1, 2. Nyen la mbeni ita-koli ahinga na ndö ti dutingo ti lo na lege ti yingo? Nyen la lo sara?

ROBERT awara batême na ngoi so lo de maseka, me tâ tënë ayeke lani kota ye na lê ti lo ape. Lo tene: “Lâ oko mbi sara mbeni sioni ye ape, me mbi yeke sara lani kua ti Jéhovah gï tongaso. Mbi kpa lani mbeni zo so akpengba na lege ti yingo ndali ti so mbi yeke gue na abungbi kue nga ambeni nze na yâ ti ngu oko oko mbi yeke sara kua ti pionnier auxiliaire. Me mbeni ye amanke mbi lani.”

² Robert ahinga lani mbilimbili ye so amanke lo ape juska lo sara mariage. Lo na wali ti lo ayeke mû ka ngoi ti hunda tënë na mba na ndö ti ambeni tënë ti Bible. Wali ti lo, so akpengba na lege ti yingo, ayeke kiri tënë nzoni mingi na ahundango ndo ni, me kamene asara Robert ndali ti so mingi ni lo hinga akiringo tënë ni ape. Lo tene: “A yeke mo bâ mo tene mbi hinga ye oko ape. Mbi gbu li ti mbi, mbi tene: ‘So mbi la mbi doit ti mû li ni ti fa ye na wali ti mbi na ndö ti Nzapa, mbi doit ti sara mbeni ye.’” Tongaso, Robert asara mbeni ye. Lo tene: “Mbi manda Bible mbi manda mbi manda mbi manda, juska mbi mä yâ ti tâ tënë nzoni mingi ahon ti kozo nga, kota ye ni ayeke so, mbi lë kpengba songo na Jéhovah.”

3. (a) Nyen la e lingbi ti manda na lege ti ye so asi na Robert? (b) Akota ye wa la e yeke sara tënë na ndö ni?

 ³ E lingbi ti manda akpengba ye na lege ti ye so asi na Robert so. E lingbi ti hinga ambeni ye na yâ ti Bible nga e yeke gue na abungbi lakue, me so aye ti tene ape so e yeke zo ti yingo. Wala e lingbi ti sara ambeni ye awe so amû lege na e ti maï na lege ti yingo, me tongana e bâ yâ ti asarango ye ti e, e yeke bâ so ambeni ye angbâ so a lingbi e sara ti maï (aPhil. 3:16). Ti mû maboko na e ti ngbâ ti maï na lege ti yingo, e yeke kiri tënë na akota hundango ndo ota na yâ ti article so: (1) Aye wa la ayeke mû maboko na e ti hinga wala e yeke zo ti yingo? (2) Tongana nyen la e lingbi ti gi ti ga zo ti yingo na ti ngbâ ti gue na li ni tongana zo ti yingo? (3) Ti duti zo so akpengba na lege ti yingo ayeke mû maboko na e na yâ ti fini ti e ti lâ na lâ tongana nyen?

4. Wango so ayeke na aÉphésien 4:23, 24 abâ zo wa?

⁴ Ti ga wakua ti Nzapa e sara lani achangement. Achangement so e sara andu ambage kue ti fini ti e. Achangement ni ahunzi ape na peko ti batême ti e. Bible atene na e ti “ngbâ ti sara si [e] kiri gï fini ni na yâ ti ngangu so ayeke fa lege na bibe ti [e]”. (aÉph. 4:23, 24). Ndali ti so e yeke mbilimbili-kue ape, a lingbi e kue e ngbâ ti sara achangement. Même awakua ti Jéhovah so asara na lo angu mingi abezoin ti ngbâ ti kpengba songo ti ala na lo.—aPhil. 3:12, 13.

