitakan ox chikauak tokuali uikalis iuan Dios?

⁵ Tiyeskij titelpochmej oso tiuejueykejya, tinochin moneki tikitaskej tein tikchiujtokej. Maj timotajtanikan: “¿Nikita ke okachi chikauak nokuali uikalis iuan Dios? ¿Okachi nitanemilia kemej Cristo? ¿Toni kinextia tein nikchiua itech nechikolmej? ¿Toni kinextia tein nikijtoua ika tein yekmelauj niktayekanaltia? ¿Keniuj kinextia keniuj yekmelauj nitanemilia kemej nimomachtia, kemej nimotilmajtia uan nimochijchiua, uan kemej nitanankilia keman nechyolmajxitiaj? ¿Toni nikchiua keman nimoajsi kampa uelis nikchiuas tein amo kuali? ¿Niknextia ke niyekyolmajsitok?” (Efes. 4:13). Nejin netajtanilmej uelis techpaleuiskej maj tikitakan ox okachi chikauak tokuali uikalis iuan Dios.

6. ¿Toni no uelis techpaleuis maj tikmatikan ox chikauak tokuali uikalis iuan Dios?

⁶ Kemansa moneki maj okseki tokniuan techpaleuikan maj tikitakan ox chikauak tokuali uikalis iuan Dios. Tatitanil Pablo kijtoj ke akin kitayekanaltia itanejnekilis amo kiita ke itachiualisuan amo kiyolpaktiaj Dios. Sayoj ke, akin mokaua maj yektikatsin espíritu kiixyekana kiita teisa kemej Dios kiita uan kimati ke yejuatsin amo kiyolpaktia maj se kitayekanalti se itanejnekilis (1 Cor. 2:14-16, TNM; 3:1-3). Kemej tayekananij kipiaj itanemilil Cristo, miakpa niman kiitaj keman tokniuan peua monejnemiltiaj kemej akin kitayekanaltiaj inintanejnekilis. Komo tejuan techpanoskia nejin uan tayekananij kitemoskiaj techpaleuiskej, ¿tikchiuaskiaj tein techyolmajxitiaj? Komo tikintakamatij tiknextiskej ke tiknekij okachi titanemiliskej kemej Jiova (Ecl. 7:5, 9).

7. ¿Keniuj tikmatij ke amo sayoj moneki tikmatiskej toni tamachtia Biblia uan ijkon mochikauas tokuali uikalis iuan Dios?

⁷ Amo sayoj moneki tikmatiskej toni tamachtia Biblia uan ijkon mochikauas tokuali uikalis iuan Dios. Tekiuaj Salomón kuali kiixmatia Jiova. Hasta seki taman tein kijtoj moajsi itech Biblia. Sayoj ke satepan kikauak Jiova (1 Rey. 4:29, 30; 11:4-6). Yejua ika, amo sayoj moneki tikmatiskej toni tamachtia Biblia, ta no moneki maj mochikaujtiuj totakuaujtamatilis (Col. 2:6, 7). ¿Keniuj uelis tikchiuaskej?

8, 9. 1) ¿Toni techpaleuis maj okachi mochikaua totakuaujtamatilis? 2) ¿Toni moneki tiktemoskej keman timomachtiaj uan titanemiliaj? (Xikonita taixkopimej ipeujyan tamachtilis.)

⁸ Itech yekinika siglo, Pablo kiniluij tokniuan  ke monekia mochikauaskej yekyolmajsitoskej (Heb. 6:1). Axkan no moneki tikchiuaskej tein kijtoj. Yejua ika, motelneki maj timomachtikan amatajkuilol “Xiksentokakan itech inetasojtalis Dios”. Nejin techpaleuis maj tikitakan keniuj tikuiskej itech tonemilis tein Biblia tayolmajxitia. Komo timomachtijkejya, uelis timomachtiskej okseki amaixmej tein techpaleuiskej maj mochikaua totakuaujtamatilis (Col. 1:23). Uan no, moneki tiktataujtiskej Jiova uan tiknemiliskej keniuj uelis tikchiuaskej tein timomachtiaj.

