1, 2. Antoy naimano na sakey a brother ya kulang nipaakar ed espiritualidad to, tan antoy ginawa to?

SI Robert et abautismoan nen tinedyer, balet ta agto impapuso so katuaan. Inkuan to: “Anggapo met so ginawak ya aliwa, balet ta mimila ak labat ed agus. Singa ak mabisbiskeg ed espiritual, ta lanang ak ya mimiaral tan maminpiga ak ya manu-auxiliary payunir diad sakey taon. Balet walay kulang.”

² Agnaimano nen Robert no antoy problema ed sikato anggad sanen angasawa. Bilang pamalabas na oras, mantetepetan iran sanasawa nipaakar ed Biblia. Mabiskeg so espiritualidad na asawa to kanian mainomay ton naebatan iray tepet, balet si Robert et lanang ya nababaingan ta agto amtay ebat. Inkuan to: “Singa anggapon balot so amtak. Inisip ko, ‘No labay kon nidaulo ed espiritual so asawak, dapat walay gawaen ko.’” Nanggaway paraan si Robert. Inkuan to: “Inaral koy Biblia tan intultuloy ko itan, anggad apankokonektaan ko ray nanaaralan ko. Inmaralem so pakatalos ko, tan say sankaimportantian et inmelet so relasyon kod si Jehova.”

3. (a) Antoy naaralan tayod eksperiensya nen Robert? (b) Anto ran importantin tepet so aralen tayo?

³ Wala ray importantin naaralan tayo ed eksperiensya nen Robert. Nayarin wala ray amta tayo ed Biblia tan regular tayon  mililimog ed kongregasyon, balet agto labay ya ibaga ya maespiritual tayo la lapud saratan. Odino nayarin inmaligwas tayo la, balet no usisaen tayo ni sarili tayo, wala ni manayay kaukolan tayon paaligwasen ed espiritualidad tayo. (Fil. 3:16) Pian natulongan tayon mantultuloy ya onaligwas, ebatan tayo so taloran importantin tepet: (1) Antoy makatulong ed sikatayon usisaen so tuan kipapasen na espiritualidad tayo? (2) Panon tayon napabiskeg so espiritualidad tayo tan mantultuloy ya onaligwas ed espiritual? (3) Panon ya ontulong ed inagew-agew ya bilay tayo so mabiskeg ya espiritualidad?

4. Parad siopa so bilin ed Efeso 4:23, 24?

⁴ Nen nagmaliw tayon lingkor na Dios, wala ray ginawa tayon pananguman ya angapektad interon bilay tayo. Tan ag-itan anampot nen nampabautismo tayo. Pinaseseg itayon “itultuloy a pasimbaloen so paraan na panagnonot [tayo].” (Efe. 4:23, 24) Aliwa tayon perpekto, kanian kaukolan tayon amin so mantultuloy ya manguman. Anggan saray abayag lan lingkor nen Jehova et kaukolan dan pansiansiaen so espiritualidad da.​—Fil. 3:12, 13.

5. Anto ran tepet so ontulong ed sikatayon nausisa so sarili tayo?

⁵ Pian napaaligwas tan napansiansia so espiritualidad tayo, kaukolan ya matua tayon usisaen so sarili tayo. Balanglan ugaw ni o matatken tayo la, sarag tayon tepetay sarili tayo: ‘Kasin wala la ray angumanan ko ya pakapatnagan a magmamaliw ak ya maespiritual? Kasin naaalig koy personalidad nen Kristo? Antoy ipapatnag na ugali tan konduktak diad saray Kristianon pantitipon nipaakar ed kabiskeg na espiritualidad ko? Antoy ipapatnag na saray itotongtong ko nipaakar ed saray pirawat kod bilay? Antoy nibaga na arum ed siak nipaakar ed ugalik ed panagaral, panangawes tan panag-ayos ko, odino reaksion kod simbawa? Antoy gagawaen ko no nipaarap ak ed saray tukso? Kasin tinmatken ak la ed espiritual bilang Kristiano?’ (Efe. 4:13) No usisaen tayoy ebat tayo ed saratan a tepet, naamtaan tayo no kaunongan lay inyaligwas tayod espiritual.

