1, 2. მუ პრობლემა უღუდ ართ ჯიმას დო მუჭო მაგვარ თინა?

რობერტიქ ახალგაზრდობას ინათ, მარა ჭეშმარიტებას მნიშვნელოვან ადგილ ვა უკინებუდ თიშ ცხოვრებას. თინა იჩიებ: „გლახას მუთუნს ვა ვორთუდ, მარა დინებას მეპჸუნდჷ. თეშ იძირედ, ითამ სულიერო ჯგირო ვორდ, თიშენ ნამდა კრებას შეხვალამეფს ვა ვოჩილითუანდ დო წანმოწანაშე მუსხირენ თუთას დამხმარე პიონერო ხოლო ვმსახურენდჷ. მარა იშენით მუდგარენ მორკუდ“.

² რობერტიქ დაქორწინებაშ უკულ ქიმეხვად, მუ პრობლემა უღუდ. თინა დო მუშ ოსურ ბიბლიურ კითხვეფს უსვენდეს ართიანს. რობერტიშ ოსურ სულიერო მოაზროვნე პიროვნება რდუ, ათეშენ შურო ვა უჭირდ კითხვეფშა პასუხეფიშ მეჩამა, მარა რობერტი უხერხულს ენმოლუდ, მუშენდა ვა უჩქუდ, მუჭო უპასუხკო. თინა იჩიებ: «ქუგოფხვად, ნამდა ბრელ მუთუნ ვანოფჩქვე. ფიფქრენდ: „ქუმოკო ჩქიმ ოსურს სულიერო ქუხემძღვანელე-და, მუდგაინ ოკო გუვაკეთე“». რობერტიქ დასურო თაშ ქიმიქცუ. თინა იშინანს: „ქიდიბჭყჷ ბიბლიაშ გურგედვალირო გურაფა დო საკითხეფს უმოსო ქინვანჭჷ. მუთ არძაშ უმოს მნიშვნელოვან რე, იეჰოვაწკუმა უმოს ხოლოშიან ურთიერთობა გუვავითარ“.

3. ა) მუს ბგურაფლენთ რობერტიშ მაგალითშე? ბ) ნამ კითხვეფს მიაჩამუ პასუხ თე სტატიას?

³ ჩქი მნიშვნელოვან გაკვეთილიშ გურაფა შემლებნა რობერტიშ შემთხვევაშე. შილებე მიჩქდან ნამთინე ბიბლიურ საკითხ დო  კრებეფს ვა ვოჩილითუანდათ, მარა თე ირფელ ვა რე დასაბაღ, ნამდა სულიერ პიროვნებაქ ქიპჸუათ. შილებე სულიერო წოხოლე ვორდათ ულირ, მარა მუჟამსით ჩქინ დუც გინვამოწმენთინ, ვორწყეთ, ნამდა გაუჯგუშება მოსაჭირნა (ფილ. 3:16). სულიერო წიმიულა გუვარგრძელათინ თე სტატიას სუმ კითხვას ქიმიაჩამუ პასუხი: 1) მუ მიმეხვარებნა თიშ გაგებას, ქუვორეთ დო ვარ სულიერო ძალიერეფი? 2) მუჭო შემლებნა გუვაგრძელათ სულიერო წიმიულა? 3) მუჭო მიმეხვარებნა სულიერობა ჩქინ ცხოვრებას?

4. მის ოხუ ეფესოელეფიშ 4:23, 24-ის მოჩამილ რჩევა?

⁴ მუჟამსით ღორონთიშ მსახურებას იბჭყანთინ, ბრელ მუთუნს ფთირანთ ჩქინ ცხოვრებას დო თეს ნათუაშ უკულ ხოლო ვაგრძელენთ. ბიბლია მირაგადნა: „გეახალით გონებაშ მამოძრავებელ ძალა“ (ეფეს. 4:23, 24). ჩქი ნამთინ ვა ვორეთ სრულყოფილ, ათეშენ საჭირო რე გავაგრძელათ უჯგუშობაშე თირუა. თინეფქ ხოლო ოკო მიქცუან თაშ, მით წანეფ რე იეჰოვას ომსახურნა (ფილ. 3:12, 13).

