1, 2. (a) Wanpela brata i pilim olsem wanem long save bilong em long sait bilong bilip? (b) Em i mekim wanem bilong kamap strong long bilip?

ROBERT i kisim baptais taim em i tineja, tasol em i no pilim tok i tru. Em i tok: “Mi no bin mekim rong, tasol mi mekim wok bilong God bikos em samting mi mas mekim. Ol narapela i tingim mi olsem man i gat strongpela bilip, mi save go long olgeta miting na planti taim long wanpela yia mi mekim wok painia haptaim. Tasol mi no mekim wanpela samting.”

² Robert i no luksave long samting em i no bin mekim i go inap long taim em i marit. Em na meri bilong em i save lusim sampela haptaim long givim ol askim bilong Baibel long tupela yet. Meri bilong Robert i stap strong long bilip, olsem na em i save bekim gut ol askim bilong Robert. Tasol planti taim Robert i no save long ol bekim, olsem na em i save pilim sem. Robert i tok: “I olsem mi no save long wanpela samting. Mi tokim mi yet olsem, ‘Sapos mi laik stap het bilong meri husat i stap strong long bilip, mi mas mekim sampela samting.’” Robert i kirap long stadi long Baibel. Em i tok: “Mi wok long stadi long Baibel, na isi isi save bilong mi i wok long i go bikpela. Mi kliagut long ol tok bilong Baibel, na bikpela samting moa em mi kisim pasin bilong pas gut wantaim Jehova.”

3. (a) Yumi inap kisim wanem skul long stori bilong Robert? (b) Yumi bai stori long wanem 3-pela askim long dispela stadi?

 ³ Yumi inap kisim wanpela gutpela skul long stori bilong Robert. Ating yumi save long sampela tok bilong Baibel, na oltaim yumi go long ol miting bilong kongrigesen, tasol ol dispela samting tasol o no mekim na yumi kamap strong long bilip. O ating yumi winim pinis sampela mak, tasol taim yumi skelim yumi yet, yumi luksave olsem i gat sampela samting moa yumi mas mekim bilong kamap strong long bilip. (Fili. 3:16) Bilong helpim yumi long wok yet long kamap strong long bilip, yumi bai bekim 3-pela bikpela askim long dispela stadi: (1) Wanem samting inap helpim yumi long skelim bilip bilong yumi? (2)  Olsem wanem yumi inap kisim pasin bilong bilip na wok yet long kamap strong? (3) Olsem wanem pasin bilong stap strong long bilip inap helpim yumi long wan wan de?

4. Tok i stap long Efesus 4:23, 24 i stret long husat?

⁴ Taim yumi kamap ol wokman bilong God, yumi mekim ol bikpela senis tru long laip bilong yumi. Ol dispela senis i mekim sampela samting long laip bilong yumi. Na taim yumi kisim baptais yumi mekim yet ol senis. Baibel i tok: “Oltaim tingting bilong [yumi] i mas wok long kamap nupela.” (Efe. 4:23, 24) Yumi gat sin, olsem na yumi mas wok yet long mekim ol senis. Maski ol wokman bilong Jehova i mekim wok bilong em inap longpela taim, ol i mas wok yet long stap strong long bilip.—Fili. 3:12, 13.

5. Yumi inap givim wanem ol askim long yumi yet bilong skelim bilip bilong yumi?

⁵ Bilong kamap strong long bilip na holimpas bilip, yumi mas skelim yumi yet. Maski yumi yangpela o lapun, yumi ken askim yumi yet olsem: ‘Mi luksave long ol senis mi mekim na dispela i soim olsem mi wok long kamap man bilong tingim ol samting long sait bilong bilip? Mi bihainim ol pasin bilong Krais? Toktok na pasin bilong mi long taim bilong miting i kamapim klia save bilong mi long sait bilong bilip? Toktok bilong mi i soim olsem mi gat wanem ol laik? Pesenel stadi bilong mi, klos na pasin bilong mi long stretim skin, na pasin mi bihainim long taim mi kisim tok kaunsel i kamapim olsem mi tingim ol samting long sait bilong bilip? Mi save mekim wanem long taim bilong traim? Mi kisim save long ol bikpela tok i tru olsem man i bikpela pinis long sait bilong bilip, na mi wok long kamap strongpela Kristen?’ (Efe. 4:13) Taim yumi skelim ol bekim bilong ol dispela askim, dispela bai helpim yumi long skelim sapos yumi wok long kamap strong long bilip.

