DURANTE nga mabbiahe i barangay ta Belfast Lough, naddafungan na bebay anna bannag, nasingan na baddi nga grupo na pasaheru ira ta utun na barangay i berde nga vuku-vukig nga nanawagan na bilag ta umma. Mayo 1910 yatun. Para ta tadday nga kavuluda, si Charles T. Russell, mekalimana ngana nga pabbiahe yaw ta Ireland. Umara-aranni kani Brother Russell i dua nga darakal nga barku nga maddaggun nga mapadday, i limimmag nga Titanic anna i barku nga Olympic. * Mattanga dosena nga Estudiante na Biblia i agga-taddag ta pantalan, nga maginnennag ta paddattalna.

Mabbente dagun nige natun, kayà ni Brother Russell nga mannammuan i kapianan nga makua tapenu mewara i mapia nga dumug ta interu-mundo, yatutta dinisidina nga mangngua tu serye na pabbisita ta lawan na America. Namegafu i ollu nga pabbiahena ta Ireland, turi Hulio 1891. Ta barku nga City of Chicago, nasinganna i pallammag na bilag durante nga umaranni yayya ta Queenstown anna talaga neraddammanna i deskripsion na maganana ta paddianadda. Durante nga mabbiahe si Brother Russell anna i kakavvuluna tatun nga marenu anna kakkasta nga pallevu, nalippawada nga tana yaw nga “preparadu anna maginnag ngana nga ma-apit.”

Namippitu nga binisita ni Brother Russell i Ireland. I nassikkag ira nga interes ta ollu nga biahena i manawag nga namaguyu ta ginatu, mittan rinivu, nga magginna uli sa ta tumunug paga ira nga pabbisitana. Ta mekadua nga pabbiahena, turi Mayo 1903, nepakannammu gukaban na lokal ira nga diariu i publiko nga palappana ta Belfast anna ta Dublin. Neraddamman ni Russell nga “atentibo i maggigginna ira” ta topiko nga “The Oath-Bound Promise” meyannung ta pangurug ni Abraham anna ta mappange nga bendision ira para ta totolay.

Megafu ta dakal nga interes ta Ireland, nelagum mangana yatun ta mekatallu nga biahe ni Russell ta Europe. Lima nga brother i nanafung nisa ta pantalan na Belfast turi ta umma na Abril 1908. Ta gabi, i neyanunsio nga publiko nga palappa, “The Overthrow of Satan’s Empire,” i nakala ta interes na “intelihente ira nga maggigginna nga ma-300.” Tadday nga kumokkontra ta nallatanadda i narubang gukaban na malalaki nga pangusa ta Katurakan. Ta Dublin egga i tadday nga talaga determinadu nga mangontra​—si Mr. O’Connor, sekretario na YMCA​—nga namurueba nga sulsulan i maggigginna ira nga maturu 1,000 nga kontran i Estudiante ira na Biblia. Anni i nesimmu?

Manoli ittam tatun anna nonopattam nu anni i makasta nga resulta natun nga nesimmu. Naddesision i tadday nga interesadu nga mammuan i kinakurug ta Biblia nga magatende tu publiko nga palappa nga nepakannammu ta The Irish Times. Maggi arianna naka-itubang ta auditorium nga napappannu tu tolay. Talaga nakafokus yayya ta tadday nga furaw i vùna anna barbas saradu nga ispiker  nga naka-amerikana tu ngisi. Durante nga mappalappa i ispiker, lumaka-lakag yayya ta plataporma, anna makkukkumpas. Memmugug nga ipakanawagna i kada tadday nga teksto yatutta nalippawa natun nga lalaki i kinakurug ira ta Biblia. Maski awan tu sound equipment, magigginna i boses na ispiker ta interu auditorium, nga talaga nalana i atension na maggigginna ta unag na tangoras-gaddua. Tapus ta pakkiavu-anna-tabbag nga parte, dinebate yayya ni O’Connor anna kakavvuluna ngem nedefensana i mensahe na Biblia. Nappoppo i maggigginna megafu ta umanugu ira. Turi ta kalmadu ngana i situasion, inarannian natun nga interesadu nga lalaki i wawwaragi tapenu makagigiammu paga. Segun ta kinagi na testigu ira, aru i nakagigiammu ta kinakurug ta kunnatun nga istilo.

Turi ta Mayo 1909 ta panoda ta New York gukaban na barku nga Mauretania para ta meka-appa nga pabbisita ni Brother Russell, nivuluna i tadday nga stenographer, nga si Brother Huntsinger, tapenu i tiempo ta pabbiahe ay meyusa ta pangidiktana sa ta artikulo ira na Watch Tower. I palappa ni Brother Russell ta Belfast ay inatendeyan na 450 nga lokal nga residente, nga ma-100 i nakataddag megafu ta ariadda makkasya ta kuarto.

Kunnatun gapa i aktibidad ta mekalima nga biahe nga nakagi ta gafu. Kabalin na palappa ta Dublin, natabbag gukaban na Biblia i pakkiavu ira na kilala nga teologo nga nivulu ni O’Connor, nga namagayayya ta maggigginna ira. Ta tumunug nga aggaw, nabbarangay i mabbiahe ira nga minay ta Liverpool anna nattakay ta sikat nga Lusitania mappange ta New York. *

Egga gapa i neyanunsio ira nga publiko nga palappa ta meka-annam anna mekapitu nga biahe ni Brother Russell turi 1911. Ta Abril natun nga dagun, ma-20 nga Estudiante na Biblia i namisita ta 2,000 nga nagginna ta palappa nga “Hereafter.” Minay si O’Connor ta Dublin anna egga mangana i nivuluna nga ministro tapenu mappakkiavu, ngem nappoppo i maggigginna ira ta nebase-Biblia ira nga tabbag. Ta Oktubre anna Nobiembre natun nga dagun, nabisita i tanakuan nga ili anna aru i minay. Pinurueban mangana ni O’Connor anna na 100 nga magulu nga kakavvuluna nga guluan i paggarammammung ta Dublin, ngem sinuportan lagapa na magginna ira i ispiker.

Maski nu si Brother Russell laman i nangirollu ta pangipresenta ta palappa ira tatun nga tiempo, nalippawana nga yaw ay “ari nakadepende ta tadday nga tolay,” ta “ari nga trabahu yaw na tolay; trabahu yaw na Dios.” I neyanunsio ira nga palappa ta publiko—​i dati nga pagagal ta Miting Publiko​—ay kapianan nga oportunidad tapenu meyarubang i kinakurug ira ta Biblia. Anni i resultana? Nakoffun i publiko nga palappa tapenu mewara i mapia nga dumug, anna nakkaru i bilang na kongregasion ta aru nga siudad ta interu Ireland.​—Naggafu ta archives tam ta Britain.