1-2. Waut wort een Brooda en, un waut deed dee dan?

ROBERT leet sikj deepen, aus hee 15 Joa wia, oba hee neem daut nich sea iernst met de Woarheit. Hee sajcht: “Ekj deed newers waut orrajchtet. Nom loten no wia ekj jeistlich stoakj, wiels ekj jinkj emma no de Toopkomes un poamol daut Joa wia ekj Pioniahelpa. Oba ekj deed daut bloos ut Jewanheit. Irjentwaut fäld doa.”

² Robert wort selfst nich en, waut doa orrajcht wia, bat hee sikj befried. Hee un siene Fru deeden sikj eenjemol fa scheengonen omzajcht Froagen stalen von de Bibel. Fa siene Fru wia daut kjeen Trubbel, de Froagen to beauntwuaten, wäajen dee wia jeistlich stoakj. Oba Robert wist foaken goanich de Auntwuat un dan must hee sikj schämen. Hee sajcht: “Daut wia soo, aus wan ekj nuscht wist. Un ekj docht soo: ‘Wan ekj en de Ehe saul em jeisteljen veroppgonen, dan mott ekj irjentwaut doonen.’” Waut deed Robert dan? Hee sajcht: “Ekj studieed un studieed un studieed un mie wort välet enne Schreft emma kloara un ekj kunn emma mea vestonen. Un waut noch wichtja wia: Ekj kjeem Jehova noda un wort werkjlich sien Frint.”

3. (a) Waut lia wie von daut, waut Robert beläwd? (b) Äwa woone Froagen woa wie en disen Artikjel räden?

³ Wie kjennen väl lieren von daut, waut Robert beläwd. Veleicht  weet wie eenjet ut de Schreft un gonen uk pinkjlich no de Vesaumlunk, oba doamet es nich jesajcht, daut wie jeistlich sent. Ooda veleicht sent wie aul em jeisteljen veraunjekomen, oba wan wie ons unjasieekjen, dan see wie, daut wie ons noch vebätren kjennen (Filip. 3:16, NW). Daut wie kjennen em jeisteljen wieda veraunkomen, woa wie mol äwa dree wichtje Froagen räden: (1) Woo kjenn wie rutfinjen, woo daut em jeisteljen werkjlich met ons steit? (2) Woo kjenn wie em jeisteljen stoakja woaren? (3) Woo kjemt ons daut togood, wan wie em jeisteljen stoakj sent?

4. Fa wäm es de Rot en Efeesa 4:23-24?

⁴ Aus wie aunfungen Gott to deenen, endad wie ons nich bloos en jewesse Stekjen. Daut deed waut aun ons gaunzet Läwen. Oba no de Doop sell wie nich opphieren, aun ons to schaufen. Wie sellen wieda doano sträwen, “en Seel un Senn, niee Menschen [to] woaren” (Efs. 4:23-24). Wiels wie onvolkomen sent, mott wie ons aula wieda aunstrenjen ons to vebätren. Mau rajcht soone, waut Jehova aul lang deenen, motten sikj bemieejen, em Gloowen stoakj to bliewen (Filip. 3:12-13).

5. Woone Froagen kjennen ons halpen, ons selfst to unjasieekjen?

⁵ Daut wie ons em jeisteljen vebätren kjennen ooda stoakj bliewen, mott wie ons opprechtich selfst unjasieekjen. Aus wie nu junk ooda aul ella sent, wie kjennen doaräwa nodenkjen: “Es daut aun mie to seenen, daut ekj em jeisteljen wiedakom? Woat miene Jesennunk emma dolla soo aus Christus siene? Woo es daut aun mien Vehoolen un miene Enstalunk en de Toopkomes to seenen, daut ekj jeistlich sie? Woo es daut aun miene Vetal to seenen, no waut ekj hinjaraun sie? Waut sajcht daut äwa mie, woo ekj studia, woo ekj mie auntrakj un oppfiks ooda woo ekj mie vehool, wan ekj Rot kjrie? Waut doo ekj, wan ekj en eene Vesieekjunk kom? Sie ekj em Gloowen aul stoakja jeworden?” (Efs. 4:13). Dise Froagen kjennen ons halpen to seenen, woo wiet wie em jeisteljen aul jekomen sent.