5. ნამ კითხვეფ მიმეხვარებნა ჩქინ დუდიშ გინომოწმებას?

⁵ სულიერო წიმიულა ქუმოკონან-და, საჭირო რე ჩქინ დუდიშ გინომოწმება. ახალგაზრდეფ ვორეთ დო ვარ ხანშამიშულირეფ, არძაქ ქოპკითხათ ოკო ჩქინ დუც: ქუვოტყუქო, ნამდა სულიერო წიმი მეურქ? ქუვავითარენქო თიცალ აზროვნებას, მუნერით ქრისტეს უღუდ? ქიძირენო კრებას ჩქიმ საქციელშე დო თანაქრისტიანეფწკუმა ურთიერთობაშე, ნამდა სულიერ აზროვნება მიღჷ? ქუვოძირანქო ჩიებათ, ნამდა სულიერ საკითხეფ ჩქიმო მნიშვნელოვან რე? ქაძირანსო ჩქიმ მიკოქუნა, გარეგნობა, რჩევეფიშ დროს ჩქიმ რეაქცია დო ბიბლიაშ გურაფაშ ჩვევა, ნამდა სულიერ პიროვნება ვორექ? მუჭო იფქციებუქ, მუჟამსით ცთუნებაშ წოხოლე გივორექ? ქუვოცადუქო ქიპჸუე უმოს მოწიფულ ქრისტიანქ? (ეფეს. 4:13). თე კითხვეფიშ პასუხეფშა დაფიქრება მიმეხვარებნა, ქობძირათ, ქომღუნა დო ვარ სულიერ აზროვნება.

6. მუ მიმეხვარებნა ქიგებგათ, ქომღუნან დო ვარ სულიერ აზროვნება?

⁶ მინშა შხვეფიშ მოხვარა მოსაჭირნა ქიგებგათ, ქომღუნან დო ვარ სულიერ აზროვნება. მუჭოთ მოციქულ პავლექ თქუნ, ხორციელ პიროვნებას ვარჩქილე, ნამდა ღორონთიშ თოლს გლახათ იქციებ. თიშ გინაწონს, სულიერო მოაზროვნე პიროვნებას უჩქჷ, მუჭო უჯინე იეჰოვა შხვადოშხვა საკითხის. თეს გეძინელ, თინა ხოლო ესმებ, ნამდა ღორონთ ვეწონუანს ხორციელ პიროვნებაშ საქმეეფს (1 კორ. 2:14—16; 3:1—3). უხუცესეფს ქრისტეცალ აზროვნება უღნა დო ხეთეშე მეხვადნა, მუჟამსით ქრისტიანეფ ხორციელო აზროვნებას იჭყანა. ქუვორეთო მზათ, მიბღათ თინეფშე რჩევა? თავრეშე იძირე, ქომღუნან დო ვარ სულიერ აზროვნება (ეკლ. 7:5, 9).

7. მუშენ ვა რე დასაბაღ ბიბლიურ რჩქინაშ მეღება, ნამდა ქიპჸუათ სულიერო მოაზროვნე პიროვნებაქ?

⁷ ვაგმოჭყორდან, ნამდა ქუმოკონა სულიერ აზროვნება გავითარება-და, ბიბლიაშ ხვალე რჩქინა ვა რე დასაბაღ. მეფე სოლომონს ბრელ მუთუნ უჩქუდ იეჰოვაშ გურშენ. თიშ ნარაგადუეფ ბიბლიას რე ინოჭარილ. მარა თიქ ბოლოშა ვა დოსკიდ იეჰოვაშ ართგურქ (1 მეფ. 4:29, 30; 11:4—6). თაშ ნამდა, ბიბლიურ რჩქინაწკუმა ართო, საჭირო რე გუვაგრძელათ სულიერო წიმიულა (კოლ. 2:6, 7). მუჭო რე თენა შეიოლებერი?

