1, 2. Se a te mea ne fatoa iloa aka ne se taina e uiga ki tena tulaga faka-te-agaga, kae se a te mea ne fai ne ia?

NE PAPATISO a Robert a koi talavou a ia, kae e se fakatāua ne ia te munatonu i tena olaga. Ne fai mai: “E seki ai se mea ‵se ne fai ne au, kae ne fai loa ne au a mea masani. E foliga malosi au i te feitu faka-te-agaga, ‵kau faeloa ki fakatasiga kae paenia lagolago i nisi taimi i te tausaga. Kae e isi eiloa se mea e galo i au.”

² Kae ne seki iloa eiloa ne Robert a te mea telā ne galo i a ia ke oko ki te taimi ne avaga ei a ia. E uke a taimi ne sau‵tala sāle lāua mo tena avaga kae fakatau fai a fesili ki mataupu faka-Tusi Tapu. E seai se fakalavelave ki tena avaga telā se fafine malosi ‵ki faka-te-agaga, ke tali aka ne ia a fesili. Kae ko Robert ko oko loa i te mā me se uke ana mea e iloa. Ne fai mai: “E pelā eiloa me seai eiloa se mea e iloa ne au. Kae ne mafaufau au, ‘Kāfai e fai au pelā me se ulu a toku avaga i te feitu faka-te-agaga, e ‵tau o fai ne au se mea.’” Kae ne fai eiloa ne Robert. Ana muna: “Ne sukesuke, sukesuke, kae sukesuke malosi au ki te Tusi Tapu, ko tai iloa ne au a mea e uke. E se gata i ei, ko maua te iloaga kae ko te ‵toe mea tāua, ne ati aka ne au se fesokotakiga ‵pili mo Ieova.”

3. (a) Ne a mea e mafai o tauloto ne tatou mai i te tala o Robert? (e) Ne a manatu tāua ka sau‵tala tatou ki ei?

³ E uke a mea e mafai o tauloto ne tatou mai te tala a Robert. Kāti e  maua ne tatou te iloaga faka-te-Tusi Tapu, e ‵kau faeloa ki fakatasiga Kelisiano, kae e se ko mea fua konei e fai ei ke ma‵losi tatou i te feitu faka-te-agaga. Io me ko ga‵solo tatou ki mua, kae kafai ko iloilo ifo ne tatou a tatou eiloa, e lavea atu me e manakogina ke ga‵solo tatou ki mua i te feitu faka-te-agaga. (Fili. 3:16) Ke fesoasoani mai ke tumau i te gasolo ki mua, e manakogina ke tali ne tatou a fesili e tolu i loto i te mataupu: (1) Se a te mea ka fesoasoani mai ke iloilo faka‵lei aka ‵tou tulaga i te feitu faka-te-agaga? (2) E mafai pefea o ati aka ke malosi i te feitu faka-te-agaga kae gasolo ki mua e pelā me se tino faka-te-agaga? (3) E mafai pefea o fesoasoani mai a ‵tou malosi i te feitu faka-te-agaga ki ‵tou olaga i aso takitasi?

4. Ko oi e aofia i pati polopoloki i te Efeso 4:23, 24?

⁴ I te taimi ne fai tatou pelā me ne tavini a te Atua, ne fai ne tatou a ‵fuliga i ‵tou olaga. A te fuliga tenei ne pokotia ei ‵tou olaga kātoa. Kae seki gata i te taimi ne papatiso ei tatou. Ne fakamasaua mai ke “tumau koutou i te faka‵fouga o otou mafaufau.” (Efe. 4:23, 24) Ona ko tatou e se ne tino ‵lei katoatoa, e manakogina ke fai a ‵fuliga i ‵tou olaga. Ke oko foki ki tino kolā ko leva ne tavini atu ki a Ieova, e manakogina foki ke fakatumau ne latou te olotou ma‵losi i te feitu faka-te-agaga.—Fili. 3:12, 13.

