岁月留痕
公众演讲有助于好消息传遍爱尔兰
蒸汽船慢慢驶入贝尔法斯特湾嘅时候，企喺甲板上嘅一小群乘客睇到远方青翠嘅山岭沐浴喺晨曦当中，而其中一位乘客就系查尔斯•罗素。当时系1910年5月，罗素第五次到访爱尔兰。随住蒸汽船继续前进，两艘建造中嘅巨大邮轮出现喺罗素弟兄眼前，分别系铁达尼号（泰坦尼克号）同佢嘅姊妹舰奥林匹克号。 *蒸汽船驶过船坞之后，罗素又见到有十几个圣经研究者喺码头等候佢。
二十几年前，为咗将好消息传遍世界各地，罗素弟兄开展咗几趟旅程，探访美国以外嘅其他地方。佢喺1891年7月展开第一趟旅程，第一站就去咗爱尔兰。当罗素乘搭嘅芝加哥城号慢慢驶近昆斯敦海岸嘅时候，佢一边欣赏日落，一边可能回想父母对家乡嘅描述。当罗素同佢嘅同伴穿过整洁嘅小镇同美丽嘅乡村嗰时，佢哋意识到呢度系一片“庄稼已经成熟，可以收割”嘅田地。
罗素弟兄先后七次探访爱尔兰。佢嘅第一次探访引起好多人嘅兴趣。结果，佢后来再次探访嘅时候，有几百甚至几千人都嚟听佢嘅演讲。1903年5月，罗素第二次探访爱尔兰。贝尔法斯特同都柏林嘅报刊都宣传咗罗素嘅公众演讲。呢个演讲嘅题目系“以誓言保证嘅应许”，内容谈及到亚伯拉罕嘅信心同人类未来嘅福分。罗素话：“听众都好留心听呢个演讲。”
由于当地有咁多人对真理感兴趣，所以，罗素第三次探访欧洲嘅时候又去咗一次爱尔兰。1908年4月嘅一个早上，当罗素落船，踏上贝尔法斯特嘅码头嗰时，有五个弟兄嚟迎接佢。傍晚时分，罗素发表一个题为 “撒但嘅世界会被毁灭”嘅演讲。呢个演讲吸引咗大约300位有学识嘅听众。其中一个人向罗素提出质疑，而罗素就迅速而且有技巧噉用经文嚟回答佢。后来喺都柏林，罗素遇到一个死缠烂打嘅对手。奥康奈尔系基督教青年会嘅秘书，佢企图令到在座嘅一千几个听众对圣经研究者嘅信息失去兴趣。究竟发生乜嘢事呢？
而家等我哋返去现场，睇吓呢件事嘅过程系点样嘅。一个寻求圣经真理嘅男子，留意到《爱尔兰时报》嘅宣传，决定去听罗素嘅公众演讲。演讲现场坐满晒人，佢好唔容易先揾到个位，坐低之后就聚精会神噉聆听演讲。台上嘅讲者满头白发，留住胡须，着住黑色嘅长礼服，喺讲台上一边行一边打手势，而且好有条理噉用一节又一节嘅经文嚟推理。呢个寻求真理嘅男子首次明白圣经嘅真理。虽然当时冇播音设备，但系讲者嘅声音可以传遍会场每个角落，使听众可以专心聆听呢个长达一个半钟头嘅演讲。喺之后嘅问答讨论环节，奥康奈尔同佢嘅同党就质疑罗素，不过罗素就好有技巧噉用圣经嚟辩护。现场听众响起热烈嘅掌声，表示赞同。辩论结束之后，嗰个寻求真理嘅男子就向现场嘅弟兄提出，自己想了解更多圣经知识。根据在场弟兄姊妹嘅回忆，好多人就系噉样认识真理嘅。
1909年5月，罗素乘搭毛里塔尼亚号离开纽约，展开佢嘅第四次旅程。罗素弟兄想善用横跨大西洋嘅时间嚟口述《守望台》文章，所以佢带埋速记员亨青格弟兄一齐出发。喺贝尔法斯特，有450个本地人嚟聆听罗素弟兄嘅演讲。不过由于座位唔够，当时大约有100个人要企住嚟听。
查尔斯•罗素弟兄摄于卢西塔尼亚号
文章开头提到嘅第五次旅程，都有同样嘅安排。罗素喺都柏林嘅公众演讲结束之后，奥康奈尔带嚟嘅有名神学家向罗素提出质疑。罗素再次用经文回答佢，得到现场观众嘅赞赏。第二日，罗素同佢嘅同伴就乘搭运载邮件嘅快船去利物浦，然后换乘出名嘅卢西塔尼亚号返纽约。 *
1910年5月20日，《爱尔兰时报》上嘅公众演讲宣传
1911年，罗素展开佢第六同第七次旅程。受到广泛宣传嘅公众演讲依然系旅程嘅重要部分。喺春季，贝尔法斯特嘅20位圣经研究者，邀请咗2000人嚟听题名为“人死后嘅情况”嘅公众演讲。罗素去到都柏林嗰时，奥康奈尔又带咗一个教士嚟提出质疑。罗素再次用经文回答，赢得观众嘅欢呼喝彩。同一年嘅秋季，罗素又去探访其他小镇，好多人都嚟听佢嘅演讲。奥康奈尔带住100个人嚟试图干扰都柏林嘅聚会，而听众依然热烈噉支持罗素弟兄。
虽然当时嘅公众演讲都由罗素弟兄负责发表，不过佢承认“冇人系必不可少嘅”，因为“呢个并唔系人嘅工作，而系上帝嘅工作”。呢啲受到广泛宣传嘅公众演讲，亦即系今日公众演讲聚会嘅前身，俾咗圣经研究者好好嘅机会嚟宣扬圣经真理。有乜嘢成果呢？公众演讲有助于好消息传遍爱尔兰，结果好多会众喺唔同嘅城市纷纷成立。——嚟自英国分部档案室