8, 9. ა) მუ მიმეხვარებნა რწმენაშ გამანგარებას? ბ) მუ ოკო რდას ჩქინ მიზან ბიბლიაშ გურაფაშ დო ნაგურეფშე დაფიქრებაშ დროს? (ქოძირით სურათ 23-მა გვერდის).

⁸ პირველ საუკუნეშ ქრისტიანეფს პავლე ურაგადუდ, ქიმუჭირნუაფდესკო მოწიფულობაშა (ებრ. 6:1). მუჭო შემლებნა მივაჸუნათ პავლეშ რჩევას? ართ-ართ მნიშვნელოვან ნაბიჯ რე, ქიდიბგურუათ წიგნი „ქუდოსკიდით ღორონთიშ ჸოროფას“. ნაგურეფშე დაფიქრება მიგეხვარებნა თიშ გაგებას, მუჭო  გიმირინუათ ბიბლიურ პრინციპეფ ცხოვრებას. თე წიგნიშ გურაფა თებულ ქუგაფნან-და, შეილებნა შხვა ოგურაფალ საშვალებეფიშ გიმორნაფა, ნამუთ მიგეხვარებნა რწმენაშ გამანგარებას (კოლ. 1:23). თეს გეძინელ, საჭირო რე, დეფიქრათ ნაგურეფშე დო ქოთხუათ იეჰოვას, ქიმგეხვარან თიშ გიმორნაფას.

⁹ გურაფაშ დო ნაგურეფშე დაფიქრებაშ დროს ჩქინ მიზან ოკო რდას, გურ გუხარათ დო დევემორჩილათ იეჰოვას (ფსალმ. 40:8; 119:97). თეწკუმა ართო, ვარია ოკო ფთქუათ ირფელშენ, მუთ მეცილებნა სულიერ რდუალას (ტიტ. 2:11, 12).

10. მუ მეხვარებ ახალგაზრდეფს სულიერობაშ გავითარებას?

¹⁰ ახალგაზრდეფ, ქოიღუნანო სულიერ მიზნეფი? ართ ბეთელელ ჯიმა რაიონულ კონგრესეფიშ დროს პროგრამაშ დოჭყაფაშახ ნათუაშ მსურველეფს სულიერ მიზნეფიშ გურშენ ოკითხჷ. თინეფ შქას ბრელ ახალგაზრდა რე, მიდგას შხვადოშხვა სულიერ მიზან უღჷ. ნამთინეს სრულ დროთ მსახურება აფჷ დაგეგმილ ვარდა თიცალ ადგილშა გინულა, სოდეთ მაქადაქებელეფიშ დიდ საჭიროება რე. მარა თიცალეფ ხოლო რენა, მიდგას დიო მუთუნნერ გეგმეფ ვა უღნა. ხომ ვა ნიშნენს თენა, ნამდა ვარწყენა თიშ საჭიროებას, უღდან სულიერ მიზნეფი? ახალგაზრდეფ, ქოკითხით თქვან დუც: მშობლეფიშ ხათრით ხომ ვა ბღებულენქ მონაწილებას სულიერ საქმეეფს? ქუვოცადუქო ღორონთწკუმა დაახლოებას თიწკუმა პირად ურთიერთობაშ გავითარებათ? მუშო ოკო რაგად, რჩევა, ნამუთ სულიერ მიზნეფიშ მეჭირნაფას ოხუნ, ხვალე ახალგაზრდეფშო ვა რე. თეშ კეთება იეჰოვაშ არძა მსახურს მეხვარებ სულიერობაშ გავითარებას (ეკლ. 12:1, 13).

11. ა) მუშ კეთება რე საჭირო, ნამდა სულიერო მიბრდათ? ბ) ნამ ბიბლიურ მაგალით შილებე გიმიბრინუათ?

