Povikando mape ya twa rora okupura epuriro otja indo. Nu pe munika aayo vi hitasana netjangwa rOvaheberi 12:16. Oro ri tja, Esau kena pa raisa ondangi koviṋa oviyapuke na ‘randisa ourumbi we komariro yemwe.’ Indu Jakob tja muna “ourumbi,” eye wina wa rira omuhoko Messias maa sokukwatwa mo.—Mat. 1:2, 16; Luk. 3:23, 34.

Nungwari, Ombeibela i raisa oukahu kutja omundu kaa hepa okukara nousemba wouveri uriri, kutja ma rire omuhoko Messias mu ma sokukwatwa. Ngatu tare komapu tjiva ngu maye raisa nao:

Omuatje wa Jakob (Israel) omutenga wa ri Ruben ngwa za momukazendu we Lea. Kombunda, Jakob wa kara nomuatje wena Josef, okuza momukazendu we omusuverwa Rahel. Indu Ruben tja tjita ourunde ounene, ourumbi we wa yandjewa ku Josef. (Gen. 29:31-35; 30:22-25; 35:22-26; 49:22-26; 1 Ekuruh. 5:1, 2) Omuhoko Messias maa sokukwatwa kanaa wa za mu Ruben poo Josef. Nungwari wa za momuhoko wa Juda, omuatje wa Jakob omuzandu outjaine ngwa za mu Lea.—Gen. 49:10.

 Embo ra Lukas 3:32 ri tamuna omihoko 5, vyokombunda Messias ma kakwatwa. Pe munika kutja ovarumendu avehe mba va ri omarumbi. Kunao, Boas wa rira ihe wa Obed, mu mwa za Isai.—Rut 4:17, 20-22; 1 Ekuruh. 2:10-12.

Posi yokutja omuatje wa Isai, David kena pa ri otjiveri. Eye wa ri omusenina movanatje 8 ovazandu. Posi yokutja Messias wa kwatwa momuhoko wa David. (1 Sam. 16:10, 11; 17:12; Mat. 1:5, 6) Momuano otjingewo, omuhoko mbwa kongorera ko wa ri owa Salomo, nandarire kutja eye kena pa ri otjiveri tja David.—2 Sam. 3:2-5.

Ihi katjina ku heya kutja, okurira otjiveri kaku nanḓengu. Omuatje omuzandu omutenga wa ri notjihako otjinanḓengu tjinene, nu ongwaa rire otjiuru tjonganda okuza ku ihe. Eye wina aa sokumuna eṱa povikando vivari.—Gen. 43:33; Deut. 21:17; Jos. 17:1.

Posi yokutja ouveri aau yenene okuyandjewa komundu warwe. Tjimuna Abraham tja yeka Ismael ourumbi, neu yandja ku Isak. (Gen. 21:14-21; 22:2) Otja tji twa hungire rukuru, ourumbi wa yandjewa ku Josef okuza ku Ruben.

Nambano ngatu tare kOvaheberi 12:16, ndi ma ri tja: “Nu ape ha kara omundu ngu ma tjiti oruvakiro nourunde otja Esau ngwa randisire ourumbi we komariro yemwe.” Epu raye nda ṋunisiwa mba?

Omuapostele Paulus mba kaa hungire omuhoko Messias maa sokukwatwa mo. Nungwari aa tunduuza Ovakriste mbo, kutja ve ‘tware ozondjira ozosemba.’ Kunao owo kave ‘nokupoka kotjari tja Ndjambi,’ tji mape ya atji tjitwa indu tji va tjiti oruvakiro. (Hebr. 12:12-16) Indu tji va tjiti nao owo mave sana ku Esau. Eye kena pa raisa ondangi koviṋa oviyapuke, nu eye we riyandjera okutjita oviṋa mbi ha tjata ku Jehova.

Esau aa hupu motuveze tji kwa ri ovarumendu ovaṱakame, nu mape ya kutja eye wa ri nondjingonekero yokutjita ozombunguhiro. (Gen. 8:20, 21; 12:7, 8; Job 1:4, 5) Posi yokutja Esau wa yandjere ombango tjinene kovihepwa vye, ngandu tja randisa ourumbi we komariro yemwe. Mape ya kutja eye kaa vanga okukara norupa mondatumisire ndji kwa za mai ya kozondekurona za Abraham. (Gen. 15:13) Esau wina kaa raisa onyengo koviṋa ovihakohoke nu kari nondengero koviṋa oviyapuke. Eye wa kupa ovakazendu vevari mbaave rikotamene koomukuru wovisenginina, nu ihi tja hihamisa ovanene ve. (Gen. 26:34, 35) Tjiri eye wa pangukire ku Jakob, ngwa kupa omukazendu ngwee rikotamene ku Mukuru watjiri!—Gen. 28:6, 7; 29:10-12, 18.

Nu nambano matu yenene okuya koumune uṋe ohunga nomuhoko Jesus poo Messias ma kwatwa? Povikando tjiva omuhoko mbo aau pitire moviveri, posi yokutja kaaruhe. Ovajuda va muna otjiṋa hi nu ave tji yakura, tjimuna indu tji va yakura kutja Kristus wa za momuhoko wa David, omuatje wa Isai omuzandu omusenina.—Mat. 22:42.