⁹ Keman timomachtiaj uan titanemiliaj, moneki tiktemoskej tiknekiskej tikyolpaktiskej uan tiktakamatiskej Jiova (Sal. 40:8; 119:97). Uan no, techpaleuia maj tikixtopeuakan tein techtsakuilia maj okachi mochikaua tokuali uikalis iuan (Tito 2:11, 12).

10. ¿Toni kinpaleuis telpochmej maj mochikaua ininkuali uikalis iuan Jiova?

¹⁰ Komo titelpoch oso tiichpoch, ¿tikixtalijtok okachi tiktekitilis Jiova? Se tokniuj takat akin tekiti Betel momattok tajtos iniuan telpochmej uan ichpochmej akin moauitij itech uejueyi nechikolmej tein uejkauaj se tonal. Kintajtania toni kiixtalijtokej kichiuaskej itech itekiyo Dios. Tein miakej kinankiliaj kinextia ke senkis kimatij toni kinekij kichiuaskej. Sekin kinekij kitekitiliskej Jiova miak tonalmej oso tapaleuitiuij kampa monekij okachi tanojnotsanij. Sayoj ke kemansa sekin amo kimatij toni kinankiliskej. Nejon xa panoua porin kinemiliaj ke amo moneki kiixtaliskej okachi kitekitiliskej Jiova. Yejua ika, telpochmej uan ichpochmej moneki motajtaniskej: “¿Niyouj nechikolmej uan nitanojnotsati porin yejua nejon kinekij notatuan maj nikchiua? ¿Oso nikpia se kuali uikalis iuan Jiova?”. Melauak ke tinochin moneki tikixtaliskej okachi tiktekitiliskej Jiova, yeski titelpochmej oso tiuejueykejya. Nejin techpaleuis maj okachi mochikaua totakuaujtamatilis (Ecl. 12:1, 13).

11. 1) ¿Keniuj uelis okachi tikchikauaskej tokuali uikalis iuan Jiova? 2) ¿Kemej akoni akin ika motajtoua itech Biblia uelis tikchiuaskej?

¹¹ Satepan ke tikitakejya toni okachi uelis tikyekchiuaskej, moneki tipeuaskej tikpataskej tein monekis. Nejin motelneki porin uelis kichiuas maj tinemikan oso maj timomikilikan (Rom. 8:6-8). Jiova amo kichia maj senkis amo titajtakokan, uan techmaka iyektikatsin espíritu tein techpaleuia. Maski ijkon, moneki timochikauaskej. Tokniuj John Barr, akin pouik iniuan Oloch Taojtokaltianij, ika tajtoj Lucas 13:24 uan kijtoj ke miakej tokniuan kikauaj Jiova “porin amo mochikauaj”. Moneki tiyeskij kemej Jacob, akin kisentokak mochijchikauak iuan se ángel hasta ke kitatiochiuij (Gén. 32:26-28). Uelis semi teyolpaktis se momachtis Biblia. Sayoj ke moneki amo tikixtajtoltiskej kemej se amatajkuilol tein moijkuiloj maj ika timoixpetanikan. Moneki timochikauaskej tiktemoskej kualtsitsin tamachtilis tein techpaleuis.

12, 13. 1) ¿Toni techpaleuis maj titanemilikan kemej Cristo? 2) ¿Keniuj techpaleuia ineskayo Pedro uan tein tayolmajxitij? 3) ¿Keniuj uelis okachi tikchikauaskej tokuali uikalis iuan Dios? (Xikonita kampa kijtoua “ Keniuj uelis tikchikauaskej tokuali uikalis iuan Dios”.)

