1, 2. Omumwatate gumwe okwa li a mono shike sha kambela shi na ko nasha nuupambepo we, nokwa ningi po shike?

OMUMWATATE Robert okwa ninginithwa e na omimvo omulongo nasha, ihe oshili ka li e yi tala ko ya simana. Okwa ti: “Kanda li handi ningi sha sha puka, ihe onda li owala handi ningi shampa tandi ningi. Onda li handi monika nda fa nda kola pambepo, handi yi komakugongala aluhe nomathimbo gamwe momumvo onda li handi kutha uukwathelikokolindjila. Ihe opwa li pwa kambela sha.”

² Omumwatate Robert ka li e wete kutya epuko oli li peni, sigo oosho a hokana. Ye nomukulukadhi gwe, oya li ya tameke okupulathana omapulo kombinga yOmbiimbeli. Omukulukadhi gwe okwa li e na uupambepo wa kola noha yamukula nawa omapulo, ihe omumwatate Robert okwa li ha nyengwa okuyamukula, naashoka osha li hashi mu sitha ohoni. Omumwatate Robert okwa ti: “Onda li nda fa kaandi na shoka ndi shi. Ondi ilombwele te ti: ‘Ondi na okuninga po sha, ngele onda hala okukala omutse gwomukulukadhi gwandje nda kola pambepo.’” Shoka osho omumwatate Robert a li a ningi. Okwa ti: “Onda konakona Ombiimbeli e tandi yi konakona noku yi konakona lela, niinima oya tameke okweenda nawa. Onda kala ndi yu uvite ko, naashoka sha simanenena, onda kala ndi na ekwatathano lyopothingo naJehova.”

3. (a) Oshike tatu ilongo ko koshimoniwa shomumwatate Robert? (b) Omapulo geni ga simanenena tatu ka kundathana ngashingeyi?

³ Moshimoniwa shomumwatate Robert, otatu vulu okwiilonga mo sha  sha simana. Odhoshili kutya otashi vulika tu kale tu na ontseyo yontumba yOmbiimbeli notashi vulika hatu endathana aluhe negongalo lyopaKriste, ihe shoka itashi ti naanaa kutya otwa kola pambepo. Nenge tashi vulika twa ninga nale ehumokomeho, ihe sho twi ikonakona nawa, otwa mono natango kutya otwa pumbwa okuhwepopala pambepo. (Fil. 3:16) Opo tu tsikile okuhwepopaleka uupambepo wetu, natu ka yamukuleni omapulo gatatu ga simanenena moshitopolwa shika: (1) Oshike tashi ke tu kwathela tu ikonakone kutya otu na uupambepo wu li ngiini? (2) Ongiini tatu vulu okukala tu na uupambepo wa kola nokutsikila okukala aantu ya kola pambepo? (3) Ongiini uupambepo wa kola tawu vulu oku tu kwathela monkalamwenyo yetu yakehe esiku?

4. Omayele ngoka ge li mAaefeso 4:23, 24, oga nuninwa oolye?

⁴ Otwa ningi omalunduluko, opo tu ninge aapiya yaKalunga. Omalunduluko ngaka oga guma onkalamwenyo yetu ayihe. Nokonima sho twa ninginithwa, onkee ngaa tatu ende tatu ningi omalunduluko. Ombiimbeli otayi tu lombwele tayi ti: “Omitima dheni nomadhiladhilo geni naga shituluke lela, ga ninge omape.” (Ef. 4:23, 24) Atuheni otwa pumbwa okutsikila okuninga omalunduluko, oshoka inatu gwanenena. Nokuli naapiya yaJehova mboka ye mu longela ethimbo ele, oya pumbwa okukaleka uupambepo wawo wa kola. — Fil. 3:12, 13.

