SAMTANG nagapasulod ang barko sa Belfast Lough, makita sang mga pasahero ang berde nga mga bakulod nga ginasilakan sang adlaw, isa ka aga sang Mayo 1910. Amo ini ang ikalima nga pagbiyahe ni Charles T. Russell sa Ireland. Malapit sa pantalan, makita ni Utod Russell ang duha ka dalagku nga barko nga wala pa mahuman, ang Titanic kag ang Olympic. * Sa uluunhan, mga 12 ka Estudyante sang Biblia ang nagahulat sa iya.

Mga 20 ka tuig antes sini, ginpamensar ni Utod Russell nga magbiyahe halin sa Amerika pakadto sa iban nga mga pungsod para mapalapnag ang maayong balita. Una sia nga nagbiyahe sa Ireland sang Hulyo 1891. Nagsakay sia sa barko nga City of Chicago, kag nakita niya ang pagtunod sang adlaw samtang nagapalapit ini sa baybayon sang Queenstown. Mahimo nga nadumduman niya ang paglaragway sang iya mga ginikanan sa ila anay lugar. Samtang nagalabay ang barko sa matinlo nga mga banwa kag matahom nga kaumhan, narealisar ni Utod Russell kag sang iya mga kaupod nga “alanihon na” ini.

Pito ka beses nga nagkadto si Utod Russell sa Ireland. Bangod madamo ang nangin interesado sa iya una nga pagkadto, ginatos kag kon kaisa linibo ang gusto mamati sa iya kada magbalik sia. Sa ikaduha niya nga pagbiyahe sang Mayo 1903, ginpahibalo sa mga newspaper ang mga miting publiko sa Belfast kag Dublin. Nagsiling si Russell nga “nagapamati gid ang mga nagtambong” sa topiko nga “The Oath-Bound Promise” (Ang Promisa nga Ginsumpaan) parte sa pagtuo ni Abraham kag mga pagpakamaayo sa mga tawo sa palaabuton.

Madamo gid ang interesado sa Ireland, gani ginlakip man ini sa ikatlo nga pagbiyahe ni Russell sa Europe. Lima ka utod ang nag-abiabi sa iya sa pantalan sang Belfast, isa ka aga sang Abril 1908. Ang ginpahibalo nga pamulongpulong publiko nga “The Overthrow of Satan’s Empire” (Ang Paglaglag sa Emperyo ni Satanas) ginhiwat pagkagab-i kag gintambungan sang mga 300 ka interesado. May isa nga nagpamatok pero ginpaathagan sia dayon paagi sa Kasulatan. May isa pa ka maisog nga nagpamatok sa Dublin, si Mr. O’Connor, ang sekretaryo sang YMCA. Gintinguhaan niya nga sugyuton ang sobra 1,000 nga nagtambong nga maakig sa mga Estudyante sang Biblia. Ano ang natabo?

Imadyinon naton ang posible nga natabo sadto. Isa ka tawo nga gusto makahibalo sang kamatuoran sa Biblia ang nagkadto para mamati sa pamulongpulong publiko nga ginpahibalo sa The Irish Times. Halos wala na sia sing pungkuan sa awditoryum kay puno na ini. Pero namati sia sing maayo sa ubanon kag buranguson nga humalambal nga nagasuksok sang itom nga amerikana. Nagalakatlakat sa entablado ang humalambal nga nagakumpas samtang nagapamulongpulong. Ginapaathag niya ang mga kasulatan kag nahangpan sang interesado nga tawo ang mga kamatuoran sa Biblia. Bisan wala sing mikropono, nagalanog ang tingog sang humalambal sa bilog nga awditoryum, kag nagpamati ang mga  nagtambong sa sulod sang isa ka oras kag tunga. Sa tion nga makapamangkot na ang mga nagtambong, ginsilingan ni O’Connor kag sang iya mga kaupod ang humalambal nga sala ang iya mensahe, pero gindepensahan ini sang humalambal paagi sa Biblia. Nagpinalakpak ang mga nagtambong. Sang ulihi, nagpalapit sa mga utod ang interesado nga tawo para makatuon pa gid. Suno sa mga nakatambong, madamo ang nakatuon sang kamatuoran sa sini nga paagi.

Sang Mayo 1909, nagsakay si Utod Russell sa barko nga Mauretania halin sa New York para sa iya ikap-at nga pagbiyahe. Gin-upod niya si Utod Huntsinger nga isa ka stenographer para madikta niya sa iya ang mga artikulo sa The Watch Tower samtang nagabiyahe sila. Ang pamulongpulong ni Utod Russell sa Belfast gintambungan sang 450, kag mga 100 sa ila ang nagtindog na lang bangod wala na sila sing mapungkuan.

Halos pareho ang natabo sa ikalima nga pagbiyahe nga ginsambit sa umpisa sini nga artikulo. Pagkatapos sang pamulongpulong sa Dublin, nasabat base sa Kasulatan ang mga pamangkot sang kilala nga ministro nga gin-upod ni O’Connor, kag nalipay gid sa sini ang mga nagtambong. Pagkadason nga adlaw, nagsakay ang grupo ni Utod Russell sa barko nga nagadala sang mga sulat sa Liverpool kag nagbiyahe sila pakadto sa New York sakay sa barko nga Lusitania. *

Ginhiwat man ang ginpahibalo nga mga pamulongpulong sa ikan-om kag ikapito nga pagbiyahe ni Utod Russell sang 1911. Sang tigpamulak sadto nga tuig, gin-abiabi sang 20 ka Estudyante sang Biblia sa Belfast ang 2,000 nga nagpamati sa pamulongpulong nga “Hereafter” (Kabuhi Pagkatapos sang Kamatayon). May gin-upod naman nga isa ka ministro si O’Connor sa Dublin nga nagpamangkot, pero nagpinalakpak ang mga tumalambong sang ginsabat ang iya mga pamangkot base sa Kasulatan. Sang tigragas sadto nga tuig, nagpamulongpulong publiko man sa iban pa nga mga banwa kag madamo ang nagtambong. Gintinguhaan liwat ni O’Connor kag sang 100 ka bugoy nga gamuhon ang miting sa Dublin, pero malipayon nga nagpamati ang mga nagtambong sa nagapamulongpulong.

Bisan pa si Utod Russell ang nagapanguna sa pagpamulongpulong sadto, ginsiling niya nga ang hilikuton “wala nagadepende sa isa ka tawo,” bangod “indi ini hilikuton sang tawo; hilikuton ini sang Dios.” Napaathag ang mga kamatuoran sa Kasulatan sa ginpahibalo nga mga pamulongpulong publiko sadto, nga amo ang ginbasihan sang Miting Publiko subong. Ano ang resulta? Paagi sa mga pamulongpulong publiko, naglapnag ang maayong balita, kag nagdamo ang mga kongregasyon sa madamo nga siudad sa bilog nga Ireland.—Halin sa amon archive sa Britanya.