¹² Keman timochikauaj okachi titanemiliskej kemej Jiova, yektikatsin espíritu techpaleuia maj tikpatakan kemej titanemiliaj. Ijkon, yolik peua okachi titanemiliaj kemej Cristo (Filip. 2:5). Uan no, yektikatsin espíritu techpaleuia maj timoijkuanilikan toamo kuali tanejnekilis uan maj tikpiakan kualneskayomej tein kiyolpaktiaj Dios (Gál. 5:16, 22, 23). Komo tikitaj ke tiktayekanaltiaj timotomintiskej oso timoyolpaktiskej, maj amo timosenkauakan. Maj tiksentokakan tiktajtanikan Jiova iyektikatsin espíritu, uan yejuatsin techpaleuis maj itech  titanemilikan tein okachi tayekantok (Luc. 11:13). Maj tikelnamikikan tein kipanok tatitanil Pedro. Yejua amo nochipa tanemilij kemej Cristo (Mat. 16:22, 23; Luc. 22:34, 54-62; Gál. 2:11-14). Sayoj ke amo mosenkauak. Ika inepaleuil Dios, yolik peuak tanemilia kemej Cristo. Uan tejuan no uelis tikchiuaskej.

¹³ Pedro ika tajtoj seki kualneskayomej tein moneki tikpiaskej, kemej timotsakuiliskej uan titetasojtaskej (xikonixtajtolti 2 Pedro 1:5-8). Moneki timochikauaskej tikpiaskej nejin kualneskayomej tein techpaleuiskej maj kisentoka mochikaua tokuali uikalis iuan Jiova. Maj mojmostaj timotajtanikan: “¿Toni kualneskayot uelis nimochikauas niknextis axkan tein nechpaleuis maj okachi nitanemili kemej Jiova?”.

14. ¿Keniuj techpaleuis komo titanemiliaj kemej Cristo?

¹⁴ Komo titanemiliaj kemej Cristo techpaleuis kemej titajtouaj, kemej timonejnemiltiaj kampa titekitij oso kampa timomachtiaj uan kemej titaixpejpenaj mojmostaj. Nejin kinextis ke timochikauaj tikchiuaskej kemej Cristo. Komo tikpiaj itanemilil, amo tikauaskej maj nion teyi kijtako tokuali uikalis iuan Jiova. Keman timoajsiskej kampa uelis tikchiuaskej tein amo kuali, tokuali uikalis iuan Jiova techpaleuis maj tikixtopeuakan. Uan keman titaixpejpenaskej, timotajtaniskej nejin: “¿Toni tayolmajxitilis tein kitemaka Biblia uelis nechpaleuis? ¿Toni kichiuaskia Cristo itech nejin taman? ¿Toni kiyolpaktis Jiova?”. Moneki nochipa ijkon titanemiliskej. Maj tikitakan seki taman tein uelis tikpanoskej. Itech sejse taman, tikijtoskej se tayolmajxitilis tein kitemaka Biblia tein uelis techpaleuis maj kuali titaixpejpenakan.

15, 16. Xikonijto keniuj techpaleuia komo titanemiliaj kemej Cristo keman tikixpejpenaj: 1) akin iuan timonamiktiskej; 2) akin yeskij totasojikniuan.

¹⁵ Keman tikixpejpenaskej akin iuan timonamiktiskej. Tayolmajxitilis tikajsij itech 2 Corintios 6:14, 15 (xikonixtajtolti). Pablo senkis kiteajsikamatiltij ke aksa akin kuali mouika iuan Jiova amo uelis moajsis iuan aksa akin kitayekanaltia itanejnekilis. ¿Keniuj nejin tayolmajxitilis uelis techpaleuis keman tikixpejpenaskej akin iuan timonamiktiskej?