¹¹ მუჟამსით ქიგებგენთ ნამ მხარეს მოსაჭირნა გაუჯგუშებან, საჭირო რე გეგნობდგათ ნაბიჯეფ, ნამუთ მიმეხვარებნა დიფთირათ უჯგუშობაშე. მნიშვნელოვან რე მიღდან სულიერ აზროვნება, მუშენდა თენა ღურა დო თელაშ საკითხ რე (რომ. 8:6—8). სულიერ მოწიფულობა სრულყოფილებას ვა ნიშნენს. იეჰოვაშ წმინდა შურს შეულებ ქიმმეხვარან წიმიულას. მუშო ოკო რაგად, თე ირფელშო დიდ მონდომა რე საჭირო. მუსხირენ წანაშ წოხოლე ხემძღვანელ საბჭოშ წევრიქ, ჯიმა ჯონ ბარქ ლუკაშ 13:24-ის თეცალ კომენტარ უკეთ: „ბრელს ვეშიასრულებუ თექ, მუშენდა საჭირო რენ თეშ ვემინდომეს სულიერო გამანგარება“. ჩქი იაკობცალო ოკო მიფქცუათ, ნამუთიქ ვედეთხუ ანგელოზის, სოიშახ კურთხევა ვემიღჷ (დაბ. 32:26—28). მართალ რე, ბიბლიაშ კითხირ სასიამოვნო რე, მარა თე წიგნი ვა რე რომან, ნამუთ დუდიშ ორთუაფალო რე ჭარილი. ჩქი ირნერო ოკო ვეცადათ ბიბლიაშე ძვირფას აზრეფიშ გორუას, მუთ მიმეხვარებნა სულიერ გამანგარებას.

12, 13. ა) მუ მიმეხვარებნა რომაელეფიშ 15:5-ის მოჩამილ რჩევაშ გიმორნაფას? ბ) მუჭო მიმეხვარებნა მოციქულ პეტრეშ მაგალით დო თიშ მოჩამილ რჩევა? გ) მუჭო შემლებნა სულიერობაშ გავითარება? (ქოძირით ჩარჩო „მუჭო შეილებნა სულიერო წიმიულა“).

¹² მუჟამსით სულიერობას ვავითარენთინ, წმინდა შური მუჩანა ძალას, დიფთირუათ აზროვნება. თეგვარო, დრო ხანიშ უკულ ქუმაშინა თიცალ აზროვნება, მუნერით ქრისტეს უღუდ (რომ. 15:5). თეს გეძინელ, წმინდა შურიშ მოხვარათ ხორციელ კორნებეფს გივორჯგინანთ დო გუვავითარენთ ღორონთიშ მოსაწონ თვისებეფს (გალ. 5:16, 22, 23). მუჟამსით ვორწყეთ, ნამდა მატერიალისტურ აზროვნება დო ხორციელ კორნებეფ იშენით მირჩქინდუნან, დუდ ოკო ვადობდვათ დო გუვაგრძელათ სულიერო წიმიულა. ქოთხით იეჰოვას წმინდა შურ დო თინა ქიმგეხვარებნა, გიღდან სწორ აზროვნება (ლუკ. 11:13). ქიგიფშინათ პეტრე მოციქულიშ მაგალითი. რდუ შემთხვევეფ, მუჟამსით თის, მუჭოთ სულიერ პიროვნებას ოსქვანდუნ თეშ ვამუქციებ (მათ. 16:22, 23; ლუკ. 22:34, 54—62; გალ. 2:11—14). მარა პეტრეს დუდ ვადუდვალ. იეჰოვაშ მოხვარათ ჭიჭე-ჭიჭეთ პეტრექ გავითარ ქრისტეცალ აზროვნება. ჩქი ხოლო შემლებნა მივაჸუნათ თიშ მაგალითის.