6. Bilong helpim yumi long skelim bilip bilong yumi, yumi mas mekim wanem narapela samting?

⁶ Bilong helpim yumi long skelim bilip bilong yumi, sampela taim yumi mas kisim helpim long ol narapela. Aposel Pol i kamapim klia olsem man i save tingim ol samting bilong skin, em i no inap luksave long ol popaia em i mekim long ai bilong God. Tasol man i stap strong long bilip bai kliagut long tingting bilong God, na pasin bilong man i save tingting tasol long ol samting bilong skin. (1 Kor. 2:14-16; 3:1-3) Ol elda i holim wankain tingting olsem bilong Krais, planti taim ol bai luksave long ol mak bilong man i save tingting long ol samting bilong skin. Sapos ol i luksave olsem yumi holim dispela tingting na ol i givim tok kaunsel long helpim yumi, bai yumi redi long bihainim? Taim yumi bihainim tok kaunsel bilong ol, yumi soim olsem yumi laik kamap strong long bilip.—Sav. 7:5, 9.

7. Bilong wanem save bilong Baibel tasol i no inap helpim yumi long kamap strong long bilip?

⁷ Pasin bilong kisim save tasol long Baibel i no inap helpim man long kamap strong long bilip. King Solomon bilong bipo i save gut long pasin bilong Jehova. Ol tok bilong em i kamap buk bilong Baibel. Tasol bihain em i no stap gut long Jehova olsem wanpela bilipman. (1 Kin. 4:29, 30; 11:4-6) Olsem na maski yumi save long ol tok bilong Baibel, yumi mas mekim wanem samting moa? Yumi mas wok yet long kamap strong long bilip. (Kol. 2:6, 7) Tasol olsem wanem yumi inap kisim dispela pasin?

8, 9. (a) Wanem samting inap helpim yumi long sanap strong long bilip? (b) Yumi putim wanem mak taim yumi stadi na tingim tingim ol tok yumi kisim save long en? (Lukim piksa long kirap bilong stadi.)

⁸ Pol i kirapim ol Kristen long  “taitim bun na wok yet long kamap strong.” (Hib. 6:1) Yumi ken mekim wanem bilong bihainim tok bilong Pol long nau? Wanpela samting yumi mas mekim em long stadi long buk, “Stap Insait Yet Long Pasin Laikim Bilong God.” Taim yu stadi long olgeta sapta bilong dispela buk, bai yu luksave long olsem wanem yu inap bihainim ol stiatok bilong Baibel long laip bilong yu. Olsem wanem? Sapos yu stadi pinis long dispela buk, yu ken stadi long ol narapela buk we inap helpim yu long sanap strong long bilip? (Kol. 1:23) Yu save beten na tingim tingim ol samting yu inap mekim bilong bihainim ol tok yu kisim save long en?

⁹ Taim yumi stadi na tingim tingim ol tok, yumi mas wok strong long amamasim Jehova na putim mak long kisim pasin bilong bihainim lo bilong em. (Sng. 40:8; 119:97) Na tu, yumi mas wok strong long sakim ol samting we inap pasim yumi long kamap strong long bilip.—Tai. 2:11, 12.

10. Ol yangpela i mas mekim wanem bambai ol i ken kamap strong long bilip?

¹⁰ Sapos yu wanpela yangpela, yu putim pinis ol mak em yu laik winim long sait bilong bilip? Long taim bilong ol kibung sekit, wanpela brata long Betel i mekim olsem pasin bilong em long toktok wantaim ol lain husat i laik kisim baptais paslain long program i kirap. Planti bilong ol lain bilong kisim baptais em ol yangpela. Brata i save askim ol long wanem ol mak long sait bilong bilip em ol i tingting long winim. Planti bilong ol i givim ol bekim i kamapim klia olsem ol i tingting pinis long mekim wok bilong Jehova—ating ol i laik insait long sampela wok fultaim sevis o go autim tok long ol hap i sot long ol pablisa. Tasol sampela yangpela i no save long wanem ol mak ol bai winim taim ol i kisim baptais. Yu ting dispela i soim olsem ol i no bin pasim tok long bel long wanem ol mak ol bai winim long sait bilong bilip? Olsem wanpela yangpela, askim yu yet: ‘Mi mekim ol wok lotu bikos em samting papamama bilong mi i laik mi mas mekim? Mi go klostu moa long God long rot bilong lukautim na mekim pasin pren bilong mi wantaim em i go bikpela?’ Em tru olsem dispela tok long putim ol mak long sait bilong bilip i bilong helpim yumi olgeta. Taim yumi mekim olsem, bai yumi kamap strong moa long bilip.—Sav. 12:1, 13.