¹⁶ Keman tikinixpejpenaskej totasojikniuan. Tayolmajxitilis moajsi itech 1 Corintios 15:33 (xikonixtajtolti). Akin kuali mouikaj iuan Jiova amo mochiuaskej inintasojikniuan akin uelis kichiuaskej maj amo takuaujtamatikanok. Maj tiknemilikan keniuj uelis tiktakamatiskej nejin tayolmajxitilis itech miak taman. Kemej neskayot: “¿Keniuj nechpaleuia maj nikixpejpena keniuj nikuis redes sociales? ¿Toni moneki nikchiuas komo aksa akin amo nikixmati nechyoleua maj iuan nimauilti itech Internet?”.

17-19. 1) ¿Toni amo tikchiuaskej komo kuali timouikaj iuan Dios? 2) ¿Toni tikixtaliskej tikchiuaskej komo kuali timouikaj iuan Dios? 3) ¿Keniuj techpaleuia tokuali uikalis iuan Dios keman tikpiaj se kuejmol iuan aksa?

¹⁷ Tein kijtakoua tokuali uikalis iuan Dios. Tikajsij se tayolmajxitilis tein motelneki itech Hebreos 6:1 (xikonixtajtolti). Itech nejin tajkuilol Pablo kiteajsikamatiltij ke moneki tikixtopeuaskej tachiualismej tein  amo techpaleuiaj maj okachi tikchikauakan tokuali uikalis iuan Dios. Nejin tanejmachtilis uelis techpaleuis maj tiknankilikan netajtanilmej kemej nejin: “¿Nechpaleuia nejin tachiualis, oso senkis amo teyi ika tapaleuia? ¿Monekiskia nikselis nejin tekit uan ijkon niktanis okachi tomin? ¿Keyej moneki amo nipouis iniuan se oloch taltikpakneminij akin kitemouaj kiyektaliskej tein mochiujtok itech taltikpak?”.

¹⁸ Tikixtaliskej okachi tiktekitiliskej Dios. Keman Jesús tamachtij itech se tepet, kuali techyolmajxitij toni moneki tikixtaliskej tikchiuaskej (Mat. 6:33, TNM). Akin chikauak ikuali uikalis iuan Dios kitayekanaltia Tekiuajyot. Tikelnamikiskej nejin tayolmajxitilis techpaleuia maj tikixpejpenakan seki taman kemej nejin: “¿Nikselis okachi ueyi tamachtilis? ¿Nikselis nejin tekit?”.

¹⁹ Keman tikpiaj se kuejmol iuan aksa. Se taman tein techpaleuia keman tikpiaj se kuejmol iuan aksa yejua tein Pablo tayolmajxitij itech nechikol tein moajsia Roma (Rom. 12:18). Tiitatojtokakauan Cristo timochikauaj kuali timouikaskej iniuan nochin. ¿Toni tikchiuaj keman tikpiaj se kuejmol iuan aksa? ¿Ouij techkisa tikakiskej tein kijtoua, oso techixmatij porin tiktemouaj kuali timouikaskej iniuan oksekin? (Sant. 3:18.)

20. ¿Keyej tikonneki tikonsentokas tikonkauas maj mitsonixyekana yektikatsin espíritu?

²⁰ Nejin neskayomej kinextiaj keniuj tein Biblia tayolmajxitia uelis techpaleuis maj tikixpejpenakan tein kinextis ke techixyekana iyektikatsin espíritu Dios. Nejin techpaleuia maj okachi tiyolpakikan. Robert, akin ika titajtojkej ipeujyan nejin tamachtilis, kijtoua ke keman yekmelauj kipiak se kuali uikalis iuan Jiova, kipaleuij maj okachi kuali kichiuani tekit kemej tepopaj uan maj okachi kuali kiixyekanani inamik. Nejon kichiua maj semi yolpaki. No tikseliskej tatiochiualismej kemej nejon komo tiktayekanaltiaj tikchikauaskej tokuali uikalis iuan Dios. Tiyolpakiskej axkan, uan satepan tikseliskej “ne ten melau nemilis” (1 Tim. 6:19).