1, 2. Er anmgbian ugen lu civir Aôndo nahan kpa, ka nyi kav ér ngi saan unu, man a er nena sha kwagh shono?

ANMGBIAN ugen iti na ér Robert. Yange er batisema shighe u lu anyom pue kar la, kpa tôô mimi ne beelee. A kaa wener: “Yange m er kwaghbo ga, kpa m gbaa eren akaa di tsô mer gba u me er. Sha ashe yô, lu er m taver ken jijingi nahan, sha ci u m bunden mkombo ga; shi hanma inyom yô, m er ishuen pania iwer igen. Kpa kwagh ugen gema lu saan mo.”

² Robert yange fa kwagh u lu zan un iyol jighilii ga zan zan kar eren kwase. Yange una memen vea kwase na yô, ve lamen ve taan ayol a ve ikyaren sha akaa a ken Bibilo. Kwase na fa Bibilo tsema tsema nahan i taver un u nan mlumun sha mpin ga. Kpa Robert yô, ashighe kpishi kunya u kôr un a iyol na, sha ci u a fatyô u nan mlumun ga. Robert kaa ér: “Lu inja er m fa kwagh môm ga nahan. M kaa ken ishima mer, ‘aluer ka u me hemen kwase wam ken mcivir u Aôndo yô, gba u me er kwagh sha ikyaa ne.’ ” Man ka kwagh u er je la. A kaa ér: “M de akaa cii m time ken Bibilo, m time, m time, m time. Maa kwagh hii u zan sha hwange. M zua a mfe, kpa kwagh u hemban cii yô, m ya ikyar kôôsôô a Yehova.”

3. (a) Ka nyi se fatyô u henen ken kwagh u Robert laa? (b) Ka mbampin mba nyi se lu timen sha mi?

³ Se fatyô u henen akaainjaa ken kwagh u er Robert la. Alaghga se lu a mfe sha akaa agen ken Bibilo, shi se zaan mbamkombo  hanma shighe, kpa ngula tseegh tese ér maa se hingir mba kwagh u ken jijingi a gbe se ishima ga. Shin alaghga se vande eren akaa a tesen ér se za ikyura ken mcivir u Aôndo, kpa zum u se hide se time sha mlu wase yô, se nenge ser gba u se seer nan ishima sha akaa a ken jijingi. (Phil. 3:16) Se lu nan mlumun sha mbampin mbavesen utar ken ngeren ne, mba vea wase se, se za hemen u lun ior mba akaa a ken jijingi a gbe ve ishima yô: (1) Ka nyi ia wase se u tôvon fan aluer mimi je akaa a ken jijingi gba se ishima? (2) Se er nan ve kwagh u mciviraôndo una hemba gban se ishima, shi se za hemen u vesen ken jijingi? (3) Aluer kwagh u mciviraôndo gba se ishima yô, kwagh la una wase se ken akaa a se eren ken uma ayange ayange la nena?

4. Kwaghwan u ken Mbaefese 4:​23, 24 la ngu sha ci u ana?

⁴ Shighe u se hingir mbacivir Aôndo la, se gema mlu wase. Mgem ne bende a hanma vegher u uma wase cii. Man kwagh ne kighir shighe u se er batisema la ga. Bibilo kaa a vese ér: “Hingir nen hegh ken jijingi u mhen wen.” (Ef. 4:​23, 24) Ken zwa Grika yô, ishember i ‘hingir hegh’ la, tese kwagh u a lu zan hemen zan zan yô. Nahan gba u se cii se za hemen u geman mlu wase. Mba ve civir Yehova ica i gbe je kpa, gba u vea za hemen u lun a aeren a sha inja i or u civir Aôndo la her.​—⁠Fil. 3:​12, 13.

5. Ka mbampin mba nyi vea wase se u tôvon fan mlu wase?

⁵ Gba u se tôv sha mlu wase sha mimi, sha er se seer eren akaa a tesen ér se mba civir Aôndo sha gbashima, shi se za hemen nahan yô. Sea lu iyev shin sea bee iyol kpa, hanmô wase nana fatyô u pinen iyol i nan mbampin mban: ‘M nenge a mbamgem ken a mo mba ve tese ér m ngu nôngon u hingir or u mcivir u Aôndo a hemba gban nan ishima kpa? M ngu hingir er Kristu nahan kpa? M tesen sha ieren kua mlu wam ken mbamkombo mba Mbakristu mer mciviraôndo gbam ishima tsung kpa? Iliam yam ka i tese ér ka akaa a nyi a saren mo? Hwe man iyolwuhan yam kua gbenda u m henen Bibilo la man ieren yam shighe u i wem kwagh la ka i tese nyi sha kwagh wama? Ka mea tagher a imeen nahan m er nena? M hingir Orkristu u nan vie ken jijingi vee?’ (Ef. 4:13) Aluer se hen sha mbamlumun mba se fatyô u nan sha mbampin mban yô, vea wase se u fan er se lu vesen ken jijingi la.

