Egga ira i tiempo nga kunnatun i komento tam. Gittana mekunnay yatun ta mabibbig tam ta Hebreo 12:16. Tatun nga bersikulo, nakagi nga si Esau ay “awan tu pangaya na ta nespirituan nga ganna-gannug” anna “megafu laman ta mittan nga ikakan, nilaku na [kani Jacob] i katunungan na nga kwenta kaka.” Gittana mallawan taw nga megafu ta nala ni Jacob i “katunungan na nga kwenta kaka,” nelinia yaya ta ginafuan nga mappange ta Mesias.​—Mat. 1:2, 16; Luc. 3:23, 34.

Ngem nu repasuattam i rekord ira na Biblia, ipasingan danatun nga ari tu kawagan nga kaka nga ana i tadday tapenu mabbalin yaya tu ginafuan na Mesias. Innan i karuan nga ebidensia:

Ta ána ni Jacob (Israel), i kakana kani Lea ay si Ruben. Tapus i kaka gapa nga anana ta mas iddukanna nga atawa nga si Rachel ay si Jose. Turi ta nakaliwa si Ruben, nepasa i kepangngattan na kaka kani Jose. (Gen. 29:31-35; 30:22-25; 35:22-26; 49:22-26; 1 Cro. 5:1, 2) Maski kunna, i linia nga ginafuan na Mesias ay parehu nga ari ziminalan kada Ruben anna Jose. Ziminalan yatun kani Juda, i meka-appa nga ana nga lalaki ni Jacob kani Lea.​—Gen. 49:10.

Nelista ta Lucas 3:32 i lima nga ginafuan  nga mattuppal ta Mesias. Puru kaka nga ana danatun nga lallaki. Si Boaz ay nabbalin tu yama ni Obed, nga nabbalin gapa tu yama ni Jesse.​—Ruth 4:17, 20-22; 1 Cro. 2:10-12.

Ngem ari tu kaka nga ana ni Jesse si David. Urian yaya ta walu nga ana nga lalaki. Ngem i linia na ginafuan na Mesias ay gukaban ni David. (1 Sam. 16:10, 11; 17:12; Mat. 1:5, 6) Tapus i tumunug mangana nga ginafuan ay si Solomon, maski nu ari tu yaya i kaka nga ana ni David.​—2 Sam. 3:2-5.

Ari tu kayà kagian naw nga ari tu matagibalor i pabbalin tu kaka nga ana. Maraya-rayaw i posision na kaka nga ana anna maruddu nga yaya i tumunug nga ulu na familia. Yaya gapa i ana nga lalaki nga doble i billena ta rensia.​—Gen. 43:33; Deut. 21:17; Jos. 17:1.

Ngem puede nga meyali i kepangngattan na kaka. Inalsa ni Abraham i faborna kani Ismael yatutta nepasa i kepangngattan na kaka kani Isaac. (Gen. 21:14-21; 22:2) Gittana nakagi, neyali i kepangngattan ni Ruben nga kwenta kaka kani Jose.

Repasuattam uli i Hebreo 12:16 nga mabibbig: “Magimmugug kamu tapenu awan nikamu tu maggannug; onu mabbalin tu kagitta ni Esau nga awan tu pangaya na ta nespirituan nga ganna-gannug. Megafu laman ta mittan nga ikakan, nilaku na i katunungan na nga kwenta kaka.” Anni i punto natun?

Ari tu meyannung ta ginafuan na Mesias i topiko taw ni apostol Pablo. Pagarammanna laman i Cristiano ira nga ‘patunungadda i dalan nga pallakaradda.’ Yatun ay tapenu ‘ari nga lonan na sinni laman nira i pagallo na Dios,’ nga awayyana nga mesimmu nira nu mangngua ira tu seksual nga imoralidad. (Heb. 12:12-16) Nu kuadda yatun, meyarig ira kani Esau. “Awan tu pangaya na ta nespirituan nga ganna-gannug,” anna literal nga nappaffu ta “ari nespirituan nga ganna-gannug.”

Nattolay si Esau ta tiempo na patriarka ira, anna awayyana nga nu mittan egga i pribilehiona nga mangitavvu. (Gen. 8:20, 21; 12:7, 8; Job 1:4, 5) Ngem megafu ta nepattaggan i appanonona, nilakuna i ngamin nga pribilehiona para laman ta tanga-tasa nga lentehas. Awayya nga ibitana i pazziga nga neprofesiya nga duttal ta gaka ni Abraham. (Gen. 15:13) Nipasingan paga ni Esau nga mas kinaragatanna i kawan tu pangikakua ta sagrado ira nga gannug, nga awan tu pangappresiana tatun, gukaban na pangatawa tu dua nga pagano nga babay nga napparaddam ta maganana. (Gen. 26:34, 35) Talaga katulia yaya ni Jacob, nga siniguraduna nga mangatawa tu tadday nga maddayaw ta kurug nga Dios!​—Gen. 28:6, 7; 29:10-12, 18.

Anni gafu i konklusiottam meyannung ta linia nga ginafuan ni Jesus, i Mesias? Yatun nga linia ay awayyana nga maddalan anna gukaban na kaka nga ana—ngem ari kanayun. Ammu yaw na Judio ira anna inakseptada yatun, kagitta na pinangalawada nga naggafu i Cristo kani David, i urian nga ana ni Jesse.​—Mat. 22:42.