1, 2. (2) ¿Tlen okipoloaya se tokni? (2) ¿Tlen okichi?

SE TOKNI tlen itoka Robert omoapolakti ijkuak okatka telpochtli, pero amo okachi okipatioitaya iTlajtol toTajtsin Dios. Tokni okijto: “Amo keman onikchi tlen amo kuali pero oniktekichiuiliaya Jehová san porque ijkon omonekiaya nikchiuas. Omotaya onikpiaya chikauak notlaneltokilis porque nochipa onimonechikoaya uan miak uelta onimochiuaya precursor auxiliar. Pero itlaj onechpoloaya”.

² Tokni Robert okajsikamatki tlen okipoloaya ijkuak omonamikti. Ualeua ye uan isiua omotlajtlaniayaj seki tlamantli itech Biblia. Isiua okipiaya chikauak itlaneltokilis uan okimatiaya tlen tlanankilis. Pero Robert opinauaya porque amo keman kuali otlanankiliaya. Tokni okijto: “Moneki itlaj nikchiuas tla ne nikyekanas nosiua ma kipia chikauak itlaneltokilis”. Uan ijkon okichi. Okijto: “Opejki nimomachtia Biblia uan opejki kuali nitlanankilia ijkuak itlaj onechtlajtlaniaya”. Non okipaleui ma kajsikamati tlen kijtoa Biblia uan kuali ma mouika iuan Jehová.

3. (1) ¿Tlen techmachtia tlen okipanok tokni Robert? (2) ¿Tlen timomachtiskej?

³ Tlen okipanok tokni Robert techmachtia seki tlamantli  tlen miak ipati. Xamo tiktlajtoltiaj Biblia, timonechikoaj uan titetlapouiaj. Pero non amo kijtosneki tikpiaj chikauak totlaneltokilis. Xamo timochijchikauaj pero tla kuali timokuayejyekoskej kox tikpiaj chikauak totlaneltokilis, techpaleuis ma tikitakan tlen techpoloa (Filip. 3:16, Itlajtol totajtzin Dios, NHY). Timomachtiskej eyi tlajtlanilmej uan ninmej techpaleuiskej ma tikitakan kox tikpiaj chikauak totlaneltokilis: “¿Ken tikmatiskej kox tikpiaj chikauak totlaneltokilis? ¿Tlen tikchiuaskej para tikpiaskej okachi chikauak totlaneltokilis? ¿Ken techpaleuis tla tikpiaskej okachi chikauak totlaneltokilis?”.

4. ¿Akinmej moneki kichiuaskej tlen kijtoa Efesios 4:23, 24?

⁴ Ijkuak opejki tiktekichiuiliaj toTajtsin Dios otikpatlakej miak tlamantli itech tonemilis. Uan ok ijkon tikchiuaj maski yotimoapolaktijkej. Biblia kijtoa: “Xikyankuilikah nomoixtlamatilis ika nomoespíritu” (Efes. 4:23, 24). Ika tlajtoli griego “xikyankuilikah” kijtosneki nochipa ijkon tikchijtoskej. Ken titlajtlakolejkej moneki nochipa tikpatlaskej toyelis. Akinmej yikipiaj miak xiuitl kitekichiuilijtokej Jehová moneki kitaskej kox kipiaj chikauak intlaneltokilis (Filip. 3:12, 13).

5. ¿Tlen tlajtlanilmej techpaleuiskej ma tikmatikan kox tikpiaj chikauak totlaneltokilis?

⁵ Maski yimiak xiuitl tikpiaj noso amo, tinochtin moneki tikitaskej kox tikpiaj chikauak totlaneltokilis. Ma timotlajtlanikan: “¿Nikpia okachi chikauak notlaneltokilis? ¿Okachi nikpia noyelis ken Cristo? ¿Kox nitetlakaita ijkuak nimonechikoa? ¿Tlen nechpaktia itech nimotlapouis? ¿Nimomachtia, nimotlakentia uan nimoyektlalia ken moneki? ¿Nikselia ijkuak nechnojnotsaj? ¿Nikixtopeua tlen amo kuali? ¿Nikpia chikauak notlaneltokilis?” (Efes. 4:13). Ninmej tlajtlanilmej techpaleuiskej ma tikmatikan kox moneki tikpiaskej okachi chikauak totlaneltokilis.

6. ¿Tlen okseki techpaleuis ma tikmatikan kox tikpiaj chikauak totlaneltokilis?