6. Zum u se lu tôvon fan er mciviraôndo wase a lu yô, ka nyi igen kpa alaghga a gba u se ere?

⁶ Ashighe agen yô, cii man se tôv se fa er mciviraôndo wase a lu yô, a gba u se ker iwasen hen mbagenev. Apostoli Paulu yange kaa ér or u akaa a iyolough a hembe gban nan ishima yô, nan nengen a ibo i nan sha ishigh ki Aôndo ga. Kpa or u akaa a ken jijingi a hembe gban nan kwagh yô, ka nan fa mnenge u Aôndo shi nan kav er aeren a iyolough a doo un ishima ga yô. (1 Kor. 2:​14-16; 3:​1-3) Er mbatamen ka ve lu a mhen u Kristu yô, mba ngôôr kaven aeren a tesen ér mhen u iyolough hii u jilen ken or ga. Ka vea wa se kwagh sha mi nahan, se ngohol kwaghwan shon je he? Aluer se er nahan yô, se mba tesen ser, sar se u seer zan hemen ken mciviraôndo wase.​—⁠Orpa. 7:​5, 9.

7. Bibilo i fan tseegh ia na or nana hingir or u kwagh u Yehova a gbe nan ishima ga sha ci u nyi?

⁷ Fa wer, aluer or fa Bibilo tseegh maa tese ér nan hingir or u akaa a ken jijingi a gbe nan ishima ga. Tor Solomon u sha ayange a tsuaa la fa kwagh u Yehova kôr inya. I va nger akaaôron a Solomon agen ken Bibilo je kpaa. Kpa ken masejime yô, kera za hemen u civir Yehova sha mimi er or u kwagh u Yehova a gbe nan ishima ga. (1 Utor 4:​29, 30; 11:​4-6) Nahan, aluer se fa Bibilo tsembelee kpa, gba u shi se er kwagh ugen kpaa. Gba u se za hemen u taver jighjigh wase her. (Kol. 2:​6, 7) Nahan se er kwagh ne nena?

8, 9. (a) Ka nyi ia wase se ve se za hemen u taver ken jijingi? (b) Zum u se lu henen kwagh shi gbidyen kwar sha mi yô, doo u awashima wase a lu u eren nyi? (Nenge foto u a lu sha mhii u ngeren ne la.)

 ⁸ Paulu yange taver Mbakristu mba sha ayange a mbaapostoli la ishima nahan ér: “Za nen hemen sha mlu u vian la.” (Heb. 6:⁠1) Ka nyi se er sha u dondon kwaghwan u Paulu la nyiana? Kwagh môm u i doo u se er hange hange yô, ka u henen takerada u “Lu Nen ken Dooshima u Aôndo” la. Aluer u hen takerada la u bee yô, kwagh la una wase u u dondon akaawan a Bibilo ken uma wou. Aluer u vande henen u been kpa shi u fatyô u henen ityakerada igen sha er jighjigh wou u nan una tenger ga yô. (Kol. 1:23) Ka u gbidye kwar zulee shi u er msen sha er u dondo kwagh u u lu henen la kpa?

⁹ Umbur wer er se lu henen Bibilo shi gbidyen kwar sha mi la, awashima wase i lu u eren ishima i Yehova shi dondon atindi na. (Ps. 40:8; 119:97) Shi se hen u palegh akaa a aa yange se u vesen ken jijingi la cii.​—⁠Titu 2: 11, 12.

10. Ka nyi agumaior aa er ve aa lu mba vian ken jijingii?

¹⁰ Aluer u ngu gumor yô, akaa nga a u we ishima u eren ken mcivir u Yehova kpa? Anmgbian ugen u a eren tom shin Betel ka una za mkohol u ningir yô, a lam a mba ve lu eren batisema la. Ve kpishi ka i lu agumaior. Anmgbian ne ka a pine ve akaa a ve we ishima u eren ken mcivir u Yehova yô. Ve mbagenev kpishi ka ve ôr kwagh u a tese ér ve fa kwagh u ve soo u eren ken mcivir u Yehova jighilii yô; er u eren Yehova tom hanma shighe, shin za eren tom hen ape kwagh a hembe gban sha mbapasen loho u Tartor nahan. Kpa ashighe agen yô, agumaior agen ka a fa ga. Kwagh la tese ér ve nenge ér gba u vea fa akaa a vea er ken mcivir u Yehova gaa? Aluer u ngu gumor yô, pine iyol you wer: ‘M eren akaa ken mcivir u Yehova sha ci u mbamaren av soo er m er yumu? M ya ikyar kôôsôô a Yehova kpa?’ Jighilii yô, gba u se mbacivir Yehova cii se lu a akaa a se we ishima u eren ken mcivir na yô, ka agumaior tseegh ga. Aluer se er nahan yô, se seer vesen ken jijingi.​—⁠Orpa. 12:​1, 13.

