1, 2. Issi ishay bawu ayyaanaaban aybi paccidoogaa akeekidee, qassi hegawu I ay oottidee?

ROBERTI xammaqettiyo wode 15 laytta naˈa; shin I tumaa mintti oyqqibeenna. I hagaadan giis: “Ta aybanne moorabeykke; shin ayyaanaabaa coo meeze oottaas. Taani shiiquwaa ubbatoo shiiqiyo gishshawunne layttaa giddon issi issitoo kaafiya aqinye gidiyo gishshawu, ayyaanaaban mino milatays. SHin aybakko paccidabi deˈees.”

² Roberti machcho ekkana gakkanaashin he paccidabay aybakko akeekibeenna. Inne A machchiyaa issi issitoo Geeshsha Maxaafaappe issoy issuwaa oychchiyoogaa doommidosona. Ayyaanaaban mino gidida A machchiyaa oychchiyoobaa sohuwaara zaarawusu; shin Roberti zaaranabaa erenna gishshawu darotoo yeellatees. I, “Taani aynne erennaba mala gidaas. Taani, ‘Ta machcheeyyo ayyaanaaban huuphe gidanawu issibaa oottana koshshees’ gaada qoppaas” yaagiis. Qassi Roberti giidoogaadan oottiis. I hagaadan giis: “Taani Geeshsha Maxaafaa zaara zaarada xannaˈaas; yaatada, issoy issuwaara gayttiya qofaa akeekiyoogaa doommaas. Ubbaappe aaruwan, Yihoowaara dabbotaa minttaas.”

3. (a) Roberta hanotaappe ay tamaarana danddayiyoo? (b) Nuuni haˈˈi pilggana ayfettiya yohoti awugeetee?

³ Roberta hanotaappe maaddiyaabaa tamaarana danddayoos. Nuuni Geeshsha Maxaafaappe guuttabaa erananne gubaaˈe shiiquwaa shiiqana danddayoos; shin hegaa xallay nuna ayyaanaabaa qoppiya asa oottenna. Woy ayyaanaaban guuttaa diccidaba  gidikkokka, nuna qoriyo wode, ayyaanaaban minnana koshshiyoogaa akeekana danddayoos. (Pili. 3:16) Nuuni ubbatoo diccanaadan maaddiya heezzu waanna oyshata ha huuphe yohuwan beˈana: (1) Ayyaanaaban nu hanotay tumuppe ay malakko qoranawu aybi maaddanee? (2) Nuuni waanidi ayyaanaaban minnananne ayyaanaabaa qoppiyoogan ubbatoo diccana danddayiyoo? (3) Ayyaanaaban mino gidiyoogee galla galla nu deˈuwan nuna waati maaddii?

4. Efisoona 4:23, 24n deˈiya zoree imettidoy oossee?

⁴ Nuuni Yihoowa Markka gidiyo wode laamettida. Nuuni nu deˈuwan ubbaban laamettida. Qassi xammaqetti simmidikka laamettiyoogaa aggibookko. ‘Nu wozanaaninne qofan muleera ooraxxanaadan’ Geeshsha Maxaafay zorees; “ooraxxanau” geetettida qaalay Giriikettuwan aggennan haniyaabaa bessees. Yaatiyo gishshawu, nuuni ubbatoo nu qofan ooraxxana koshshees. (Efi. 4:23, 24) Nuuni ubbay nagaranchcha gidiyo gishshawu, ubbatoo laamettana bessees. Yihoowawu daro wodiyaa oottidaageetikka gidin ayyaanaaban minnidi deˈana koshshees.—Pili. 3:12, 13.

