MAIUNI de 1910, enga barku baporiiri niárani japkia Belfast Lough, grupu sapichu enga barkurhu nirani japka, exeaspti xuxunharhati juátechani enga apenasi erandini japka. Para Charles Taze Russell, sinku ueltesptia enga nirenga Irlanda. Jima uératini exespti tsimani kʼérati barkuechani engaksï únhani japka: ma jindespti Titanic, enga niárapka uekameni, ka Olympic enga sáno májkueni jáxepka. * Dose Bibliaeri Jorhenguarhitichaksï mueierhu erokaxapti, jima sánderu orhepatini engaksï barkuecha arreglarinhenga.

Beinte uéxurhinisï antesi, erachi Russell uánikua biajichani uáspti Estados Unidos uératini para iápurisï etsakuni eianhperakua. Ka Irlanda orheta niraspti juliuni de 1891. Barkurhu uératini City of Chicago, exespti na enga Jurhiata inchajtsïkuni japkia enga niárani japkia kosta de Queenstown. Jamberi Russell miántapti ambe engaksï táti jembecha arhipka ima lugariri engaksï anapuepka. Engaksï nípka imani sési járhati iretecharhu, ima ka imeri pámpirichaksï exespti eskaksï kampuecha listu jarhaspkia para pʼikunhantani.

Russell siete uelta niraspti Irlanda. Imeri primeru biajirhu, uánikuaksï interesi xarhataspti, ísï jimbo enga ménderu nípka, uánikuaksï niraspti kurhaani diskursuechani, ménisïksï milichanisï nirasïrendi. Segundu biajirhu, maiuni de 1903, úkuarhisptiksï tánguarhikuecha Belfast ka Dublín ka periodikuecharhuksï anunsiarikuarhespti. Russell uandaspti eskaksï iáminduecha jingontku kurhaaxapka diskursuni “La promesa bajo juramento”, enga Abraaniri jakajkukueri uandenga ka kóntperatecheri enga kʼuiripu jatsiauaka sánderu orhepani.

Irlanda, uánikuechaksï interesi xarhataspti, jimbosï Russell pʼorhembiantapti enga Europa nípka imeri terseru biajirhu. Mueierhu enga Belfast jaka, sinku erachichaksï erokaspti abrilini de 1908. Inchatiru ima mísmu jurhiatikua, nitamataraspti diskursuni “La derrota del imperio de Satanás”. Ka tresientu kʼuiripuechisïksï niraspti engaksï interesi jatsipka. Kʼuiripu ma enga nípka, uénaspti mámaru ambe uandani, peru Russell Biblia jingoni mókukuntaspti. Jini Dublín, O’Connor, kʼuiripu ma enga sánderu inchandimenga, sekretariuespti grupurhu Asociación Cristiana de Jóvenes (YMCA, inglés jimbo), uékasïrendi eska jukari mili kʼuiripu no kurhajchaapiringa Bibliaeri Jorhenguarhitichani. ¿Ambe úkuarhipi?

Ju je eranhaskani. Achati ma enga uéjka Bibliaeri ambe jorhenguarhini, nirasïndi kurhaani diskursu ma enga periodikurhu The Irish Times anunsirinhapka. Enga niárajka, xáni uáni janhasïndi enga no újka exentani nani uaxakani. Uénasïndi kurhaani ambe enga erachi uandani jaka, erachi jauiri urapiti jukasti ka tisïnharisti ka abrigu turhipiti ma jukarini jini ka jini jámaxati plataformarhu, níjkurhaparini. Sési terokutantaasïndi textuechani ka jimbosï achati sánhani arhijti kurhanguni ambe enga Biblia jorhentpejka. No jarhasti  sonidu peruksï iáminduecha kurhaaxati ambe enga erachi uandajka ka jingontkuksï kurhaasïndi ma ora ka media. Tátsekuaksï úndasïndi kurhamarhikuechani uaani ka O’Connor ka imeri amiguechaksï uénasïndi kurhamarhini erachini andisï imani ambe uanda ka ima Biblia jingoni mókukuantasïndi. Iámindu engaksï jima jaka, tsípiparinksï pasajkusïndi. Ísï tátsekua, ima achati engachi uénakuarhu uandaka, andarheraasïndi erachichani para kurhakuani informasioni. Máruksï uandantaspti eskaksï uánikuecha ísï jorhenguarhispka Bibliaeri ambe.

Maiuni de 1909, erachi Russell Nueva York uératini Mauretaniani jatapaspti para kuartu biaji úni Irlanda. Ka erachi Huntsinger pámbitaspti. Engaksï jamberi oseanurhisï parhimepiringa, Russell úpirindi arhipani ambe enga karapiringa para La Atalaya. Belfast, Russell nitamataraspti diskursu ma nani enga 450 kʼuiripu japka, ka 100 kʼuiripisïksï anhandetini pakaraspti jimboka nóteru jarhaspkia lugari.

Kintu biajirhu, engachi uénakuarhu uandaka, sáno májkueni ambe úkuarhispti. Enga erachi Russell nitamatarapkia diskursuni jini Dublín, teólogo ma enga O’Connor jingoni nípka, Biblia jingoni mókumenhantaaspti imeri kurhamarhikuechani. Ima engaksï jima japka, konformeksï pakaraspti. Ka pauandikua, Russell ka imeri pámpirichaksï jataspti barkuni ma korreueri enga Liverpool nirenga, ka jimaksï Lusitaniani jataspti enga Nueva York nirenga. *

Enga sextu ka séptimu biajini úpka 1911, Russell diskursuechani nitamataraaspti engaksï ístu anunsiarinhapkia. Abrilini ima mísmu uéxurhini, 20 Bibliaeri Jorhenguarhitichaksï erokaaspti 2,000 kʼuiripuechani jini Belfast engaksï nípka kurhaani diskursuni “La vida después de la muerte”. O’Connor niraspti Dublín, relijioniri orhejtsïkuti ma jingoni ka tsimarhanksï uánikua kurhamarhikuechani uáspti. Ima engaksï jima japka, tsitisptiksï na engaksï Biblia jingoni mókukuantaapka. Otoniuni, Russell niraspti máteru siudadicharhu nani engaksï uánikuecha nípka kurhajchani. Peru ménderu, O’Connor ka 100 ikiatspitichaksï uékaspti anhaxustani tánguarhikuani jini Dublín, peru ima engaksï jima japka, tsípikua jingonksï apoiarispti erachini.

Nájtuka erachi Russell nitamatarauenga diskursuechani, uandaspti eska “no ma kʼuiripu uétarhisïnga”, jimboka “i ánchikuarhita no kʼuiripueriska, sino Tata Diosïri”. Ima diskursuecha engaksï anunsiarinhenga, marhuasptiksï para jurhimbikua ambe eianhpini ka jima uérasti Tánguarhikua para Iáminduecha. Ísï jimbo, úkuarhisptiksï kúnguarhikuecha uánikua iretecharhu ka jurhimbikua iámu Irlanda etsakurhispti (Juchari archibuecharhu anapu de Gran Bretaña).