1, 2. Ano an nasabtan han usa nga bugto nga kulang ha iya may kalabotan han iya espirituwalidad, ngan ano an iya ginbuhat?

HI Robert nabawtismohan han tin-edyer hiya, pero an kamatuoran diri amo an pinakaimportante ha iya kinabuhi. Hiya nagsiring: “Waray ako ginbubuhat nga sayop, pero rutina la an akon pag-alagad. Baga hin marig-on ako ha espirituwal kay pirme ako natambong ha mga katirok ngan nag-o-auxiliary payunir hin pipira ka beses kada tuig. Pero baga hin may kulang.”

² Nasabtan la ni Robert kon ano an kulang han nag-asawa hiya. Usahay nag-uuyag hira nga mag-asawa; nagpapakiana hira ha usa kag usa hin mga topiko mahitungod ha Biblia. Nababaton dayon han iya asawa, nga hamtong ha espirituwal, an mga pakiana. Pero hi Robert agsob nga naaawod kay diri hiya maaram han ibabaton. Hiya nagsiring: “Baga hin waray ako hinbabaroan. Nahunahuna ko, ‘Para matuman ko an akon pagin ulo ha akon asawa may kalabotan ha espirituwal, kinahanglan may buhaton ako.’” Salit may ginhimo hiya. Hi Robert nagsiring: “Gin-adman ko an Biblia ngan padayon nga nag-inaram tubtob nga naintindihan ko na an koneksyon han mga impormasyon. Nag-uswag an akon pagsabot, ngan labaw ha ngatanan, nagkaada ako duok nga relasyon kan Jehova.”

3. (a) Ano an aton mahibabaroan ha eksperyensya ni Robert? (b) Ano nga importante nga mga punto an aton hihisgotan yana?

³ May mahibabaroan kita nga importante nga mga leksyon ha eksperyensya ni Robert. Bangin may mga nahibabaroan kita mahitungod ha Biblia  ngan regular nga natambong ha Kristiano nga mga katirok, pero diri ini nagpapasabot nga espirituwal na kita nga tawo. O bangin nakahimo na kita hin mga pag-uswag, pero han gin-usisa pa naton an aton kalugaringon, nakita naton nga mahimo pa kita mag-uswag ha espirituwal. (Fil. 3:16) Basi mabuligan kita nga padayon nga mag-uswag, babatunon hini nga artikulo an tulo nga importante nga pakiana: (1) Ano an mabulig ha aton nga mahibaroan an tinuod nga kahimtang han aton espirituwalidad? (2) Paonan-o naton mapapatubo an aton espirituwalidad ngan padayon nga mag-uuswag ha pagin espirituwal nga tawo? (3) Paonan-o nakakabulig an marig-on nga espirituwalidad ha aton adlaw-adlaw nga pagkinabuhi?

4. Kan kanay naaplikar an sagdon nga mababasa ha Efeso 4:23, 24?

⁴ Han nagtikang kita mag-alagad ha Dios, naghimo kita hin mga pagbag-o. Ito nga mga pagbag-o nakaapekto ha ngatanan nga bahin han aton kinabuhi. Ngan waray ito matapos han nabawtismohan kita. Ginsusugo kita nga ‘padayon nga bag-uhon an aton paagi han paghunahuna.’ (Efe. 4:23, 24) Tungod kay diri kita perpekto, kita ngatanan nagkikinahanglan nga padayon nga maghimo hin mga pagbag-o. Bisan an mag-iha na nga surugoon ni Jehova kinahanglan mangalimbasog nga tipigan an ira espirituwalidad.—Fil. 3:12, 13.

