MAYO de 1910 watapi, hermano Charles Taze Russellqa, uj barcopi Irlandaman chayasqa, Belfast nisqa llajtaman. Paytaqa 12 hermanos suyasqanku. Russellqa chay kutipaj phishqa kutitaña Irlandaman chayasqa. Chay tiempopaj Belfast llajtitaj lomasnenqa, qʼomerlla kasqa. Chay kutipitaj hermano Russellqa, iskay jatuchaj barcosta ruwakushajta rikusqa. Ujninpa sutenqa Titanic karqa, ujninpatataj Olympic karqa. *

Hermano Russellqa, julio de 1891 watapi uj barcopi primera vez Irlandaman chayasqa, Queenstown llajtaman. Payqa karusta viajaj, jallpʼantinpi Diosmanta willakunanpaj. Russellqa Irlandaman chayashaspa, ichá tatasninmanta yuyarikorqa, tatasnin Irlandamanta kasqankurayku. Paykunataj ichá willarej kanku chay lugares kʼachitus kasqanta. Russellwan hermanoswanqa, rikusqanku ajinapuni kasqanta. Reparallasqankutaj ashkhas Diosmanta yachakuyta munasqankuta.

Russellqa Irlandaman qanchis kutitapuni viajasqa. Ñaupaj kutipi Irlandaman chayashajtin, runasqa Bibliamanta astawan yachakuyta munasqanku. Chayrayku qhepan kutispi Irlandaman chayananpajqa, ashkhas discursonta uyarej risqanku. Kay 1903 watapitaj, ujtawan Irlandaman chayasqa. Chay kutipeqa Belfast llajtapi, Dublín llajtapipis tantakuykunata ruwasqanku. Chaypajtaj periodicospi willachikusqa. Russellqa “La promesa bajo juramento”, nisqa discursota qosqa. Sutʼinchasqataj, Abrahanpa creeyninmanta, bendicionesta japʼinanchejmantawan. Chay kutismanta parlaspataj, Russellqa nerqa: “Tantakuykunaman jamojkunaqa, sumajta uyarisharqanku”, nispa.

Abril de 1908 watapi, Russellqa waj suyusman viajaytawan Irlandaman kutillasqataj, runas Bibliamanta astawan yachakuyta munasqankurayku. Russelltaqa Belfast llajtapi 5 hermanos suyasqanku, barcos sayanku chaypi. Chay tardepachataj uj discursota qosqa. Chay discurso kanantataj periodicospi willachikusqaña. Chay discursotaj “La caída del imperio de Satanás”, nisqa karqa. Chaymantaj 300 jina risqanku. Paykunamanta ujnintaj, Russellman churanakuspa tapuykunata ruwasqa. Russelltaj Bibliawan sutʼinchasqa. Chantá Dublín llajtapi, waj tantakuy ruwakullasqataj, chaymanqa 1.000 kuraj risqanku. Chay tantakuypitaj OʼConnor sutiyoj runaqa, mayta Russellman churanakusqa. Payqa chay tantakuyman rejkunata Russellpa contranpi oqharichiyta munasqa. OʼConnorqa Asociación Cristiana de Jóvenes, nisqa iglesiamanta secretario kasqa.

Dublín llajtapi niraj chay tantakuy ruwakushajtin ashkha runaschá periodicopi leerqanku, uj tantakuy kananta. Bibliamanta yachakuyta munaspataj chay tantakuyman ashkhas risqanku. Chay día Russellqa yana trajeta churakusqa. Payqa yuraj umitaña karqa. Runastaj sumajtachá uyarerqanku. Imajtinchus payqa, kaymanta jaqayman purispa discursonta qosqa. Chantapis Russellqa Bibliata sumajta sutʼinchasqa, runaspa sonqonman chayananpaj jina. Mana parlantes kajtinpis, parlasqanqa kʼuchukama uyarikusqa. Russellqa hora y mediatapuni discursonta qosqa.  Chantá OʼConnor amigosninwan, Russellman churanakuspa mayta tapuykusqanku. Russelltaj Bibliawan sumajta sutʼinchasqa. Chaymantataj, runasqa mayta tʼajllarikusqanku. Astawan yachakuyta munaspataj, hermanoswan parlarisqanku. Wakin hermanos nisqankuman jinaqa, chay jina tantakuyman rispa ashkha runas Jehová Diosmanta yachakusqanku.

