ბელფასტიშ სანაპიროს 1910 წანაშ მესის გემქ ქადირთჷ. მზგავრეფიშ ჭიჭე ჯგუფ გემბანშე თოლს გინულინუანს მწვანე დოლოს, ნამუსით ოჭმარეშ ბჟაშ სხივეფ გიოსინთანს. თინეფწკუმა ართო ჩარლზ ტეიზ რასელი ხოლო რე. თენა თიშ მახუთა მოულა რე ირლანდიაშა. ჯიმა რასელი ორწყე, მუჭო მეურს ჟირ ქვერსემ ლაინერიშ „ტიტანიკიშ“ დო „ოლიმპიკიშ“ შენება. * ნავსაშენიშ იქილე, სოდგარენ 12 ბიბლიაშ მარკვიებელ გემშე თიშ გიმულას უჯინე.

სოდგარენ 20 წანათ ადრე ჯიმა რასელქ გეგნოჭყვიდ მსოფლიოშ შხვადოშხვა ქიანაშა მიდურთუმუდკო, ნამდა სახიოლო ამბექ ირდიხას გევრცელკო. თიშ პირველ მოგზაურობაქ 1891 წანაშ კვირკვეს ირლანდიაშე დიჭყჷ. მუჟამსით გემქ კუინზტაუნიშ სანაპიროს ქადირთუნ, რასელი გემბანშე ბჟაშ ინულას ოკვირუდ. თე დროს ალბათ ქუგაშინედ, მუს ეჩიებდეს მშობლეფ მუნეფიშ მშობლიურ მხარეშ, ირლანდიაშ გურშენ. გემით მოგზაურობაშ დროს ჯიმა რასელი დო შხვა ბიბლიაშ მარკვიებელეფ სუფთა ქალაქეფს დო სქვამ სოფელეფს მიკმიშეს დო ორწყედეს, ნამდა სახიოლო ამბეშ გასავრცელებელო მეტ რდუ ოკეთებელი.

ჯიმა რასელი ირლანდიას შკვითშა რდუ. თიშ პირველ მეულას თექ ბრელქ დეინტერეს ჭეშმარიტებათ. თეშ უკულ ირ მეულას ოშობით, მინშა ანთასობით მარჩქილე ხოლო ჸუნდ. მაჟია მეულას 1903 წანაშ მესის, ბელფასტის დო დუბლინს თიშ მოხსენებეფ ადგილობრივ გაზეთეფს რდუ ბეშტელი. რასელი იშინანს, ნამდა „აუდიტორია დიდ ინტერესით ურჩქილედ მოხსენებას „ღორონთიშ დაპირება“, ნამუთ აბრაამიშ რწმენას დო კაცობრიობაშ მომავალ კურთხევეფს ოხუდ.

ირლანდიას ხალხიქ ჭეშმარიტებაშ დიდ ინტერეს გიმირჩქინ, ათეშენ რასელქ გეგნოჭყვიდ ევროპაშა მასმა მოგზაურობაშ დროს ირლანდიაშა ხოლო ქიმურთუმუდკო. 1908 წანაშ აპრილიშ ართ ოჭმარეს თის ბელფასტიშ ნავსადგურს ხუთ ჯიმაქ ქუდოხვად. გაზეთის ბეშტელ მოხსენებაქ „სატანაშ იმპერიაშ აკოცუმა“, თექიანეფ დაინტერეს დო თიმ ონჯუას სოდგარენ 300 კოჩიქ ქიმერთ თიშ მარჩქილაფშა. თაქ მულირ ხალხ შქას რდუ ართ მოწინააღმდეგე, ნამუთ ოცადუდ რასელიშ ინოჭკირუას, მარა ჯიმა რასელქ ბიბლიურ მუხლეფით თიშ არგუმენტეფს გიორჯგინ. თის დუბლინს ხოლო ქეშეხვად ართ მოწინააღმდეგექ, ო’კონორქ, ნამუთ „ახალგაზრდეფიშ ქრისტიანულ კავშირიშ“ მდივან რდუ. თინა ოცადუდ მოხსენებაშ ორჩქილშა მულირ 1000-შე მეტ პიროვნება ბიბლიაშ მარკვიებელეფს დუპირისპირკო. მუქ მოხვად თეშ უკულ?

