BAYAT a sumsumrek ti barko iti Belfast Lough, a maysa a luek, nakatakder ti sumagmamano a pasahero iti kubierta, wenno makinngato a paset ti barko, a mangbuybuya kadagiti berde a turod a masilsilnagan iti lawag ti init iti agsapa. Mayo 1910 idi. Maysa kadakuada ni Charles T. Russell, ket dayta ti maikalima a panagbiahena iti Ireland. Makitkitana ti dua a dadakkel a barko a maar-aramid, ti Olympic ken ti nakas-ang ti nagtungpalanna a Titanic. * Iti likud ti pagaramidan iti barko, nakatakder iti pantalan ti adu nga Estudiante ti Biblia nga agur-uray kenkuana.

Agarup 20 a tawen sakbayna, nagdesision ni Brother Russell nga agsasaruno a pasiarenna ti nagduduma a pagilian iti ruar ti America tapno maammuanna ti kasayaatan a pamay-an a maisaknap ti naimbag a damag iti intero a lubong. Rinugianna iti Ireland ti umuna a panagpasiarna idi Hulio 1891. Bayat a nakalugan iti City of Chicago, mabuybuyana ti ilelennek ti init iti asideg iti igid ti baybay ti Queenstown ken mabalin a nalagipna ti panangiladawan dagiti nagannakna iti dati a pagilianda. Bayat a malabsan ni Brother Russell ken dagiti kakaduana a nagbiahe dagiti naurnos nga ili ken napipintas nga aw-away, nabigbigda a daytoy a pagilian ket kas iti talon a “nakasaganan a maani.”

Namimpito a pinasiar ni Brother Russell ti Ireland. Adu ti naginteres iti damo a panagpasiarna. Nalawag a dayta ti makagapu a ginasut, wenno rinibu pay ketdi no dadduma, ti dimngeg kadagiti simmaganad a panagbisitana. Iti maikadua a panagpasiarna, idi Mayo 1903, naipakaammo kadagiti lokal a pagiwarnak dagiti palawag publiko idiay Belfast ken Dublin. Imbaga ni Russell a “dimngeg a naimbag dagiti immatender” iti palawag a “The Oath-Bound Promise” a maipapan iti pammati ni Abraham ken kadagiti masanguanan a bendision para iti sangatauan.

Gapu ta adu ti interesado, inraman ni Russell ti Ireland iti maikatlo a panagbisitana iti Europa. Lima a kakabsat ti simmabat kenkuana iti pantalan iti Belfast iti maysa nga agsapa idi Abril 1908. Naipakaammo ti palawag a “The Overthrow of Satan’s Empire.” Karabiyanna, adda “agarup 300 a dimngeg a tattao a silulukat ti panunotna.” Maysa a nangkuestionar ti nasungbatan a dagus babaen iti nataktika a pannakausar ti Kasuratan. Idiay Dublin, ti nakaro a bumusbusor a sekretario ti YMCA a ni Mr. O’Connor pinadasna a kombinsiren ti nasurok a 1,000 a tattao a busorenda dagiti Estudiante ti Biblia. Ania ti napasamak?

Iladawantayo iti panunottayo ti mabalin a napasamak. Inkeddeng ti maysa a lalaki nga agsapsapul iti kinapudno iti Biblia nga atenderan ti palawag a naipakaammo iti The Irish Times. Narigatan a nangbirok iti pagtugawan iti napumpunno nga auditorium. Naala a dagus ti atensionna iti ubanan ken barbasan nga agpalpalawag a nakabado iti nagayad ken nangisit  nga amerikana. Bayat nga agpalpalawag ti ispiker, agkomkompas ken agpagnapagna iti plataporma. Silalaing a nagusar kadagiti teksto ken pinagnanaigna dagita ket naawatan ti lalaki dagiti kinapudno iti Biblia. Uray awan dagiti alikamen a mangpapigsa iti uni, mangngeg ti amin ti timek ti ispiker isu a dimngegda iti maysa ket kagudua nga oras. Iti paset a saludsod ken sungbat, isu ket kinuestionaran ni O’Connor ken dagiti kakaduana ngem naidepensa ti ispiker ti palawagna babaen iti Biblia. Nagpapalakpak dagiti dumdumngeg a mangipakita nga umanamongda. Idi nagsardengen ti palakpak, immasideg ti lalaki kadagiti kakabsat tapno ad-adu pay ti maammuanna. Sigun kadagiti nakasaksi, adu ti nakaammo iti kinapudno iti kastoy a pamay-an.

Idi Mayo 1909, iti maikapat a panagpasiar ni Brother Russell, naglugan iti Mauretania manipud New York ken intugotna ti stenographer a ni Brother Huntsinger tapno bayat ti panagbiaheda mabalinna nga idiktar kenkuana dagiti artikulo ti Watch Tower. Adda 450 nga umili nga immatender iti palawag ni Brother Russell idiay Belfast, ket agarup 100 kadakuada ti nagtakder ta awan pagtugawanda.

Kasta met laeng ti napasamak iti maikalima a panagpasiar a nadakamat itay. Kalpasan ti palawag idiay Dublin, nasungbatan babaen iti Kasuratan dagiti saludsod ti maysa a mabigbigbig a teologo nga intugot ni O’Connor ket naragsakan iti dayta dagiti dumdumngeg. Iti simmaruno nga aldaw, naglugan dagiti biahero iti napartak a barko nga agitultulod iti surat nga agturong iti Liverpool sa nagluganda iti sikat a barko a Lusitania nga agpa-New York. *

Adda met dagiti naipakaammo a palawag bayat ti maikanem ken maikapito a panagpasiar ni Brother Russell idi 1911. Iti Abril, inasistiran ti 20 nga Estudiante ti Biblia ti 2,000 a dimngeg iti palawag a “Hereafter.” Napan manen ni O’Connor iti Dublin a kaduana ti sabali manen a ministro ket adu ti saludsodna, ngem pinalakpakan dagiti dumdumngeg dagiti sungbat a naibatay iti Biblia. Iti met Oktubre ken Nobiembre, nabisita ti dadduma nga ili ket adu ti immatender. Naminsan manen a ginandat ni O’Connor ken ti 100 a nagulo a tattao a kakaduana a riribuken ti maysa a taripnong idiay Dublin, ngem sinuportaran dagiti dumdumngeg ti ispiker.

Nupay ni Brother Russell ti kaaduanna a nangiparang kadagiti palawag publiko iti dayta a tiempo, binigbigna nga “awan ti tao a saan a masukatan,” ta “saan a trabaho ti tao daytoy; trabaho ti Dios daytoy.” Dagiti naipakaammo a palawag, a maawagan ita iti Palawag Publiko, nangtedda iti nagsayaat a gundaway a mangiparang kadagiti kinapudno iti Kasuratan. Ania ti resultana? Nakatulong dagita tapno maisaknap ti naimbag a damag, ken mabuangay dagiti kongregasion iti adu a siudad iti intero nga Ireland.—Manipud iti archives-tayo iti Britain.