 ¹³ უმოს გვიანო პეტრექ მიშინუ კონკრეტულ თვისებეფ, ნამუთ ჩქი ხოლო მიმეხვარებნა (წეკითხით 2 პეტრე 1:5—8). * ირნერო ოკო ვეცადათ, ნამდა გუვავითარათ თიცალ თვისებეფი, მუნერით რე დუდშეკება, მოთვინება, ჯიმალურ ჸოროფა. თენა მიმეხვარებნა გუვაგრძელათ სულიერო წიმიულა. ირ დღას ოკო ქოპკითხათ ჩქინ დუც: ნამ თვისება ოკო გუვაუჯგუშე, ნამდა სულიერო გემამგარე?

14. მუჭო იმოქმედენს ჩქინ ცხოვრებას ქრისტეცალ აზროვნება?

¹⁴ მუჟამსით ქრისტეცალ აზროვნება მაღვენუნა, თენა გეგმორჩქინდუ ჩქინ საქციელშე სამუშას, სკოლას, ჩქინ ჩიებას დო ირდღაშიან გადაწყვეტილებეფიშ მეღებაშ დროს. ჩქინ გადაწყვეტილებეფ ოძირანს, ნამდა მოკონა მივაჸუნათ ქრისტეს. ჩქი, მუჭოთ სულიერ პიროვნებეფს, ვა მოკონა მუთუნქ ეცილას იეჰოვაწკუმა ჩქინ ურთიერთობას. მუჟამსით ცთუნებეფს შეფხვადუთინ, სულიერობა მიმეხვარებნა ვადვაჸუნათ თის. გადაწყვეტილებეფიშ მეღებაშახ ოკო გაფჩერდათ დო ქოპკითხათ ჩქინ დუც: ნამ ბიბლიურ პრინციპ მიმეხვარებ? მუჭო მიქციებუდ თე დროს იესო ქრისტე? ქიმეწონებნო თე გადაწყვეტილება იეჰოვას? თე საკითხეფშე დაფიქრება ჩვევათ ოკო მიღდან. ასე ქობძირათ ნამთინე სიტუაცია, სოდეთ შემლებნა ბიბლიურ პრინციპეფიშ გიმორნაფა დო გონივრულ გადაწყვეტილებეფიშ მეღება.

15, 16. ქიმიჸონით მაგალითეფ, მუჭო მიმეხვარებნა ქრისტეცალ აზროვნება, მუჟამსით საქმე ოხუ: ა) დაოჯახებას ბ) სამეგობრო წრეს.

¹⁵ დაოჯახება. თე საკითხის ოხუნ ფერ ბიბლიურ პრინციპ შემლებნა ქობძირათ 2 კორინთელეფიშ 6:14, 15-ის (წეკითხით). * პავლეშ სიტყვეფშე ჯგირო იძირე, ნამდა სულიერ პიროვნებას ბოლოშა დღას ვაგაგინე ხორციელ პიროვნებაშა. მუჭო შემლებნა თე პრინციპიშ გიმორნაფა, მუჟამსით დაოჯახებაშე ფიფქრენთ?

¹⁶ სამეგობრო წრე. ყურადღება ქიმვაქცუათ ბიბლიურ პრინციპის, ნამუთ მოჩამილ რე 1 კორინთელეფიშ 15:33-ს (წეკითხით). * ღორონთიშ მოსაწონ პიროვნებას ვაღვენუ ურთიერთობა თიცალ კათაწკუმა, ნამუთიქ შილებე ეცილას თიშ სულიერობას. ნამ კითხვეფ მიმეხვარებნა თე დროს? მაგალთო, მუჭო შეილებნა თე პრინციპიშ გიმორნაფა სოციალურ ქსელით სარგებლობაშ დროს? ვარდა, მუჭო მიქციებუთ, მუჟამსით უჩინებუეფ გაპეჯენა თინეფწკუმა ართო მონაწილება მიღათ ონლაინ ლაჸაფებს?