6. Waut bruck wie veleicht noch toom seenen, woo wie ons em jeisteljen stonen?

⁶ Toom seenen, woo wie ons em jeisteljen stonen, bruck wie veleicht eenjemol Help von aundre. De Apostel Paulus wees, daut een fleeschelja Mensch nich vestonen kaun, daut Gott met dän sien Läwen ontofräd es. Oba een jeistelja Mensch weet, woo Jehova denkjt un daut dee daut nich fa goot talt, wan eena sien Fleesch toom Jefaulen läft (1. Kor. 2:14-16; 3:1-3). Eltestasch, waut Christus siene Jesennunk haben, woaren daut foaken bosich en, wan eena aunfangt, fleeschlich to denkjen. Wan dee ons dan von daut aunräden, näm wie dän Rot aun? Wan jo, dan wies wie, daut wie em jeisteljen veraunkomen wellen (Liera 7:5, 9).

7. Wuarom es daut nich jenuach, bloos to weeten, waut de Schreft sajcht?

⁷ Om jeistlich to sennen, rieekjt daut nich too, bloos to weeten, waut de Schreft sajcht. De Kjennich Salomo kjand Jehova goot un siene weise Wieed stonen mau rajcht en de Bibel. Oba tolatst kjeem hee von Jehova auf un wort am ontru (1. Kjen. 5:9-10; 11:4-6). Waut es aulsoo noch needich, aus bloos de Schreft to kjanen? Wie motten uk fa wieda em jeisteljen veraunkomen (Kol. 2:6-7). Oba woo kjenn wie daut?

8-9. (a) Waut woat ons halpen, em Gloowen stoakja to woaren? (b) Wuaropp sell wie schaufen, wan wie studieren un nodenkjen? (See daut Bilt aum Aunfank.)

⁸ Paulus säd to de Christen en siene Tiet,  see sullen “nich bie de Sachen vom Aunfank stonen bliewen” (Heb. 6:1). Un woo kjenn wie Paulus sienen Rot nokomen? Wie motten biejlikj daut Buak “Blieft en Gott siene Leew” studieren. Soo woa wie lieren, woo wie no biblische Gruntsauzen läwen kjennen. Wan wie dit Buak gaunz studieet haben, dan wudd wie kjennen aundre Sachen studieren, waut ons halpen, em Gloowen stoakja to woaren (Kol. 1:23). Wie motten äwa daut nodenkjen, waut wie studieren, un doarom bäden, daut wie daut kjennen nokomen.

⁹ Wan wie studieren un nodenkjen, dan sell wie doaropp schaufen, daut wie dän Wensch kjrieen, Jehova to jefaulen un siene Jesazen to hoolen (Psa. 40:9; 119:97). Wie schaufen uk doaraun, daut wie aules tochloten, waut ons em jeisteljen trigjhelt (Tit. 2:11-12).

10. Woo kjennen junge Menschen em jeisteljen stoakja woaren?

¹⁰ Wan du een Jugentlicha best, hast du die dan aul krakjt väajenomen, waut du em jeisteljen doonen west? Een Brooda, waut em Betel deent, rät bie eendachsche Kongressen jeweenlich met dee, waut sikj wellen deepen loten. Väle von dee sent Jugentliche. De Brooda frajcht dee, waut dee sikj em jeisteljen väajenomen haben. Väle haben sikj daut aul krakjt äwajetalt, waut dee em Deenst fa Jehova doonen wellen, biejlikj irjenteene Sort Voltietdeenst ooda wua methalpen, wua mea Vekjindja fälen. Oba eenjemol sent doa uk junge Menschen, waut nich weeten, waut see sajen sellen. Denkjen dee veleicht, daut es goanich needich, sikj Sachen väatonämen, no dee eena em jeisteljen sträwen kaun? Wan du een Jugentlicha best, dan äwalaj mol: “Go ekj bloos no de Toopkomes un em Deenst, wäajen miene Elren daut wellen? Ooda sie ekj selfst Frint met Gott?” Oba nich bloos junge Menschen sellen sikj em jeisteljen waut väanämen. Wie aula woaren em jeisteljen stoakja woaren, wan wie daut doonen (Liera 12:1, 13).