5. Ne a fesili e fesoasoani mai ke iloilo ifo ne tatou a tatou eiloa?

⁵ Ke momea aka te ‵lei kae tumau a te malosi i te feitu faka-te-agaga, e manakogina se iloiloga ‵lei e uiga ki a tatou eiloa. Faitalia me fo‵liki io me ma‵tua tatou, e ‵tau o fesili ifo tatou taki tokotasi penei: ‘E mata, e lavea ne au a ‵fuliga i au ko gasolo ki mua ke fai pelā me se tino e mafaufau faka-te-agaga? E mata, oku uiga e ‵pau mo Keliso? E mata, e fakaasi atu ne au i oku lagonaga mo faifaiga i fakatasiga Kelisiano a te ‵poko o toku iloa i te feitu faka-te-agaga? E mata, e fakaasi atu ne au e auala i aku pati a mea kolā e manako au ki ei i te olaga? E fakaasi atu ne au pefea e auala i aku sukesukega totino, oku teuga, gatu mo te auala e saga atu ei au ki polopolokiga me ko au se tino pefea? E pefea oku lagonaga i taimi e fe‵paki ei au mo tofotofoga? E mata, ko gasolo atu au ki mua ke fai pelā me se Kelisiano telā e katoatoa tena matua ‵lei?’ (Efe. 4:13) A te mafau‵fau ki tali ki fesili konei, e mafai o fesoasoani mai ke iloa aka me pefea te ga‵solo o tatou ki mua i te feitu faka-te-agaga.

6. Ke iloilo aka a ‵tou tulaga faka-te-agaga, ne a mea e manakogina ne tatou?

⁶ Ke iloilo aka a ‵tou tulaga faka-te-agaga, e manakogina a fesoasoani mai nisi tino. Ne fakaasi mai ne te apositolo ko Paulo me i te tagata faka-te-foitino e se lavea ne ia ana mea ‵se e fai i mua o te Atua. I te suā feitu, a te tino faka-te-agaga e malamalama i te kilokiloga a te Atua penā foki mo te auala matagā e sasale ei te tagata faka-te-foitino. (1 Koli. 2:14-16; 3:1-3) E lavea ‵mao ne toeaina kolā e maua ne latou a te mafaufau o Keliso a fakailoga o te mafaufau faka-te foitino. Kafai e fesoasoani mai latou ki a tatou i feitu konā, e mata e toka tatou o talia a pati polopoloki konā? Mai te faiga tenā, e tuku atu ne tatou a te fakamaoniga o te ga‵solo o tatou ki mua i te feitu faka-te-agaga.—Fai. 7:5, 9.

7. Kaia e se lava fua i te iloaga faka-te-Tusi Tapu ke ‵mautakitaki a ‵tou feitu faka-te-agaga?

⁷ Ke masaua me i te fai mo fai se tino faka-te-agaga e se lava fua i te mauaga o te iloaga e uiga ki te Tusi Tapu. A te Tupu ko Solomona i aso mua, ne ‵lasi ki tena iloa e uiga ki a Ieova. Ne fai ana muna konei e pelā me se vaega o te Tusi Tapu. Kae i te fakaotiga, ne seki fakamaoni a ia ki a Ieova e pelā me se tino faka-te-agaga. (1 Tupu 4:29, 30; 11:4-6) Tela la, e se gata fua i te mauaga o te iloaga e uiga ki te Tusi Tapu, se a te mea e manakogina? E ‵tau o ati aka ke ‵mautakitaki a ‵tou feitu faka-te-agaga. (Kolose 2:6, 7) Se a te mea e ‵tau o fai ne tatou?

8, 9. (a) Se a te mea ka fesoasoani mai ke ati aka kae fakatumau ne tatou a te ‵tou feitu faka-te-agaga? (e) Se a te ‵tou fakamoemoega māfai e suke‵suke kae mafaufau ‵loto tatou? (Ke onoono ki te ata i te kamataga.)

⁸ Ne fakamalosi atu a Paulo ki Kelisiano i te senitenali  muamua ke ga‵solo ki mua i te feitu faka-te-agaga. Ne fakamalosi ne ia latou “ke na kausaki atu . . . ke ma‵tua ‵lei.” (Epe. 6:1) Ke tau‵tali ki fakaakoakoga a Paulo i aso nei, ne a mea e mafai ne tatou o fai? E tasi te auala ko te suke‵suke ki te tusi ko te “Ke Tumau i te Alofa o te Atua.” A te fakaoti faka‵lei o ‵tou sukesukega ki te tusi tenei, ka fesoasoani mai ke mafai o fakagalue ne tatou a fakatakitakiga faka-te-Tusi Tapu i ‵tou olaga. Kafai ko oti ne sukesuke koe ki te tusi tenei, e mata, e mafai o sukesuke koe ki nisi tusi foki kolā e fai ei a sukesukega ke fesoasoani atu o fakatumau ei tou fakatuanaki? (Ko. 1:23) E mata, e mafaufau ‵loto koe kae ‵talo atu ki te auala e mafai ei o fakagalue ne koe i tou olaga a mea kolā e sukesuke koe ki ei?