5. Ano nga mga pakiana an makakabulig ha aton nga mausisa an aton kalugaringon?

⁵ Basi mapauswag ngan matipigan an aton espirituwalidad, kinahanglan naton tangkod nga usisahon an aton kalugaringon. Batan-on man kita o lagas, mahimo naton pakianhan an aton kalugaringon hini nga mga pakiana: ‘May naoobserbaran ba ako nga pagbag-o ha akon kalugaringon nga nagpapakita nga padayon ako nga nag-uuswag ha pagin espirituwal nga tawo? An akon ba personalidad nagigin pariho na han personalidad han Kristo? Ano an iginpapakita han akon disposisyon ngan mga ginbubuhat ha Kristiano nga mga katirok mahitungod han akon espirituwalidad? Ano an iginpapakita han akon mga igin-iistorya mahitungod han akon mga hingyap? Ano an iginpapakita han akon rutina ha pag-aram, reaksyon ha sagdon, o pamado ngan pag-ayos mahitungod ha akon? Ano an akon ginbubuhat kon naatubang ako hin mga pagsulay? Nag-uuswag na ba ako ha Kristiano nga pagkahamtong?’ (Efe. 4:13) An pagpamalandong han aton baton hini nga mga pakiana makakabulig ha aton nga mahibaroan an aton espirituwal nga pag-uswag.

6. Ano pa an bangin ginkikinahanglan basi mahibaroan an kahimtang han aton espirituwalidad?

⁶ Basi mahibaroan naton an kahimtang han aton espirituwalidad, usahay bangin ginkikinahanglan naton an bulig han iba. Iginsaysay ni apostol Pablo nga an pisikal, o unudnon, nga tawo diri nakakasabot nga an iya pagkinabuhi diri nakakapalipay ha Dios. Ha luyo nga bahin, an espirituwal nga tawo nakakasabot han panhunahuna han Dios ngan maaram hiya nga diri naruruyagan ni Jehova an pagkinabuhi han pisikal nga tawo. (1 Cor. 2:14-16; 3:1-3) An mga tigurang nga may-ada han panhunahuna han Kristo kasagaran na nga nakakakita dayon han mga tigaman han unudnon nga panhunahuna. Kon ginsasagdonan kita nira mahitungod hini, ginkakarawat ngan ginsusunod ba naton an ira sagdon? Ha pagbuhat hito, iginpapakita naton nga hingyap naton nga mapauswag an aton espirituwalidad.—Ekles. 7:5, 9.

7. Kay ano nga an pagkaada kahibaro ha Biblia diri igo basi magin usa nga tawo nga mahunahunaon ha espirituwal?

⁷ Hinumdumi nga an pagkaada kahibaro ha Biblia diri igo basi magin usa nga tawo nga mahunahunaon ha espirituwal. Hi Hadi Solomon damu an nahibabaroan mahitungod han mga paagi ni Jehova. An pipira han iya mga iginyakan nagin bahin pa ngani han Biblia. Pero ha urhi, napakyas hiya ha pagpabilin nga matinumanon kan Jehova sugad nga espirituwal nga tawo. (1 Hadi 4:29, 30; 11:4-6) Salit ano pa an ginkikinahanglan labot han pagkaada kahibaro ha Biblia? Kinahanglan padayon naton nga pauswagon an aton espirituwalidad. (Col. 2:6, 7) Paonan-o naton ito mahihimo?

8, 9. (a) Ano an mabulig ha aton nga maparig-on an aton espirituwalidad? (b) Ano an aton tumong ha aton pag-aram ngan pagpamalandong? (Kitaa an retrato ha tinikangan hini nga artikulo.)

⁸ Gin-aghat ni Pablo an mga Kristiano han siyahan  nga siglo nga “mag-uswag ngadto ha pagkahamtong.” (Heb. 6:1) Basi maiaplikar naton an sagdon ni Pablo, ano nga mga pitad an mahimo naton buhaton? An usa nga importante nga pitad amo an pag-aram han libro nga Magpabilin ha Gugma han Dios. Kon tatapuson mo an pag-aram hito nga libro, mabulig ito nga mahibaroan mo kon paonan-o iaaplikar ha imo kinabuhi an mga prinsipyo ha Biblia. Kon natapos mo na an pag-aram hito nga libro, puydi mo ba pag-adman an iba pa nga aradman nga publikasyon nga makakabulig basi maparig-on an imo pagtoo? (Col. 1:23) Ginpapamalandong mo ba ha mainampoon nga paagi kon paonan-o mo maiaaplikar ha imo kinabuhi an imo gin-aadman?