11. (a) Waut mott wie doonen, daut wie em jeisteljen veraunkomen? (b) Woon biblischet Biespel kjenn wie nodoonen?

¹¹ Wan wie ieescht weeten, wua wie ons vebätren kjennen, dan sell wie daut needje doatoo doonen. Daut es onbedinjt needich, em jeisteljen stoakj to woaren – ons Läwen henjt doavon auf (Reem. 8:6-8). Oba toom em jeisteljen stoakj woaren mott eena nich volkomen sennen. Jehova sien Jeist kaun ons doabie halpen, oba wie motten ons uk aunstrenjen. John Barr, waut toom Väastaunt jehieed, räd een poa Joa trigj äwa Lukas 13:24 un säd: “Väle kjennen nich derch de enje Puat gonen, wäajen dee sikj nich jenuach aunstrenjen, em Gloowen stoakj to woaren.” Wie sellen soo aus Jakob sennen, waut soo lang met eenen Enjel resseld, bat dee am säajend (1. Mo. 32:27-29). De Bibel studieren kaun scheen gonen, oba wie sellen nich denkjen, daut dee soo aus een Jeschichtenbuak es, waut eena toom Tietvedrief läst. Wie motten ons aunstrenjen, doabennen de jeistelje Schaza to finjen, waut ons halpen woaren.

12-13. (a) Waut woat ons halpen, Reema 15:5 (NW) notokomen? (b) Woo kaun dän Apostel Petrus sien Biespel un sien Rot ons halpen? (c) Waut kaust du doonen toom em jeisteljen stoakja woaren? (See dän Kausten “Waut eena doonen kaun toom jeistlich stoakja woaren”.)

¹² Wan wie doaropp schaufen, em jeisteljen stoakja to woaren, dan woat de heilja Jeist ons halpen, daut wie onse Jesennunk endren kjennen un emma mea soo denkjen aus Christus (Reem. 15:5, NW). De heilja Jeist woat ons uk halpen, jäajen de fleeschelje Wenschen to gonen un no soone Ieejenschoften to sträwen, waut Gott jefaulen (Gal. 5:16, 22-23). Wan wie moakjen, daut wie hinjaraun sent no daut tietelje ooda no  daut fleeschelje, dan sell wie nich mootloos woaren. Wie sellen wieda om heiljen Jeist bäden, un Jehova woat ons dan halpen, ons Denkjen trajchttostalen (Luk. 11:13). Denkj wie mol aun dän Apostel Petrus. Hee wia mieremol en sien Läwen nich jeistlich jesonnen (Mat. 16:22-23; Luk. 22:34, 54-62; Gal. 2:11-14). Oba hee jeef nich opp. Jehova holp am, un soo bie sacht lieed Petrus, soo to denkjen aus Christus. Krakjt soo kjenn wie daut uk lieren.

¹³ Petrus schreef lota mau rajcht eenjet opp, aun waut wie schaufen kjennen toom em jeisteljen veraunkomen (läs 2. Petrus 1:5-8). Wie sellen ons biejlikj aunstrenjen, ons selfst to beharschen, staunthauft to sennen un breedaliche Leew to haben. Wie kjennen jieda Dach äwalajen: “Aun waut kaun ekj vondoag schaufen toom mie em jeisteljen vebätren?”

14. Aun waut es daut to seenen, aus wie jeistlich sent?

¹⁴ Wan wie soo denkjen aus Christus, dan woat daut doaraun to seenen sennen, woo wie räden, woo wie ons oppe Oabeit ooda enne School benämen un uk doaraun, fa waut wie ons jieda Dach entscheiden. Onse Entscheidungen woaren wiesen, daut wie Christus nofoljen wellen. Wäajen wie jeistlich jesonnen sent, well wie daut nich tooloten, daut ons irjentwaut von onsen himlischen Voda aufbrinjt. Wan wie vesocht woaren, dan woat onse christelje Jesennunk ons halpen, nuscht orrajchtet to doonen. Ea wie ons to waut eenich woaren, woa wie äwa de Froagen nodenkjen: “Woone biblische Gruntsauzen kjennen mie halpen? Waut wudd Christus en miene Städ doonen? Waut fa eene Entscheidunk wudd Jehova jefaulen?” Daut wie daut lieren, soo aus dit to denkjen, woa wie mol een poa Biespels seenen. Bie jieda Biespel es een biblischa Gruntsauz aunjejäft, waut ons halpen kaun, rajcht to entscheiden.