5. Nuna qoranaadan maaddiya oyshati awugeetee?

⁵ Ayyaanaaban diccanawunne minnidi deˈanawu, nuna loytti qorana bessees. Nuuni yelaga gidin cima gidin, hagaadan giidi nuna oychchana danddayoos: ‘Taani ayyaanaabaa qoppiya ura gidanawu dicciyoogaa bessiyaabaa akeekiyaanaa? Ta eeshshay Kiristtoosaagaa mala gidiiddi deˈii? Nu shiiquwan ta haniyoobay taani ayyaanaaban ay keena mino gidiyoogaa qonccissii? Ta haasayiyoobay ta koshshaabaa ay bessii? Ta xinaatiyaabay, ta maayuwaabay, woy asi zoriyo wode ta haniyoobay tabaa ay qonccissii? Paacee gakkiyo wode waaniyaanaa? Biron doommiyo wodiyaagaappe diccada, Kiristtaanetuppe koyettiyaagaa keenaa wozannaama gididanaa?’ (Efi. 4:13) Nuuni ha oyshatussi zaariyoobaa qoppiyoogee ayyaanaaban dicciiddi deˈiyaakkonne akeekanaadan maaddees.

6. Ayyaanaaban nu hanotaa qoranawu nuussi koshshana danddayiya harabay aybee?

⁶ Ayyaanaaban nu hanotaa qoranawu, issi issitoo haratu maadoy koshshana danddayees. Kiitettida PHawuloosi asatettaabaa qoppiya uri A hanotay Xoossaa sinttan iita gidiyoogaa akeekana danddayennaagaa yootiis. SHin, ayyaanaabaa qoppiya uri Xoossaa qofaakka asatettaabaa qoppiya uraa balaakka akeekees. (1 Qor. 2:14-16; 3:1-3) Kiristtoosaagaadan qoppiya cimati issi uri asatettaabaa qoppiyoogaa doommidoogaa bessiya malaataa akeekoosona. Eti hegaa nuuyyo yootikko, eta zoriyaa siyidi oosuwan peeshshiyoo? Yaatikko, nuuni ayyaanaaban minnanawu koyiyoogaa bessoos.—Era. 7:5, 9.

7. Ayyaanaabaa qoppiya asa gidanawu Geeshsha Maxaafaa qofaa eriyoogaa xallay gidennay aybissee?

⁷ Ayyaanaabaa qoppiya asa gidanawu, Geeshsha Maxaafaa eraa xallay gidennaagaa hassaya. Kawuwaa Solomoni Yihoowabaa darobaa erees. I aadhdhida eran haasayidobay guyyeppe Geeshsha Maxaafan xaafettiis. SHin wurssettan, I ayyaanaaban shuggidi ammanettiya asa gidiyoogaa aggiis. (1 Kaw. 4:29, 30; 11:4-6) Yaatin, Geeshsha Maxaafaa qofaa eriyoogaappe harabaa ay oottana koshshii? Nuuni ayyaanaaban ubbatoo diccana bessees. (Qol. 2:6, 7) SHin waatidi hegaadan oottana danddayiyoo?

8, 9. (a) Ayyaanaaban minnidi deˈanawu nuna aybi maaddii? (b) Nuuni xannaˈiyoonne wotti dentti qoppiyo wode nu halchchoy aybee? (Doomettan deˈiya misiliyaa xeella.)

⁸ PHawuloosi koyro xeetu layttaa Kiristtaaneti “wozannaama” gidanaadan eta zoriis.  (Ibr. 6:1) Ha wodiyan PHawuloosi zoridoogaadan wozannaama gidanawu waatana danddayiyoo? Hegawu keehi maaddiya issibay ‘Xoossaa Siiquwan Deˈa’ giyo maxaafaa xannaˈiyoogaa. Neeni he maxaafaa xannaˈada wurssiyoogee Geeshsha Maxaafaa maaraa oosuwan waata peeshshanaakko akeekanawu maaddees. He maxaafaa xannaˈada wurssaychchidaba gidikko, ammanuwan minnada deˈanawu neeni xannaˈana danddayiyo hara xuufetikka deˈoosona. (Qol. 1:23) Neeni xannaˈiyoobaa waata oosuwan peeshshanaakko wotta dentta qoppay, qassi woossay?