5. Omapulo geni taga vulu oku tu kwathela tu ikonakone?

⁵ Opo tu hwepopaleke uupambepo wetu noku wu kaleka po, otwa pumbwa okwiikonakona lela. Kutya nduno otu li aagundjuka nenge aakuluntu, otatu vulu okwiipula omapulo ngaka: ‘Mbela onda ninga ngaa omalunduluko ngoka tagu ulike kutya otandi humu komeho pambepo? Mbela ondi na ngaa omaukwatya ga fa gaKristus? Mbela iikala yandje neihumbato lyandje kokugongala kwopaKriste, otayi holola shike kombinga yuupambepo wandje? Mbela shoka handi popi ohashi ulike kutya onda hala shike monkalamwenyo? Mbela okukonakona kwandje pandjigilile, okuzala nokwiiyopaleka nenge omukalo moka handi inyenge uuna tandi pewa omayele, otayi holola shike kombinga yandje? Ohandi inyenge ngiini, uuna nda taalela omashongo? Mbela onda ninga ngaa ehumokomeho mokukala Omukriste a koka lela pambepo?’ (Ef. 4:13) Okudhiladhila komayamukulo gomapulo ngoka, otaku ke tu kwathela tu mone kutya otwa huma komeho pambepo shi thike peni.

6. Oshike ishewe twa pumbwa, opo tu mone kutya uupambepo wetu owa kola shi thike peni?

⁶ Omathimbo gamwe otashi vulika twa pumbwa yalwe ye tu kwathele, opo tu vule okumona kutya uupambepo wetu owa kola shi thike peni. Omuyapostoli Paulus okwa popi kutya omuntu ngoka ha dhiladhila panyama, iha mono kutya shoka ha ningi inashi hokiwa kuKalunga. Mepingathano naashono, omuntu ngoka e na uupambepo uuwanawa oku shi nkene Kalunga ha tala ko iinima nonokutya iha hokwa ondjila ya puka yomuntu ngoka kee na ombepo ye. (1 Kor. 2:14-16; 3:1-3) Ngele omumwatate gwontumba okwa tameke okudhiladhila pauntu, aakuluntugongalo mboka haya dhiladhila ngaashi Kristus, olundji ohaye shi dhimbulula mo nziya e taye mu kwathele. Ngele taye tu pe omayele, mbela ohatu ga taamba ko ngaa noku ga tula miilonga? Ngele otwe shi ningi, kungawo otatu ulike kutya otwa halelela okukoleka uupambepo wetu. — Omuuv. 7:5, 9.

7. Omolwashike inaashi gwana okukala owala nontseyo yOmbiimbeli, opo wu kale wu na uupambepo wa kola?

⁷ Kaleka momadhiladhilo kutya inashi gwana owala okukala wu na ontseyo yOmbiimbeli, opo ando wu kale omuntu e na uupambepo wa kola. Pashiholelwa, omukwaniilwa Salomo okwa li e na ontseyo oyindji kombinga yoondjila dhaJehova. Konima oohapu dhe odha ningi oshitopolwa shOmbiimbeli. Ihe pehulilo, okwa ndopa okukala omudhiginini kuJehova, e li omulumentu e na uupambepo wa kola. (1 Aak. 4:29, 30; 11:4-6) Kakele kontseyo yOmbiimbeli, oshike ishewe twa pumbwa? Otwa pumbwa okutsikila okuhuma komeho pambepo. (Kol. 2:6, 7) Ihe ongiini tu na oku shi ninga?

8, 9. (a) Oshike tashi ke tu kwathela tu kale twa kola pambepo? (b) Elalakano lyetu lyokukonakona nokutedhatedha olya shike? (Tala kethano lyopetameko.)

 ⁸ Paulus okwa li a ladhipike Aakriste yomethelemimvo lyotango ya ‘lalakanene uukuluntu.’ (Heb. 6:1) Opo tu tule miilonga omayele gaPaulus kunena, oonkatu dhini tatu vulu okukatuka? Onkatu yimwe ya simana oyo okukonakona okambo ‘Ikalekeni mohole yaKalunga.’ Ngele owe ka mana ko, otake ke ku kwathela wu mone nkene to vulu okutula miilonga omakotampango gOmbiimbeli monkalamwenyo yoye. Ngele owe ka mana ko nale, mbela ito vulu okukonakona iileshomwa yilwe mbyoka tayi vulu oku ku kwathela wu koleke eitaalo lyoye? (Kol. 1:23) Mbela oho tedhatedha ngaa nokugalikana kombinga yankene wu na okutula miilonga shoka to konakona?

