Ti a tia n taekinna n tabetai bwa e riai n anganaki te aomata ae te karimoa rinena ni karimoa. Ao e taraa naba n aki kauntaba anne ma ae ti warekia n Ebera 12:16. E kaotaki n te kibu anne bwa Etau e “aki karinei baika tabu” ao e “anganako [nakon Iakoba] rinena ni karimoa ibukin te amwarake ae tii teuana.” Ai aron ae e iangoaki n te kibu aei bwa ngke e reke iroun Iakoba “rinena ni karimoa,” e a riki naba iai bwa ana bakatibu te Mesia.—Mat. 1:2, 16; Ruka 3:23, 34.

Ma imwin rinanoan rongorongo man te Baibara, e a oti raoi iai bwa e aki kainnanoaki te aomata bwa e na riki bwa te karimoa bwa e aonga n riki bwa ana bakatibu te Mesia. Iangoi bwaai ni kakoaua tabeua:

Bon te karimoa Reuben i buakoia natin Iakoba (Iteraera) ake mwaane, mairoun Rea. Imwina riki, e a bungiaki Ioteba ae ana karimoa Iakoba ma buuna are e tangiria riki ae Rakera. Ngke e karaoa ae aki riai Reuben, e a kanakoaki rinena ni karimoa nakon Ioteba. (KBwaai 29:31-35; 30:22-25; 35:22-26; 49:22-26; 1Rong. 5:1, 2) Ma e ngae n anne, e aki  riki te Mesia mairoun Reuben ke Ioteba. E bon riki mairoun Iuta are ana kaaman n nati Iakoba ma Rea.—KBwaai 49:10.

E karinanaki n Ruka 3:32 rinanoia naake imwina riki aika niman kateirikian te Mesia. E taraa n ae mwaane aikai boni karimoa. Boati e karika Obeta, ao Obeta e karika Iete.—Ruta 4:17, 20-22; 1Rong. 2:10-12.

Ma bon tiaki te karimoa natin Iete are Tawita. Bon te bina i buakoia natina mwaane ake waniman. Ma e ngae n anne, e riki te Mesia rinanon Tawita. (1Tam. 16:10, 11; 17:12; Mat. 1:5, 6) N aron naba anne, te kanoa are imwina n te kateiriki bon Toromon, e ngae ngke tiaki ngaia ana karimoa Tawita.—2Tam. 3:2-5.

Ma tiaki nanona bwa e a aki kakawaki te karimoa. E anganaki te karimoa te nakoa ae rine ao n angiin te tai e riki imwina bwa atuia kaaini batana. Boni ngaia naba te nati te mwaane ae reke irouna tibwana ae uoua mwaitina.—KBwaai 43:33; TuaKau. 21:17; Iot. 17:1.

Ma e kona n anganaki temanna te rine ni karimoa. E kanakoaki Itimaera iroun Aberaam ao e a nakon Itaaka te rine ni karimoa. (KBwaai 21:14-21; 22:2) Ao n aron ae kaotaki, e anaaki te rine ni karimoa mairoun Reuben ao e anganaki Ioteba.

Ti na okira ngkai Ebera 12:16, ae kangai: “Taraia bwa e na akea i buakomi te tia wene ni bure ke te aomata ae aki karinei baika tabu, n aron Etau are anganako rinena ni karimoa ibukin te amwarake ae tii teuana.” Tera ae kateretereaki ikanne?

E aki maroroakina ikai te abotoro Bauro kateirikian te Mesia. E tii kaumakiia Kristian bwa a na ‘kaetii kawaini waeia.’ Bwa e kaawa n ‘aki reke irouia ana akoi ae rianako te Atua,’ ao e kananokawaki bwa e boni kona n riki ngkana a wene ni bure. (Ebera 12:12-16) Ngkana a karaoa anne, a katotonga iai Etau. E aki “karinei baika tabu,” ao e iraraang ni baika aki tabu.

E maiu Etau n aia tai ngkoa baatua, ao e bae ni kakabwaiaaki ni mwiokoaki n te angakarea n tabetai. (KBwaai 8:20, 21; 12:7, 8; Iobi 1:4, 5) Ma ibukin arona n aki iaiangoi baika tabu, e a anganako kakabwaia akanne ni kabane tii ibukin teuana te boora n tuubu. Tao e bae ni kan totokoa rikin te rawawata are e a kaman taekinaki bwa e na riki nakoia kanoan Aberaam. (KBwaai 15:13) E kaotia naba Etau bwa e nano riki ni baika aki tabu, ao e aki kakaitau ni baika tabu, ngke e mare ma aine ake uoman ake beekan, ake a a riki bwa karawawataan nanoia ana karo. (KBwaai 26:34, 35) Ai kaokorora arona ma Iakoba, are e taraia raoi bwa e na mare ma te tia taromauria te Atua ae koaua!—KBwaai 28:6, 7; 29:10-12, 18.

Ngaia are tera ngkanne ae ti kona n taekinna ibukin te kanoa are e na riki mai iai Iesu are te Mesia? N tabetai, a anganaki karimoa aika mwaane, ma tiaki n taai nako. A ataa aei I-Iutaia ao a butimwaeia, ngke a kakoauaa bwa Kristo e riki man te kanoa ae Tawita, are ana bina Iete.—Mat. 22:42.