1, 2. Мае валаз одӥг вын-агай Инмарен кусыпъёсыз сярысь но мар со кариз?

 РОБЕРТ быдэ вуэмезлэсь азьло ик пылатӥськиз, но зэмлык солэн улоназ валтӥсь инты ӧз басьты. Со тодаз вае: «Мон номыр уродзэ уг лэсьтӥськы вал, но мар ке троссэгес лэсьтыны но кужымме уг понӥськы вал. Мар кулэ, сое гинэ карисько вал. Палэнысен учкыса, мынам Инмарен кусыпъёсы юнэсь кадь адӟиськизы: пумиськонъёсты мон ӧй келля но араз кӧня ке пол юрттӥсь пионер луыса ужай-тырши. Но маиз ке но умойтэм вал».

² Роберт кышнояськемез бере гинэ валаз, маиз умойтэм. Куддыръя соос кышноеныз ог-огзылы Библияя юанъёс сётъязы. Солэн кышноез Библиез умой тодэ вал, соин ик юанъёслы капчиен валэктонъёс сётъяз. Нош Роберт ӵемысь уг тоды вал, мар вераны. Со тодаз вае: «Мыным потэ вал, мон номыре но уг тодӥськы шуыса. Соку мон аслым шуи: „Кышноелы йыр луэме потэ ке, мыным мае ке воштоно“». Роберт уж борды кутскиз. Со вера: «Мон пыр-поч Библиез дышетыны кутски, тырши сое мургес валаны, но пумен тодон-валанэ люкаськиз. Соку мон зэмлыкез умойгес  валай, нош валтӥсез — озьы мынам Иеговаен кусыпъёсы юнмазы».

3. а) Малы милемыз дышетыны быгатэ Робертлэн учырез? б) Кыӵе юанъёсты ми эскеромы та статьяын?

³ Робертлэн учырез милемыз тросэзлы дышетэ. Ми Библиез умой тодӥськомы, кенешлэсь пумиськонъёссэ ум келляське но ялан тодытон уже пыриськиськомы ке но, со милемыз духовной адямиос уг кары. Яке милям Инмарен кусыпъёсмы юнгес луизы ини, но ми валаськомы: со тырмыт ӧвӧл (Флп. 3:16). Ми азьланяз но Инмарлы матэ кариськыны мед быгатомы шуыса, эскеромы куинь юанъёсты: 1) Мар юрттоз милемлы валаны, кыӵеесь кусыпъёсмы милям Инмарен? 2) Мар юрттоз милемлы азьланяз но Инмарлы матэ кариськыны? 3) Адӟиське-а ужъёсысьтымы, ми духовной адямиос шуыса?

4. Кинлы пайда ваёз Ефесъёслы 4:23, 24 визь-кенеш?

⁴ Инмарлы ужаны-тыршыны кутскыса, ми улонмес быдэсак воштӥмы. Но пылатӥськем бере воштӥськонъёс лэсьтэмысь дугдоно ӧвӧл. Библия ӧте милемыз азьланяз но визьмынымы, духенымы выльдӥськыны (Еф. 4:23, 24). Ми ваньмы тырбыдэстэмесь, соин ик милемлы азьланяз но воштӥськоно. Соослы но, кинъёс Иеговалы трос аръёс ӵоже ужало-тыршо ини, соин кусыпъёссэс юнматоно (Флп. 3:12, 13).

5. Кыӵе юанъёс юрттозы милемлы асьмеды эскерыны?

⁵ Инмарен кусыпъёсмес юнматон понна, милемлы асьмеды сак эскероно. Котькудмы, кӧня гинэ милемлы арес медаз луы, асьмелы таӵе юанъёс сётыны быгатомы: «Адӟиське-а улонысьтым, мон духовной адями луыны тыршисько шуыса? Тыршисько-а мон Христослэсь адӟем карыны? Мар мон сярысь вера со, кызьы мон асме кенешлэн пумиськонъёсаз возисько но кызьы мон соос шоры учкисько? Кызьы мынам вераськонъёсысьтым адӟиське, мар мынам улонам валтӥсез луэ? Мар сярысь вера со, кызьы мон Библиез дышетон шоры но мыным сётэм визь-кенешъёс шоры учкисько? Мар вераны луоз мынам дӥськутэ но вылтусы сярысь? Мар мон карисько, куке визь сынаськонэн пумиськисько? Луоз-а монэ быдэ вуэм христиан мурт шуыны?» (Еф. 4:13). Та юанъёс вылын малпаськон юрттоз милемлы валаны, кыӵеесь милям Инмарен кусыпъёсмы.