⁶ Ualeua monekis ma techpaleuikan tokniuan ma tikitakan kox tikpiaj chikauak totlaneltokilis. Tlatitlanil Pablo okijto akin amo kipia chikauak itlaneltokilis amo kita kox kiyolpaktia toTajtsin Dios tlen kichiua. Pero akin kipia chikauak itlaneltokilis kita nochi tlamantli ken toTajtsin Dios kita uan amo kichiua tlen amo kuali (1 Cor. 2:14-16, NHY; 3:1-3). Tlayekankej mokuayejyekoaj ken Cristo, ik non, san niman kitaj akin amo kipia chikauak itlaneltokilis. Tla ijkon techpanos uan tlayekankej kinekiskej techpaleuiskej, ¿tikchiuaskej tlen techiluiskej? Tla tikintlakamatiskej, tikteititiskej tiknekij tikpiaskej okachi chikauak totlaneltokilis (Ecl. 7:5, 9).

7. ¿San moneki tikmatiskej tlen kijtoa Biblia para tikpiaskej chikauak totlaneltokilis?

⁷ Para tikpiaskej chikauak totlaneltokilis amo san moneki tikmatiskej tlen kijtoa Biblia. Ueyi tekiua Salomón okixmatiaya Jehová. Seki tlamantli tlen okijto Salomón poui itech Biblia. Pero satepan okika Jehová (1 Rey. 4:29, 30; 11:4-6). Ik non, amo san moneki tikmatiskej tlen kijtoa Biblia para tikpiaskej chikauak totlaneltokilis (Col. 2:6, 7). ¿Tlen techpaleuis?

8, 9. (1) ¿Tlen techpaleuis ma tikpiakan chikauak totlaneltokilis? (2) ¿Tlen moneki tikilnamiktoskej ijkuak timomachtiskej? (Xikita tlaixkopinal tlen ika peua tlamachtil).

⁸ Pablo okinmilui tokniuan tlen okatkaj itech achto siglo ma kipiakan chikauak intlaneltokilis.  Okinmilui ‘mamoskaltikah itech intlaneltokalis’ (Heb. 6:1). Axkan noijki moneki tikchiuaskej tlen okijto Pablo. Ik non, moneki ma timomachtikan amochtli “Xiyetokan itech itlasojtlalis toTajtsin Dios”. Nin amochtli techpaleuis ma timoyekanakan ika principios bíblicos. Tla yotimomachtijkej, ma timomachtikan okseki amatlajkuilolmej tlen techpaleuiskej ma tikpiakan chikauak totlaneltokilis (Col. 1:23). Noijki moneki ma timotlatlaujtikan uan ma timokuayejyekokan itech tlen timomachtiaj uan ma tikchiuakan itech tonemilis.

⁹ Ijkuak timomachtiskej ma tikilnamikikan tikchiuaj porque tiknekij ika nochi toyolo tikyolpaktiskej uan tiktlakamatiskej Jehová (Sal. 40:8; 119:97). Noijki tikixtopeuaskej tlen amo techpaleuia uan ijkon tikpiaskej chikauak totlaneltokilis (Tito 2:11, 12).

10. ¿Tlen moneki kichiuaskej telpokamej uan ichpokamej para kipiaskej chikauak intlaneltokilis?

¹⁰ Tla ok titelpochtli noso tiichpochtli, ¿tikneki okachi tiktekichiuilis Jehová? Se tokni tlen tekiti Betel, kijtoa ijkuak yaui ueyi nechikol de circuito nochipa motlapouia iuan telpokamej uan ichpokamej tlen moapolaktiskej uan kintlajtlania kox kinekij okachi kitekichiuiliskej Jehová. Tlen sekimej kinankiliaj kiteititia kinekij okachi kitekichiuiliskej Jehová. Sekimej kijtoaj okachi tetlapouiskej noso tlapaleuiskej kanin okachi moneki. Pero sekimej amo kimatij tlen kijtoskej. ¿Kijtosneki amo mokuayejyekoaj ken uelis okachi kitekichiuiliskej Jehová? Ik non, telpokamej uan ichpokamej ximotlajtlanikan: “¿Nimonechikoa uan nitetlapouia san porque notatajuan kinekij ijkon ma nikchiua? ¿Noso kuali nimouika iuan Jehová?”. Tinochtin moneki okachi tiktekichiuiliskej Jehová, maski yitikpiaj miak xiuitl noso amo. Nin techpaleuis ma tikpiakan okachi chikauak totlaneltokilis (Ecl. 12:1, 13).