⁹ Hinumdumi nga an sadang naton magin tumong ha aton pag-aram ngan pagpamalandong amo an pagpatubo han aton kinasingkasing nga hingyap nga lipayon hi Jehova ngan sugton an iya mga balaud. (Sal. 40:8; 119:97) Samtang ginhihimo naton ito, nangangalimbasog liwat kita nga isalikway an mga butang nga makakaulang han aton espirituwal nga pag-uswag.—Tito 2:11, 12.

10. Ano an mahimo buhaton han mga batan-on basi mapauswag an ira espirituwalidad?

¹⁰ Kon usa ka nga batan-on, may-ada ka ba matin-aw nga espirituwal nga mga tumong? Kon natambong ha sirkito nga asembleya, nabatasan na han usa nga Bethelite nga makiistorya ha mga kandidato ha bawtismo antes han programa. Damu nga kandidato an mga batan-on. Ginpapakianhan hira han bugto kon ano an ira espirituwal nga mga tumong. An mga baton han damu ha ira nagpapakita nga matin-aw ha ira kon ano an ira karuyag buhaton ha pag-alagad kan Jehova—bangin pinaagi ha pagsulod ha bug-os-panahon nga pag-alagad o pag-alagad ha lugar nga mas daku an panginahanglan hin magwarali han Ginhadian. Pero usahay, may mga batan-on nga baga hin diri maaram kon ano an ira ibabaton. Posible ba nga nagpapasabot ito nga diri pa hira naghuhunahuna nga sadang hira magkaada matin-aw nga espirituwal nga mga tumong? Sugad nga batan-on, pakianhi an imo kalugaringon: ‘Nakikigbahin ba ako ha espirituwal nga mga buruhaton tungod la kay ito an ginlalaoman han akon mga kag-anak? Nangangalimbasog ba ako nga magin duok ha Dios pinaagi ha pagparig-on han akon relasyon ha iya?’ Syempre, an sagdon may kalabotan ha pagkaada espirituwal nga mga tumong diri la aplikado ha mga batan-on. An pagkaada hito nga mga tumong mabulig ha aton ngatanan sugad nga mga surugoon ni Jehova nga maparig-on an aton espirituwalidad.—Ekles. 12:1, 13.

11. (a) Ano an kinahanglan naton buhaton basi mag-uswag gud ha espirituwal? (b) Kan kanay ehemplo ha Biblia an mahimo naton subaron?

¹¹ Kon nahibaroan na naton an mga bahin nga sadang naton pauswagon, kinahanglan maghimo kita hin maaramon nga mga pitad nga mabulig ha aton nga padayon nga mag-uswag. Importante gud an pagin espirituwal nga tawo. Ngani, mahimo ito magresulta hin kinabuhi o kamatayon. (Roma 8:6-8) Pero an pagin hamtong ha espirituwal diri nagpapasabot hin pagin perpekto. An espiritu ni Jehova makakabulig ha aton ha paghimo han ginkikinahanglan nga mga pagbag-o. Kondi, kinahanglan kita mangalimbasog. Ha pagkomento mahitungod han Lucas 13:24, hi John Barr, nga nag-alagad sugad nga membro han Nagmamando nga Lawas, nagsiring pipira ka tuig na an naglabay: “Damu an napapakyas [pagsulod ha haligot nga purtahan] tungod kay diri gud hira nangangalimbasog nga magin makusog.” Kinahanglan naton subaron hi Jacob, nga waray umundang ha pakigdulong ha anghel tubtob nga nakakarawat hiya hin bendisyon. (Gen. 32:26-28) Bisan kon mahimo magin makalilipay an pag-aram ha Biblia, diri kita sadang maghunahuna nga an pagbasa ha Biblia pagpahalibway la pariho ha pagbasa hin nobela. Kinahanglan kita mangalimbasog ha pagpamiling hin espirituwal nga mga hiyas nga mabulig ha aton.

12, 13. (a) Ano an mabulig ha aton nga maiaplikar an Roma 15:5? (b) Paonan-o makakabulig ha aton an ehemplo ngan sagdon ni apostol Pedro? (c) Ano an mahimo mo buhaton basi mapauswag an imo espirituwalidad? (Kitaa an kahon nga “ Mga Pitad nga Mahimo Mo Buhaton Basi Mag-uswag ha Espirituwal.”)