6. Pian nausisa tayoy espiritualidad tayo, anto ni nayarin makatulong?

⁶ Pian nausisa so espiritualidad tayo, no maminsan et kaukolan tayoy tulong na arum. Impaimano nen apostol Pablo ya say pisikal a too et agto natetebek ya aliwan makapaliket ed Dios iray gagawaen to. Balet say espiritual a too et natatalosan toy panmoria na Dios pati saray aliwan gagawaen na pisikal a too. (1 Cor. 2:14-16; 3:1-3) Mabetbet ya saray elder ya walaan na kanonotan nen Kristo et naiimano da no kasin onggagapo tayo lan mannononot na nipaakar ed laman. No ipaimano da itan ed sikatayo, kasin awaten tan iyaplika tayoy simbawa da? No ontan so gawaen tayo, ipapanengneng tayo ya labalabay tayoy onaligwas ed espiritual.​—Ecl. 7:5, 9.

7. Akin ya aliwan magenap so kakabatan ed Biblia pian magmaliw tayon espiritual?

⁷ Tandaan ya aliwan magenap so pakawalaan na kakabatan ed Biblia pian magmaliw tayon maespiritual. Si Arin Solomon et dakel so amta to nipaakar ed si Jehova. Saray insulat to et nagmaliw ni ingen a kabiangan na Biblia. Balet diad kaunoran et kinmapuy so espiritualidad to kanian ag-akapanmatoor ed si Jehova. (1 Ara. 4:29, 30; 11:4-6) Kanian likud ed kakabatan ed Biblia, anto ni kaukolan tayo? Kaukolan ya tuloytuloy tayon paaligwasen so espiritualidad tayo. (Col. 2:6, 7) Balet panon tayon nagawaan itan?

8, 9. (a) Antoy makatulong pian ombiskeg so espiritualidad tayo? (b) Antoy gagala tayo no manaaral tan mandadalepdep tayo? (Nengnengen so litratod gapo na artikulo.)

⁸ Pinaseseg nen Pablo iray Kristiano nen inmunan siglo ya “itultuloy [day] manpatatken.”  (Heb. 6:1) Pian niyaplika tayo so bilin nen Pablo, anto ray sarag tayon gawaen? Importantin aralen so libron “Mansiansia ed Panangaro na Dios.” No sumpalen mon aralen itan, natulongan ka no panon mon iyaplikad bilay mo iray prinsipyo ed Biblia. No asumpal mo lan inaral itan a libro, sarag mo kasin aralen so arum ni ran publikasyon pian ombiskeg so pananisiam? (Col. 1:23) Kasin masimoon mon dadalepdepen no panon mon niyaplikad bilay mo iray aaralen mo?

⁹ Tandaan ya say gagala tayo no manaaral tan mandadalepdep tayo et pian nawalaan na impapuson pilalek ya paliketen si Jehova tan unoren iray ganggan to. (Sal. 40:8; 119:97) Ontan met, ipulisay tayo iray bengatlan makaamper ed iyaligwas tayod espiritual.​—Tito 2:11, 12.

10. Antoy nayarin gawaen na saray kabataan pian ombiskeg so espiritualidad da?

¹⁰ No sakey kan kabataan, kasin wala ray goal mo ed espiritual? Walay sakey a brother ya manlilingkor ed Bethel ya no onaatendi ed saray sirkiton asemblea et niyugali toy mitongtong ed saray kandidato ed bautismo antis ya onggapoy programa. Dakel ed saray kandidato et kabataan. Tetepetan ira na brother no anto ray goal dad espiritual. Napatnagan ed ebat na dakel ya amta da no antoy labay dan gawaen diad panlingkor ed si Jehova​—nayarin diad panlingkor ya full-time odino panlingkor ed lugar ya mas baleg so pankaukolan parad saray manangipulong na Panarian. Balet arum ed saray kabataan et singa anggapoy niyebat da. Kasin pakapatnagan itan ya agda ni iisipen ya kaukolan day nawalaan na goal ed espiritual? No sakey kan kabataan, tepetay sarilim: ‘Kasin mimiaral tan manpupulong ak ta atan so labay na saray ateng ko? Kasin manggugunaet ak ya nawalaan na personal a relasyon ed Dios?’ Siempre, aliwan saray kabataan labat so papasesegen ya nawalaan na saray goal ed espiritual. No amin tayo ya lingkor nen Jehova et walaan na ontan iran goal, ombiskeg so espiritualidad tayo.​—Ecl. 12:1, 13.

11. (a) Pian talagan onaligwas tayod espiritual, antoy kaukolan tayon gawaen? (b) Siopan alimbawa ed Biblia so sarag tayon aligen?