15-16. Woo kaun Christus siene Jesennunk ons halpen, (a) dän rajchten Ehepoatna to finjen? (b) de rajchte Frind to wälen?

¹⁵ Dän rajchten Ehepoatna finjen. De biblischa Gruntsauz steit en 2. Korinta 6:14-15 (läs). Paulus muak daut kloa, daut een jeistelja Mensch gaunz aundasch es aus een fleeschelja; dee denkjen nich äwareen. Woo kaun dis Gruntsauz eenem halpen, dän rajchten Ehepoatna to finjen?

¹⁶ De rajchte Frind wälen. Denkj mol äwa dän Gruntsauz en 1. Korinta 15:33 (läs) no. Een jeistelja Mensch woat nich met soone toop sennen, waut am em jeisteljen schoden kjennen. Woo kjenn wie disen Gruntsauz en veschiedne Loagen nokomen? Woo kaun dee ons biejlikj halpen, wan wie ons em Internet met wäm aufjäwen? Ooda wan wie de Jeläajenheit haben, met wäm, waut wie nich kjanen, äwa Internet Gäms to spälen?

17-19. Wan du jeistlich jesonnen best, woo woat die daut halpen, (a) nich no onnutzboaret to sträwen? (b) no daut rajchte to sträwen? (c) met Striedarieen omtogonen?

¹⁷ Sachen, waut ons em jeisteljen schoden. Paulus schreef fa Christen eene Woarnunk  opp (läs Hebräa 6:1). Waut sent de “doodje Woakjen”, waut wie sellen utem Stich gonen? Daut sent onnutzboare Woakjen, waut eenem nich halpen, em jeisteljen stoakja to woaren. Dis Gruntsauz kaun ons bie veschiedne Froagen en ons Läwen halpen, biejlikj: “Es dise Sach toom gooden ooda es dee onnutzboa? Sull ekj bie dit Jeschaft metmoaken toom mea Jelt vedeenen? Wuarom sull ekj bie eene Grupp nich metmoaken, waut de Welt vebätren well?”

¹⁸ No jeisteljet sträwen. Jesus jeef en siene Räd oppem Boajch gooden Rot, no waut eena sträwen sull (Mat. 6:33). Een jeistelja Mensch sträft no jeisteljet. Aun disen Gruntsauz to denkjen halpt ons, wan wie biejlikj entscheiden motten: “Sull ekj doano sträwen, mie huach uttolieren? Sull ekj de Oabeit aunnämen, waut se mie aunbeeden?”

¹⁹ Striedarieen. Woo halpt ons de Rot, waut Paulus de Christen en Room jeef, wan et mol Oneenichkjeit jeft? (Reem. 12:18). Aus Christus siene Nofolja schauf wie doaropp, “met aule Menschen Fräd to haben”. Waut doo wie, wan Striedarieen oppkomen? Bliew wie opp ons Stekj stonen ooda sent wie soone, waut “Fräd vebreeden”? (Jak. 3:18).

20. Wuarom west du em jeisteljen veraunkomen?

²⁰ Dit sent bloos een poa Biespels doafäa, woo biblische Gruntsauzen ons halpen kjennen, soo to entscheiden, aus een jeistelja Mensch daut doonen wudd. Wan wie jeistlich sent, dan woa wie tofrädna un schaftja sennen. Robert, von dän wie aul ea räden, sajcht: “Aus ekj Jehova noda jekomen wia, wia ekj een bätra Ehemaun un een bätra Voda. Un ekj wia tofräd un schaftich.” Ons woat daut uk sea toom gooden sennen, wan daut fa ons daut ieeschte es, em jeisteljen verauntokomen. Dan woa wie aul en de vondoagsche Tiet tofrädna sennen un lota noch mol “daut woare Läwen” kjrieen (1. Tim. 6:19).