LONG Me 1910, wanpela bot i kam kamap long Belfast Lough, em bikpela pasis, na ol pasindia long bot i lukim san long moning i kisim ol maunten i gat grinpela gras. Charles T. Russell em wanpela bilong ol pasindia, em namba 5 raun bilong em long i kam long Aialan. Sip Brata Russell i stap long en i wok long kam long baksait bilong 2-pela bikpela sip ol man i wok yet long en, em Titanic na Olympic. * Planti Sumatin Bilong Baibel i sanap long wof na wetim em long kam.

Inap 20 yia paslain, Brata Russell i painim gutpela wei bilong autim gutnius long olgeta hap. Olsem na em i tingting long mekim planti raun long ol narapela kantri, na i no long Amerika tasol. Fes raun bilong em long Aialan em long Julai 1891. Taim em i kalap long sip City of Chicago, em i lukim san i go daun taim sip i ron i go long nambis bilong Queenstown, na ating em i tingim papamama bilong em i stori olsem em asples bilong ol. Taim Brata Russell na ol pren bilong em i ron long sip na kam namel long ol klinpela taun na naispela kantri sait, ol i luksave olsem i gat wanpela gaden we “planti kaikai i mau pinis na ol wokman i ken kisim.”

Brata Russell i visitim Aialan inap 7-pela taim. Long fes raun bilong em, planti handret manmeri i amamas long harim ol tok, sampela taim planti tausen manmeri i kam bung. Planti manmeri i kam bilong harim tok bilong em long ol narapela visit. Long namba 2 raun bilong em long Me 1903, niuspepa bilong Aialan i kamapim ol edvetaismen bilong ol pablik miting long Belfast na Dublin. Brata Russell i tok “ol manmeri i putim gut yau” long tok “The Oath-Bound Promise,” dispela tok i stori long bilip bilong Abraham na blesing ol manmeri bai kisim long bihain.

Ol manmeri long Aialan i gat bikpela laik long kisim save long tok i tru, olsem na taim Brata Russell i go raun long Yurop long namba 3 taim, em i visitim gen Aialan. Long moning bilong Epril 1908 taim Brata Russell i go kamap long wof long Belfast, 5-pela brata i go bungim em. Long seim de long apinun, “klostu 300 manmeri i gat save i kam bung” bilong harim pablik tok, “The Overthrow of Satan’s Empire.” Wanpela bilong ol man i kam bung em man husat i birua long ol tok em i harim, tasol kwiktaim ol brata i yusim gut ol tok bilong Baibel long bekim tok bilong em. Long Dublin, wanpela man nem bilong em Mr. O’Connor, em sekreteri bilong YMCA, na em i birua long ol Sumatin Bilong Baibel. Em i traim long kirapim winim 1 tausen manmeri i kam bung long birua long ol Sumatin Bilong Baibel. Wanem samting i kamap?

Piksaim long tingting samting i kamap long dispela bung. Wanpela man i laik save long tok i tru bilong Baibel, olsem na taim em i lukim edvetaismen bilong pablik tok long The Irish Times, em i tingting long i go long dispela bung. Taim em i go long haus kibung, em i no inap painim ples sindaun. Tasol em i putim gut yau long man i mekim pablik tok, em i  gat waitpela gras na longpela mausgras, na em i werim blakpela saket. Man i mekim tok i wokabaut i go i kam long pletfom na wokim han, na stori gut long wanpela skripsa na kamapim ol narapela skripsa bilong strongim tok, olsem na dispela man i kliagut long tok i tru bilong Baibel. I no gat ol maikrofon na spika samting, tasol man i givim tok i gat strongpela nek na olgeta long haus inap harim tok inap 1 na hap aua. Bihain, O’Connor na ol pren bilong em i givim ol askim long Brata Russell, tasol em i yusim gut Baibel long bekim ol askim bilong ol. Odiens i amamas na ol i paitim han. Taim bung i pinis, dispela man i laik kisim sampela save moa na em i go toktok wantaim ol brata. Ol lain long dispela bung i tok, planti manmeri i kisim save long tok i tru long rot bilong harim ol pablik tok.

Long Me 1909, Brata Russell i kalap long sip Mauretania long New York bilong i go long Yurop long namba 4 raun bilong em. Em i bringim tu Brata Huntsinger, em man bilong raitim ol tok. Olsem na taim ol i ron long sip, Brata Huntsinger i harim ol tok bilong Brata Russell na em i raitim ol tok long ol atikol bilong Watch Tower. Inap 450 asples manmeri i kam harim pablik tok bilong Brata Russell long Belfas, na klostu 100 bilong ol i kam bung i mas sanap bikos i no gat spes bilong sindaun.

Wankain samting i kamap long namba 5 raun bilong Brata Russell long Yurop. Bihain long em i mekim pablik tok long Dublin, wanpela tisa bilong lotu—dispela man i kam wantaim O’Connor—i kisim ol bekim bilong askim bilong em long Baibel, na planti long odiens i amamas taim ol i lukim dispela. Long neks de, Brata Russell na ol brata i go wantaim em, i kalap long wanpela bot i save karim ol pas bilong i go long Liverpool, na long hap ol i kalap long sip Lusitania na i go long New York. *

Long 1911, Brata Russell i mekim namba 6 na 7 raun bilong em, na ol i edvetaisim ol pablik tok bilong em. Long taim bilong san, inap olsem 20 Sumatin Bilong Baibel long Belfast i lukautim 2 tausen manmeri husat i kam bilong harim pablik tok “Hereafter.” O’Connor i go gen long Dublin wantaim narapela lida bilong lotu na givim planti askim, tasol Brata Russell i yusim Baibel long bekim ol askim na odiens i paitim han. Long seim yia long taim kol i laik kamap, Brata Russell i visitim ol narapela taun, na bikpela lain manmeri i kam bung na harim tok. O’Connor na 100 man i traim gen long bagarapim bung i kamap long Dublin, tasol odiens i sapotim tru Brata Russell.

Long dispela taim, Brata Russell i go pas long mekim ol pablik tok. Em i luksave olsem “i no gat man i mas kisim biknem” bikos “dispela em i no wok bilong ol man, em wok bilong God.” Ol pablik tok ol i bin edvetaisim i stap paslain long ol i mekim ol Pablik Miting—em nambawan rot bilong skulim ol man long ol tok i tru bilong Baibel. Wanem gutpela samting i kamap? Ol pablik tok i helpim planti man moa long save long gutnius, na planti kongrigesen i kirap long ol siti long Aialan.—Histori Bilong Yumi Long Briten.