BELFAST LOUGH sat cheqar purkasajja, barconkir jaqenakajj qhantatiw uka lugaran qollunakapajj suma chʼojjñätap uñjapjjäna. Ukhasti 1910 mayo phajjsïnwa. Charles Taze Russell jilataw uka barconkäna, ukampejj phesqër kutiw Irlanda islar viajïna. Russell jilatajj pä jachʼa barconak luraskirwa uñjäna, maynisti Titanic satänwa, uka barcojj qhepatjja uma manqharuw jalantjjäna, yaqhasti Olympic satarakïnwa. * Barconak puripki ukansti, Bibliat Yatjjatirinaka sasin uñtʼatäpkäna ukanakat 12 suyasipkäna.

20 maranak nayrajja, suma yatiyäwinakajj oraqpachan yatiyasiñapatakiw Russell jilatajj yaqha cheqanakar 1891 julio phajjsin viajiñ qalltäna. City of Chicago sat jachʼa barcotwa Irlanda markar saräna, Queenstown sat cheqar purkasajja Inti jalantir uñjäna. Ukhajj inas kunanakatï awk taykapajj markapat cuentapjjerïkäna ukanak amtaschïna. Uka markanak suma chʼojjñätap uñjasajja, yapunakajj apthapiñatak poqoratäjjatapwa Russell jilatasa, jupamp chik saririnakas amuyapjjäna.

Russell jilatajj paqallq kutiw Irlanda markar visittʼäna. Nayrïr kuti sarkäna ukhajja discursop istʼirinakajj jukʼamp yatiñ munapjjäna, ukatwa qhepa maranakansa discursonakap istʼirejj patak patakani sarapjjerïna, awisajj waranq waranqaniw sarapjjarakirïna. 1903 maran mayo phajjsinwa payïr kuti viajïna, ukhasti Belfast, Dublín markanakanwa tantachäwinakajj apasïna, ukatakejj walja periodiconakanwa yatiyasïna. Russell jilatajja “La promesa bajo juramento” sat discurso arstʼäna, ukanjja Abrahán chachajj Diosar taqe chuyma confiyatapa, ukhamaraki jutïr urunakan kuna bendicionanaktï katoqkañäni ukanak qhanañchäna. “Tantachasirinakajj sum istʼapjjäna” sasaw Russell jilatajj säna.

Irlanda markanjja Diosan arunakap wal istʼañ munapjjäna, ukatwa Russell jilatajj kimsïr viajepan Europa toqer sarkäna ukhajj Irlanda markar visittʼarakïna. 1908 abril phajjsin mä alwajja, Belfast sat markan barconak purki ukanwa phesqa jilatanakajj qatoqapjjäna. Uka jaypʼpachaw “La caída del imperio de Satanás” sat discurso arstʼäna. “Mä 300 jaqenakaw tantachasipjjäna”. Ukanjja mä chachaw walja jisktʼanakamp yantʼäna, Russell jilatajj Bibliampiw qhanañchäna. Dublín cheqanjja ukhamarakiw OʼConnor chachajj jukʼamp yantʼañ munäna, jupajj “Asociación Cristiana de Jóvenes” siski ukan secretariopänwa, waranqa jila jaqenakaruw jilat kullakanak contra saytʼayañ munäna. ¿Kunas paspachäna?

Uka tiempon kunas paspachäna uk amuytʼañäni. Bibliatwa mä discurson qhanañchasini sasaw The Irish Times sat periodicon yatiyasïna, ukatwa Bibliat yatjjatañ munir mä chachajj ukar saräna. Ukar purïna ukhajj wali phoqänwa, asiento katuñas chʼamarakïnwa. Wali sum istʼäna, kunjamsa chʼiyar saconi, janqʼo ñikʼutani, janqʼo  sunkhani mä jaqejj amparamp amparampi parlas mays maysa plataforman sarnaqäna uk uñjäna. Uka arstʼirejj Bibliampiw sum qhanañchäna, ukhamatwa uka jaqejj jukʼat jukʼat Biblian cheqa yatichäwinakap sum amuyjjäna. Janiw parlantes utjkänti, ukampis taqeniw mä hora chikatan sum istʼapjjäna. Tantachasirinakajj jisktʼapkäna ukhajja, OʼConnor chachampi amigonakapampiw arstʼiri jilatar jisktʼanakampi yantʼapjjäna, ukampis jilatajj Bibliamp qhanañchasaw taqe ukanak arjjatäna. Uk istʼasajja jaqenakajj kusisitaw amparanakap tʼajjllirtʼapjjäna. Tukuyjjäna ukhajja sarkäna uka jaqejj jukʼamp yatjjatañatakiw jilatanakar jakʼachasïna. Kunjamtï yaqhepajj sapkejja, waljaniw Diosan arunakap ukham uñtʼawayapjje.

1909 mayo phajjsinjja, Russell jilatajj Mauretania sat jachʼa barcotwa Nueva York markat Irlanda markar saräna, ukampejj pusi kutiw saräna. Ukhasti ratuk qellqeri (taquígrafo) Huntsinger sat jilatampiw saräna. Ukhamatwa lamar qotnäm sarkasajj Yatiyañataki sat revistatak yatichäwinak qellqasipkakïna. Belfast sat markar puripjjäna ukhasti, Russell jilatajj 450 jaqenak nayraqatanwa mä discurso arstʼäna, wali phoqätap laykojj 100 jaqenakaw saytʼatakïpjjäna.

Irlanda markar phesqër kuti sarkäna ukhajja niya ukhamarakikïnwa. Russell jilatajj Dublín markan arstʼäna, ukarojj wali uñtʼat mä teólogo chachaw OʼConnor chachamp saratayna, tukuyarojja jilatajj Bibliampiw jisktʼanakapar qhanañchäna. Tantachasirinakasti, uk istʼasajj wal kusisipjjäna. Qhepürusti Russell jilatampi, jupamp chik saririnakampejj correonak apir barcotwa Liverpool sat cheqar sarapjjäna, ukatsti Lusitania jachʼa barcotwa Nueva York markar sarjjapjjäna. *

Russell jilatajj 1911 maran sojjtïri, paqallqöri kuti sarkäna ukhajja, discursonak arstʼäna, ukasti janiräkipanwa periodiconakan yatiyasïna. Uka pachpa maran abril phajjsinjja, 20 jilat kullakanakaw 2.000 jaqenakar Belfast cheqar qatoqapjjäna, ukhamatwa “El más allá” sat discurso istʼapjjäna. OʼConnor chachajj religión pʼeqtʼir yaqha chachampiw Dublín markar sararakitayna, panpachaniw wal jisktʼapjjäna. Jilatan Bibliampi qhanañchatapajja, tantachasirinakar wal gustäna. Octubre, noviembre phajjsinakansti, yaqha markanak visittʼarakïna, waljaniw istʼapjjarakïna. Dublín markanjja, OʼConnor chachampi 100 jaqenakampejja, mayampiw tantachäw saytʼayañ munapjjäna, ukampis tantachasirinakajj Russell jilatatwa saytʼasipjjäna.

Uka tiemponjja Russell jilatakiw discursonak arstʼirïna, ukampis jupajj akham sänwa: “Janiw khitis wakiskiripunïkiti”, “akham lurañajj Diosankiwa, janiw jaqenkkiti” sasa. Ukham discursonakampiw tantachäwinak apañajj qalltasiwayi, Bibliat yatichasiraki. Ukatjja walja markanakanwa congregacionanakajj utjawayi, ukhamatwa Irlanda markpachan Diosan arunakapajj yatiyasiwayi. (Gran Bretaña markat qellqanita).