⁹ Nuuni Yihoowa ufayssanawunne A higgiyaa azazettanawu wozanappe koyiyo gishshawu xannaˈananne wotti dentti qoppana koshshiyoogaa hassaya. (Maz. 40:8; 119:97) Hegaa bollikka, ayyaanaaban diccennaadan nuna diggiyaabaa eqettanawu minnidi baaxetoos.—Tii. 2:11, 12.

10. Yelagati ayyaanaaban diccanawu ay oottana danddayiyoonaa?

¹⁰ Neeni yelaga gidikko, ayyaanaaban ne halchchidobi deˈii? Beeteelen haggaaziya issi ishay woradaa shiiquwaa shiiqiyo wode, xammaqettanawu giigettidaageeta shiiquwaappe kase haasayissiyoogaa meeze oottiis. Hegeetuppe daroti yelagata. Ayyaanaaban eti ay halchchidaakko he ishay eta oychchees. Daroti zaariyoobay eti Yihoowawu haggaazanawu oottana koyiyoobaa, hegeekka, issi qommo kumetta wodiyaa haggaazuwaa doommiyoogaa woy aassiyaageeti keehi koshshiyoosan haggaaziyoogaa malabaa halchchidoogaa bessees. SHin issi issitoo zaaranabaa erennaba milatiya yelagati deˈoosona. Hegee eti ayyaanaabaa halchchana koshshiyoogaa bantta wozanan kuuyichchibeennaagaa bessiyaabeeshsha? Neeni yelaga gidikko, hagaadan nena oychcha: ‘Tana yelidaageeti koyiyooba gidiyo gishsha xallawu ayyaanaabaa oottiyaanaa? Xoossaara dabbotaa medhdhada akko shiiqaydda deˈiyaanaa?’ Ayyaanaabaa halchchanaadan zoree imettiyoy yelagatu xallaassa gidennaagee tuma. Hegaadan halchchiyoogee Yihoowawu oottiya nuuni ubbay ayyaanaaban diccanaadan maaddees.—Era. 12:1, 13.

11. (a) Nuuni ayyaanaaban diccanawu ay oottana koshshii? (b) Nuuni Geeshsha Maxaafan odettida oogaadan oottana danddayiyoo?

¹¹ Nuuni kaseegaappe minnana koshshiyaabaa akeekikko, diccanawu maaddiyaabaa oottana bessees. Ayyaanaabaa qoppiya asa gidiyoogee nuuni deˈanaakko woy hayqqanaakko erissiyaaba gidiyo gishshawu, keehi koshshiyaaba. (Roo. 8:6-8) SHin ayyaanaaban wozannaama gidiyo wode bali baynna asa gidokko. Nuuni koshshiyaagaa keenaa diccanaadan Yihoowa ayyaanay maaddees. Gidikkokka, nuuni baaxetana koshshees. Bolla Gididi Heemmiyaagaa citan haggaazida Joon Baari, amarida layttappe kase Luqaasa 13:24 qofaa qonccissiiddi, “Daroti minnanawu koshshiyaagaa keenaa baaxetenna gishshawu, unˈˈo penggiyaara gelana danddayokkona” yaagiis. Nuuni anjjuwaa ekkana gakkanaashin kiitanchchaara baaxetida Yaaqooba mala gidana koshshees. (Doo. 32:26-28) Geeshsha Maxaafaa xannaˈiyoogee ufayssiyaaba gidikkokka, nuuni ufayttana xallawu nabbabiyo maxaafadan A xeellana bessenna. Ayyaanaaban nuna maaddiya alˈˈobaa demmanawu baaxetana koshshees.

12, 13. (a) Koyro Qoronttoosa 2:16n deˈiya zoriyaadan oottanawu nuna maaddanabay aybee? (b) Kiitettida PHeexiroosa leemisoynne I zoridobay nuna waati maaddii? (c) Ayyaanaaban diccanawu ay oottana danddayay? (“ Neeni Ayyaanaaban Diccanawu Oottana Danddayiyoobaa” giya saaxiniyaa xeella.)

