ǂGAUB ge kai ǃāb tawa ra mâ ǂgaugu xōǀkhā mâ. Khoen hîna ǂgaub ai hân ge îsa ǃam hâina ra mû sores ǂoas ai. ǁNās ge Meib 1910ǁî kuri ge ī ǃnaeǃkhaisa. Nēs ge ge koroǁî ǃnā i Charles T.Russeli ge Irelanda ǃoa a sīsa. ǁNā kai ǃāb tawa i ge ǀgam kai ǂgaukha ge mâ i, ǁnās ge Titaniki tsî Olympik di ǀon hâ ǂgaukha.  *ǂGaugu ra mâ ǃkhais tawa i ge ǂgui Elobmîs ôaǃnâ-aona ge ǀoa hâ i, ǁîn ge Charles T.Russela ge ǃâu hâ i.

ǃGâsab Russeli ge 20 kurigu aiǃâ ge mî, ǁîb ǀnî ǃhūga ra sari ǂgao ǃkhaisa. Îb ǃgâiǂhôasa sī aoǁnâ ǁkhā. ǁÎb ge ǂgurose Irelanda ge sari Julib 1891ǁî kurib ǃnâ. ǁÎb ge Chicago di ra ǂgaihe ǃās Queenstowni tawab ge sī o, o ǁîb ǁgûra xab gere mîbahe xūna ge ǂâihō, ǃās îsasib xa. ǃGâsab Russeli tsî ǁîb ǀkha ge hâ i khoen tsîn ge ǁnā îsa ǃāsan ge mû o, o ge mûǂan nē ǃās “aoǁnâs ǃaroma a ǂhanusa.”

ǃGâsab Russeli ge Irelanda 7 ǃnāde ge sari. ǁÎb di ǂguro saris ge kaise ge ǂoaǂamsa i, ǁnās ǀkhan ge khoena ǁîba hoaǁae gere ǃgâ aoǁnâb gere o. ǁÎb di ǀgamǁî saris Belfasti tsî Dublini tsîna ǃoas ge Meib 1903ǁî kurib ǃnâ ǂhôan ǂkhanib ǃnâ ge xoasa i. Russeli ge ra mî ǃgâ-aon ge kaise “ǂōrisase gere ǃgâ” ǁîb ge “The Oath-Bound Promise” di hâ ǃhoasa a mā o. Abrahammi ǂgoms tsî khoesib di ǀkhaeb ai ge ǃgaoǃgaosa isa.

Khoen ge Irelandi ǃnâ ǃgâiǂhôasa ǃamkuse a ūǃoa ǃkhais ǃaromab ge Russela ǃnonaǁî ǃnāsab ge Europa ǃoa a ī o, o ǁkhawa ǁîna ge sari. ǁÎb ge Aprili 1908ǁî kuri Belfast ǃās tawa a sī khami gu ge koro ǃgâsaga ǁîba gere ǁkhoreǁhare. “The Overthrow of Satan’s Empire” di ge hâ i ǃhoas ge “300 xa ǃnāsa khoen xa ǁnā ǃui ge ǁnâuhe.” ǀNî mâǃoa-aob ge Elobmîs xoadi ge ǃamkuse gere sîsen-ūhe ǀgaus xa ge tsâǀkhāhe. Dublini ǃnâb ge O’Connora, mâǃoa-aose ǀgui ǃnansa gere ǂnûiǁkhaeba, YMCA xoa-aob ase. ǁÎb ge 1 000 xa ǃnāsa khoena Elobmîs ôaǃnâ-aon ǃoagu gere ǂgaeǁae ǂgao. Tae-e ge ī?