11. (1) ¿Tlen tikchiuaskej para tikpiaskej chikauak totlaneltokilis? (2) ¿Akin ijkon okichi uan ken techpaleuis?

¹¹ Ijkuak yotikmatkej tlen techpoloa, moneki san niman ma tikchiuakan. Ijkon ma tikchiuakan porque ijkon uelis tiyoltoskej noso timikiskej (Rom. 8:6-8). Tikpiaskej chikauak totlaneltokilis amo kijtosneki amo tikchiuaskej tlen amo kuali. Jehová techpaleuia ika iespíritu santo pero moneki timochijchikauaskej. Yikipia seki xiuitl tokni John Barr akin opouiaya itech Cuerpo Gobernante, okijto seki tlamantli itech Lucas 13:24 uan okijto sekimej tokniuan “amo totoka kichiuaj tlen moneki”. Ma tikchiuakan ken okichi Jacob tlen amo okika ma uia se ángel hasta ijkuak okiteochi (Gén. 32:26-28). Techpaktis timomachtiskej Biblia. Pero amo ma tiktlajtoltikan ken yetoskia se cuento. Ijkuak tiktlajtoltiskej Biblia moneki ma tikajsikamatikan tlen miak ipati uan ijkon techpaleuis ma tikpiakan chikauak totlaneltokilis.

12. ¿Tlen techpaleuis ma timokuayejyekokan ken Cristo?

¹² Ijkuak timochijchikauaj tikpiaskej okachi chikauak totlaneltokilis, espíritu santo techpaleuia ma tikpatlakan ken timokuayejyekoaj. Ijkon yolik timokuayejyekoaj ken Cristo (Rom. 15:5, NHY). Espíritu santo techpaleuia amo san totech ma timotekipachokan uan ma tikpiakan toyelis ken kineki toTajtsin Dios (Gál. 5:16, 22, 23). Amo ma timosotlauakan tla tikitaj tiknekij tikpiaskej miak tlamantli noso san tiknekij timoyolpaktiskej. Ma tiktlajtlanilikan Jehová espíritu santo uan ye techpaleuis ma timokuayejyekokan itech tlen kuali (Luc. 11:13). Ma tikilnamikikan tlen okipanok Pedro. Amo nochipa omokuayejyeko ken Cristo (Mat. 16:22, 23; Luc. 22:34, 54-62;Gál. 2:11-14). Pero amo omosotla  uan Jehová okipaleui ma mokuayejyeko ken Cristo. Tejuan uelis noijki ijkon timochijchikauaskej.

13. (1) ¿Ken techpaleuia tlen okichi Pedro? (2) ¿Tlen tikchiuaskej para tikpiaskej okachi chikauak totlaneltokilis? (Xikita recuadro “ ¿Tlen tikchiuaskej para tikpiaskej okachi chikauak totlaneltokilis?”).

¹³ Satepan Pedro okijto ken moneki tikpiaskej toyelis. Okijto ma timonauatikan, ma titlaxikokan uan ma titetlasojtlakan (xiktlajtolti 2 Pedro 1:5-8). Tla timochijchikauaskej ijkon tikchiuaskej, techpaleuis ma tikpiakan chikauak totlaneltokilis. Ik non, mojmostla ma timotlajtlanikan: “¿Tlen nikchiuas para okachi nikpias chikauak notlaneltokilis?”.

14. ¿Ken techpaleuis tla tikpiaskej okachi chikauak totlaneltokilis?

¹⁴ Tla timokuayejyekoaj ken Cristo, techpaleuis ma tikpiakan kuali toyelis kanin titekitij, kuali ma titlajtokan uan kuali ma tikpejpenakan tlen tikchiuaskej. Nochi non kiteititis tiknekij tikchiuaskej ken Cristo. Tla tikpiaj chikauak totlaneltokilis, nochipa kuali timouikaskej iuan Jehová. Tikixtopeuaskej tlen amo kuali uan ijkuak itlaj tikpejpenaskej tikchiuaskej, timotlajtlaniskej: “¿Tlen principios bíblicos nechpaleuiskej kuali ma nikpejpena tlen nikchiuas? ¿Tlen kichiuaskia Cristo? ¿Tlen kiyolpaktis Jehová?”. Nochipa ijkon ma timotlajtlanikan. Uan tikitaskej seki tlamantli uan tlen principios bíblicos techpaleuiskej kuali ma tikpejpenakan tlen tikchiuaskej.

