Nega haida unai bamona ita henanadai danu. Unai ese Heberu 12:16 ena hereva ia hamomokania. Unai siri ia gwau Esau be “helaga gaudia ia laloa bada lasi” bona “aniani tamona totona iena vara guna ahuna [be Iakobo dekenai] ia henia.”  Unai dainai haida idia laloa Iakobo be “vara guna ahuna” ia abia neganai, ia be Mesia ena tubuna tauna ai ia lao danu.​—⁠Mat. 1:2, 16; Luka 3:23, 34.

To, Baibel ia gwau lasi vara guna ahuna idia abia taudia sibona be Mesia ena tubuna ai idia lao. Mani haheitalai haida ita laloa:

Iakobo (Israela) ena natudia amo, Rubena be Lea ese ia havaraia natuna ginigunana. Gabeai, Iakobo ese ena lalokau hahine, Rahela, amo ia havaraia natuna ginigunana be Iosepa. Rubena be kara kererena ia karaia neganai, ena vara guna ahuna be Iosepa ese ia abia. (Gen. 29:31-35; 30:22-25; 35:22-26; 49:22-26; 1 Siv. 5:1, 2) To, Mesia be Rubena eiava Iosepa ena bese amo ia mai lasi. Ia be Iuda, Lea ese ia havaraia natuna namba 4 amo ia mai.​—Gen. 49:10.

 Luka 3:32 ese tatau 5 ia herevalaia bona idia amo Mesia ia vara. Unai tatau ta ta be vara guna natudia. Boasi be Obeda ena tamana bona Obeda ena natuna be Iese.​—Ruta 4:17, 20-22; 1 Siv. 2:10-12.

To, Iese ena natuna Davida be vara guna natuna lasi. Memero 8 amo ia be dokona. To Mesia be Davida ena bese amo ia mai. (1 Sam. 16:10, 11; 17:12; Mat. 1:5, 6) Unai hegeregerena, Mesia be Solomona ena bese amo ia mai, herevana ia be Davida ena vara guna natuna lasi.​—2 Sam. 3:2-5.

Namo lasi ita laloa vara guna ahuna be anina lasi. Vara guna natuna be ahuna badana bona vaia ia be bese kwarana iharuana ai ia lao. Danu, tama ena kohu ibounai amo ia be ahuna rua ia abia.​—Gen. 43:33; Deu. 21:17; Ios. 17:1.

To vara guna natuna ena ahuna be natuna ma ta dekenai idia henia hanai diba. Aberahamo ese Isamaela ena vara guna ahuna be Isako dekenai ia henia. (Gen. 21:14-21; 22:2) Danu, Rubena ena vara guna ahuna be Iosepa ese ia abia.

Heberu 12:16 ma ia gwau: “Namo lasi umui huanai matabodaga tauna ta eiava helaga gaudia ia laloa bada lasi tauna ta ia noho, Esau bamona, ia ese aniani tamona totona iena vara guna ahuna ia henia.” Unai siri ena anina be dahaka?

Aposetolo Paulo be Mesia do ia mai besena ia herevalaia lasi. To, ia ese Keristani taudia ia hagoadaia “edia aena ena raka daladia do [idia] hamaoromaoroa.” Bema matabodaga karadia idia karaia, idia be ‘Dirava ena hebogahisi hereadaena do idia abia lasi.’ (Heb. 12:12-16) Bema unai ia vara, idia be Esau bamona. Ia be “helaga gaudia ia laloa bada lasi” bona ia matauraia lasi.

Esau be bese kwaradia edia negai ia noho, bona reana nega haida boubou gaudia ia henia. (Gen. 8:20, 21; 12:7, 8; Iobu 1:4, 5) To Esau be tauanina gaudia ia laloa dainai, aniani tamona totona unai hahenamo ibounai ia haboioa. Reana ia ura Aberahamo ena bese dekenai do ia vara hisihisina ia dadaraia. (Gen. 15:13) Danu, ia ese kaivakuku idia tomadiho henia hahine rua ia adavaia dainai, ena tama sina idia lalohisihisi bada, bona ia hahedinaraia ia be helaga gaudia ia laloa bada lasi. (Gen. 26:34, 35) Iakobo be unai bamona lasi, ia be Dirava momokanina ia tomadiho henia hahinena ia adavaia!​—Gen. 28:6, 7; 29:10-12, 18.

Unai dainai, Iesu eiava Mesia do ia mai besena be edena bamona do ita herevalaia? Nega haida ia be vara guna natuna amo ia mai​—⁠to nega momo lasi. Iuda taudia be unai idia lalopararalaia bona abia dae, idia gwau Keriso be Iese ena natuna dokona, Davida, ena bese amo do ia mai.​—Mat. 22:42.