მორთ, წერმიბდგინათ, მუქ შილებედ მოხვადკო თე შეხვალამას. ბიბლიურ ჭეშმარიტებათ დაინტერესებულ პიროვნება გინმოჭყვიდუნს, ქუმურჩქილუას მოხსენებას, ნამუშ გურშენ ადგილობრივ გაზეთის „აირიშ ტაიმზის“ რე ბეშტელი. თინა ხალხით ეფშა აუდიტორიას ადგილს ონდეთ გორუნს დო ყურადღებით ურჩქილე ჩე თუმამ დო ბჟაკეამ კოჩის, ნამუსით უჩა გინძე პალტო მიკაქუნს. მომხსენებელ რაგადიშ დროს ჟესტეფს გიმირინუანს დო სცენას იშო-აშო გილურს.  თინა ართიანიშ მეჸუნელო ეთმონწყუნს ბიბლიურ მუხლეფს დო თეთ დაინტერესებულ პიროვნება ბიბლიურ გურაფეფს გებულენს. თიშ ხონარ აპარატურაშ უმშო ხოლო მთელ დარბაზის ონჭჷ დო აუდიტორია შურდოგურით ურჩქილე თიშ საათ დო გვერდიან მოხსენებას. თეშ უკულ კითხვა- პასუხეფიშ დრო იჭყაფ. თე დროს ო’კონორი მუშ ამხანაგეფწკუმა ართო რასელიშ ინოჭკირუას ოცად, მარა თინა ბიბლიაშ საშვალებათ პასუხენს თინეფიშ კითხვეფს. აუდიტორიას მოწონს რასელიშ პასუხეფ დო ტაშის მეუგანს. თეშ უკულ დაინტერესებულ კოჩ მეურს ჯიმალეფშა დო ურაგად, ნამდა მეტიშ გაგება ოკო. მუჭოთ თეცალ შეხვალამეფიშ მოწმეეფ იჩიებნან, თეგვარო ჭეშმარიტება ბრელქ გეგჷ.

1909 წანაშ მესის, მუჟამსით გემით ნიუ-იორკშე ბელფასტშა მანთხაშა მიშუნ, რასელქ სტენოგრაფისტ ჯიმა ჰანტცინგერ ხოლო მიდეჸონ, ნამდა ოკეანეს გემით მოგზაურობაშ დროს „გინაჯინალ კოშკიშ“ სტატიეფ დუბეშტუდესკო. ბელფასტის ჯიმა რასელიშ მოხსენებაშ მარჩქილაფშა 450 კოჩიქ მორთ. თავრეშე სოდგარენ 100 კოჩის კუჩხის აჸუ გიორინალქ, მუშენდა დახუნალ ადგილეფქ ვა უბაღეს.

მახუთა მოგზაურობაშ დროს ხოლო, ნამუთ დაჭყაფუს მიფშინეთინ, დუბლინს მოხსენებაშ უკულ რასელქ ო’კონორიშ მოჸუნაფილ ართ თეოლოგიშ არძა კითხვას ქუპასუხ, მუდგაქ აუდიტორია მანგარო გახარ. მაჟია დღას რასელქ დო მუწკუმა ართო მიშესინ თინეფქ ჩქარ ფოსტაშ ნავით ლივერპულშა მიდართეს დო თევრეშე ნიუ-იორკშა გეგნორთეს ისტორიულო ცნობილ გემით „ლუზიტანიათ“. *

1911 წანას ჯიმა რასელქ მუშ მამშვა დო მაშკვითა მოგზაურობაშ დროშ ადგილობრივ გაზეთის ბეშტელ მოხსენებეფიშ გურშენ იჩუ. თი წანაშ გაზაფხულს ბიბლიაშ 20 მარკვიებელქ ქიზრუნ, ნამდა 2 000 პიროვნებაქ ქუმურჩქილუკო მოხსენებას, ნამუშ სათაურ რდუ „მუ ხვადუ ღურაშ უკული?“. დუბლინს შეხვალამაშ დროს ჟიშე მოშინაფილ ო’კონორქ ართ რელიგიურ მსახურწკუმა ართო, ინმაჭკირალ კითხვეფ ქუდუსვჷ რასელს, მარა თიქ არძა კითხვას ბიბლიაშე ქუპასუხ, მუდგას აუდიტორიაქ ტაშით ქეშეხვად. თი წანაშ დამორჩილს შხვადოშხვა ქალაქეფს ხოლო ჯგირ მორჩქილაფა რდუ. ო’კონორქ დო თეს გეძინელ თიშ 100 მომხრექ ხოლო ართშა ქეშეცადეს ხე ქეშუშალესკო შეხვალამას ჩატარებას დუბლინს, მარა აუდიტორია მომხსენებელიშ მხარეს რდუ.

მართალ რე, თი დროს ჯიმა რასელი კითხულენდჷ მოხსენებეფს, მარა თის არჩქილედ, ნამდა „შხვას ხოლო შეიალებედ თეშ კეთება“, მუშენდა „თენა ღორონთიშ საქმე რდუ დო ვართ ხოლო კოჩიშ“. საჯარო მოხსენებეფქ ბრელს მეხვარ ბიბლიურ გურაფეფიშ გაგებას. საბოლათ, თიქ ხე შეუნწყუ სახიოლო ამბეშ გავრცელებას დო ირლანდიაშ შხვადოშხვა ქალაქეფს კრებეფიშ ჩამოყალიბებას (ჩქინ არქივშე, ბრიტანეთი).