LEGAN ya bebeltangen na barko so baybay na Belfast Lough, sankanengneng na pigaran pasahero ya akaalagey ed tagey na barko iray birdin pukdol ya nasisinagan na liwaway kabuasan. Mayo 1910 so petsa ed saman. Kaiba da si Charles T. Russell, tan saya so komaliman impanbiahe to ed Ireland. Nen asingger la rad daongan, anengneng nen Brother Russell so duaran gagawaen ya angkakabaleg ya barko, say Titanic tan say Olympic. * Diad gilig na pier, akaalagey so labinduan Estudyante na Biblia ya manaalagar ed isabi to.

Manga 20 taon antis na satan, lapud manaanap si Brother Russell na sankaabigan a paraan pian nipakabat ed interon mundo so maong a balita, sikatoy aminpigan nambiahe ed arum a bansa. Say inmunan nila to et diad Ireland, nen Hulyo 1891. Legan ya akalugan ed barkon City of Chicago, nababantag to so iseselek na agew diad baybay na Queenstown tan nayarin anonotan toy imbaga na atateng to nipaakar ed baley da. Legan ya nadadalanan di Brother Russell tan saray kakaiba to iray malinlinis a baley tan mararakep ya kaumaan, naisip dan say teritorya dia et “akaparaan la tan manaalagar lan anien.”

Si Brother Russell et aminpiton binmisita ed Ireland. Dakel so nagmaliw ya interesado nen inmunan imbisita to, kanian diad sinmublay iran imbisita to, nilasus so dinmengel ed paliwawa to tan no maminsan et nilibo. Diad komaduan imbisita to, nen Mayo 1903, saray pantitipon parad publiko diad Belfast tan Dublin et nipakabat panamegley na dyaryo. Imbaga nen Russell ya “saray inmatendi et madengedengel” ed teman “The Oath-Bound Promise” (“Say Sinambaan ya Sipan”) ya nipaakar ed pananisia nen Abraham tan saray bendisyon ya naawat na totoo ed arapen.

Lapud dakel so interesado ed Ireland, sayan bansa et kaiba ed binisita nen Russell diad komatlon impanbiahe to ed Europe. Limaran brother so inmabet ed sikato diad pier na Belfast nen kabuasan na Abril 1908. Diad saman ya labi, say nipakabat ya paliwawa ton, “The Overthrow of Satan’s Empire” (“Say Imbagsak na Empiryo nen Satanas”), et inatendian na “manga 300 a dumerengel ya walaay aralem ya pakatalos.” Nen walay sakey ya kinmontra, sikatoy inebatan ya tampol diad marundunong ya impangusar ed Kasulatan. Diad Dublin, walay mas makpel ya kinmontra​—si Mr. O’Connor, say sekretaryo na YMCA​—ya sinali ton kombinsien so masulok ya 1,000 ya inmatendi pian kontraen iray Estudyante na Biblia. Antoy agawa?

Pawilen tayo pay apalabas tan isipen tayo no antoy posiblin agawa ed saman. Sakey a laki ya manaanap na katuaan ed Biblia so inmatendi ed paliwawa ya nipakabat ed The Irish Times. Ngalngali anggapoy naromog ton yurongan ed napnon auditoryum. Sikatoy madengedengel ed espiker ya amputi buek to tan walay balbas to, ya akasulong na andukey tan andeket ya amerikana. Say espiker et onaalis-alis ed entablado legan ya manpapaliwawa tan mana-andawes, a manguusar na sakey a teksto ed Biblia insan  suportaan to na sananey a teksto, kanian atalosan na samay laki iray katuaan ed Biblia. Anggano anggapoy mikropono o arum nin gamit ed sound, sankarengel ed interon hall so boses na espiker, kanian apansiansia toy atension na dumerengel ed sakey tan kapalduan oras. Insan diad tepet tan ebat ya sesyon, sikatoy sinubok nen O’Connor tan saray kakaiba to balet naebatan to iratan panamegley na Biblia. Agustoan na dumerengel so ebat to tan nantipak ira. Kayari na paliwawa, samay interesadon laki et inmasingger ed saray agagi ta labay toy makaaral ni. Imbaga na saray mismon akaimaton ya dakel so akaaral na katuaan ed ontan a paraan.

Nen Mayo 1909, si Brother Russell et sinmipot ed New York tan linmugan ed barkon Mauretania parad komapat ya imbisita to. Impila to si Brother Huntsinger, sakey ya stenographer, pian legan iran manbiabiahe et nidikta to iray artikulo na Watch Tower. Say paliwawa nen Brother Russell ed Belfast et inatendian na 450 ya taga ditan, tan manga 100 so nanalagey ta kulang so nayurongan.

Diad komaliman impanbiahe to ya abitlad gapo, ontan met so agawa. Kayari na paliwawa to ed Dublin, walay kabkabat a theologian ya intagar nen O’Connor ya amayamay so tepet to balet sikatoy inebatan panamegley na Biblia, tan agustoan ya maong itan na saray dumerengel. Diad sinmublay ya agew, linmugan irad maples ya melag a baloto paonlad Liverpool insan linmugan irad sikat ya barkon Lusitania papawil ed New York. *

Diad komanem tan komapiton impanbiahe nen Brother Russell nen 1911, wala ra met so nipakabat ya paliwawa to. Diad panaon na spring, 20 ya Estudyante na Biblia ed Belfast so akaiba na 2,000 ya totoo ya dinmengel ed paliwawan “Hereafter” (“Biek a Bilay”). Linma lamet si O’Connor diad Dublin ya walay sananey ya kaiba ton ministro ya amayamay so tepet to, balet agustoan na dumerengel iray ebat ya base ed Biblia. Diad panaon na autumn, wala ni ray arum ya baley ya binisita ra, tan dakel so onaatendi. Sinali nen O’Connor tan saray kaiba ton 100 ya lalaki ya guloen lamet so pantitipon ed Dublin, balet maliket ya sinuportaan na saray inmatendi so espiker.

Anggano si Brother Russell so angidaulo ed panagpaliwawa ed saman ya panaon, binidbir to ya “ag-itan akadepende ed too” ta “aliwa itan ya kimey na too, noagta kimey na Dios.” Saray nipakabat ya paliwawa​—ya angaligan ed saray Pantitipon Parad Publiko​—et sankaabigan a paraan pian nipaamta iray katuaan ed Biblia. Antoy resulta? Nipakabat so maong a balita panamegley na saray paliwawa, tan aporma iray kongregasyon diad dakel iran syudad ed Ireland.​—Inalad daan iran koleksion mi diad Britain.