6. Мар эшшо милемлы кароно луоз, вылды, валан понна, кыӵеесь милям Инмарен кусыпъёсмы?

⁶ Кыӵеесь милям Инмарен кусыпъёсмы шуыса валан понна, куддыръя милемлы юрттэт кулэ. Апостол Павел вераз, «адями, кудӥз бордын Инмарлэн Духез уг улы», уг малпа, Инмарлэн син азяз со мае ке шонертэм лэсьтэ шуыса.  Нош духовной адями тодэ, мар малпа Инмар со яке та юан пумысен, но вала, малэсь палэнсконо (1 Кор. 2:14—16; 3:1—3). Тӧроослы «Христослэн визьмыз» сётэмын бере, соос адӟыны быгато, ми малпаськыны кутскиськомы шуыса адями кадь, кудӥз бордын Инмарлэн Духез уг улы, но дырыз дыръя милемлы визь-кенеш сётыны. Санэ пономы-а ми сое? Санэ понӥмы ке, со возьматоз, милям Инмарен кусыпъёсмес юнматэммы потэ шуыса (Екк. 7:5, 9).

7. Малы, Инмарлы матэ кариськон понна, Библиез тодыны гинэ ӧжыт?

⁷ Тодады возе: Инмарлы матэ кариськон понна, Библиез тодыны гинэ ӧжыт. Соломон эксэй Иегова сярысь трос тодэ вал. Солэн веранъёсыз Библия пӧлы но пыризы. Озьы ке но, пересьмон даураз Соломон Иеговалы оскымон луэмысь дугдӥз, но солэн Иеговаен кусыпъёсыз сӧриськизы (3 Экс. 4:29, 30; 11:4—6). Библиез тодэм сяна, мар эшшо милемлы кулэ на? Милемлы азьланяз но Инмарлы матэ кариськоно (Кол. 2:6, 7). Мар юрттоз милемлы?

8, 9. а) Мар юрттоз милемлы осконмес юнматыны? б) Малы ми Библиез дышетӥськомы но со вылын малпаськиськомы? (Учке статья кутсконысь туспуктэмъёсты.)

⁸ Павел ӧтиз христианъёсты: «Быдэ вуонэ дыртоме» (Евр. 6:1). Кызьы ми солэсь кылзӥськыны быгатомы? Кылсярысь, публикациосты дышетыса, кудъёсыз юртто валаны, кызьы Библиысь возетъёсты улонамы кутоно. Со милесьтым осконмес юнматоз (Кол. 1:23). Озьы ик, милемлы тодэммы вылын малпаськоно но Иеговаез милемлы юрттыны куроно басьтэм тодон-валанмес улонэ пыртыны.

⁹ Вунэтоно ӧвӧл, малы ми ваньзэ сое кариськомы — милям вань сюлмысьтымы Иеговаез шумпоттэммы но солэн законъёсызъя улэммы потэ (Пс. 39:9; 118:97). Со дыре ик милемлы палэнсконо ваньмызлэсь, мар милемлы Инмарлы матэ кариськыны люкетэ (Тит. 2:11, 12).

10. Мар юрттоз егит пиослы но нылъёслы Инмарлы матэ кариськыны?

 ¹⁰ Егит пиос но нылъёс, вань-а тӥляд духовной ужпумъёсты? Вефильын ужась-тыршись одӥг вын-агай, ёросысь конгрессъёсы ветлыкуз, программа кутскемлэсь азьло пылатӥськыны дасяськемъёсын вераськыны тырше. Тросэз соос пӧлысь егитэсь. Вын-агай юа соослэсь, кыӵе соослэн духовной ужпумъёссы. Тросэз умой тодо, мар каремзы потэ Иеговалы ужан-тыршонын: одӥгъёсыз малпало вань дырзэс висъяса ужаны-тыршыны, нош мукетъёсыз — мыныны отчы, кытын ивортӥсьёс уг тырмо. Нош куд-огъёсыз мар вераны ик паймо, кадь. Соос малпало, дыр, духовной ужпумъёс пуктыны дась ӧвӧл на шуыса. Тӥ егитэсь ке, юалэ асьтэлэсь: «Ветлӥсько-а мон кенешлэн пумиськонъёсаз но тодытон уже со понна гинэ, сое мынэсьтым анай-атае возьма шуыса? Тыршисько-а мон, Иегова мынам матысь эше мед луоз шуыса?» Духовной ужпумъёс егитъёслы гинэ пуктоно ӧвӧл. Иеговалэн вань ужась-тыршисьёсыз сыӵе ужпумъёс пуктыны кулэ, малы ке шуоно со юрттэ милемлы Инмарен кусыпъёсмес юн возьыны (Екк. 12:1, 13).