¹² Nuuni ayyaanaaban minnanawu baaxetiyo wode, geeshsha ayyaanay nu qofay laamettanaadan maaddees. Geeshsha ayyaanay maaddin, nuuni loddan loddan Kiristtoosaagaadan qoppiyoogaa tamaarana danddayoos. (Roo. 15:5) Hegaa bollikka, nuuni asatettaa amuwaa agganaadaaninne  Xoossaa ufayssiya eeshshaa bessanaadan geeshsha ayyaanay maaddees. (Gal. 5:16, 22, 23) Miishshaa siiqiyoogee woy asatettaabaa amottiyoogee nu wozanan deˈiyoogaa akeekikko, nuuni hidootaa qanxxana koshshenna. Nuuni Geeshsha ayyaanaa demmanawu ubbatoo woossana koshshees; yaatikko, Yihooway nuuni zaarettidi suurebaa qoppanaadan maaddana. (Luq. 11:13) Kiitettida PHeexiroosabaa qoppa. I issi issitoo ayyaanaabaa qoppiya uradan hanibeenna. (Maa. 16:22, 23; Luq. 22:34, 54-62; Gal. 2:11-14) SHin I hidootaa qanxxibeenna. PHeexiroosi Yihooway maaddin loddan loddan Kiristtoosaagaadan qoppiya asa gidiis. Nuunikka hegaadan hanana danddayoos.

¹³ Guyyeppe, PHeexiroosi nuuni baaxetana koshshiya issi issibaa yootiis. (2 PHeexiroosa 1:5-8 nabbaba.) Nuuni kaseegaappe aaruwan nuna naaganawu, genccanawunne ishatettaa siiquwaanne hegaa mala eeshshata bessanawu “minnidi” baaxetiyoogee ayyaanaabaa qoppiyoogan ubbatoo diccanawu maaddees. ‘Ayyaanaaban diccanawu hachchi ay oottana danddayiyaanaa?’ gaada nena galla galla oychchana danddayaasa.

14. Ayyaanaabaa qoppiyoogee nu deˈuwan nuna waati maaddii?

¹⁴ Nu haasayan, ooso sohuwan woy timirtte keettan nuuni haniyoobaaninne galla galla kuuyiyooban Kiristtoosaagaadan qoppiyoogee maaddees. Nu kuuyiyoobay Kiristtoosa kaallanawu baaxetiyoogaa bessiyaaba gidana. Nuuni ayyaanaabaa qoppiya asa gidiyo gishshawu, saluwan deˈiya nu Aawaara deˈiya nu dabbotaa aybinne mooranaadan koyokko. Nuna paacee gakkiyo wode, Kiristtoosaagaadan qoppiyoogee hegaa eqettanaadan maaddees. Nuuni issibaa kuuyiyo wode, ha oyshata yuushshi qoppoos: ‘Kuuyanawu tana maaddana Geeshsha Maxaafaa maarati awugeetee? Hagaa mala hanotan Kiristtoosi waatanee? Taani ay kuuyiyaakko Yihooway ufayttanee?’ Hegaadan qoppiyoogaa tamaaranawu, amarida hanotata ane beˈoos. He ubba hanotatunkka, eratettan kuuyanaadan maaddana danddayiya Geeshsha Maxaafaa maarata nuuni beˈana.

15, 16. Kiristtoosaagaadan qoppiyoogee kaallidi deˈiyaaban kuuyiyo wode nuna waati maaddiyaakko leemisuwaa yoota: (a) Aqo laggiyaa dooranawu. (b) Laggeta dooranawu.