⁹ Ke masaua me i te taimi e suke‵suke kae mafau‵fau loto ei tatou, e ‵tau o fai ne tatou pelā me se fakamoemoega ke ati aka i ‵tou loto a te manakoga ke fakafiafia ne tatou a Ieova kae faka‵logo ki ana tulafono. (Sala. 40:8; 119:97) E se gata i ei, e ‵tau foki mo tatou o ga‵lue ke ‵teke atu ki mea kolā e mafai o fakalavelave mai ki ‵tou ga‵solo ki mua i te feitu faka-te-agaga.—Tito 2:11, 12.

10. Ne a mea e mafai o fai ne talavou ke ma‵losi latou i te feitu faka-te-agaga?

¹⁰ Kafai koe se talavou, e mata, e isi ne ou fakamoemoega faka-te-agaga mautinoa? I taimi e kau atu ei ki fono o atufenua, e faipati faeloa se taina e galue i te Peteli ki tino ka papatiso katoa koi tuai o kamata te polokalame. E tokouke mai i ei ne talavou. E fesili sāle a ia ki a latou me ne a olotou fakamoemoega faka-te-agaga e kausaki ki ei. E tuku atu ne te tokoukega a tali ma‵nino i a latou e fia tavini atu ki a Ieova—kāti ko te ‵kau atu ki so se vaega o te taviniga tumau io me tavini atu i koga e manakogina i ei a tino talai o te Malo. Kae i nisi taimi, e isi eiloa ne talavou e seai ne olotou tali. E mata, e fakaasi mai i ei me seki mautinoa i a latou a olotou fakamoemoega faka-te-agaga? E pelā me se talavou, ‵sili ifo ki a koe eiloa, penei: ‘E mata, e kau atu fua au ki polokalame faka-te-agaga ona ko oku mātua e ma‵nako ke fai au penā? E mata, e fakapilipili atu au ki te Atua mai te atiakaga o se fesokotakiga ‵pili mo ia?’ E tonu, a pati fakatonutonu konei ke ati aka a fakamoemoega faka-te-agaga e se fakapitoa fua mō talavou. A te faiga tenā ka fesoasoani atu ki tavini a Ieova ke ‵poko te faka-te-agaga.—Fai. 12:1, 13.

11. (a) Ke ga‵solo malosi ki mua i te feitu faka-te-agaga, se a te mea e manakogina ke fai ne tatou? (e) Se a te akoakoga mai te Tusi Tapu e manako ke fakaakoako tatou ki ei?

¹¹ Kafai ko iloa ne tatou a koga kolā e manakogina ke faka‵lei aka, e ‵tau mo tatou o gasue‵sue o fai se faiga mautinoa ke fesoasoani mai ke ga‵solo tatou ki mua. A te fai pelā me se tino faka-te-agaga se mea tāua ‵ki. E tonu, e faka‵na eiloa ki i ei a ‵tou ola mo te mate. (Loma 8:6-8) Kae ko te fai mo fai se tino faka-te-agaga e se fakauiga i ei me e ‵tau mo tatou o ‵lei katoatoa. E mafai o fesoasoani mai te agaga o Ieova ke ga‵solo tatou ki mua. Kae e manakogina a taumafaiga e uke. A John Barr, telā ne tavini atu i te Peteli e pelā me se sui o te Potukau Pule, ne fai mai ana pati i te fia tausaga ko oti, “E tokouke a tino ne ‵siga ki lalo ona ko te mea e se ma‵losi ke ga‵solo ki mua. E ‵tau mo tatou o fai pelā mo Iakopo, telā ne seki ‵fiu ke tafiti mo te agelu ke oko ki te taimi ko maua i ei ne ia a fakamanuiaga. (Kene. 32:26-28) E tiga eiloa e fakafiafia a te faiga o te akoga faka-te-Tusi Tapu, e se ‵tau o fakamoe‵moe tatou me i te Tusi Tapu e fai pelā me se tusi o tala telā ne tusi ke fakafiafia mai ki a tatou. E manakogina ke ga‵lue tatou i te sala‵ga o koloa faka-te-agaga kolā ka fesoasoani mai.