11. (a) Cii ve se za hemen u vesen ken jijingi sha mimi yô, gba u se er nyi? (b) Ka ikyav i ana ken Bibilo se fatyô u dondono?

¹¹ Zum u se nenge a vegher u i doo u se seer nôngon yô, se er nahan fese sha er se za hemen u vesen ken jijingi yô. Gba hange hange u se lu ior mba akaa a ken jijingi a gbe ve ishima yô. Kwagh ne una fatyô u nan se uma, kpa aluer ka nahan ga yô, ka ku. (Rom. 8:​6-8) Nahan kpa u se vian ken jijingi la maa tese ér se kera mba a myen ga ze. Jijingi u Yehova una wase se u sôron ape se yen la. Shi se ayol a ase kpa gba u se nôngo kwagh kpoghuloo. Shighe u Anmgbian John Barr u lu môm ken Mbahemenev mba Shin Itine la, lu lamen sha Luka 13:24 yô, a kaa ér: “Mbagenev hemba ve u nyôron hen hunda u hogholoo la, sha ci u ve kanshio u henen Mkaanem ma Aôndo zulee shi dondon kwagh u ve hen la sha er vea via ken jijingi yô.” Gba u se lu er Yakob u gba uwer ga, nôngo wav a ortyom zan zan kar zuan a iveren la nahan. (Gen. 32:​26-28) Alaghga Bibilo i ôron ia doo se, kpa doo u se ôr i ayem ayem er ka antyakeradav mba ka i nger sha u nan ior msaanyol di tsô la ga. Gba u se ker akaainjaa ker a aa wase se yô.

12, 13. (a) Ka nyi ia wase se u eren kwagh u i nger ken Mbaromanu 15:5 laa? (b) Ikyav i apostoli Peteru man kwaghwan na la una fatyô u wasen se nena? (c) Ka nyi u er ve u lu or u vian ken jijingi? (Nenge ngeren u kiriki u lu a itinekwagh ér “Akaa a U Er ve U Seer Vesen ken Jijingi Yô” la.)

¹² Er se lu nôngon ser se lu mba kwagh u ken jijingi a gbe se ishima la, icighan jijingi una na se agee a geman mhen wase. Sha iwasen i icighan jijingi yô, kure kure tsô se gema henen kwagh er Kristu nahan. (Rom. 15:⁠5) Shi icighan jijingi una wase se u dughun asaren a iyolough ken avese kera geman lun a aeren a Aôndo a soo la. (Gal. 5: 16, 22, 23) Aluer se nenge ser ishima yase ngi zeren henen sha akaa a iyolough shin asaren a iyolough kpa, mayange se gba uwer ga. Za hemen u sônon Yehova a na u jijingi na, nahan Una kôôm mhen wou sha er u hide u ver ishima sha akaa a injaa yô. (Luka 11:13) Umbur kwagh u apostoli Peteru. Ashighe agen yange a er kwagh er ka or u nan vie ken jijingi ga nahan. (Mat. 16:​22, 23; Luka 22:​34, 54-62; Gal. 2:​11-14) Kpa mayange gba uwer ga. Kure kure tsô, Yehova wase un gema henen kwagh er Kristu nahan. Se kpa se fatyô u eren nahan.

¹³ Shighe karen yô, Peteru va ter aeren a a fatyô u wasen se yô. (Ôr 2 Peteru 1:​5-8.) Aluer se ‘nôngo ngeelee’ se mba a aeren er iyolkôrontsaha man ishimataver shi anmgbianev doo se ishima yô, kwagh ne una wase se u lun ior mba kwagh u ken jijingi a hembe gban ve ishima yô. Hanma iyange yô pine iyol you wer, ‘Ka ieren i nyi me ver ishima sha mi nyian, sha er me za hemen u vesen ken jijingi?’

14. Aluer kwagh u ken jijingi gba se ishima yô, se tese sha akaa a se eren ken uma wase la nena?

¹⁴ Aluer se mba a mhen u Kristu yô, se wa ikyo sha iliam kua ieren yase hen ijiirtom shin ken makeranta kua sha akaa a se tsough ayange ayange la. Akaa la aa tese ér se mba nôngon kpoghuloo ser se lu mbadondon Kristu. Er se lu mba kwagh u ken jijingi a gbe se ishima yô, se soo ser kwagh môm a vihi ikyar i se ye a Ter wase u sha la ga. Zum u se tagher a ameen yô, mhen u Kristu la una wase se u hemban a. Shighe u i gbe u se tsua kwagh u se er yô, doo u se gbidye kwar sha mbampin mban: ‘Ka kwaghwan u ken Bibilo u nyi una wasem u tsuan kwagh nee? Aluer ka Kristu nahan ma a er nena? Ka nyi me er ve a lu sha ishima i Yehova?’ De se nenge akav kpuaa sha er se fa er se tsaase mhen wase yô. Hanma ikyav yô, se zua a kwaghwan u ken Bibilo u una fatyô u wasen se u tsuan kwagh u se er sha inja yô.

