A BEN de mei 1910. A boto pe Charles T. Russell ben de na ini, ben de na tapu Belfast Lough, wan liba di e waka fu a se go na a lanpresi. A pikin grupu sma di ben de fesisei fu a boto, ben man si fa a mamanten son e skèin na tapu den bon. Brada Russell ben kon fu a di fu feifi leisi na Ierland. Di a boto ben e doro a lanpresi, Brada Russell ben man si fa sma ben e meki den tu bigi sipi Titanic nanga Olympic. * Sowan 12 Bijbel Ondrosukuman ben tanapu e wakti en na syoro.

Sowan 20 yari na fesi, Brada Russell di ben de na ini Amerkankondre ben wani prati a bun nyunsu na heri grontapu. Dati meki a bosroiti fu go hori lezing na ini tra kondre. A fosi kondre pe a go na Ierland, na ini yuli 1891. A ben go nanga a sipi di nen City of Chicago. Di den ben de krosibei fu Queenstown a ben kan si fa a son ben e saka èn kande a ben e memre san en papa nanga mama ben fruteri en fu Ierland, a kondre fu den. Di a boto fu den ben e pasa den moi foto nanga den boitipresi fu Ierland, Brada Russell nanga den mati fu en ben si taki „a nyanyan lepi kaba fu koti”. Sobun, furu wroko ben de fu du.

Brada Russell go na Ierland seibi leisi. Fu di sma ben lobi den lezing di a ben hori a fosi leisi, meki hondrohondro èn son leisi dusundusun sma ben kon arki den lezing fu en den tra leisi di a go na Ierland. A di fu tu leisi di a go na Ierland ben de mei 1903. Den ben meki bekènti na ini koranti taki Bijbel-lezing ben o hori na ini Belfast nanga Dublin. Brada Russell ben fruteri taki „den arkiman ben arki bun” di a ben hori a lezing di ben taki fu a bribi fu Abraham nanga den blesi di libisma o kisi na ini a ten di e kon.

Fu di furu sma na ini Ierland ben wani kon sabi moro, meki Brada Russell go na Ierland baka, a di fu dri leisi di a go preiki na Europa. Di a doro na Belfast, na ini april 1908, feifi brada ben e wakti en fu gi en wan switikon. A Bijbel-lezing di ben o hori a neti dati, ben nen „A grontapu fu Satan o kisi pori”. Sowan 300 sma di ben wani sabi moro fu Bijbel, ben kon arki a lezing disi. Wan man di no ben agri nanga san a ben yere, no ben man taki noti moro di den gebroiki Bijbel fu overtoigi en. Na ini Dublin, wan fayafaya gensman ben de di nen O’Connor èn a ben de sekretarsi fu wan organisâsi di nen YMCA. A ben e taki wan lo sani fu di a no ben wani taki den moro leki 1000 sma di ben kon arki a lezing, bribi den Bijbel Ondrosukuman. San pasa a dei dati?

Meki wi go luku san ben pasa kande, na a lezing dati. Wan man di wani kon sabi moro fu Bijbel, bosroiti fu go arki wan lezing di a si a kari na ini a koranti The Irish Times. A zaal ben span so te taki bijna a no ben feni presi fu sidon. A man ben e arki bun te a takiman Brada Russell, di ben abi wan weti barba  èn di ben weri wan langa blaka dyakti, ben e hori en lezing. A takiman ben e waka go-kon tapu a podium, a ben e meki gebaar nanga en anu èn a ben e gebroiki difrenti Bijbeltekst di yepi a man fu frustan den sani di Bijbel e leri. Aladi mikrofon no ben de, toku ala sma na ini a zaal ben man yere en èn den ben e arki nanga ala den prakseri wán nanga afu yuru langa. Baka dati den sma ben kan poti aksi. O’Connor nanga den mati fu en ben poti wan lo aksi gi Brada Russell, ma nanga yepi fu Bijbel a ben man piki ala den aksi. Den arkiman ben lobi san den yere èn den naki anu. Baka di ala sani kaba, a man di ben kon arki a lezing go taigi den brada taki a wani sabi moro. Sma di ben go na den lezing fu Brada Russell fruteri taki na a fasi disi furu sma kon sabi san Bijbel e leri.

Na ini mei 1909, Brada Russell komoto fu New York fu go na Ierland a di fu fo leisi. A go nanga a boto di nen Mauretania èn a tyari Brada Huntsinger nanga en. Di den ben de na pasi Brada Russell ben e taigi en san o kon na ini a Watch Tower èn a brada disi ben e type ala sani. Sowan 450 sma kon arki a Bijbel-lezing di Brada Russell hori na ini Belfast èn sowan 100 sma ben musu tanapu fu di presi no ben de.

A di fu feifi leisi di Brada Russell go na Ierland, O’Connor tyari wan sabiman fu kerkitori kon na a Bijbel-lezing di ben hori. Brada Russell piki ala den aksi di a man disi ben poti èn den arkiman ben lobi den piki. A tra dei, Brada Russell teki wan boto go na Liverpool èn baka dati den go na New York nanga a boto Lusitania. *

Na ini 1911, di Brada Russell go na Ierland a di fu siksi nanga a di fu seibi leisi, den ben e meki bekènti tu taki a ben o hori lezing. Na ini april fu a yari dati, 20 Bijbel Ondrosukuman na ini Belfast yuru wan presi pe 2000 sma ben kon arki a lezing di nen „Sma di dede e libi go doro?” O’Connor kon drape baka nanga wan tra domri di ben poti aksi. Ala den arkiman ben lobi den piki di Brada Russell gi. Na ini oktober nanga november fu a srefi yari dati, den brada hori lezing na ini tra foto èn furu sma ben kon arki. A leisi disi O’Connor kon nanga moro leki 100 man fu bruya a konmakandra di hori na ini Dublin. Ma den arkiman ben horibaka fayafaya gi Brada Russell.

Aladi na Brada Russell ben e hori furu fu den lezing, a ben frustan taki „disi a no a wroko fu libisma, ma fu Gado”. Sobun, awinsi a no ben o de moro, a wroko ben o go doro. Den Bijbel-lezing di ben hori fosi wi bigin hori wi Publiki Konmakandra, ben gi sma na okasi fu kon sabi san Bijbel e leri. San ben de a bakapisi? Nanga yepi fu Bijbel-lezing, furu sma na ini Ierland yere a bun nyunsu èn omeni gemeente seti na ini den difrenti foto drape.​—A historia fu wi na ini Ingrisikondre.