⁹ Kaleka momadhiladhilo kutya uuna tatu konakona nokutedhatedha, otu na oku shi ninga nelalakano lyokukokeka momitima dhetu ehalo lyokuninga shoka tashi nyanyudha Jehova nokuvulika koompango dhe. (Eps. 40:8; 119:97) Pethimbo opo tuu mpono, ohatu kambadhala okutinda iinima mbyoka tayi vulu oku tu imba tu koleke uupambepo wetu. — Tit. 2:11, 12.

10. Aagundjuka otaya vulu okuninga shike, opo ya kale ye na uupambepo wa kola?

¹⁰ Ngele ngoye omugundjuka, mbela owu na ngaa omalalakano gopambepo? Uuna twa yi kiigongi yoshikandjo, olundji omumwatate gumwe gwokoBetel oha popi aluhe naamboka taya ka ninginithwa, manga omutumba inaagu tameka. Oyendji yomwaamboka taya ninginithwa, ohaya kala aagundjuka. Onkee ano, omumwatate ngoka ohe ya pula kutya oye na omalalakano gopambepo geni. Oyendji ohaya gandja omayamukulo ngoka tagu ulike shoka ya hala okuninga, opo ya longele Jehova. Yamwe otashi vulika ya tye oya hala okuya miilonga yontumba yethimbo lyu udha nenge ya ka longe hoka ku na ompumbwe onene yaauvithi yUukwaniilwa. Nonando ongawo, poompito dhimwe, aagundjuka yamwe ihaya kala ye na omayamukulo. Mbela shono otashi ti kutya inaya thika natango pehulithodhiladhilo kutya omalalakano gopambepo geni ye na okwiitulila po? Wu li omugundjuka, ipula ngeyi: ‘Mbela ohandi kutha ombinga miinima yopambepo, molwaashoka owala aavali yandje osho ya tegelela ndi ninge? Mbela ohandi kambadhala ngaa paumwene okukala nekwatathano lya kola naKalunga?’ Omayele kombinga yokwiitulila po omalalakano gopambepo, inaga nuninwa owala aagundjuka. Ngele otwa kala tu na omalalakano gopambepo, otashi ke tu kwatheleni atuheni tu li aapiya yaJehova tu koleke lela uupambepo wetu. — Omuuv. 12:1, 13.

11. (a) Oshike twa pumbwa okuninga, opo tu hume komeho lela pambepo? (b) Oshiholelwa shomOmbiimbeli shini tatu vulu okuholela?

¹¹ Uuna twa mono kutya openi twa pumbwa okuninga omalunduluko, otwa pumbwa okukatuka oonkatu oombwanawa, ndhoka tadhi ke tu kwathela tu hume komeho pambepo. Okukala omuntu e na uupambepo wa kola, oshinima sha simana. Oshikwawo, otashi ti omwenyo nenge eso. (Rom. 8:6-8) Ihe inatu pumbwa okukala twa gwanenena, opo ando tu kale tu na uupambepo wa kola. Ombepo yaJehova otayi vulu oku tu kwathela tu ninge ehumokomeho ndyoka lya pumbiwa. Nonando ongawo, otwa pumbwa okuninga oonkambadhala dha mana mo. Omimvo dhontumba dha ka pita, omumwatate John Barr, oshilyo shOlutuwiliki, okwa popile kombinga yaLukas 13:24, a ti: “Oyendji oya hulile muunyengwi, oshoka kaya li ye na uupambepo wa kola.” Onkee ano, otwa pumbwa okukala twa fa Jakob, ngoka kaa li a teka omukumo mokukondjitha omuyengeli sigo a yambekwa. (Gen. 32:26-28) Nonando ekonakonombiimbeli otashi vulika li kale tali nyanyudha, katu na okutegelela Ombiimbeli yi kale ya fa okahokololo hoka ka nyolwa nelalakano lyokunyanyudha. Otwa pumbwa okulonga nuudhiginini, tu mone omaliko gopambepo ngoka taga vulu oku tu kwathela.

12, 13. (a) Oshike tashi ke tu kwathela tu tule miilonga Aaroma 15:5? (b) Oshiholelwa shomuyapostoli Petrus nosho wo omayele ge, otayi vulu ngiini oku tu kwathela? (c) Oshike wu na okuninga, opo wu koke pambepo? (Tala oshimpungu: “ Oonkatu ndhoka to vulu okukatuka, opo wu hume komeho pambepo.”)