5. Ahundango ndo wa la alingbi ti mû maboko na e ti hinga wala e yeke zo ti yingo?

⁵ Atâa e yeke maseka wala e yeke kangba, a lingbi e bâ yâ ti asarango ye ti e nzoni. E lingbi ti hunda terê ti e: ‘Eskê mbi bâ ambeni ye na yâ ti sarango ye ti mbi so afa so mbi yeke maï na lege ti yingo? Mbi yeke sara ye tongana Christ? Bango ndo ti mbi nga na sarango ye ti mbi na ngoi ti abungbi afa nyen na ndö ti dutingo ti mbi na lege ti yingo? Alisoro ti mbi afa nyen na ndö ti anzara ti bê ti mbi? Fason ti mandango ye ti mbi, yungo bongo ti mbi nga na lekengo terê ti mbi wala sarango ye ti mbi na ngoi so a mû na mbi wango afa nyen na ndö ti mbi? Na ngoi so mbi wara tara mbi yeke sara ye tongana nyen? Mbi yeke mbeni Chrétien so ayeke biazo?’ (aÉph. 4:13). Tongana e gbu li ti e na ndö ti akiringo tënë ti e na ahundango ndo so, a yeke mû maboko na e ti hinga wala e maï na lege ti yingo.

6. Mbeni ye nde wa la alingbi ti mû maboko na e ti hinga wala e yeke zo ti yingo?

⁶ Ti hinga wala e yeke zo ti yingo, peut-être na ambeni ngoi e bezoin mungo maboko ti ambeni zo. Bazengele Paul afa so zo ti mitele alingbi pëpe ti bâ so dutingo ti lo na gbele Nzapa ayeke nzoni ape. Me zo ti yingo ahinga bango ndo ti Nzapa na ndö ni. Lo hinga so Jéhovah aye sarango ye ti zo ti mitele pëpe (1 aCor. 2:14-16; 3:1-3). Mingi ni tongana mbeni ita akomanse ti sara ye ti zo ti mitele a-ancien so ayeke na bibe ti Christ ayeke bâ ni hio na ala yeke gi ti mû maboko na lo. Tongana a-ancien aye ti mû maboko na e, eskê e yeke yeda na awango ti ala nga e yeke sara ye alingbi na ni? Tongana e sara ni, e yeke fa so e ye ti ga zo ti yingo.—Zo-ti. 7:5, 9.

7. Ngbanga ti nyen la gï ti wara hingango ye ti Bible alingbi pëpe ti sara si e ga zo ti yingo?

⁷ Zia e girisa ape so gï ti wara hingango ye ti Bible alingbi pëpe ti sara si e ga zo ti yingo. Gbia Salomon ahinga lani ye mingi na ndö ti Jéhovah nga a zia même atënë so lo tene na ndara na yâ ti Bible. Me ambeni ngoi na pekoni, songo ti lo na Jéhovah awoko na lo ngbâ be-ta-zo na lo ape (1 aGbia 4:29, 30; 11:4-6). Tongaso, na ndö ti hingango ye ti Bible so e wara ni, nyen la a lingbi e sara? A lingbi e ngbâ ti kpengba mabe ti e (aCol. 2:6, 7). E yeke sara ni tongana nyen?

8, 9. (a) Nyen la ayeke mû maboko na e ti tene mabe ti e aluti ngangu? (b) Na ngoi so e yeke manda ye nga e yeke gbu li ti e, nyen la e yeke gi? (Bâ foto so ayeke na tongo nda ti article so.)

 ⁸ Paul awa lani akozo Chrétien ti “sara kue ti ga abiazo”. (aHéb. 6:1). Nyen la e lingbi ti sara laso ti sara ye alingbi na wango ti Paul so? Mbeni kpengba ye so e lingbi ti sara ayeke ti manda buku “Zia ala ngbâ na yâ ti ndoye ti Nzapa.” Tongana mo manda buku so kue ayeke mû maboko na mo ti bâ tongana nyen la mo lingbi ti sara ye alingbi na amama-ndia ti Bible na yâ ti fini ti mo. Tongana mo hunzi ti manda buku so awe, ambeni mbeti ayeke dä so mo lingbi ti manda ni ti mû maboko na mo ti kpengba mabe ti mo (aCol. 1:23). A lingbi nga mo gbu li ti mo na ndö ti aye so mo manda nga hunda na Jéhovah ti mû maboko na mo ti bâ tongana nyen la mo lingbi ti sara ye alingbi na ni.