¹¹ No amta tayo la no anto ray nepeg tayo nin paaligwasen, kaukolan tayoy manggawa na paraan pian mantultuloy tayon onaligwas. Importantin maong so pagmaliw ya maespiritual ta bilay so nalalanor. (Roma 8:6-8) Balet agkaukolan ya magmaliw tayon perpekto pian ontatken tayod espiritual. Pian nagawaan itan, makatulong so espiritu nen Jehova. Balet kaukolan tayo nin siansia so mansagpot. Manga pigay taon lay apalabas, oniay inkomento nen John Barr, a nanlingkor bilang membro na Mananguley ya Ulop, nipaakar ed Lucas 13:24, “Dakel so ag-akaloob ed mainget a puerta lapud ag-ira nampursigin ombiskeg ed espiritual.” Kaukolan tayon aligen si Jacob, ya agtinmundan akibalsakan ed sakey ya anghel anggad akaawat na bendisyon. (Gen. 32:26-28) Anggano nai-enjoy tayoy manaral na Biblia, agtayo ipapasen ya saray nabasa tayod Biblia et singa nobela ya insulat labat pian mamaliket. Kaukolan tayoy manseet pian naromog tayo iray espiritual a kayamanan ya ontulong ed sikatayo.

12, 13. (a) Antoy makatulong pian niyaplika tayo so Roma 15:5? (b) Panon ya makatulong ed sikatayo so alimbawa tan bilin nen apostol Pedro? (c) Antoy sarag mon gawaen pian napabiskeg moy espiritualidad mo? (Nengnengen so kahon ya “ Saray Sarag Mon Gawaen Pian Onaligwas Kad Espiritual.”)

¹² Legan tayon papabiskegen so espiritualidad tayo, tulongan itayo na masanton espiritu pian nauman tayoy kanonotan tayo. Diad tulong na espiritu, kalkalna tayon naaralan so mannonot a singa ed Kristo. (Roma 15:5) Ontulong met itan pian naekal ed puso tayo iray pilalek na laman tan nawalaan tayo na saray kualidad ya makapaliket ed Dios. (Gal. 5:16, 22, 23) No nalikas tayon say lanang tayo lan  nononoten et saray materyal a bengatla odino pilalek na laman, agtayo onsusuko. Itultuloy tayon kerewen so espiritu, tan tulongan itayo nen Jehova ya umanen so panagnonot tayo pian makapampokus ed saray bengatlan manepeg. (Luc. 11:13) Nonoten pay apostol Pedro. Aminpiga ya sikatoy agkinmiwas bilang espiritual a too. (Mat. 16:22, 23; Luc. 22:34, 54-62; Gal. 2:11-14) Balet agsinmuko. Diad tulong nen Jehova, kalkalnan naaralan nen Pedro so mannonot a singa ed Kristo. Sarag tayo met ya gawaen itan.

¹³ Diad tua, binitla nen Pedro iray espisipikon kualidad ya sarag tayon pankimeyan. (Basaen so 2 Pedro 1:5-8.) No ‘gawaen tayoy anggaay nayarian tayo’ ya nawalaan na saray kualidad a singa say panangontrol ed sarili, panagsungdo, tan panamabli ed agagi, natulongan itayon mantultuloy ya onaligwas ed espiritual. Kada agew, maabig no tepetan moy sarilim, ‘Antoy sarag kon gawaen natan pian napaaligwas koy espiritualidad ko?’

14. Panon ya say pagmaliw ya maespiritual et walaan na epekto ed bilay tayo?

¹⁴ No mannonot itayo a singa ed Kristo, impluensyaan na satan so panagsalita, kagagawa tayo diad trabaho odino diad eskuelaan, tan saray desisyon tayo ed kada agew. Napatnagan ed saray desisyon tayo ya panggugunaetan tayon tumboken so Kristo. Bilang maespiritual a totoo, agtayo labay ya walay maneral na relasyon tayo ed Ama tayod tawen. No walaan itayo na kanonotan a singa ed Kristo, ontulong itan pian nalabanan tayo ray tukso. Tan no mandedesisyon tayo, nonoten tayon maong tan tepetan so sarili tayo: ‘Anto ray prinsipyo ed Biblia ya makatulong ed siak ya mandesisyon? Anto kasi gawaen nen Kristo no walad onian situasyon? Anton desisyon so mamaliket ed si Jehova?’ Pian nipasal itayon mannonot ed onian paraan, nengnengen tayo so pigaran situasyon. Diad kada situasyon, amtaen tayo no anton prinsipyo ed Biblia so makatulong ed sikatayon manggawa na dugan desisyon.

