MAY 1910 ai, bouti ta be Belfast Lough davara ena heau vareai gabuna dekenai ia vareai, bouti ataiai idia gini pasendia haida be mai moale ida dina be ororo amo ia daekau karana idia itaia. Idia huanai be Charles T. Russell, bona unai be iena nega namba 5 Ireland ia vadivadi henia. Tadikaka Russell ena vairanai be bouti badadia rua idia karaia ia itaia, unai be Titanic bona Olympic. * Bible Student taudia momo be wofu dekenai idia gini bona ia idia naria.

Lagani 20 gunana, Tadikaka Russell be tanobada ibounai dekenai sivarai namona harorolaia daladia ia laloa, bena ena lalona ia hadaia tano ma haida do ia vadivadi henia. July 1891 ai, ia lao gabu ginigunana be Ireland. Bouti ladana, City of Chicago, ia guia bona Queenstown kahirakahira idia lao bona dina ia diho neganai, ena tama sina ese edia hanua idia herevalaia dalana ia laloatao. Tadikaka Russell bona ia ida idia lao taudia edia bouti be idia goeva taoni bona hanua hairaidia ia hanaia neganai, idia laloparara unuseniai uma aniani be “idia mage vadaeni gogoa totona.”

Tadikaka Russell be nega 7 Ireland ia vadivadi henia. Iena vadivadi ginigunana amo, taunimanima handred momo, nega haida tausen, idia haboua ena hereva idia kamonai totona. May 1903 ai ena vadivadi iharuana ia karaia neganai, Belfast bona Dublin dekenai ia henia tok be niuspepa dekenai idia halasia. Russell ia gwau, tok ladana “The Oath-Bound Promise” ia henia neganai, “taunimanima be idia kamonai namonamo.” Unai tok ai ia ese Aberahamo ena abidadama bona vaira nega ena helaro ia herevalaia.

Ireland ai taunimanima momo idia kamonai dainai, Russell be nega ihatoina Europe ia vadivadi henia neganai, Ireland dekenai ia lao danu. April 1908 ena daba ai, Belfast ena wofu dekenai ia ginidae neganai, tadikaka 5 ese ia idia hedavari henia. Unai adorahi ai, pablik tok ladana, “The Overthrow of Satan’s Empire,” kamonai totona taunimanima 300 bamona idia haboua. Tau ta be ia kamonai herevadia dekenai ia lalotamona lasi, to karaharaga Baibel amo iena lalohadai idia hamaoromaoroa. Dublin ai, inai tauna ta​—⁠YMCA ena seketere, Mr. O’Connor​—⁠ese taunimanima 1,000 mai kahana edia lalona ia veria Bible Student taudia idia dagedage henia totona. Dahaka ia vara?

Mani unai nega ai idia vara gaudia ita laloa lou. Baibel ena hereva momokani ia ura dibaia tauna ta be The Irish Times dekenai idia halasia pablik tok kamonai totona ia lao. Idia haboua ruma badana lalonai, helai gabuna ta ia davaria lasi. Huina kurokuro tauna, mai ena besoso bona kouti korema ia hahedokilaia tauna ena hereva ia kamonai namonamo. Tok ia henia neganai, platfom dekenai ia raka lao mai bona ena imana ia gaukaralaia, ia gaukaralaia Baibel siridia amo unai tauna ena laloparara Baibel ena hereva momokani dekenai ia habadaia. Ena be  tok henia tauna be maikrofon ia gaukaralaia lasi, to idia haboua taudia ibounai ese iena hereva idia kamonai, ia be hora ta mai kahana ia hereva. Bena, henanadai bona haere negana ai, O’Connor bona ena turadia be ia gwauraia herevadia dainai idia henanadai momo, to ia ese Baibel amo edia henanadai ibounai ia haerelaia. Unai dainai, helai taudia be mai moale ida edia imana idia patapataia. Gabeai, unai kamonai tauna be tadikaka dekenai ia lao, badina ia ura hereva ma haida ia dibaia. Unai idia itaia taudia idia gwau, momo be unai dala amo hereva momokani idia dibaia.

May 1909 dekenai, Tadikaka Russell ena laolao namba 4 ai, bouti ladana Mauretania amo New York ia rakatania, unai nega ai ia ese sivarai torea tauna (stenographer) ia hakaua danu, ia be Tadikaka Huntsinger, unai amo idia loaloa neganai, Watch Tower atikol ia toredia diba. Belfast ai, Tadikaka Russell ena pablik tok kamonai totona, taunimanima 450 idia haboua, idia 100 bamona be idia gini, badina helai gabudia be lasi.

Iena laolao namba 5 ai, matamanai ita herevalaia dala ia badinaia. Dublin ai pablik tok ia henia murinai, O’Connor ese tomadiho stadilaia tauna ia hakaua mai, bona tadikaka ese iena henanadai momo be Baibel amo ia haerelaia dainai, helai taudia ibounai idia moale. Murina dinana ai, bouti maragina ta amo Liverpool dekenai idia lao bena bouti ladana Lusitania dekenai idia guia bona New York dekenai idia giroa. *

Lagani 1911 ai, Tadikaka Russell ena laolao namba 6 bona 7 ai, niuspepa ai idia halasia pablik tok ia henia danu. Siahu negana ai, Belfast dekenai idia noho Baibel Student taudia 20 ese tok ladana “Hereafter” kamonai totona idia mai taudia 2,000 idia naria. Dublin ai, O’Connor be minista ma ta ia hakaua mai, to edia haere ibounai be Tadikaka Russell ese Baibel amo ia haerelaia dainai, kamonai taudia idia moale. Unai lagani tamona ena keru negana ai, taoni ma haida ia vadivadi henia danu, bona momo idia kamonai. Dublin ai idia karaia hebouna hadikaia totona, O’Connor be dagedage taudia 100 ida mai, to kamonai taudia be mai ura bada ida tok henia tauna idia durua.

Ena be unai nega ai Tadikaka Russell ese pablik tok momo ia henia, to ia laloparara “tadikaka ibounai be tok idia henia diba,” badina “inai be taunimanima edia gaukara lasi, to Dirava ena gaukara.” Niuspepa ai pablik tok halasia karana be dala namona Baibel ena hereva momokani idia halasia totona. Unai ese dahaka namo ia havaraia? Pablik tok amo sivarai namona idia halasia, bona Ireland ena siti momo dekenai kongrigeisen matamatadia momo idia hamatamaia.​—⁠Orea ena histori Britain ai.