15. Xikijto ken techpaleuia tla timokuayejyekoaj ken Cristo ijkuak tikpejpenaj akin iuan timonamiktiskej.

¹⁵ Ijkuak tikpejpenaskej akin iuan timonamiktiskej. Principio bíblico kajki itech 2 Corintios 6:14, 15 (xiktlajtolti). Pablo okijto akin kipia chikauak itlaneltokilis amo monamiktis iuan akin amo kitekichiuilia toTajtsin Dios. ¿Ken tiktlakamatiskej nin principio ijkuak tikpejpenaskej akin iuan timonamiktiskej?

16. Xikijto ken techpaleuia tla timokuayejyekoaj ken Cristo ijkuak tikinpejpenaj akinmej inmiuan timouikaskej.

¹⁶ Ijkuak tikinpejpenaj akinmej inmiuan timouikaskej. Ma tikitakan principio bíblico tlen kajki itech 1 Corintios 15:33 (xiktlajtolti). Akinmej kipiaj chikauak intlaneltokilis amo mouikaj iuan akinmej amo kitekichiuiliaj Jehová porque uelis kinmijtlakoskej. Ma timokuayejyekokan ken timoyekanaskej ika nin principio bíblico. Se neskayotl: “¿Ken nechpaleuis kuali ma nikinpejpena akinmej inmiuan nimotlapouis itech Internet? ¿Tlen nikchiuas tla ikaj tlen amo nikixmati nechiluis iuan ma nimauilti itech Internet?”.

17. ¿Tlen amo tikchiuaskej tla tikpiaj chikauak totlaneltokilis?

¹⁷ Ijkuak itlaj techtsakuilia amo okachi ma tiktekichiuilikan Jehová. Techpaleuis Hebreos 6:1 (xiktlajtolti). Itech nin tlaxelol Pablo okijto ayakmo ma tikchiuakan tlen “techwika  imak mikílistli” kijtosneki seki tlamantli tlen techtsakuilia amo okachi ma tiktekichiuilikan Jehová. Nin tlaxelol techpaleuis ma timotlajtlanikan: “¿Nechpaleuis nin tlamantli? ¿Nikselis se tekitl para okachi niktlanis tomin? ¿Tleka amo ma nimokajkalaki inmiuan tlen kijtoaj kinekij tlayektlaliskej?”.

18. ¿Tlen tikchiuaskej tla tikpiaj chikauak totlaneltokilis?

¹⁸ Okachi ma tiktekichiuilikan Jehová. Ijkuak Jesús otlamachti itech Tepetl, okijto ken okachi uelis tiktekichiuiliskej toTajtsin Dios (Mateo 6:33). Akin kipia chikauak itlaneltokilis, achto kitlalia Tekiuajkayotl itech inemilis. Nin principio bíblico techpaleuis ma timotlajtlanikan: “¿Okachi moneki nimomachtis escuela? ¿Nikselis tekitl tlen onechiluijkej nechmakaskej?”.

19. Tla tikpiaj chikauak totlaneltokilis, ¿tlen tikchiuaskej ijkuak tikpiaskej ouijkayotl iuan se tokni?

¹⁹ Ijkuak tikpiaj ouijkayotl iuan tokniuan. Ijkuak tikpiaj ouijkayotl iuan se tokni ma tiktlakamatikan tlen Pablo okinmilui tokniuan tlen ochantiayaj Roma (Romanos 12:18). Akinmej tikchiuaj ken Cristo ‘tiktemoliah kenijki timoyekwikaskeh ika yolsewílistli iwan nochteh’. ¿Tlen tikchiuaj ijkuak tikpiaj ouijkayotl iuan se tokni? ¿Amo techpaktia tikkakiskej tlen kijtoaj tokniuan? ¿Noso techixmatij san niman titetlapojpoluiaj? (Sant. 3:18).

20. ¿Tleka tiknekij tikpiaskej okachi chikauak totlaneltokilis?

²⁰ Ninmej principios techpaleuiskej ma tikteititikan tikpiaj chikauak totlaneltokilis tla ika timoyekanaskej ijkuak tikpejpenaskej tlen tikchiuaskej. Okachi tiyolpakiskej. Robert tlen achto itech otimotlapouijkej, okijto: “Ijkuak okachi opejki nimouika iuan Jehová, opejki kuali nikmaluia nosiua uan nokoneuan. Axkan sapanoa niyolpaki”. Noijki ijkon tiyolpakiskej tla okachi tikpatioitaj tikpiaskej chikauak totlaneltokilis. Nin techpaleuis okachi kuali ma tikpiakan tonemilis uan satepan ‘tikpiaskeh n nemílistli non ayik tlami’ (1 Tim. 6:19).