OMWO vwato vwetile mu ndonga ya Belfast, vanu vaje vakele muje mu vwato vamwene minkinda yaivwa ku thimbu ya mutondo omwo litangwa lyakele na kutuhuka. Evi vyalingiwile mu May 1910. Charles T. Russell wapwile umo wa vanu vaje vakele muje mu vwato, cho ovu vukevwo vwapwile vungendthzi vwa mu chitanu kuya ku Ireland. Ndolome Russell na vakwavo vaje vakele muje mu vwato vamwene vimbapolo vivali vyakama vije vivakele na kutunga, vije vivatumbwile ngwavo Titanic na Olympic. * Kuthambwa yevi vimbapolo vivakele na kutunga, kwakele mbunga ya vaka-kulilongetha Mbimbiliya vaje vakele na kumuvandamena.

Myaka 20 kunima, Ndolome Russell te nashangumuka laja kwambulula muthzimbu wauvwa ku mafuti eka, aje kuwakele mu America. Walivangele kuya ku Ireland, mu July 1891. Omwo walondele mu mbapolo ije vatumbwile ngwavo City of Chicago, wamwene litangwa mulyakele na kulahuka muvetele kuyehi na Queenstown. Ha thimbu oyo, hamo wanukile vivamulekele vithemi vendi vya kukundama ku lifuti lya Queenstown muje mwapwile mwimbo lyavo. Omwo Ndolome Russell na vakwavo vakele na kwenda navo vetile mu vimbongi vyavivwa na mu mitambela yaivwa, vanangukile ngwavo eyi myela inapu ngwe lihya lije lili na “vimbuto vije vinavandamena vaka-kuteja.”

Ndolome Russell wendelele lifuti lya Ireland vithimbu vya kupwa 7. Ha vungendthzi vwendi vwa kulivanga, vanu vavwahelelele manene kuthziva muthzimbu wauvwa. Ngechi, omwo wakele na kwilukilako ha mangendthzi akwavo vanu vavangi vakele na kwija na kutolilila ku viñanda vyendi. Omwo wakele na kulivwahethela vungethndthzi vwendi vwa mu chivali mu May 1903, vathonekele vya kwija kwendi mu mapapelo a mithzimbu a mu Belfast na mu Dublin na kulanya vanu mangana vaije ku viwano vya mbunga. Russell wendekele ngwendi “vanu vaje vakungulukile, vatolililile mwamuvwa” ku ñanda ije yakele na mutwe wa “The Oath-Bound Promise,” (Chikumiyo cha Chikulahetho) ije yendekele ha likulahelo lya Avilahama na vivethzikitho vivakawana vanu kulutwe.

Omwo Russell waile ku Europe lwa mu chitatu, wayongwele kuketa na mu Ireland mwafwa mwakele vanu vavangi vaje vashakele kuthziva muthzimbu wauvwa. Mu April 1908, vandolome vatanu vamutambwile omwo wetele mu Belfast, mutondo. Vandolome valanyene vanu vavangi kwakutolilila ku ñanda ya mbunga ije yakele na mutwe wa kwendeka ngwavo: “The Overthrow of Satan’s Empire” (Kunyonga kwa Chiyulo cha Satana), cho “vanu vaje vashakele kuthzivuka vuthunga va kupwa 300” vethzileko. Mukati ka vaje vakukungulukile, mwakele munalume umo muka-kulwitha, oloni vamukumbulwile mwamuvwa kulikwathetha Vithoneka. Mu Dublin, munalume umo muka-kulwitha wa lithzina lya O’Connor, uje wapwile muka-kuthoneka wa vaka-YMCA washakele kungumuna vanu va kutuvakana 1,000 mangana kethi vatolilile kuli Vaka-kulilongetha Mbimbiliya. Vika vyalingiwile?