Mayo de 1909 watapi, Russellqa, Estados Unidosmanta ujtawan Irlandaman barcopi risqa. Chay barcoqa Mauretania sutikorqa. Chay kutipitaj, hermano Huntsingerwan viajasqa. Chay hermanoqa, rato escribej. Chayrayku viajashaspa, Russellqa chay hermanoman wakin yachaqanasta dictasqa, Torremanta Qhawaj revistapi llojsinanpaj. Irlandaman chayaytawantaj, Russellqa uj discursota qosqa. Chaymantaj 450 runas risqanku, 100 jinataj sayasqalla uyarikusqanku.

Mayo de 1910 watapi, Russell Irlandaman viajallasqataj. Chay kutipi ashkha runasllataj discursonta uyarej risqanku. Russellqa, Dublín llajtapi discursallasqataj. Chay kutipitaj OʼConnorqa may rejsisqa pastorwan chay discursoman risqa. Chay pastorqa Russellta mayta tapuykusqa. Russelltaj Bibliawan sumajta sutʼinchasqa. Chayman rejkunataj, Russell allinta sutʼinchasqanmanta kusisqas kasharqanku. Qʼayantintaj Russellqa, compañerosninwan cartasta apaj barcopi Liverpool llajtaman risqanku. Chaymantataj Estados Unidosman kutipusqanku, Lusitania sutiyoj barcopi. *

Russellqa 1911 watapi, iskay kutita Irlandaman viajasqa. Chay kutispipis discursosta qollasqataj. Chay discursos kanantaqa periodicospi hermanos willachisqankuña. Chay watamanta abril killapitaj, Belfast llajtapi 2.000 runaspuni Russellta uyarej risqanku. Chaypitaj 20 hermanoslla kasharqanku. Chay discursotaj “¿Maymantaj wañuspa ripunchej?”, nisqa karqa. Chantapis Russellqa Dublín llajtapi discursota qollasqataj. Chaymanpis OʼConnorqa waj pastorwan rillasqataj. Iskayninkutaj Russellman churanakuspa mayta tapuykusqanku. Russelltaj Bibliawan sumajta sutʼinchasqa. Runastaj Russellpa sutʼinchasqanta allinpaj qhawasqanku. Chantá Russellqa octubre, noviembre killaspi waj llajtaspiñataj discursosta qosqa. Chayta uyarejtaj, ashkhas risqanku. Uj kutitaj Russell Dublín llajtapi discursota qoshajtin, OʼConnorqa 100 runaswan, ujtawan chʼajwata jatarichiyta munallasqankutaj. Jinapis chay tantakuyman rejkunaqa, Russellman kutikusqanku.

Irlanda suyupeqa, Russell discursosta qoyta qallarerqa. Payqa mana jatunchakojchu, astawanpis nej: “Jallpʼantinpi Diospa Gobiernonmanta willakunanqa, mana uj runamantachu kashan. Manaqa Jehová Diosllamanta”, nispa. Jaqay tiempopeqa Irlandapi Russellpa discursosninta periodicopi willachikoj. Chay discursostaj runasta yanaparqa, Bibliata sutʼita entiendenankupaj. Chayraykutaj hermanosqa tantakuykunata ruwayta qallarerqanku. Ajinamantataj tukuynejpi congregaciones sayarerqa, Irlandantinpitaj Diosmanta willakorqa. (Gran Bretaña sucursalpi waqaychakusqanmanta).