11. а) Мар милемлы кароно, Инмарен кусыпъёсмес юнматон понна? б) Инмарлэн ужась-тыршисьёсыз пӧлысь кинлэсь адӟем карыны луоз?

¹¹ Ми валамы ке, мае умой пала воштоно, милемлы соку ик воштӥськыны кутсконо. Милемлы туж кулэ Инмарен  кусыпъёсмес юнматыны, малы ке шуоно соин милям улонмы герӟаськемын (Рим. 8:6—8). Но Инмарен юнэсь кусыпъёс милемыз тырбыдэс уг каро. Воштӥськон понна, милемлы Иеговалэн святой духез кулэ. Озьы ик, милемлы асьмелы но вань кужмысьтымы тыршоно. Тани мар вераз кӧня ке ар талэсь азьло Джон Барр, кудӥз Кивалтӥсь кенешын ужаз-тыршиз, Лукалэсь 13:24 кылъёсты валэктыкуз: «Тросэз „ӟоскыт капкатӥ пырыны“ уг быгато, малы ке шуоно соос вань кужымзэс уг поно, Инмарен кусыпъёссэс юнматон понна». Милемлы Иаковлэсь адӟем кароно, кудӥз кылчинэн нюръяськиз, бакель карон басьтытозяз (Ул.-выл. 32:26—28). Библиез лыдӟон милемлы шумпотон вайыны быгатэ, но сое огшоры тунсыко книгаез кадь гинэ лыдӟоно ӧвӧл. Духовной марӟанъёсты шедьтон понна, милемлы трос кужым пононо.

12, 13. а) Мар юрттоз милемлы дышетскыны Христос кадь малпаськыны? б) Кыӵе пайда вае милемлы Пётрлэн примерез но солэн визь-кенешез? в) Мар юрттоз милемлы Инмарлы матэ кариськыны? (Учке «Мар юрттоз тӥледлы Инмарлы матэ кариськыны» рамкаез.)

¹² Инмарен кусыпъёсмес юнматыны тыршиськомы ке, святой духлэн юрттэменыз, ми пумен Христос кадь малпаськыны дышетскомы (1 Кор. 2:16). Со сяна, Инмарлэн духезлы луыса, ми шонертэм мыл потонъёсмес быдтомы но Инмарлы ярась сямъёс будэтомы (Гал. 5:16, 22, 23). Нош мар, ми валаськомы ке, ваньбур люкан яке шулдыръяськыса улыны тыршон милям улонамы нырысетӥ интыын на шуыса? Сётсконо ӧвӧл! Азьланяз но Иеговалэсь святой духсэ куроно. Со юрттоз милемлы шонерезлы саклыкмес висъяны (Лука 11:13). Тодады вае апостол Пётрез. Со ассэ котьку духовной адями кадь ӧз возьы (Матф. 16:22, 23; Лука 22:34, 54—62; Гал. 2:11—14). Но Пётр ӧз сётскы. Дыр ортчыса, Иеговалэн юрттэменыз, со Христос кадь малпаськыны дышиз. Ми но озьы быгатомы.

¹³ Берлогес Пётр гожтӥз, мар со понна кароно. (Лыдӟе 2 Пётрлэсь 1:5—8.) Милемлы «вань тыршонмес ватсано», возиськон-утиськон, чидан но агай-вынъёсты гажан сямъёсты будэтон вылысь. Котькуд нунал асьтэлы таӵе юан сётъяса утчалэ: «Мар бордын мон туннэ ужало, Инмарлы матэ кариськон вылысь?»

14. Ми Христос кадь малпаськиськомы ке, кызьы со улонмы вылын шӧдӥське?

¹⁴ Ми Христос кадь малпаськиськомы ке, со шӧдӥське со вылын, кызьы ми вераськиськомы, кызьы асьмеды уж дорын но школаын возиськомы но кыӵе ужпумъёс ми котькуд нунал кутӥськомы. Кутэм ужпумъёсмы возьматыны кулэ, ми Христослэсь адӟем карыны тыршиськомы шуыса. Духовной адямиос луэммы потэ бере, милям уг поты, мар ке но инмысь Атаенымы кусыпъёсмес мед тӥялоз шуыса. Визь сынаськонъёсын пумиськыкумы, ми ум кышкалэ но палэнтомы соосты. Нош ужпумъёс кутыкумы, ми ум дыртэ но таӵе юанъёс вылын малпаськомы: «Библиысь кыӵе возетъёс юрттозы мыным шонер ужпум кутыны? Мар карысал Иисус таӵе югдурын? Кыӵе кутэм ужпум Иеговаез шумпоттысал?» Кылсярысь, ойдолэ учкомы куд-ог югдуръёсты но эскеромы,  Библиысь кыӵе возетъёс юрттозы шонер быръён лэсьтыны.

