SAMTANG nagkaduol ang barko sa bokana nga Belfast Lough, nakita sa gamayng grupo sa mga pasaherong nagtindog sa deck ang lunhawng kabukiran nga gidan-agan sa silaw sa adlaw sa sayong kabuntagon. Mayo 1910 kadto. Usa sa mga pasahero si Charles T. Russell, ug kini ang iyang ikalimang pagbisita sa Ireland. Nakita ni Brader Russell ang duha ka dagko kaayong barko nga ginahimo, ang Titanic ug ang Olympic. * Sa pantalan unahan sa himoanag barko, nagtindog ang pipila ka Estudyante sa Bibliya nga naghulat niya.

Mga 20 ka tuig unâ pa niana, sa pagpangitag kinamaayohang paagi sa pagpakaylap sa maayong balita sa tibuok kalibotan, si Brader Russell nakadesisyon nga mobisita sa lainlaing nasod sa gawas sa America. Una niyang gibisita ang Ireland niadtong Hulyo 1891. Samtang nagkaduol sa pantalan ang City of Chicago, nakita niya ang pagsalop sa adlaw sa baybayon sa Queenstown, ug tingali nahinumdom siya sa gisulti sa iyang ginikanan bahin sa ilang yutang natawhan. Dihang naagian ni Brader Russell ug sa iyang mga kauban sa biyahe ang limpiyong mga lungsod ug nindot nga kabaryohan, ilang naamgohan nga kining lugara “andam ug naghulat nga anihon.”

Si Brader Russell kapito mibisita sa Ireland. Tungod sa interes nga nahaling sa iyang unang biyahe, ginatos​—usahay linibo pa—​ang naminaw niya sa iyang ulahing mga pagbisita. Sa iyang ikaduhang biyahe, niadtong Mayo 1903, gibalita sa mga mantalaan ang miting publiko sa Belfast ug Dublin. Si Russell nahinumdom nga “ang nanambong naminaw pag-ayo” sa topikong “Gipanumpaan nga Pakigsaad” nga naghisgot sa pagtuo ni Abraham ug sa umaabot nga mga panalangin alang sa katawhan.

Tungod kay daghang interesado didto, apil ang Ireland sa ikatulong biyahe ni Russell sa Europe. Usa ka buntag sa Abril 1908, gisugat siya sa lima ka brader sa pantalan sa Belfast. Pagkagabii, ang gibalitang pakigpulong, “Ang Pagkapukan sa Imperyo ni Satanas,” gitambongag “halos 300 ka intelihenteng mamiminaw.” May misupak pero nahilom dihang gipakitaag pamatuod sa Bibliya. Sa Dublin, usa ka panatikong oposer​—si Mr. O’Connor, nga sekretaryo sa YMCA—​ang misulay sa pagkombinsir sa kapig 1,000 ka mamiminaw nga supakon ang mga Estudyante sa Bibliya. Unsay nahitabo?

Atong balikan ug hunahunaon ang nahitabo niadtong panahona. Usa ka lalaking interesado sa kamatuoran ang mitambong sa pakigpulong nga gibalita sa The Irish Times. Naglisod siyag pangita ug kalingkoran sa puno nga awditoryum. Naminaw siyag maayo sa putig buhok ug bangasong mamumulong nga nagsul-ob ug taas, itom nga amerkana. Samtang nagpakigpulong, ang mamumulong nagpasopaso sa plataporma nga nagkompas, ug sistematikong nagsaysay sa matag teksto. Nasabtan sa lalaking naminaw pag-ayo ang kamatuoran sa Bibliya. Bisag walay sound system, nadungog sa tibuok awditoryum ang tingog sa mamumulong, nga nakakuha sa atensiyon sa mga mamiminaw  sulod sa usa ka oras ug tunga. Dayon, diha sa pangutanag tubag nga sesyon, gikuwestiyon ni O’Connor ug sa mga higala niini ang iyang gisulti pero nadepensahan niya ang mensahe sa Bibliya. Ang mga nanambong namakpak. Dihang mikalma na ang palibot, ang interesadong lalaki miduol sa mga igsoon aron mokat-og dugang. Sumala sa mga nakakita, daghan ang nakakat-on sa kamatuoran niining paagiha.

Migikan si Brader Russell sa New York niadtong Mayo 1909 sakay sa barkong Mauretania para sa iyang ikaupat nga pagbisita. Giuban niya si Brader Huntsinger, usa ka stenographer, aron makasulat silag mga artikulo sa Watch Tower samtang nagbiyahe. Ang pakigpulong ni Brader Russell sa Belfast gitambongag 450 ug halos 100 ang kinahanglang motindog kay kulag lingkoranan.

Susama niana ang kahimtang sa iyang ikalimang biyahe nga gihisgotan sa sinugdan. Human sa pakigpulong publiko sa Dublin, natubag pinaagig Kasulatan ang mga pangutana sa usa ka iladong teologo nga gidala ni O’Connor, ug nalingaw ang nanambong. Pagkaugma, ang mga biyahero misakay sa paspas nga barkong kargahanag sulat paingon sa Liverpool ug dayon misakay sa sikat nga Lusitania padulong sa New York. *

Gibalita sab ang mga pakigpulong sa ikaunom ug ikapitong biyahe ni Brader Russell, niadtong 1911. Sa tingpamulak niadtong tuiga, giabiabi sa 20 ka Estudyante sa Bibliya sa Belfast ang 2,000 nga nakapaminaw sa pakigpulong nga “Kinabuhi Human sa Kamatayon.” Mitambong na sab si O’Connor sa Dublin nga nianang tungora may kaubang ministro nga daghag pangutana, pero ang nanambong namakpak sa Kasulatanhong mga tubag. Pagka-tinghunlak, gibisita sab ang ubang lungsod ug daghan ang nanambong. Si O’Connor, apil ang 100 ka samokan, misulay na sab pagbalda sa tigom sa Dublin, pero madasigong gisuportahan sa nanambong ang mamumulong.

Bisag si Brader Russell ang nanguna sa paghatag ug mga pakigpulong niadtong panahona, iyang giila nga “ang organisasyon ni Jehova wala magdepende sa usa ka tawo,” kay “dili kini buluhaton sa tawo; buluhaton kini sa Diyos.” Ang gibalitang mga pakigpulong publiko​—nga karon mao ang Miting Publiko—​naghatag ug nindot nga kahigayonan sa pagpatin-aw sa kamatuoran sa Bibliya. Unsay resulta? Ang mga pakigpulong publiko nakatabang sa pagpakaylap sa maayong balita, ug may natukod nga mga kongregasyon sa daghang siyudad sa tibuok Ireland.​—Gikan sa among archives sa Britain.