An i tajol cheʼʌch acʼbil ti ñaʼtʌntel bajcheʼ jiñi. Ili mucʼʌch i taj i bʌ yubil bajcheʼ miʼ yʌl Hebreos 12:16, baqui miʼ yʌl chaʼan Esaú maʼañic tsiʼ chʼʌmʌ ti ñuc «jini albil bʌ i chaʼan Dios» i «tsiʼ choño i yʌscuñil cheʼ an i wiʼñal chaʼan miʼ poj taj i bʌl i ñʌcʼ» tiʼ tojlel Jacob. Ili miʼ yʌcʼ ti ñaʼtʌntel yubil chaʼan Jacob tsaʼ mejli ti sujtel tiʼ ñojteʼel jiñi Mesías cheʼ bʌ tsaʼ cʌyle tiʼ wenta «i yʌscuñil» Esaú (Mt. 1:2, 16; Lc. 3:23, 34).

Pero cheʼ tsaʼ c wen qʼuele lojon yambʌ relato tac yaʼ ti Biblia, tsaʼ cʼoti lon c ñaʼtan chaʼan mach cʼʌñʌlic ascuñʌl juntiquil chaʼan miʼ mejlel ti sujtel tiʼ ñojteʼel jiñi Mesías. Laʼ laj qʼuel chucoch:

Jiñi ñaxam bʌ i yalobil Jacob (Israel) yicʼot Lea, jiñʌch Rubén. Ti wiʼil, Jacob tsiʼ yʌcʼʌ i yalobil yicʼot jiñi cʼuxbibil bʌ i yijñam i cʼabaʼ Raquel, jiñi ñaxam bʌ i yalobil jiñʌch José. Cheʼ bʌ Rubén tsiʼ chaʼle mulil, José tsaʼ cʌyle bajcheʼ jiñi mero ascuñʌl bʌ (Gn. 29:31-35; 30:22-25; 35:22-26; 49:22-26; 1 Cr. 5:1, 2). Pero mach jiñic tiʼ tojlel Rubén yicʼot José tsaʼ tili jiñi Mesías, jiñʌch tiʼ tojlel Judá  i chʌnticlel bʌ i yalobil Jacob yicʼot Lea (Gn. 49:10).

Ti Lucas 3:32, miʼ taj ti tʼan joʼtiquil wiñicob i ñojteʼeloʼ bʌ jiñi Mesías. Tiʼ pejtelelob luʼ ascuñʌlob. Boaz jiñʌch i tat Obed, i Obed i tatʌch Jesé (Isaí) (Rt. 4:17, 20-22; 1 Cr. 2:10-12).

Yambʌ i ñojteʼel bʌ jiñi Mesías jiñʌch David. Pero David jiñʌch cojix bʌ i yalobil Jesé (1 S. 16:10, 11; 17:12; Mt. 1:5, 6). Lʌcʼʌl lajalʌch bajcheʼ an tiʼ tojlel Salomón, come mach jiñic ñaxam bʌ i yalobil David (2 S. 3:2-5).

Ili mach yomic i yʌl chaʼan mach ñuquic i cʼʌjñibal jiñi yʌxʼalʌl bʌ. Juntiquil yʌxʼalʌl mucʼʌch i wen chʼʌjmel ti ñuc i ti bele ora jiñʌch muʼ bʌ i cʌytʌl tiʼ wenta jiñi i familia. Cheʼ jaʼel, jiñʌch muʼ bʌ i ñumen aqʼuentel i lum bajcheʼ yambʌlob (Gn. 43:33; Dt. 21:17; Jos. 17:1).

Pero jiñi ascuñiyel yambʌ majqui miʼ mejlel ti cʌybentel. Jumpʼejl ejemplo, cheʼ bʌ Abrahán tsiʼ choco loqʼuel Ismael, jiñi mero ascuñʌl bʌ tsaʼ cʌyle jiñʌch Isaac. I bajcheʼ tsaʼix la cʌlʌ, jiñi i yʌscuñiyel Rubén tsaʼ cʌyle tiʼ wenta José.

Laʼ lac chaʼ qʼuel Hebreos 12:16, baqui jiñi apóstol Pablo tiʼ tsʼijbu: «Tsajiletla ame anic majch miʼ taj i yixic [«tsʼiʼlel», TNM], ame anic majch miʼ tsʼaʼlen jini albil bʌ i chaʼan Dios cheʼ bajcheʼ Esaú. Tsiʼ choño i yʌscuñil cheʼ an i wiʼñal chaʼan miʼ poj taj i bʌl i ñʌcʼ». ¿Chuqui tsaʼ bʌ i mulaj i tsictesan?

Pablo maʼañic woliʼ yʌl chaʼan bajcheʼ tsaʼ tili jiñi Mesías. Tsaʼix i wʌn sube jiñi xñoptʼañob chaʼan yom miʼ ‹pʌtob toj bʌ bij› chaʼan maʼañic majqui «muʼ bʌ i ñusʌben, o muʼ bʌ i sʌt, i yutslel i pusicʼal Dios», ili cheʼʌch miʼ mejlelob ti ujtel mi tsiʼ chaʼleyob tsʼiʼlel (He. 12:12-16). Lajalobʌch bajcheʼ Esaú cheʼ miʼ yajlelob ti jiñi mulil, come Esaú maʼañic tsiʼ qʼuele ti ñuc «jini albil bʌ i chaʼan Dios».

Esaú tsaʼ chumle tiʼ yorajlel jiñi tatʌloʼ bʌ ti wajali ti colem bʌ familia, i tajol tsaʼ mejli i mel jiñi ñuc bʌ eʼtel chaʼan miʼ pul majtañʌl bajcheʼ motomaj chaʼan i familia (Gn. 8:20, 21; 12:7, 8; Job 1:4, 5). Pero tsiʼ qʼuexe tiʼ pejtelel muʼ bʌ i mejlel i taj bajcheʼ ascuñʌl tiʼ caj jumpʼejl chʼejew lenteja, come jin jach tsiʼ ñaʼta chuqui yom tiʼ bʌcʼtal. Tajol maʼañic tsiʼ mulaj i ñusan jiñi wocol tac wʌn albil bʌ chaʼan mi caj i tilel tiʼ tojlel i pʼolbal Abrahán (Gn. 15:13). Esaú tsiʼ pʌsʌ chaʼan maʼañic miʼ qʼuel ti ñuc jaʼel jiñi chʼujul tac bʌ come tsiʼ pʌyʌ chaʼtiquil xʼixic maʼan bʌ miʼ chʼujutesañob Jehová, i tsaʼʌch i wen aqʼue i chʼijiyemlel i tat (Gn. 26:34, 35). Pero Jacob wen qʼuexelʌch come tsaʼ ñujpuñi yicʼot juntiquil muʼ bʌ i chʼujutesan jiñi isujm bʌ Dios (Gn. 28:6, 7; 29:10-12, 18).

Jin mecu chaʼan, ¿chuqui miʼ cʼotel laj cʌn? Chaʼan i ñojteʼelob jiñi Mesías mach tiʼ pejtelelic ora yaʼ tsaʼ ñumi tilel tiʼ tojlel jiñi ascuñʌloʼ bʌ. Jiñi judíojob yujilobʌch iliyi i cheʼʌch tsiʼ ñopoyob come tsiʼ yʌlʌyob chaʼan jiñi Cristo yaʼʌch mi caj i loqʼuel ti jiñi ijtsʼiñʌl bʌ i yalobil Jesé i cʼabaʼ David (Mt. 22:42).