17-19. მუჭო მიმეხვარებნა სულიერ აზროვნება ა) დუდ ევუჩილითუათ საქმეეფს, ნამუთ ოცილ სულიერ წიმიულას? ბ) მიღდან სულიერ მიზნეფი? გ) გაუგებრობეფიშ დროს?

¹⁷ საქმეეფი, ნამუთ ოცილ სულიერ რდუალას. მოციქულ პავლექ გაფრთხილება მეჩჷ ქრისტიანეფს, ნამუთ ინოჭარილ რე  ებრაელეფიშ 6:1-ის (წეკითხით). * მუ რე თი „ღურელ საქმეეფი“, ნამუსით დუდ ოკო ევუჩილითუათ? თეშა მიშურს არძა საქმე, ნამუთ მეცილებნა სულიერო წიმიულას. თე მუხლის მოჩამილ პრინციპის შეულებ მიმეხვარან შხვადოშხვა საკითხეფიშ დროს. მაგალთო: თიცალ საქმე ხომ ვა რე თენა, ნამუსით მუთუნნერ ჯგირობუა ვა მოუღჷ? ქიჸუაფნო ჯგირ თე ბიზნესიშ წუმოჭყაფა? მუშენ ოკო ვა ვორდე თი გაერთიანებეფიშ წევრი, ნამუთ მსოფლიო მდგომარეობაშ გაუჯგუშებას ოცადნა?

¹⁸ სულიერ მიზნეფი. იესოშ სიტყვეფი, ნამუთ გვალას ქადაქებაშ დროს თქუნ, მოხვარნა მიღდან ჯგირ სულიერ მიზნეფი (მათ. 6:33). სულიერ პიროვენება ირიათო ფიქრენს სულიერ მიზნეფიშ მეჭირნაფაშე. თე პრინციპეფ მიმეხვარებნა ქუპასუხათ თეცალ კითხვეფს: გუვაგრძელაო უმაღლეს განათლებაშ მეღება? ქოღირნო თე სამუშაშ დოჭყაფა?

¹⁹ გაუგებრობეფი. მუჭო მიმეხვარებნა გაუგებრობეფიშ დროს პავლეშ რჩევა, ნამუთ რომაელ ქრისტიანეფს მეჩჷ? (რომ. 12:18). ქრისტეშ მიმაჸუნალეფს ბიბლია თეცალ რჩევას არზენს: „მშვიდობიანო რდათ არძაწკუმა“. მუჭო იფქციებუთ გაუგებრობეფიშ დროს? ხომ ვამჭირა დათმობა დოვარ თიცალ პიროვნებათ მიჩინენა, ნამუთ მშვიდობას უნწყუნს ხეს? (იაკ. 3:18).

20. მუშენ გოკონა სულიერო წიმიულა?

²⁰ თენა ხვალე მუსხირენ მაგალით რე, სოვრეშეთ იძირე, მუჭო მიმეხვარებნა ბიბლიურ პრინციპეფ თიცალ გადაწყვეტილებეფიშ მეღებას, ნამუსით სულიერ პიროვნებაშე ელნა. სულიერ აზროვნება მოხვარნა მიღდან ბედნერ დო კმაყოფილ ცხოვრება. სტატიაშ დაჭყაფუს მოშინაფილ რობერტი იჩიებ: „თიშ უკულ, მუჟამსით იეჰოვაწკუმა ნამდვილ ურთიერთობა გუვავითარინ, უჯგუშ ქომონჯ დო მუმა ვორექ. ასე კმაყოფილო დო ბედნერო ბგინაფლენქ დუც“. ჩქი ხოლო შემლებნა თეცალ კურთხევეფიშ მეღება, მუჟამსით ირნერო ქივეცადებუთ სულიერო წიმიულას დო შედეგო, კმაყოფილ ცხოვრება მაღვენნა, მუჭოთ ამდღა, თეშ მომავალს ხოლო (1 ტიმ. 6:19).