15, 16. Валэктэ, кызьы Христос кадь малпаськон юрттэ: а) кузпал бырйыку; б) эшъёс бырйыку.

¹⁵ Аслыд кузпал быръён. Та югдурын уже кутыны луоз Библиысь возетэз, кудӥз гожтэмын 2 Коринфъёслы 6:14, 15 (лыдӟе). Павел гожтэ, духовной адями но адями, кудӥз бордын Инмарлэн Духез уг улы, котьмар шоры одӥг кадь уг учко шуыса. Кызьы со, кузпал бырйыку, юрттыны быгатэ?

¹⁶ Эшъёс быръён. Учке возетэз, кудӥз гожтэмын 1 Коринфъёслы 15:33 (лыдӟе). Ми Инмарен кусыпъёсмес дунъяськомы ке, ум эшъяське соосын, кинъёс люкетозы милемлы Инмарен кусыпъёсмес юнматыны. Малпалэ, кызьы та возетэз улонын кутыны луоз. Кылсярысь, кызьы со возет юрттоз милемлы, социальной сетьёсын эшъёсты бырйыкумы? Нош мар тӥ кароды, тӥледлы интернетын тодмотэм адямиен шудыны ӵектӥзы ке?

17—19. Кызьы Христос кадь малпаськеммы юрттэ милемлы: а) пайда вайисьтэм ужъёслэсь палэнскыны? б) духовной ужпумъёс пуктыны? в) валамтэосты тупатыны?

¹⁷ Инмарлы матэ кариськыны люкетӥсь ужъёс. Еврейёслы 6:1 (лыдӟе) кулэ луись алон гожтэмын. Милемлы палэнсконо «быронэ нуись ужъёслэсь», яке ужъёслэсь, кудъёсыз люкето Инмарлы матэ кариськыны. Та возет пӧртэм югдуръёсын пайдаё луоз, кылсярысь, куке таӵе юанъёс кылдо: «Луоз-а со яке та ужез „быронэ нуись уж“ шуыса ниманы? Соглаш кариськоно-а, мыным тросгес коньдон поттыны ӵекто ке? Малы огкылысь кариськоно ӧвӧл соосын, кинъёс пумит ӝутско но улонэз ас кужыменызы воштыны тыршо?»

¹⁸ Духовной ужпумъёс. Гурезь йылын тодытыкуз, Иисус валамон вераз, мар улонамы нырысетӥ интыын луыны кулэ (Матф. 6:33). Духовной адямилэн пуктэм ужпумъёсыз Инмарлэн Эксэйлыкеныз герӟаськемын. Та возетэз лыдэ басьтыса, ми таӵе юанъёслы валэктонъёс сётыны быгатомы: «Кулэ-а мыным вылӥ образование басьтыны? Соглаш кариськоно-а со яке та ужлы?»

¹⁹ Споръяськонъёс но валамтэос. Кызьы Павеллэн Римын улӥсь христианъёслы сётэм визь-кенешез юрттоз милемлы валамтэосмес тупатыны? Ми христианъёс луиськомы бере, вань адямиосын тупаса улыны тыршиськомы (Рим. 12:18). Кызьы ми асьмеды возиськомы, куке кин ке милемын соглаш уг луы? Секыт-а милемлы мукетъёссэ кылзыны, яке милемыз тупаса улонэз вайисьёсты кадь тодо? (Иак. 3:18).

20. Малы тӥляд Инмарлы матэ кариськемды потэ?

²⁰ Ми куд-огъёссэ гинэ югдуръёсты эскеримы, кудъёсаз быгатомы Библиысь возетъёс вылын малпаськыны но Инмарез шумпоттӥсь ужпумъёс кутыны. Духовной адямиос луимы ке, милям улонмы шудо луоз но трос шумпотон ваёз. Тани мар вера Роберт, кудӥз сярысь статьялэн кутсконаз вераськон мынӥз: «Мон Инмарлы матэ кариськыны быгатӥ. Со юрттӥз мыным умой карт но атай луыны. Мон солы туж шумпотӥсько!» Ми Иеговалы матэ кариськыны тыршимы ке, со милемыз бакель кароз. Ми туннэ ини зэмзэ ик шудо луыны быгатӥськомы, нош азьланяз милемыз «быронтэм улон» возьма (1 Тим. 6:19).