MAYO de 1910-pe, peteĩ várko a vapór oike ohóvo Belfast Lóughpe, ha umi pasahéro oĩva pype ohecha mbaʼéichapa pe kuarahy osẽvo ohesape umi kaʼaguy vérde asývare. Upérõ Charles Taze Russell oviaha avei upe várkope. Cinco veseháma haʼe oho Irlándape. Ermáno Russell oĩha guive ojekuaa avei mokõi várko tuichaicháva ojejapóva hína. Peteĩva héra Titanic, pe várko tuichaitéva oñapymi vaʼekue. * Ha pe ótro héra Olympic. Ha amo gotyove katu oĩ unos kuánto Estudiánte de la Biblia ohaʼarõva hína chupekuéra.

Veinte áñorupi upe mboyve, ermáno Russell oñepyrũ vaʼekue oviaha Américagui heta ótro lugárpe omombeʼu hag̃ua pe marandu porã. Primeroite voi ovisita kuri Irlanda áño 1891-pe. Upérõ haʼe oviaha pe várko héravape City of Chicago, ha og̃uahẽmbotaitévo Queénstownpe omaña ohóvo pe kuarahyreikére. Upépe oiméne imanduʼa raʼe umi mbaʼe ituakuéra omombeʼúmi vaʼekuére chupe ivállegui. Ovisitávo hikuái umi puévlo porã porã oĩva Irlándape, ermáno Russell ha iñirũnguéra ohechakuaa upérupi umi kóga otyarõmbamaha ha oĩmaha oñemonoʼõ hag̃uáicha, térã ojeheka hag̃ua umi persóna ipyʼaporãvape.

Ermáno Russell 7 vése ovisita vaʼekue Irlanda. Pe primera visítape heta hénte ohendu porã vaʼekue chupe. Upéicha rupi, umi ótra visítape hetaitereivéma oho ohendu idiskúrso. Áño 1903-pe, pe isegúnda visítape, haʼe ojapo kuri diskúrso púvliko Belfast ha Dublínpe. Heta diáriope osẽ vaʼekue haʼe ojapotaha upéva. Ermáno Russell omombeʼu oĩ hague heta persóna ojapysaka porãva hese ojapórõ guare pe diskúrso hérava “La promesa bajo juramento”. Upe diskúrsope haʼe omombeʼu Abrahán ojerovia mbarete hague Jehováre, ha avei oñeʼẽ umi mbaʼe porã yvyporakuéra ohupytýtavare amo gotyove.

Oĩ rupi heta persóna ohendu porãva chupe Irlándape, ermáno Russell ovisita jey upe lugár ohórõ guare tres veseha Európape. Abril de 1908-pe, haʼe og̃uahẽ kuri pyhareve Bélfastpe ha 5 ermáno oho orresivi chupe. Upe kaʼaru pytũme, ermáno Russell ojapo pe diskúrso oñeanunsia vaʼekue haʼe ou mboyve. Pe diskúrso héra “La caída del imperio de Satanás”. Upérõ 300 persónarupi oikuaasevéva la Bíbliagui oho ohendu hag̃ua chupe. Peteĩ karai osẽ oporandu ha okuestiona chupe heta mbaʼe, péro ermáno Russell katupyrýpe ombohovaipaite chupe umíva la Biblia rupive. Dublínpe katu peteĩ karai hérava OʼConnor oñemoĩ mbaretevéma hese. Upe karai ningo sekretário peteĩ grúpo héravape Asociación Cristiana de Jóvenes (ingléspe ko grúpo réra oñemombykyve kóicha: YMCA). Ko karai omoĩsemoʼã umi Estudiánte de la Biblia kóntrape umi mas de 1.000 persóna ijatývape upépe. ¿Mbaʼépa oiko raʼe?