15, 16. Mangiter na alimbawa no panon a makatulong so pannonot a singa ed Kristo no mandedesisyon tayo nipaakar ed (a) pampili na magmaliw ya asawa. (b) pampili na saray kaulop.

¹⁵ Pampili na magmaliw ya asawa. Naromog so prinsipyo na Biblia diad 2 Corinto 6:14, 15. (Basaen.) Malinew so imbaga nen Pablo ya agbalot nayarin mankasakey so espiritual a too tan pisikal a too. Panon iyan onaplika ed pampili na magmaliw ya asawa?

¹⁶ Pampili na saray kaulop. Imanoen so prinsipyo na Biblia diad 1 Corinto 15:33. (Basaen.) Say toon maespiritual et agmiulop ed saramay nayarin mamakapuy ed espiritualidad to. Isip mo no panon mon niyaplika iyan prinsipyo diad nanduruman situasyon. Singa bilang, panon iyan onaplika ed social networking? Odino antoy nepeg a gawaen mo no walay angimbita ed sikan mibiang ed online games ya agmo kabat iray kagalaw mo?

17-19. Panon a say pagmaliw ya maespiritual et ontulong ed sikatayon (a) paliisan iray andi-kakanaan ya aktibidad? (b) manggawa na saray goal ed espiritual? (c) ayosen iray agpantatalosan?

¹⁷ Saray aktibidad ya mangamper ed iyaaligwas mod espiritual. Say imbilin nen Pablo ed  saray kapara ton Kristiano et sakey met a pasakbay. (Basaen so Hebreo 6:1.) Anto iratay “inatey a gawa” a nepeg tayon paliisan? Antokaman ya andi-kakanaan ya aktibidad ya makaamper ed iyaligwas tayod espiritual. Ontulong iyan prinsipyo pian naebatan tayo irayan tepet: ‘Kasin kabiangan na saray gawa na laman iyan aktibidad? Nepeg ak kasin mibiang ed sayan plano ya pakakuartaan? Akin ya agak nepeg a mila ed saray grupon labay dan umanen iray situasyon ed mundo?’

¹⁸ Saray goal ed espiritual. Saray imbaga nen Jesus diad Sermon to ed Palandey et balibalin giya ed panggawa na saray goal tayo. (Mat. 6:33) Say espiritual a too et iyuuna tod bilay to so Panarian. Sayan prinsipyo et ontulong ed sikatayon naebatan irayan tepet: ‘Kasin ituloy ko ni mangala na atagey ya edukasyon? Kasin awaten koy sakey a trabaho?’

¹⁹ Agpantatalosan. Panon ya makatulong ed sikatayo so bilin nen Pablo ed kongregasyon na Roma pian naayos iray agpantatalosan? (Roma 12:18) Bilang Kristiano, pansagpotan tayoy ‘mikareenan ed amin a totoo.’ Antoy reaksion tayo no wala ray nagawan agpantatalosan? Kasin agtayo labay so patalo, odino kabkabat itayon ‘mikakareenan’?​—Sant. 3:18.

20. Akin ya labay moy mantultuloy ya onaligwas ed espiritual?

²⁰ Pigara labat iratan ya alimbawa a mangipapanengneng ya say pannonot ed saray prinsipyo na Dios et ontulong ed sikatayon manggawa na saray desisyon a pakapatnagan ya maespiritual tayo. Ontulong met ed sikatayo so pagmaliw ya maespiritual pian mas maliket tan kontento tayod inagew-agew ya bilay tayo. Oniay imbaga nen Robert, ya abitla so eksperiensya to diad gapo na sayan artikulo: “Nen awalaan ak na malet a relasyon ed si Jehova, nagmaliw ak ya maong ya asawa tan maong ya ama. Natan et anggapo lay kulang ed bilay ko tan maliket ak.” Naawat tayo met iratan a bendisyon no iprayuridad tayo so pamaaligwas ed espiritualidad tayo. Bilang maespiritual a totoo, nawalaan itayo na mas maliket a bilay natan tan say “tuan bilay” diad arapen.​—1 Tim. 6:19.