¹² Sho tatu kambadhala okukokeka uupambepo wetu, ombepo ondjapuki otayi ke tu nkondopaleka, opo tu lundulule omadhiladhilo getu. Kekwatho lyombepo ondjapuki, otatu vulu okukala hatu dhiladhila lela ngaashi Kristus a li ha dhiladhila. (Rom. 15:5) Niishewe, otashi ke tu kwathela tu vudhe mo uuhalu wopantu nokukokeka  omaukwatya ngoka ga hokiwa kuKalunga. (Gal. 5:16, 22, 23) Ngele otwa mono kutya otatu dhiladhila unene kiinima yopamaliko nenge kuuhalu wopantu, inatu teka omukumo. Pehala lyaashono, natu tsikile okupula Jehova e tu kwathele ombepo ondjapuki, nokungawo ote ke tu kwathela tu gandje eitulomo kiinima mbyoka yi na oshilonga. (Luk. 11:13) Dhimbulukwa omuyapostoli Petrus. Omathimbo nomathimbo monkalamwenyo ye, okwa li i ihumbata momukalo ngoka tagu ulike kutya ina kola pambepo. (Mat. 16:22, 23; Luk. 22:34, 54-62; Gal. 2:11-14) Nonando ongawo, ka li a shuna omutse miipeta. Mokweendela ko kwethimbo, kekwatho lyaJehova, okwa li a tameke okudhiladhila ngaashi Kristus. Natse otatu vulu okuninga sha faathana.

¹³ Konima yethimbo, Petrus okwa li a popi iinima yokondandalunde mbyoka tatu vulu okulongela ko. (Lesha 2 Petrus 1:5-8.) Sho tatu ‘kambadhala’ okukokeka omaukwatya ngaashi eikwatonawa, eidhidhimiko nohole yuumwayinathana, otashi ke tu kwathela tu tsikile okuhuma komeho pambepo. Esiku kehe, omolwashike itoo kambadhala okwiipula epulo ndika: ‘Okushike ndi na okulongela ko nena, opo ndi hume komeho pambepo?’

14. Okukala tu na uupambepo wa kola otaku ka guma ngiini onkalamwenyo yetu?

¹⁴ Ngele otwa kala hatu dhiladhila ngaashi Kristus, otashi ka nwetha mo okupopya kwetu neihumbato lyetu kiilonga nenge kosikola nosho wo omatokolo ngoka tatu ningi esiku kehe. Omatokolo ngoka otage ku ulika kutya otatu kambadhala okukala aalanduli yaKristus. Tu li aantu ye na uupambepo wa kola, inatu hala ekwatathano lyetu naTate yetu gwomegulu li yonwe po kusha. Uuna twa adhika komamakelo, uukwatya wetu yopaKriste otawu ke tu inyengitha tu ga kondjithe. Uuna tatu ningi omatokolo, otatu ka kankama nokudhiladhila komapulo ngaka: ‘Omakotampango gOmbiimbeli geni taga ka kwathela ndje ndi tokole? Ando Kristus oye a li monkalo ndjino, ando okwa ningi po shike? Etokolo lini tali ka nyanyudha Jehova?’ Opo tu idheule okukala tatu dhiladhila momukalo nguka, natu ka taleni koonkalo dhontumba. Moshiholelwa kehe, otatu ka tala kekotampango lyOmbiimbeli ndyoka tali vulu oku tu kwathela tu ninge omatokolo ge li pandunge.

15, 16. Gandja iiholelwa nkene okudhiladhila ngaashi Kristus taku vulu oku tu kwathela, uuna tatu ningi omatokolo kombinga (a) yokuhogolola kuume kopandjokana. (b) yokuhogolola mboka tu na okweendathana nayo.

¹⁵ Uuna to hogolola kuume kopandjokana. Ekotampango lyopamanyolo kombinga yaashono, otali adhika mAakorinto aatiyali 6:14, 15. (Lesha.) Oohapu dhaPaulus odha yelitha sha yela kutya omuntu ngoka a koka pambepo ita vulu okutsa kumwe thiluthilu naangoka ha dhiladhila panyama. Ekotampango ndyoka otali longo ngiini mokuhogolola kuume kopandjokana?