12, 13. (a) Se a te mea ka fesoasoani mai ke fakagalue aka ne tatou a te Loma 15:5? (e) E mafai pefea o fesoasoani mai ki a tatou a te fakaakoakoga mo pati fakatonutonu a Petelu? (i) Se a te mea e mafai ne koe o fai ke ati aka ei tou feitu faka-te-agaga? (Ke onoono ki te pokisi “ Auala e Mafai o Fakagalue ke Gasolo Koe ki Mua i te Feitu Faka-te-Agaga.”)

¹² Ke ga‵lue i te atiakaga ke ma‵losi i te feitu faka-te-agaga, a te agaga tapu e fakamalosi ne ia tatou ke fai a ‵fuliga i ‵tou mafaufau. Fakatasi mo te agaga tapu, e mafai ei o gasolo o kamata o ‵pau tou mafau‵fau mo te mafaufauga a Keliso. (Loma 15:5) E se gata i ei, ka fesoasoani mai ke tapale kea‵tea a manakoga faka-te-foitino kae ati aka ei ne tatou a  uiga ‵gali kolā e fakafiafia atu ki te Atua. (Kala. 5:16, 22, 23) Kafai e iloa ne tatou me ko fakatāua ne ‵tou mafaufau a te fia fai kope e uke io me ko manakoga faka-te-foitino, e se ‵tau o fiu tatou i te taua atu ki ei. Ke tumau eiloa i te akai atu ki te agaga tapu kae ka fesoasoani atu a Ieova ke ‵fuli tou mafaufau ke saga atu koe ki mea aoga. (Luka 11:13) Ke masaua te apositolo ko Petelu. E fakafia taimi i tena olaga, ne seki fai pelā me se tagata faka-te-agaga. (Mata. 16:22, 23; Luka 22:34, 54-62; Galu. 2:11-14) Kae ne seki ‵fiu eiloa a ia. Kae ne gasolo o fesoasoani atu a Ieova ki a ia, ne kamata o ati aka ne Petelu a te mafaufauga o Iesu. Kae e mafai foki o fai tatou penā.

¹³ Fakamuli, ne mafai ne Petelu o fai mai a mea e ‵tau o ga‵lue ki ei tatou. (Faitau te 2 Petelu 1:5-8.) Mai te “fakapalele otou mafi” ke ati aka ei a te loto pulea, kufaki, mo te alofa fakataina, ka fesoasoani mai ke ga‵solo ki mua i te mafaufau e pelā me se tino faka-te-agaga. I aso katoa, ke fesili ifo penei, ‛Se a te mea e mafai o fai ne au i te aso nei ke gasolo au ki mua i te feitu faka-te-agaga?’

14. Ka fesoasoani mai pefea a te mafaufau faka-te-agaga ki ‵tou olaga?

¹⁴ A te mafaufau e pelā mo Keliso ka fesoasoani mai ki ‵tou amioga i ‵tou koga ga‵lue, akoga, te auala e faipati ei mo fakaikuga e fai ne tatou i aso takitasi. Ka fakaasi mai i filifiliga konā i a tatou e ma‵nako ke fai pelā mo soko o Keliso. E pelā me se tino faka-te-agaga, e se ma‵nako tatou ki se isi mea ke fakalavelave mai ki ‵tou fesokotakiga mo ‵tou Tamana i te lagi. I taimi e fe‵paki ei mo tofotofoga, ka fesoasoani mai a ‵tou uiga fakaatua ke ‵kalo keatea tatou mai ei. I te taimi e fai ei a filifiliga, ka mafaufau ‵loto tatou ki fesili konei: ‛Ne a fakatakitakiga faka-te-Tusi Tapu ka fesoasoani mai ke fai aku filifiliga? Se a te mea ka fai ne Keliso i te tulaga tenei? Ne a fakaikuga e fakafiafia atu ki a Ieova?’ Ke fakaakoako tou mafau‵fau ki te tulaga tenei, ke na onoono aka tatou ki nai fakaakoakoga. E pelā me se fakaakoakoga, ka sau‵tala tatou ki se fakatakitakiga faka-te-Tusi Tapu telā e fesoasoani mai ke fai ne tatou a filifiliga ‵poto.

15, 16. E fesoasoani mai pefea a mafaufauga o Keliso e uiga ki te (a) filifiliga o se avaga. (e) filifiliga o ‵tou taugasoa.