⁹ Na ngoi so e yeke manda ye nga e yeke gbu li ti e, ye so e yeke gi ayeke ti duti na nzara mingi ti zia ngia na bê ti Jéhovah nga ti mä yanga ti lo (Ps. 40:8; 119:97). Na oko ngoi ni, e yeke sara kue ti ke aye so alingbi ti kanga lege na maïngo ti e na lege ti yingo.—Tite 2:11, 12.

10. Nyen la amaseka alingbi ti sara ti kpengba na lege ti yingo?

¹⁰ Tongana mo yeke maseka, mo yeke na ambeni mbilimbili ye so mo leke na bê ti mo ti sara na lege ti yingo? Na ngoi ti akota bungbi ti lango oko, mbeni ita so asara kua na Béthel ayeke sara ka lisoro na amaseka so ayeke gue ti wara batême kozo na kapa ni, lo yeke hunda ala na aye so ala leke na bê ti ala ti sara na lege ti yingo. Lo bâ so ala mingi agbu li ti ala nzoni na ndö ti fason so ala ye ti sara na Jéhovah na yâ ti angoi so ayeke ga. Ambeni aleke ti sara kua ti ngoi kue wala ti gue na ndo so a bezoin awafango tënë mingi dä. Me ambeni ahinga tënë so ala lingbi ti tene ape. Peut-être so aye ti tene so ala bâ so ala yeke na bezoin ape ti zia ambeni ye ti yingo na gbele ala ti sara? Tongana mo yeke maseka, hunda terê ti mo: ‘Mbi yeke sara aye ti yingo gï ndali ti so babâ na mama ti mbi aye ti tene mbi sara ni? Mbi wani mbi yeke na kpengba songo na Nzapa?’ Tâ tënë, a lingbi e kue e zia ambeni ye ti yingo na gbele e atâa e yeke maseka wala kota zo. Aye so e zia na gbele e ayeke mû maboko na e ti kpengba mingi na lege ti yingo.—Zo-ti. 12:1, 13.

11. (a) Ti maï biani na lege ti yingo, nyen la a lingbi e sara? (b) Tapande wa ti Bible alingbi ti mû maboko na e?

¹¹ Tongana e hinga ndo so a lingbi e gi ti maï dä, a yeke nzoni e komanse ti sara achangement so ayeke mû maboko na e ti gue na li ni. Ti ga zo ti yingo ayeke kota ye mingi. A yeke biani tënë ti fini wala kuâ (aRom. 8:6-8). Ye oko, ti tene e ga biazo aye pëpe ti tene e ga mbilimbili-kue. Yingo ti Jéhovah alingbi ti mû maboko na e ti sara achangement so e bezoin ni. Me a lingbi e sara ngangu. A sara angu mingi awe, John Barr, so ayeke lani mbeni membre ti Bebungbi, atene na ndö ti Luc 13:24, atene: “Azo mingi atï ndali ti so ngangu so ala sara alingbi ape ti mû lege na ala ti kpengba.” A lingbi e sara ye tongana Jacob so atiri na mbeni ange juska a iri tënë nzoni na ndö ti lo (Gen. 32:26-28). Atâa so mandango Bible alingbi ti duti mbeni ye so anzere na zo, a lingbi e pensé pëpe so Bible ayeke tongana mbeni senge mbeti so a sû ni ti tene zo adiko ni gï ti tene terê ti lo anzere. A lingbi e gi ti wara apendere tâ tënë so alingbi ti mû maboko na e.

12, 13. (a) Nyen la ayeke mû maboko na e ti sara ye alingbi na aRomain 15:5? (b) Tapande ti Pierre nga na awango so lo mû alingbi ti mû maboko na e tongana nyen? (c) Nyen la mo lingbi ti sara ti duti zo ti yingo? (Bâ encadré “ Ambeni ye so mo lingbi ti sara ti maï na lege ti yingo.”)

