Bi wô’ô bo bi kobô’ô ajô ete. Amu a ne ve ane ôsimesan ôte wo lu’an a mejô me ne Kalate Behébreu 12:16. Éfus éte ja jô na Ésaü a nga ‘biasé’ biôme bi ne étyi, a “kuan [Jacob] éto ntôle jé émien a adi bidi da.” Nalé a liti na, éyoñe Jacob a nga nyoñ “éto ntôle” monyañ, éyoñ éte nje a nga bo môte wua ya éndane Messie.​—Mt 1:2, 16; Lc. 3:23, 34.

Ve éyoñe bia tu’a fase minkañete ya Kalate Zambe, bia yene na, e nji be e sili’i na môt a bo ntôle mon asu ya na, a bo éndane Messie. Tame yene beamu ba yemete de:

Ntôle mone Jacob (Israël) ba Léa ô mbe Ruben. Ntôle mone Jacob ba Rachel ki ô mbe Joseph. Éyoñe Ruben a nga taté na a wulu abé, ane Jacob a nga ve Joseph éto ntôl. (Met. 29:31-35; 30:22-25; 35:22-26; 49:22-26; 1 Mka. 5:1, 2) Ve Messie a nji so mvoñe bôte Ruben nge nyi Joseph. Messie a nga viane kuu mvoñe bôte Juda, mone nyini Jacob ba Léa be nga bi.​—Met. 49:10.

 Luc 3:32 a kate biyôlé bi bôte betan béziñ be mbe éndane Messie. A ne ane môt ase ya été a mbe ntôle mone ya nda bôte jé. Boaz a nga biaé Obed, Obed ki a biaé Jessé.​—Ru. 4:17, 20-22; 1 Mka. 2:10-12.

Ve David, mone Jessé a nji be ntôle mone ya nda bôte jé. A mbe mesu’ulane ya bone mwom. Ve Messie a nga so mvoñe bôte jé. (1 Sa. 16:10, 11; 17:12; Mt. 1:5, 6) Messie a nga so fe mvoñe bôte Salomon, a to ke na, a nji be ntôle mone David.​—2 Sa. 3:2-5.

Nalé a nji tinane na, e bo ntôle mone ya nda bôt a nji be mfi. Ntôle mon ô mbe ô bili beta éto nda bôt, ô mbe fe ô su’ulane bo nlô ya nda bôt. Mon a mbe ntôl, a mbe fe a bili ngap ébaé éyoñe be mbe be kabe’ élik.​—Met. 43:33; Dt. 21:17; Jos. 17:1.

Ve, môte mfe a mbe fe ve nyoñ éto ntôle mon. Abraham a nga ve Isaac éto ntôl a to ke na, Ismaël nnye a mbe ntôle mon. (Met. 21:14-21; 22:2) A avale bia te jô yôp, Jacob a nga vaa éto ntôle Ruben a ve je Joseph.

Bi tame zu beta ke kalate Behébreu 12:16, a jô na: “A za bo na mbo mejian éziñ a ye bo, nge môte ya ébiasé, aval ane Ésaü, nnye ate a nga kuan éto ntôle jé émien a adi bidi da.” Ñye’elan ôvé bia nyoñ été?

Nlômane Paul ô nji be ô kobô’ô ajô ya éndane Messie. A mbe a jô’ô Bekristene na, be bo ‘mezene me ne mvo’é mfa’a ya meda mebo map.’ Be ne “[sube] mvame Zambe” nge ba bo mame ya bisôk. (Beh. 12:12-16) Nge ba bo de, ba ye bo ane Ésaü. A nga “biasé” biôme bi ne étyi, mboan ôte ô nga liti na a dañe nye’e mame ya minsôn.

Bebo bisaé be Yéhôva ya melu mvus be mbe be va’a nye metuna’a, Ésaü fe a nga yiane de bo éyoñ éziñ. (Met. 8:20, 21; 12:7, 8; Jb. 1:4, 5) Ve a nga dañe nye’e mame ya minsôn, ajô te nde a nga biasé mvom a mbe a bili amu ésua bidi. A nga yiane kômbô sa’ale minju’u mi mbe mi yange’e mvoñe bôt Abraham. (Met. 15:13) Ésaü a nga liti na a nye’e mame ya minsôn, a na, a biasé mam me ne étyi éyoñ a nga lu’u binga be nji be be kañe’e Yéhôva, a to ke na, bebiaé bé be nga vini mboan ôte. (Met. 26:34, 35) Ngo’o avale beta nsela’ane a ne zañe ba Jacob! Jacob nye a nga lu’u minga a mbe a kañe’e Yéhôva.​—Met. 28:6, 7; 29:10-12, 18.

Nde jé bi ne jô a lat a éndane Messie? Be mbe be lañe’ éndane Messie be tyii be ntôle mon, ve sa ke éyoñ ése. Bejuif be mbe be yeme’e a kañese mboan ôte. Be nga yebe na Krist a nga so mvoñe bôte David, e be mesu’ulane me mone mé, Jessé.​—Mt. 22:42.