15, 16. Aluer se mba henen kwagh er Kristu nahan yô, se er kwagh sha kwaghfan zum se soo u (a) tsuan ikyar u ken ivese nena? (b) tsuan azende ase nena?

¹⁵ U tsuan ikyar u ken ivese. U zua a Kwaghwan u ken Bibilo ken 2 Mbakorinte 6:​14, 15. (Ôr.) Mkaanem ma Paulu ôr ne tese wang ér or u civir Aôndo nan kaha a or u nan civir un ga la. Gbenda u ve nengen kwagh la u zua ga. Se dondo kwaghwan ne zum u se lu tsuan kwase shin nom u se er la nena?

¹⁶ Azende. Nenge ase kwagh u Bibilo i we ken 1 Mbakorinte 15:33 ne. (Ôr.) Or u kwagh u Yehova a gbe nan ishima yô, mayange nana kôr ijende a ior mba vea na jighjigh u nan una ndôhôr ga. Ka mbampin mba nyi vea wase se u dondon kwaghwan laa? Ikyav i tesen yô, me dondo kwaghwan la sha gbar u ajiir a lamen a ior a sha Intanet la nena? Shin aluer i lôhô u er u gbidye gyeem sha Intanet vea ior mba u fe ve ga nahan, u er nena?

17-19. Aluer akaa a ken jijingi gba u ishima yô, kwagh la una wase u (a) u palegh u zendan agbilinakaa ityô nena? (b) u tsuan akaa a u er ken uma wou nena? (c) sôron ayôôso nena?

¹⁷ Akaa a a yange or u vesen ken jijingi yô. Paulu yange ôr mbacivir Aôndo a na  imôngo mkaanem ma ma lu icintan yô. (Ôr Mbaheberu 6:⁠1.) Ka nyi i lu “aeren a a lu kpenegh” a i gbe u se palegha? Ka nyityôkwagh i ia yange se u taver ken jijingi cii. Kwaghwan ne una wase se u nan mlumun sha mbampin amba er: Kwagh u m soo u eren ne ngu môm ken aeren a iyolougho? M nyôr iyol ken kpenga u i lu kaan ér ka u van a inyaregh nee? Er nan i doo u me nyôr nongo a ior mba ve lu nôngon ér vea sôr tar la ga?

¹⁸ Akaa a u we ishima u eren ken mcivir u Yehova yô. Mkaanem ma Yesu ôr ken Ityesen i sha Uwo la ma a kwaghwan u injaa u una wase se, se fa u tsuan akaa a se er yô. (Mat. 6:33) Or u akaa a ken jijingi a gbe nan ishima yô, ka nan wa ishima u eren akaa a tesen ér nan ngu keren Tartor u Aôndo hiihii. Aluer se mba a kwaghwan ne ken ishima yô, kwagh la una wase se u nan mlumun sha mbampin mban: ‘M za yunivasiti zum u m bee kôleeji yôô? Doo u me lumun hanma tom ciilii?’

¹⁹ Ayôôso. Kwagh u Paulu wa anmgbianev mba ken tiônnongo u ken Roma la una wase se u sôron ayôôso nena? (Rom. 12:18) Se mbadondon Kristu ka se nôngo ser se ‘lu bem a ior cii.’ Nahan shighe u ayôôso a due yô, se er nena? Ka i taver se u den kwagh shon shin i fa se ér se mba ior ‘mba ve ker numu’?​—⁠Yak. 3:18.

20. Er nan u soo u seer vian ken jijingi?

²⁰ Akav a se ter kpuaa ne tese er aluer se mba gbidyen kwar sha akaawan a Aôndo ve, aa wase se u tsuan akaa sha gbenda u tesen ér jijingi na ngu hemen se yô. Aluer kwagh u Yehova gba se ishima yô, a hemba saan se iyol shi se zua a mkom. Robert u se ter kwagh na ken mhii u ngeren ne la kaa ér: “Yange m ye ikyar i mimi vea Yehova yô, m hemba lun nom kua ter u injaa. Kwagh kuman mo shi saan mo iyol kpaa.” Aluer se na ishima u eren akaa a a wase se u seer vesen ken jijingi yô, se kpa se zua a averen. Aluer se via ken jijingi yô, se hemba zuan a mkom ken uma hegen shi se va zua a “uma u a lu uma jim la.”​—⁠1 Tim. 6:⁠19.