¹² Tongana e sara ngangu ti maï na lege ti yingo, yingo vulu ayeke mû maboko na e ti changé fason so e yeke pensé na ni. Na mungo maboko ti yingo, yeke yeke e lingbi ti komanse ti pensé tongana Christ (aRom. 15:5). Na ndö ni, yingo alingbi ti mû maboko na e ti zi na yâ ti bê ti e anzara ti mitele nga ti maï asarango ye so ayeke zia ngia na bê ti Nzapa (aGal. 5:16, 22, 23). Tongana e bâ so li ti e  ayeke gï na ndö ti aye ti sese wala na ndö ti anzara ti mitele, a lingbi e ngbâ lakue ti sara ngangu. A lingbi e ngbâ ti hunda Jéhovah ti mû na e yingo vulu ti mû maboko na e ti zia li ti e gï na ndö ti aye so ayeke na lege ni (Luc 11:13). Dabe ti mo na bazengele Pierre. Fani mingi na yâ ti fini ti lo, lo sara ye tongana zo ti yingo ape (Mat. 16:22, 23; Luc 22:34, 54-62; aGal. 2:11-14). Me lo ngbâ lakue ti sara ngangu. Na lege ti mungo maboko ti Jéhovah, yeke yeke Pierre amanda ti pensé tongana Christ. E nga e lingbi ti sara tongaso.

¹³ Ambeni ngoi na pekoni, Pierre afa ambeni mbilimbili ye so e lingbi ti sara. (Diko 2 Pierre 1:5-8.) Tongana e “sara ngangu kue” ti duti na anzoni sarango ye, na tapande kangango nzara ti bê, gbungo ngangu nga na yengo terê ti aita, ayeke mû maboko na e ti ngbâ ti gue na li ni na lege ti yingo na e yeke ga azo ti yingo. Lâ oko oko, e lingbi ti hunda terê ti e: ‘Sarango ye wa la mbi lingbi ti gi ti duti na ni laso si mbi gue na li ni na lege ti yingo?’

14. Ti duti zo ti yingo ayeke ndu fini ti e tongana nyen?

¹⁴ Tongana e yeke pensé tongana Christ ayeke sara ngangu na ndö ti sarango ye ti e na place ti kua wala na ekole, na ndö ti tënë ti yanga ti e nga na adesizion so e yeke mû lâ na lâ. Adesizion ni so ayeke fa wala e yeke gi ti sara ye tongana Christ. So e yeke azo ti yingo, e ye pëpe si mbeni ye abuba yâ ti songo ti e na Babâ ti e ti yayu. Tongana e wara atara, songo so e yeke na ni na Jéhovah ayeke pusu e ti dö sese. Kozo ti mû adesizion, e yeke luti nga e yeke gbu li ti e na ndö ti ahundango ndo so: ‘Amama-ndia ti Bible wa la alingbi ti mû maboko na mbi? Tongana fade a yeke Christ la, nyen lo yeke sara? Desizion wa la ayeke nzere na Jéhovah?’ Ti mû maboko na e ti gbu li ti e tongaso, zia e bâ ambeni tapande. Na yâ ti atapande ni oko na oko, e yeke gi ti bâ mama-ndia ti Bible so alingbi ti mû maboko na e ti mû nzoni desizion.

15, 16. Tongana nyen la ti pensé tongana Christ alingbi ti mû maboko na e ti mû desizion na ndö ti (a) sorongo zo ti sara mariage na lo? (b) sorongo akamarade?

¹⁵ Sorongo mbeni zo ti sara mariage na lo. Mama-ndia ni ayeke na 2 aCorinthien 6:14, 15. (Diko ni.) Paul afa polele so zo ti yingo ayeke nde mingi na zo ti mitele. Ala lingbi pëpe ti duti na oko bango ndo na ndö ti aye. Tongana nyen la mama-ndia so alingbi ti mû maboko na mo ti soro zo so mo ye ti sara mariage na lo?