¹⁶ Eendathano. Ndhindhilika ekotampango ndyoka li li mAakorinto yotango 15:33. (Lesha.) Omutilikalunga ita ka endathana naamboka taya vulu okutula uupambepo we moshiponga. Omapulo geni tage ke ku kwathela wu li tule miilonga? Pashiholelwa, ekotampango ndika otali longo ngiini ngele tashi ya pomakwatathano gokointaneta? Nenge oto ka ninga po shike, ngele owa hiwa wu dhane uudhano wontumba kointaneta naantu mboka kuu shi?

17-19. Okukala wa pititha komeho iinima yopambepo, otaku ke ku kwathela ngiini (a) wu yande iinima mbyoka yaa na oshilonga? (b) wu itulile po omalalakano monkalamwenyo? (c) wu ungaunge nokwaauvathana?

¹⁷ Iinima mbyoka tayi vulu okwiimba omuntu a koke pambepo. Paulus okwa li a nyolele Aakriste  ooyakwawo oohapu tadhi londodha. (Lesha Aahebeli 6:1.) “Iilonga yaa na oshilonga” yini tu na okuyanda? Oombyoka itaayi vulu oku tu kwathela tu koke pambepo nenge tu imike iiyimati iiwanawa. Onkee ano, ekotampango ndika otali vulu oku tu kwathela kombinga yomapulo ogendji ngoka tatu vulu okwiipula monkalamwenyo. Omapulo ngoka ongaashi: ‘Mbela iilonga mbika oya kwatelwa mwaambyoka hayi longwa kaantu mboka haya dhiladhila panyama? Mbela nandi kuthe ombinga momikalo ndhika dhokwiikongela oshimaliwa? Omolwashike kaandi na okuwaimina oongundu ndhoka tadhi kambadhala okulundulula onkalo yuuyuni?’

¹⁸ Omalalakano gopambepo. Oohapu dhaJesus mEuvitho lye lyokOndundu, odhe tu pa uuyelele wa yela kombinga yokwiitulila po omalalakano. (Mat. 6:33) Omuntu ngoka e na uupambepo uuwanawa, oha kambadhala okupititha komeho omalalakano gopambepo. Okukaleka momadhiladhilo ekotampango ndika, otaku ke tu kwathela tu yamukule omapulo ngaashi: ‘Mbela nandi lalakanene elongo lyopombanda? Mbela nandi taambe ko iilonga mbyoka tandi pewa?’

¹⁹ Okwaauvathana. Omayele ngoka Paulus a li a gandja kegongalo lyomuRoma, otage tu kwathele ngiini tu ungaunge nokwaauvathana hoka taku vulu okuholoka po? (Rom. 12:18) Tu li aalanduli yaKristus, ohatu kambadhala tu “kale nombili naantu ayehe.” Uuna twa taalelwa komashongo, ohatu inyenge ngiini? Mbela oshidhigu kutse okupanga ombili nenge otwa tseyika tu li “aatungimbili”? — Jak. 3:18.

20. Omolwashike wa hala okuhuma komeho pambepo?

²⁰ Mbika iiholelwa owala iishona, mbyoka tayi tu ulukile nkene okuvulika komakotampango gaKalunga taku vulu oku tu kwathela tu ninge omatokolo ge li metsokumwe naashoka omuntu ngoka e na uupambepo uuwanawa, a tegelelwa a ninge. Ngele otwa kala tu na uupambepo uuwanawa, otashi ke tu kwathela tu kale twa nyanyukwa notu na ombili lela esiku kehe. Omumwatate Robert, ngoka a popiwa metetekelo lyoshitopolwa shika, okwa ti: “Konima sho nda tameke okukala nekwatathano lyashili naJehova, onda kala omusamane natate e li nawa. Onda kala nda gwanenwa nonda nyanyukwa.” Otatu vulu okunyanyukilwa omayambeko ga faathana, ngele otwa pititha okuhuma komeho pambepo. Tu li aantu ye na uupambepo uuwanawa, otatu vulu okunyanyukilwa onkalamwenyo ombwanawa ngashingeyi nosho wo “okukalamwenyo kwashili” monakuyiwa. — 1 Tim. 6:19.