Tuchilingeni ngwe netu mutwakele muje mu chiwano mangana tuthzivithithe mwamuvwa vyuma vyalingiwile. Cho lingeni ngwe mumona munalume uje ashaka kuthzivuka vuthunga vwa mu Mbimbiliya aija na kutolilila ku ñanda ya mbunga ije ivathonekele mu lipapelo lya mithzimbu lya The Irish Times. Omwo eta ku chiwano, atondatonda ha kutumbama, oloni kawanaho mwafwa vanu vanatumu. Owo munalume atolilila mwamuvwa kuli munalume wa kakulukathzi, uje ali na minjethzi yailaha, uje lalo nathzala mukanjo wa kuthzivala. Muka-kwendeka ñanda endeka ñanda yendi mu kushuvuluka, oku ali na kwendangana ha vutenda na  kwinathzeka mavoko noku noku, cho apangetha vithoneka vya kulithethzathethza vije vikwatha uje munalume kuthzivithitha vuthunga vwa mu Mbimbiliya. Nameme kukwakele makina akwametha ku lijwi, oloni vanu voshe vaje vakungulukile vathzivile mwamuvwa vyakele na kwendeka, cho vatwaleleleho kumutolilila ha ola imo na minutu 30. Muyetele thimbu ya vihula na vikumbululo, ndolome Russell vamulwithile kuli O’Connor na vakwavo, oloni wavakumbulwile kulikwathetha Mbimbiliya. Ngechi, vanu vakandele mavoko mu kwimanena vandolome. Munima ya chiwano, munalume uje washakele kulilongetha vuthunga walombele vandolome ngwendi vamulongethe vyavingi. Vukaleho vumwetha ngwavo vanu vavangi mukemwo muvalilongethelele vuthunga.

Omwo Ndolome Russell watundile ku New York mu May 1909, walondele mu mbapolo ya Mauretania, cho ha vungendthzi ovu vwa mu chiwana wendele na ndolome Huntsinger uje wathzivukile ku taipa mangana mu vungendthzi vwavo athoneke vithimpi vya mu leka mangana vakuvithoneke mu Kaposhi ka Kukengela. Vanu va kupwa 450 vakatolililile ku ñanda ya Ndolome Russell ije yakendekelele mu Belfast, cho vanu va kupwa 100 vemanene lika mwafwa kuvawanene ha kutumbama.

Vikevyo vyalingiwile na ha vungendthzi vwendi vwa mu chitanu vutunendeka ku maputukilo a ino ñanda. Omwo wamanethele kwendeka ñanda yendi mu Dublin, munalume umo uje walilongethele vya vulombelo wethzile na O’Connor, cho Ndolome Russell wakumbulwile vihula vyavo kulikwathetha Mbimbiliya, cho mbunga yavwahelelele manene. Lya mukwavo, Ndolome Russell na vakwavo valondele vwato vuje vwakele na kutwala mikanda na kuvatwala ku Liverpool, muvaketele kuje, vakalondele mu mbapolo ya Lusitania na kuya ku New York. *

Viñanda vya mbunga vakele na kuvithoneka mu mapapelo a mithzimbu, cho Ndolome Russell wakavyendekele ha vungendthzi vwendi vwavu 6 novu vwavu 7 mu 1911. Ha thimbu ya ndombo ya chithika, Vaka-Kulilongetha Mbimbiliya va kupwa 20 va mu Belfast hamo lika na vaka-kuvwahelela 2,000, va kutolililile ku ñanda ije yakele na mutwa wa “Hereafter.” (Vuyoye vwa Kulutwe) O’Connor wethzile lalo mu Dublin na mukulunu wa vulombelo na kwihwothzola vihula, oloni mbunga vakandele mavoko omwo ndolome Russell wavakumbulwile kulikwathetha Vithoneka. Mu mwaka ou vene mu ntondwe, wendelele vimbongi vikwavo, ngechi vanu vavangi vakele na kwija na kutolilila ku viñanda vyakele na kwendeka. O’Connor na vakwavo va kupwa 100 vashakele kwonowetha viwano vije vivakele na kulingila mu Dublin, oloni vanu vavangi vemanene ndolome Russell.

Nameme Ndolome Russell wakele na kutwamenena chipangi cha kwambulula, oloni wathzivukile ngwendi, “echi chipangi kuchemanene ha ndthzili ya munu,” mwafwa “kuchapwile chipangi cha munu, oloni chapwa cha Njambi.” Kuthoneka viñanda vya mbunga mu mapapelo a mithzimbu kwakwathele manene vanu vavangi valilongethe vuthunga. Vika vyatundilemo? Viñanda vya mbunga vyakwathele manene vanu vathzive muthzimbu wauvwa, cho vikungulukilo vyalivwethzelele mu vimbongi vyavingi vya mu lifuti lya Ireland. Mithzimbu yetu ya kunima ya mu Britain.