¹⁵ Aqo laggiyaa dooriyoogaa. Hegawu maaddiya Geeshsha Maxaafaa maaray 2 Qoronttoosa 6:14, 15n (nabbaba.) deˈees. PHawuloosi yootido he qofay ayyaanaabaa qoppiya uri asatettaabaa qoppiya uraara ubbaban maayettidi deˈana danddayennaagaa bessees. Aqo laggiyaa dooranawu he maaray waati maaddii?

¹⁶ Laggetettaa. Geeshsha Maxaafan, 1 Qoronttoosa 15:33n (nabbaba.) deˈiya maaraa akeeka. Xoossawu yayyiya uri bana ayyaanaaban qohana danddayiyaageetuura laggetenna. Hegaa oosuwan peeshshanawu nena maaddana danddayiya oyshati awugeetee? Leemisuwawu, Intternneetiyan asaara gayttiyooban hegee waati maaddii? Woy  erenna uri banaara Intterneetiyan kaaˈanaadan shoobbikko neeni waatana koshshii?

17-19. Ayyaanaabaa qoppiyoogee neeni (a) pattenna oosuwaa oottennaadan waati maaddii? (b) ne deˈuwan halchchiyooban waati maaddii? (c) palamay denddiyo wode maayettanaadan waati maaddii?

¹⁷ Ayyaanaaban diccennaadan nuna diggiya oosota. PHawuloosi ba mala Kiristtaanetussi xaafidoban seeray deˈees. (Ibraawe 6:2 nabbaba.) Nuuni oottana koshshenna ‘pattenna oosoti’ awugeetee? Ayyaanaaban pattennaba woy goˈˈennaba gidida aybinne pattenna ooso. Nu deˈuwan oychchana danddayiyo, kaallidi deˈiyaageetu mala daro oyshawu he maaray maaddees: ‘Ha oosoy “pattenna oosoo”? Taani ha zalˈˈiyaa doommana koshshii? Alamiyan hanotata laammanawu baaxetiya citan taani gelana koshshennay aybissee?’

¹⁸ Ayyaanaabaa halchchuwaa. Yesuusi deriyaa bolli tamaarissidoban halchchanawu maaddiya loˈˈo zoriyaa yootiis. (Maa. 6:33) Ayyaanaabaa qoppiya asi ayyaanaabaa halchchidi oottees. He maaraa hassayiyoogee kaallidi deˈiyaageetu mala oyshaa zaaranawu maaddees: ‘Taani xoqqa timirttiyaa tamaarana bessii? Imettida issi ooso taani oyqqana koshshii?’

¹⁹ Palamaa. PHawuloosi Roome Kiristtaaneta zoridobay palamay denddiyo wode nuna waati maaddii? (Roo. 12:18) Nuuni Kiristtoosa kaalliyaageeta gidiyo gishshawu, “asa ubbaara sarotettan de7anau” baaxetoos. Palamay denddiyo wode waaniyoo? Maayettanawu metootiyoyye “sarotettaa” medhdhiyoogan erettiyoo?—Yaaq. 3:18.

20. Neeni ayyaanaabaa qoppiyoogan diccana koyiyoy aybissee?

²⁰ Xoossaa maaraa wotti dentti qoppiyoogee ayyaanaabaa qoppiya uri kuuyana bessiyaabaa kuuyanaadan nuna waati maaddiyaakko bessiya leemisotuppe hageeti amaridaageeta. Ayyaanaabaa qoppiya asa gidiyoogee galla galla nu deˈuwan keehi ufayttanaadan maaddees. Doomettan abaa denttido Roberti hagaadan giis: “Taani Yihoowaara dabbotaa mintta simmada, loˈˈo azinanne loˈˈo aawa gidaas. Taani ufayssaanne woppaa demmaas.” Nuunikka ayyaanaaban diccanawu baaxetikko, hegaa mala anjjuwaa demmoos. Nuuni ayyaanaabaa qoppiya asa gidiyoogan, ha wodiyan keehi ufayssiya deˈuwaa deˈananne sinttappe “tumu de7uwaa” demmana.—1 Xim. 6:19.