¹⁶ Sorongo akamarade. Bâ mama-ndia so ayeke na 1 aCorinthien 15:33. (Diko ni.) Zo ti yingo ayeke sara kamarade pëpe na azo so alingbi ti sara si mabe ti lo awoko. Ahundango ndo wa la alingbi ti mû maboko na mo ti sara ye alingbi na mama-ndia so? Na tapande, mama-ndia so andu sarango songo na azo na lege ti Internet tongana nyen? A lingbi ti mû maboko na mo tongana nyen ti bâ wala mo yeke sara jeux na azo so mo hinga ala ape na ndö ti Internet?

17-19. Ti duti zo ti yingo ayeke mû maboko na mo tongana nyen (a) ti sara pëpe akua so ayeke senge senge? (b) ti leke na bê ti mo ti sara anzoni ye? (c) ti leke atënë so alondo?

¹⁷ Akua so alingbi ti kanga lege na zo ti maï na lege ti yingo. E yeke wara mbeni kpengba wango na yâ ti atënë so Paul atene na  amba ti lo aChrétien. (Diko aHébreu 6:1.) “Akusala so ayeke senge senge” so a lingbi e kpe ni ayeke akusala wa? A yeke akua so ayeke senge senge so alingbi pëpe ti mû maboko na e ti kpengba na lege ti yingo. Mama-ndia so alingbi ti mû maboko na e ti kiri tënë na mara ti ahundango ndo so: ‘Kua so alingbi ti ga na nzoni na zo wala ayeke gï senge senge kua? Eskê mbi lingbi ti dë buze so senge? Ngbanga ti nyen la a lingbi mbi bungbi pëpe na azo so ayeke gi ti changé aye na yâ ti dunia so?’

¹⁸ Leke ti sara ambeni ye na lege ti yingo. Na yâ ti fango tënë ti Jésus na ndö ti hoto, lo mû na e anzoni wango na ndö ti aye so e lingbi ti leke na bê ti e ti sara (Mat. 6:33). Zo ti yingo ayeke zia Royaume na kozo ndo na yâ ti fini ti lo. Mama-ndia so ayeke mû maboko na e ti kiri tënë na mara ti ahundango ndo so: ‘A lingbi mbi gue na dasendagi na peko ti so mbi hunzi mandango mbeti na lycée? A lingbi mbi yeda ti sara mara ti kua so?’

¹⁹ Atënë so alondo. Tongana e mä terê na amba ti e ape, wango so Paul amû na aChrétien ti Rome alingbi ti mû maboko na e (aRom. 12:18). So e yeke adisciple ti Christ, e yeke sara kue ti “duti na siriri na azo kue.” Na ngoi so papa alondo, e yeke sara ye tongana nyen? A yeke ngangu na e ti yeda na bango ndo ti mbeni zo nde? Wala a hinga e tongana azo so ayeke “sara si siriri amaï”?—Jacq. 3:18.

20. Ngbanga ti nyen la mo ye ti gue na li ni na lege ti yingo?

²⁰ So ayeke gï ambeni tapande ti aye so afa so ti gbu li na ndö ti amama-ndia ti Nzapa ayeke mû maboko na e ti mû adesizion so afa so yingo ti Nzapa afa lege na e. Ti duti zo ti yingo ayeke mû maboko na e ti duti na ngia mingi na yâ ti fini ti e. Robert, so a sara tënë ti lo fade na tongo nda ti article so, atene: “Na peko ti so mbi lë kpengba songo na Jéhovah, mbi ga nzoni koli nga nzoni babâ. Mbi yeke nga na ngia.” E nga kue e lingbi ti wara mara ti anzoni ye so tongana e sara kue ti maï na lege ti yingo. Laso e yeke duti na ngia na yâ ti fini ti e nga na yâ ti ngoi so ayeke ga e yeke wara “fini so ayeke tâ fini ni biani.”—1 Tim. 6:19.