歲月留痕
公衆演講有助於好消息傳遍愛爾蘭
蒸汽船慢慢駛入貝爾法斯特灣嘅時候,企喺甲板上嘅一小群乘客睇到遠方青翠嘅山嶺沐浴喺晨曦當中,而其中一位乘客就係查爾斯•羅素。當時係1910年5月,羅素第五次到訪愛爾蘭。隨住蒸汽船繼續前進,兩艘建造中嘅巨大郵輪出現喺羅素弟兄眼前,分别係鐵達尼號(泰坦尼克號)同佢嘅姊妹艦奧林匹克號。 *蒸汽船駛過船塢之後,羅素又見到有十幾個聖經研究者喺碼頭等候佢。
二十幾年前,為咗將好消息傳遍世界各地,羅素弟兄開展咗幾趟旅程,探訪美國以外嘅其他地方。佢喺1891年7月展開第一趟旅程,第一站就去咗愛爾蘭。當羅素乘搭嘅芝加哥城號慢慢駛近昆斯敦海岸嘅時候,佢一邊欣賞日落,一邊可能回想父母對家鄉嘅描述。當羅素同佢嘅同伴穿過整潔嘅小鎮同美麗嘅鄉村嗰時,佢哋意識到呢度係一片“莊稼已經成熟,可以收割”嘅田地。
羅素弟兄先後七次探訪愛爾蘭。佢嘅第一次探訪引起好多人嘅興趣。結果,佢後來再次探訪嘅時候,有幾百甚至幾千人都嚟聽佢嘅演講。1903年5月,羅素第二次探訪愛爾蘭。貝爾法斯特同都柏林嘅報刊都宣傳咗羅素嘅公衆演講。呢個演講嘅題目係“以誓言保證嘅應許”,内容談及到亞伯拉罕嘅信心同人類未來嘅福分。羅素話:“聽衆都好留心聽呢個演講。”
由於當地有咁多人對真理感興趣,所以,羅素第三次探訪歐洲嘅時候又去咗一次愛爾蘭。1908年4月嘅一個早上,當羅素落船,踏上貝爾法斯特嘅碼頭嗰時,有五個弟兄嚟迎接佢。傍晚時分,羅素發表一個題為 “撒但嘅世界會被毁滅”嘅演講。呢個演講吸引咗大約300位有學識嘅聽衆。其中一個人向羅素提出質疑,而羅素就迅速而且有技巧噉用經文嚟回答佢。後來喺都柏林,羅素遇到一個死纏爛打嘅對手。奧康奈爾係基督教青年會嘅秘書,佢企圖令到在座嘅一千幾個聽衆對聖經研究者嘅信息失去興趣。究竟發生乜嘢事呢?
而家等我哋返去現場,睇吓呢件事嘅過程係點樣嘅。一個尋求聖經真理嘅男子,留意到《愛爾蘭時報》嘅宣傳,決定去聽羅素嘅公衆演講。演講現場坐滿晒人,佢好唔容易先揾到個位,坐低之後就聚精會神噉聆聽演講。台上嘅講者滿頭白髮,留住鬍鬚,着住黑色嘅長禮服,喺講台上一邊行一邊打手勢,而且好有條理噉
用一節又一節嘅經文嚟推理。呢個尋求真理嘅男子首次明白聖經嘅真理。雖然當時冇播音設備,但係講者嘅聲音可以傳遍會場每個角落,使聽衆可以專心聆聽呢個長達一個半鐘頭嘅演講。喺之後嘅問答討論環節,奧康奈爾同佢嘅同黨就質疑羅素,不過羅素就好有技巧噉用聖經嚟辯護。現場聽衆響起熱烈嘅掌聲,表示贊同。辯論結束之後,嗰個尋求真理嘅男子就向現場嘅弟兄提出,自己想了解更多聖經知識。根據在場弟兄姊妹嘅回憶,好多人就係噉樣認識真理嘅。1909年5月,羅素乘搭毛里塔尼亞號離開紐約,展開佢嘅第四次旅程。羅素弟兄想善用橫跨大西洋嘅時間嚟口述《守望台》文章,所以佢帶埋速記員亨青格弟兄一齊出發。喺貝爾法斯特,有450個本地人嚟聆聽羅素弟兄嘅演講。不過由於座位唔够,當時大約有100個人要企住嚟聽。
查爾斯•羅素弟兄攝於盧西塔尼亞號
文章開頭提到嘅第五次旅程,都有同樣嘅安排。羅素喺都柏林嘅公衆演講結束之後,奧康奈爾帶嚟嘅有名神學家向羅素提出質疑。羅素再次用經文回答佢,得到現場觀衆嘅讚賞。第二日,羅素同佢嘅同伴就乘搭運載郵件嘅快船去利物浦,然後換乘出名嘅盧西塔尼亞號返紐約。 *
1910年5月20日,《愛爾蘭時報》上嘅公衆演講宣傳
1911年,羅素展開佢第六同第七次旅程。受到廣泛宣傳嘅公衆演講依然係旅程嘅重要部分。喺春季,貝爾法斯特嘅20位聖經研究者,邀請咗2000人嚟聽題名為“人死後嘅情況”嘅公衆演講。羅素去到都柏林嗰時,奧康奈爾又帶咗一個教士嚟提出質疑。羅素再次用經文回答,贏得觀衆嘅歡呼喝彩。同一年嘅秋季,羅素又去探訪其他小鎮,好多人都嚟聽佢嘅演講。奧康奈爾帶住100個人嚟試圖干擾都柏林嘅聚會,而聽衆依然熱烈噉支持羅素弟兄。
雖然當時嘅公衆演講都由羅素弟兄負責發表,不過佢承認“冇人係必不可少嘅”,因為“呢個並唔係人嘅工作,而係上帝嘅工作”。呢啲受到廣泛宣傳嘅公衆演講,亦即係今日公衆演講聚會嘅前身,俾咗聖經研究者好好嘅機會嚟宣揚聖經真理。有乜嘢成果呢?公衆演講有助於好消息傳遍愛爾蘭,結果好多會衆喺唔同嘅城市紛紛成立。——嚟自英國分部檔案室