¹⁵ Filifiliga o se avaga. E maua te fakatakitakiga fakavae i te Tusi Tapu i te 2 Kolinito 6:14, 15. (Faitau.) E fakaasi manino mai konei me e se mafai o ‵pau a mea e maua ne te tino faka-te-agaga mo te tino faka-te-foitino. E fakafetaui aka pefea te manatu tenei ki se filifiliga o se avaga?

¹⁶ Taugasoa. Onoono ki te akoakoga fakavae i te Tusi Tapu i te 1 Kolinito 15:33. (Faitau.) A te tino amioatua ka se fai taugasoa ki te tino telā e mafai o fakamasei ne ia tena tulaga faka-te-agaga. Ne a fesili e mafai o fesoasoani mai ke mafau‵fau ki te tulaga tenei? E pelā me se fakaakoakoga, i te auala fea e mafai ei o pokotia te fakaaogaga o te itaneti? Io me ne a au mea ka fai māfai e ‵kami koe ne se tino i te itaneti telā e se iloa ne koe ke tafao koulua?

17-19. Ka fesoasoani mai pefea a te mafaufau faka-te-agaga (a) ke ‵kalo keatea mai fakamoemoega sē aoga? (e) ke kausaki atu ki fakamoemoega aoga i te olaga? (i) ke fakafesagai atu ki kinauga?

¹⁷ Faifaiga e fakatalave ei tou gasolo ki mua faka-te-agaga. Ne fai atu a pati a Paulo ki Kelisiano ke fakaeteete. (Faitau te Epelu 6:1.) Ne a “galuega sē aoga” kolā e ‵tau o ‵kalo kea‵tea tatou mai i ei? Ko so se galuega telā e mafai o iku atu ki te mate i te  feitu faka-te-agaga, sē aoga io me se ‵fua ‵lei. A te fakatakitakiga tenei e mafai o fesoasoani mai ki a tatou ke tali aka a fesili e uke i ‵tou olaga, e pelā mo te: E mata, e fakamalosi aka i te galuega tenā a manakoga faka-te-foitino? E mata, e ‵tau au o aofia i fakamalosiga ke maua a tupe e uke? Kaia e se ‵tau o aofia au i fakapotopotoga a tāgata kolā e fakatāua ne latou a ‵fuliga ke tai faka‵lei aka a tulaga o te lalolagi?

¹⁸ Fakamoemoega faka-te-agaga. E manino ‵lei a fakatakitakiga mo fakamoemoega i te Lāuga a Iesu i luga i te Mauga. (Mata. 6:33) A te tino faka-te-agaga e kausaki atu ki tena fakamoemoega faka-te-agaga. A te mafaufau ki te fakatakitakiga tenei ka fesoasoani mai ke tali aka a fesili konei: E mata, e ‵tau mo au o kausaki atu ki akoakoga ma‵luga? E mata, e ‵tau mo au o talia so se galuega ‵togi e ofo mai ne te lalolagi?

¹⁹ Kinauga. E fesoasoani mai pefea a pati polopoloki a Paulo ki te fakapotopotoga o Loma i te faka‵leiga o kinauga? (Loma 12:18) E pelā mo soko o Keliso, e ga‵lue latou “ke tausi te filemu i te va o [latou] mo tino katoa.” I te taimi e sae aka ei se kinauga, e pefea ou lagonaga? E mata, e faigata ke kufaki koe, io me e lauiloa koe e pelā me se tino “tausi filemu”?—Iako. 3:18.

20. Kaia e ma‵nako ei ke gasolo tatou ki mua i te feitu faka-te-agaga?

²⁰ Konei a nai fakaakoakoga e mafai ei fakaasi atu ne tatou a fakatakitakiga fakavae mai te Atua kolā e mafai o fesoasoani mai ke iloa aka ei ne tatou te tino faka-te-agaga. A te mafaufau faka-te-agaga e mafai o fesoasoani mai ke fiafia kae aoga ‵tou olaga i aso takitasi. A Robert, telā i te kamataga o te mataupu, ne fai mai: “Mai tua o te atiakaga o se fesokotakiga ‵lei, ne fai au pelā me se tamana mo se avaga ‵lei. E lotomalie kae fiafia au i toku olaga. E mafai foki o maua ne tatou a fakamanuiaga penā māfai e fakamuamua ne tatou a te gasolo ki mua i te feitu faka-te-agaga. E pelā me ne tino faka-te-agaga, ka maua eiloa ne tatou se olaga fakamalie loto i te taimi nei mo “te ola tonu” i aso mai mua.—1 Timo. 6:19.