Ñañeimahinamína mbaʼépa oiméne oiko raʼe. Peteĩ kuimbaʼe oikuaaseve la Biblia omboʼéva, upémarõ odesidi oho ohendu pe diskúrso oñeanunsia vaʼekue pe diário héravape The Irish Times. Og̃uahẽvo pe lugár ojejapotahápe pe diskúrso, hetaiterei héntema ijaty ha hasýpe otopa peteĩ asiénto oguapy hag̃ua. Upéi haʼe ojapysaka porã pe diskursántere. Pe diskursánte ningo iñakãrangue morotĩ, ivárva ha oreko peteĩ sáko hũ ipukúva. Haʼe oseñeamba voi la oñeʼẽnguévo ha ndopytái peteĩ hendápente pe platafórmape, síno okorre ápe ha pépe. Oexplika umi téxto ha okompara ótro téxtore oñentende porãve hag̃ua. Upéicha rupi, pe karai oho vaʼekue ohendu  idiskúrso ontende porãvéma ohóvo la Biblia omboʼéva. Ndaipóriramo jepe parlánte, lomímonte enterove ohendu porã pe diskursánte heʼíva, ha ojapysaka porã hese hikuái mas de una óra. Upéi pe diskursánte omeʼẽ oportunida umi héntepe ombaʼeporandu hag̃ua, ha upépe OʼConnor ha isosiokuéra oñepyrũ okuestiona heta mbaʼe pe diskursánte omboʼéva. Péro pe diskursánte katupyrýpe ohechauka la Biblia rupive siertoha la omboʼéva, ha umi hénte ojepopetejoa chupe. Oñekalma rire la situasión, pe karai ñañeʼẽ hague oikuaaseve la Bíbliagui, ha oñemboja umi ermáno rendápe. Ko ehémplo ñamoĩva ningo oikómi vaʼekue, ha oĩ kuri persóna ohecháva ha heʼíva heta hénte oaprende hague upéicha la Biblia omboʼéva.

Mayo de 1909-pe Nueva Yórkpe, ermáno Russell ojupi peteĩ várko héravape Mauretania, ha oho ovisita cuatro veseha Irlanda. Ko viáhepe oraháma hendive ermáno Huntsinger, pórke haʼe oipurukuaa takígrafo (mákina de eskrivír joguaha). Oviaha aja hikuái, ermáno Russell odikta chupe umi artíkulo osẽtava pe Ñemañaháme. Og̃uahẽ rire hikuái Bélfastpe, ermáno Russell ojapo peteĩ diskúrso púvliko, ha 450 persóna oho ohendu chupe. Umíva apytégui 100 voi opytámante oñemboʼyhápe, pórke ndaiporivéima lugár oguapy hag̃ua.

Oñepyrũre ko artíkulo ñañeʼẽ kuri umi mbaʼe oiko vaʼekuére ermáno Russell ovisitárõ guare 5 veseha Irlanda. Upérõ haʼe ojapo kuri avei peteĩ diskúrso púvliko Dublínpe. Upépe peteĩ teólogo ohóva OʼConnor ndive oporandu ermáno Rússellpe heta mbaʼe oikuaaséva, ha haʼe orresponde chupe la Biblia rupive, ha umi héntepe ogustaiterei la ohendúva. Al día sigiénte Russell ha iñirũnguéra ojupi peteĩ várkope ogueraháva korréo Líverpoolpe, ha upéi ojupi hikuái peteĩ várko héravape Lusitania oho hag̃ua Nueva York gotyo. *

Áño 1911-pe, ermáno Russell ojapórõ guare pe sexto ha séptimo viáhe, omeʼẽ kuri umi diskúrso oñeanunsiáma vaʼekue ojapotaha. Upe áñope mes de abrílpe, 20 Estudiánte de la Biblia orresivi umi 2.000 persóna ohóvape Bélfastpe ohendu hag̃ua pe diskúrso hérava “El más allá”. Upéi ermáno Russell ohórõ guare Dublínpe, OʼConnor oñepresenta jeýma upépe ha ogueraha hendive peteĩ líder rrelihiósope, ha heta mbaʼe oporandu hikuái ermáno Rússellpe. Haʼe ombohovái chupekuéra umi porandu la Biblia rupive, ha umi héntepe ogustaiterei upéva. Upéi, octubre ha noviémbrepe ermáno Russell ovisitave unas kuánta siuda oĩva Irlándape, ha heta persóna oho ohendu hag̃ua chupe. Ojapo jeýrõ guare idiskúrso Dublínpe, OʼConnor ha 100 kuimbaʼe omoirũva chupe oho ojoko hag̃uáicha upe rreunión, péro umi hénte oapoja ermáno Rússellpe ha nopermitíri chupekuéra ojapo mbaʼeve.

Upe épokape, ermáno Russell meme lénto ojapo vaʼekue umi diskúrso púvliko. Upéicharõ jepe, haʼe orrekonose vaʼekue ikatunteha avei ótro ojapo la haʼe ojapóva. Upévare heʼi kuri: “Kóva ndahaʼéi yvypóra rembiapo, síno Ñandejára mbaʼe”. Umi diskúrso rupive ojeexplika vaʼekue heta mbaʼe omboʼéva la Biblia, ha upéicha avei ojejapo ñane tiémpope umi rreunión fin de semanaguápe. Umi diskúrso rupive ermáno Russell omboʼe kuri pe añetegua Irlándape, ha péicha oñepyrũ oñeforma heta kongregasión upe lugárpe (Manduʼarã oúva Gran Bretáñagui).