11. (a) Sapos yumi laik kamap strong long bilip, yumi mas mekim wanem? (b) Yumi ken bihainim eksampel bilong husat long Baibel?

¹¹ Taim yumi luksave olsem yumi mas mekim sampela senis, orait yumi mas mekim ol samting we inap helpim yumi long kamap strong long bilip. Em i bikpela samting long yumi mas kamap strong long bilip, long wanem, dispela bai helpim yumi long kisim laip. (Rom 8:6-8) Tasol dispela i no makim olsem yumi mas kamap gutpela olgeta na bai yumi kamap strong long bilip, nogat. Holi spirit bilong Jehova inap helpim yumi long kamap strong long bilip. Tasol yumi tu i mas wok strong long mekim olsem. Inap sampela yia i go pinis, John Barr em wanpela memba bilong Gavening Bodi, em i stori long tok bilong Luk 13:24, na em i tok: “Planti manmeri i pundaun long bilip bikos ol i no givim bel tru long kamap strong long bilip.” Yumi mas bihainim pasin bilong Jekop, em i no givap taim em i pait wantaim ensel i go inap long em i kisim blesing. (Stt. 32:26-28) Maski yumi amamas long ritim Baibel, yumi no ken ritim olsem wanpela stori nating bilong mekim man i amamas, nogat. Yumi mas wok strong long painim ol gutpela save na dispela bai helpim yumi.

12, 13. (a) Wanem samting inap helpim yumi long bihainim tok bilong Rom 15:5? (b) Olsem wanem eksampel na tok bilong Pita inap helpim yumi? (c) Yu ken mekim wanem bilong kamap strong long bilip? (Lukim blok “Rot Bilong Kamap Strong Long Bilip.”)

¹² Taim yumi wok long kisim ol pasin bilong tingim ol samting long sait bilong bilip, holi spirit bilong God bai strongim yumi long senisim tingting bilong yumi. Na isi isi yumi inap holim  tingting wankain olsem bilong Krais. (Rom 15:5) Na tu, holi spirit bai helpim yumi long rausim ol laik nogut bilong bodi, na kisim ol gutpela pasin em God i amamas long en. (Gal. 5:16, 22, 23) Sapos yumi luksave olsem yumi wok long kisim pasin bilong laikim mani kago o yumi bihainim ol laik bilong skin, orait yumi no ken givap. Wok yet long beten na askim Jehova long givim yumi holi spirit bambai dispela i ken stiaim yumi long tingim ol gutpela samting. (Luk 11:13) Tingim aposel Pita, sampela taim em i popaia na mekim ol pasin olsem bilong man i no gat bilip. (Mat. 16:22, 23; Luk 22:34, 54-62; Gal. 2:11-14) Tasol em i no givap. Isi isi Jehova i helpim em long holim wankain tingting olsem bilong Krais. Yumi tu inap mekim olsem.

¹³ Bihain Pita i kolim sampela samting yumi ken mekim bilong holim wankain tingting olsem Krais. (Ritim 2 Pita 1:5-8.) Taim yumi “wok strong tru” long kisim ol pasin olsem pasin bilong bosim bel, sanap strong, na pasin bilong laikim ol brata, dispela bai helpim yumi long wok yet long kamap strong long bilip. Long olgeta wan wan de, askim yu yet olsem, ‘Mi ken mekim wanem pasin long dispela de na bai mi inap kamap strong long bilip?’

14. Taim yumi tingim ol samting long sait bilong bilip, olsem wanem dispela inap helpim yumi?

¹⁴ Taim yumi holim wankain tingting olsem bilong Krais, dispela bai stiaim toktok bilong yumi, pasin bilong yumi long ples wok na long skul, na ol disisen yumi mekim long wan wan de. Ol dispela disisen bai soim olsem yumi wok strong long i stap disaipel bilong Krais. Olsem ol man i gat bilip, yumi no laik larim wanpela samting i bagarapim pasin bilong yumi long pas gut wantaim Papa bilong yumi long heven. Taim ol traim i painim yumi, tingting bilong Krais em yumi bihainim bai kirapim yumi long sakim ol dispela traim. Taim yumi mekim ol disisen, yumi bai tingim ol dispela askim: ‘Wanem ol stiatok bilong Baibel inap helpim mi long mekim disisen? Krais bai mekim wanem sapos dispela samting i painim em? Wanem disisen bai amamasim Jehova?’ Yumi ken skelim sampela eksampel long olsem wanem yumi inap mekim olsem. Long wan wan eksampel, yumi bai skelim stiatok bilong Baibel we inap helpim yumi long mekim gutpela disisen.