¹² Samtang nangangalimbasog kita nga patuboon an aton espirituwalidad, an baraan nga espiritu maghahatag ha aton han gahum basi mabag-o an paagi han aton paghunahuna. Ha bulig hito nga espiritu, hinay-hinay nga masusubad naton an panhunahuna han Kristo. (Roma 15:5) Dugang pa, mabulig ito  ha aton nga wad-on an unudnon nga mga hingyap ngan patuboon an mga kalidad nga nalilipayan han Dios. (Gal. 5:16, 22, 23) Kon inaabat naton nga an aton hunahuna nagdadani ha aton nga magin materyalistiko o magkaada unudnon nga mga hingyap, diri kita sadang umundang. Padayon nga pangaro han baraan nga espiritu, ngan bubuligan ka ni Jehova nga mabag-o an paagi han imo paghunahuna basi maipokus ito ha husto nga mga butang. (Luc. 11:13) Hinumdumi hi apostol Pedro. May mga higayon nga waray hiya gumios sugad nga espirituwal nga tawo. (Mat. 16:22, 23; Luc. 22:34, 54-62; Gal. 2:11-14) Pero waray hiya umundang. Ha bulig ni Jehova, hinay-hinay nga nasubad ni Pedro an panhunahuna han Kristo. Mahihimo liwat naton ito.

¹³ Ngani ha urhi, nag-unabi hi Pedro hin espisipiko nga mga kalidad nga mahimo naton patuboon. (Basaha an 2 Pedro 1:5-8.) Samtang ‘nangangalimbasog gud’ kita nga patuboon an mga kalidad sugad han pagpugong ha kalugaringon, pagpailob, ngan minagburugto nga gugma, mabubuligan kita hito nga padayon nga mag-uswag ha pagin espirituwal nga tawo. Kada adlaw puydi naton pakianhan an aton kalugaringon, ‘Ano nga kalidad an mahimo ko patuboon yana nga adlaw nga mabulig ha akon nga mag-uswag ha espirituwal?’

14. Paonan-o nakakaapekto ha aton kinabuhi an pagin mahunahunaon ha espirituwal?

¹⁴ Kon may-ada kita han panhunahuna han Kristo, makakaapekto ito ha aton panyakan, ha aton panggawi ha trabaho o ha eskwelahan, ngan ha aton mga desisyon nga ginhihimo kada adlaw. Ito nga mga desisyon magpapakita nga nangangalimbasog kita nga magin sumurunod han Kristo. Sugad nga espirituwal nga tawo, karuyag gud naton likyan an bisan ano nga makakadaot han aton relasyon ha aton langitnon nga Amay. Kon naatubang kita hin mga pagsulay, an pagkaada panhunahuna han Kristo magpapagios ha aton nga isalikway ito. Kon naghihimo hin mga desisyon, maopay nga pamalandungon anay ini nga mga pakiana: ‘Ano nga mga prinsipyo ha Biblia an mabulig ha akon ha pagdesisyon? Ano an bubuhaton han Kristo hini nga sitwasyon? Ano nga desisyon an makakapalipay kan Jehova?’ Basi mahibaro kita ha paghunahuna ha sugad nga paagi, kitaon naton an pipira nga sitwasyon sugad nga ehemplo. Ha tagsa nga ehemplo, ipapakita an usa nga prinsipyo ha Kasuratan nga makakabulig ha aton ha paghimo hin maaramon nga desisyon.

15, 16. Paghatag hin mga ehemplo kon paonan-o an pagkaada han panhunahuna han Kristo nabulig ha aton kon nagdidesisyon may kalabotan ha (a) pagpili hin maarasawa. (b) pagpili hin mga kaupod.

¹⁵ Ha pagpili hin maarasawa. An Kasuratanhon nga prinsipyo mababasa ha 2 Corinto 6:14, 15. (Basaha.) An mga pulong ni Pablo matin-aw nga nagpapakita nga diri bug-os nga magkakauyon an espirituwal nga tawo ngan an pisikal nga tawo. Paonan-o ini naaplikar ha pagpili hin maarasawa?