ǂÂis ǀguisa dī re, tae-i ga ī hâsa. Khoeb hîna Elobmîsa ǁkhāǁkhāsens ǃnâ ge ǃgâiǃgâibasensa ūhâ îb ge nē ǀhaosa ge hâǃnâ The Irish Times di hâ ǂhôan ǂkhanib ǃnâb ge ǂanǂansa a khomai o. ǁÎb ge ǁnāpab ge sī o, o ǂnû ǃkhai-e ge hō tama hâ i. Xaweb ge ǃuri danasa ūhâ aob ra ǃhoa ǀgauba ra ǃgâ. Nē ǃhoa-aob ge ǃgû rase ra ǃhoa tsîb ge ǁîb ǃomga ra sîsen-ū ǃhoa rase. Tsîb  ge nē xoasa xu nau xoasa ǃoa ra ǁnaeǁgau. Nē ǀhûhâsib ǃhoasa go ǃgâ ǃgû khoeb ge a ǂkhî, nēb ra ǁnâu xūn xa. Nē ǃuri danasa ūhâ ǃhoa-aob ge ǃgari dommi ǀkha ra ǃhoa tsîn ge hoa khoena ǁîba ra ǃgâ. ǁNās khaoǃgâ i ge, dîdi tsî ǃereamdi ǃâba ge hâ i. O’Connorab tsî ǁîb ǀhōsan tsîn ge Russela gere mâǃoa, xawen ge Elobmîs haisi-amsa gere ǁkhauba. ǃGâ-aon ge ǃkhō-am rase Russela ge ǁamba. ǁNās khaoǃgâb ge Elobmîs ǃnâ ge ǃgâiǃgâibasensa ūhâ i khoeba ǃgâsaga ge mîba ǃnāsaseb ra ǁkhāǁkhāsen ǂgaosa amab xa. Mîhe ras ǃoagun ge ǂgui khoena amaba ǁnā ǀgaub ǃnâ ge ǁnâu.

ǁÎb ge Meib 1909ǁî kuri, ǁkhawa 4ǁî ǃnāsa Amerikaba xu gere ī. Nē ǃnās aib ge xoaǁnâ-aob ǃgâsab Huntsingera ge ū sao. Îb ǁnā ǁaeba sîsen-ū tsî Watch Tower ǃâde xoa. ǃGâsab Russeli ǃhoas Belfast ǃnâs ge 450 khoena ge ǂgae tsî 100 khoen hîna ge ǂnû ǃkhaihe ūhâ tama hâ în tsîna.

Koroǁî ǃnās hînab ge sīs tsîn ge ǁnāti ǀgui ge dīhe. Dublini ǃnâb ge sī o, ob ge O’Connoraba khoe-e ge sī ū, nē khoeb ge kurusǂans ǃnâ ǁkhāǁkhāsa ge ūhâ i. Xawe i ge Elobmîsa xub gere ǁnâu xūna ǁîba kaise ge ǃgâiba i. ǁNās khaoǃgân ge Elobmîs ǁkhāǁkhā-aona Amerikaba ǃoa ge oa. *

ǀHûhâsib ǃoa gere dīhe ǃhoadi ge 1911ǁî kuri ǃgâsab Russeli di 7ǁî saris ǃnâ gere ǂanǂanhe ǂhôan ǂkhanib ǃnâ. “Hereafter” di hâ ǃhoasa ǃoan ge 20 Elobmîs ôaǃnâ-aona 2 000 khoena ge ǁkhau. O’Connorab ge ǁkhawa nē ǁaxasib tawa ǀnî hâ khoeba ge sī ū, îb ǁkhawa dîna dî xawen ge ǃgâ-aona Russeli di Elobmîs ǁkhāǁkhās xa ge ǃgâibahe hâ i. ǁNā ǁaeb ǂûb ǃnâ da ge ǁkhawa ǀnî hâ ǃāsa ge sari tsîn ge ǁnāpas tsîna ǂgui khoena ǃhoasa gere ǃgâ. Dublini ǃnâb ge O’Connorab tsî 100 aore khoegu tsîna ǀhaosa gere ǀhomaxa kai ǂgao xawen ge ǁkhawa ǃgâ-aona ǃhoa-aoba gere ǂkhâǃnâ.

ǃGâsab Russeli ge ǀapeǂhomis ǃnâ ǃereamsa gere tani xaweb ge ge mî “khoe-i xare i ge nē sîsen-e dīs ǃnâ ǂhâǂhâsa tama hâ” nēn “a Elob di sîsen amaga.” ǃHoade ǀhûhâsib ǃnâ ǂanǂans ge ǃgâi ǃēde gere mā Elobmîs amaba ǁkhāǁkhās ǃgao. ǀAm ǂoasa a tae? ǀHûhâsib ǃhoadi ge ǃgâiǂhôasa ge aiǃgû kai tsî nēs xa ǃaromahe hâse gu ge ǂgui ǀhaohâga ge omkhâihe. Nēs ge sida ǃkharu ge ǃnaeǃkhaidi ǂkhanin ǁgâub Britainiab ǃnâ hâba xu hâ.