15, 16. Taim yumi holim wankain tingting olsem bilong Krais, olsem wanem dispela inap helpim yumi long mekim gutpela disisen long (a) makim poroman marit? (b) makim ol poroman?

¹⁵ Makim poroman marit.  Stiatok bilong Baibel we inap helpim yumi em 2 Korin 6:14, 15. (Ritim.) Tok bilong Pol i kamapim klia olsem man i save tingim ol samting long sait bilong bilip, em i no inap stap amamas tru wantaim wanpela husat i save tingim ol samting bilong skin. Olsem wanem dispela stiatok inap helpim yu long makim poroman marit?

¹⁶ Ol poroman. Tingim stiatok bilong Baibel long 1 Korin 15:33. (Ritim.) Man i save tingim ol samting long sait bilong bilip, em i no inap bung wantaim ol man husat inap bagarapim pasin bilong em long pas gut wantaim God. Wanem ol askim inap helpim yu long makim ol poroman? Olsem, hau bai dispela stiatok i stret long pasin bilong yusim sosel netwok? O yu bai mekim wanem sapos ol narapela em yu no save long ol i askim yu long pilai gem wantaim ol long Intenet?

17-19. Olsem wanem pasin bilong tingim ol samting long sait bilong bilip inap helpim yu long (a) abrusim ol samting we inap bagarapim bilip? (b) putim ol mak yu laik winim? (c) stretim ol hevi?

¹⁷ Ol samting we inap pasim yumi long kamap  strong long bilip. Tok bilong Pol long ol wanbilip Kristen em wanpela tok lukaut. (Ritim Hibru 6:1.) Wanem “ol wok i no gat as bilong en” em yumi mas abrusim? Em ol samting we inap bagarapim yumi long sait bilong bilip. Dispela stiatok inap helpim yumi long bekim planti askim we inap kamap long laip bilong yumi, olsem: ‘Dispela wok i insait long pasin bilong tingim laik bilong skin? I stret mi insait long dispela wok bisnis? Bilong wanem mi no ken insait long ol oganaisesen husat i ting ol inap stretim ol hevi?’

¹⁸ Ol mak bilong winim. Tok Jisas i mekim long Bikpela Tok Long Maunten i kamapim klia ol mak yumi mas putim bilong winim. (Mat. 6:33) Man husat i save tingim ol samting bilong lotu, em i save putim ol mak em i laik winim long sait bilong bilip. Taim yumi tingim dispela stiatok, dispela inap helpim yumi long bekim ol kain askim olsem: ‘I stret long mi go long bikpela skul? I stret long mi kisim dispela wok mani?’

¹⁹ Ol hevi. Olsem wanem tok kaunsel Pol i givim long kongrigesen long Rom inap helpim yumi long stretim ol hevi? (Rom 12:18) Olsem ol disaipel bilong Krais, yumi wok strong long “stap wanbel wantaim olgeta man.” Taim ol hevi i kamap, yumi save mekim wanem? Yumi hatwok long kamapim pasin wanbel? O yumi gat nem olsem man o meri bilong “kamapim pasin wanbel”?—Jems 3:18.

20. Bilong wanem yu laik mekim ol samting bilong kamap strong long bilip?

²⁰ Dispela em sampela eksampel long olsem wanem pasin bilong bihainim ol stiatok bilong Baibel inap helpim yumi long mekim ol disisen we i stret long man husat i save tingim ol samting long sait bilong bilip. Taim yumi tingim ol samting long sait bilong bilip, dispela inap helpim yumi long stap amamas long olgeta de na laip bilong yumi bai i gat as bilong en. Robert, em yumi stori long en long kirap bilong stadi, em i tok: “Bihain long mi strongim pasin bilong mi long pas gut wantaim Jehova, mi kamap gutpela man marit na gutpela papa. Mi amamas long ol samting mi gat pinis na mi stap amamas.” Yumi tu inap kisim wankain blesing sapos yumi wok strong long putim pasin bilong yumi long kamap strong long bilip i stap namba 1. Olsem ol manmeri i stap strong long bilip, yumi bai amamas tru long laip bilong yumi long nau na “laip tru” em klostu nau bai yumi kisim.—1 Tim. 6:19.