¹⁶ Ha pagpili hin mga kaupod. Tigamni an Kasuratanhon nga prinsipyo ha 1 Corinto 15:33. (Basaha.) An diosnon nga tawo diri makikig-upod hadton mahimo makadaot han iya espirituwalidad. Ano nga mga pakiana an mahimo makabulig ha imo ha paghimo hin praktikal nga aplikasyon? Pananglitan, paonan-o ini naaplikar ha social networking? O ano an imo sadang buhaton kon gin-iimbitar ka nga umapi ha mga online game kaupod an mga tawo nga diri mo kilala?

17-19. Paonan-o an pagin mahunahunaon ha espirituwal nabulig ha imo (a) ha paglikay han mga buruhaton nga waray pulos? (b) ha paghimo hin mga tumong? (c) ha pagsulbad han diri pagsinabtanay?

¹⁷ Mga buruhaton nga nakakapugong ha pag-uswag ha espirituwal. An ginsiring ni Pablo ha mga igkasi-Kristiano nag-uupod hin pahamangno. (Basaha an  Hebreo 6:1.) Ano an “patay nga mga buhat” nga sadang naton likyan? An bisan ano nga waray pulos nga buruhaton ngan diri makakabulig ha aton nga mag-uswag ha espirituwal. Ini nga prinsipyo makakabulig ha aton nga mabaton an damu nga pakiana nga mahimo naton ipakiana ha aton kalugaringon, sugad han: ‘Ini ba nga buruhaton kaupod hadton unudnon nga mga buhat? Sadang ba ako umapi hini nga negosyo? Kay ano nga diri ako sadang bumulig ha grupo nga nangangalimbasog nga bag-uhon an mga kahimtang ha kalibotan?’

¹⁸ Espirituwal nga mga tumong. Ha Sermon ha Bukid ni Jesus, naghatag hiya ha aton hin matin-aw nga giya may kalabotan ha paghimo hin mga tumong. (Mat. 6:33) An espirituwal nga tawo nakapokus ha espirituwal nga mga tumong. Ini nga prinsipyo nabulig ha aton nga mabaton an mga pakiana sugad han: ‘Sadang ba ako mag-eskwela hin hitaas nga edukasyon? Sadang ko ba karawaton an partikular nga trabaho?’

¹⁹ Diri pagsinabtanay. Paonan-o an sagdon ni Pablo ha mga Kristiano ha Roma nabulig ha aton ha pagsulbad han diri pagsinabtanay? (Roma 12:18) Sugad nga mga sumurunod han Kristo, nangangalimbasog kita ha “pakigmurayaw ha ngatanan nga tawo.” Kon nabangon an diri pagsinabtanay, ano an aton reaksyon? Nakukurian ba kita nga magpaumaya, o kilala kita sugad nga tawo nga “nakikigmurayaw”?—San. 3:18.

20. Kay ano nga karuyag mo nga padayon nga mag-uswag ha espirituwal?

²⁰ Pipira la ini han mga ehemplo nga nagpapakita nga an diosnon nga mga prinsipyo makakabulig ha aton ha paghimo hin mga desisyon nga uyon ha ginlalaoman ha usa nga espirituwal nga tawo. An pagin mahunahunaon ha espirituwal makakabulig ha aton nga magin mas malipayon ngan mas makapatagbaw an aton adlaw-adlaw nga pagkinabuhi. Hi Robert, nga gin-unabi ha tinikangan hini nga artikulo, nagsiring: “Han napatubo ko an marig-on nga relasyon kan Jehova, nagin mas maopay ako nga bana ngan nagin mas maopay nga tatay. Kontento ngan malipayon ako.” Mapapahimulosan liwat naton ito nga mga bendisyon kon bubuhaton naton an ngatanan basi mag-uswag ha espirituwal. Sugad nga espirituwal nga tawo, mapapahimulosan naton an makalilipay nga kinabuhi yana ngan “an totoo nga kinabuhi” ha tidaraon.—1 Tim. 6:19.