Nonkango odo kwa liza nedi atu resa moVahebeli 12:16. Velise ozo kutanta asi Esau ‘kwa randesere po umbeli wendi [kwaJakopo] konondya domuzuhwa gezuva limwe tupu.’ Eyi kwa monekere ngwendi asi apa Jakopo ga ya gwene upingwa woumbeli, age kwa ya heme melikwamo lyoruvharo oru rwa twaredesa kwaMesiyasa.—Mat. 1:2, 16; Ruk. 3:23, 34.

Nampili ngoso, yihorokwa yomoBibeli kulikida asi mugara kapi ga hepere kukara mbeli yipo a hamene melikwamo lyezimo eli lya twaredesere kwaMesiyasa. Tu konakoneni maumbangi gamwe:

MunwaJakopo gombeli kwa kere Rubena ogu ga mu reterere Reya. Ano konyima, Jakopo ga ya kere nombeli zimwe hena Josefa ogu ga mu reterere Rakera. Apa Rubena ga honderere, umbeli wendi kwa ya u pere Josefa. (Gen. 29:31-35; 30:22-25; 35:22-26; 49:22-26; 1 Hist. 5:1, 2) Nye simpe, malikwamo gezimo lyaMesiyasa kapi ga pitilire momazimo goRubena naJosefa. Ago kwa pitilire mwaJuda munwaJakopo gwaune ogu ga mu reterere Reya.—Gen. 49:10.

 MwaRukasa 3:32 kwa tumbura mo malikwamo gatano gezimo lyaMesiyasa. Kumoneka asi vagara owo kwa kere nombeli. Yipo nye, Bowasa kwa retere Obedi ano Obedi kwa retere Jese.—Rutu. 4:17, 20-22; 1 Hist. 2:10-12.

Nampili ngoso munwaJese, Ndafita kapisi mbeli ga kere nye nsiraura. Nye Mesiyasa kwa ya tundire moruvharo rwaNdafita. (1 Sam. 16:10, 11; 17:12; Mat. 1:5, 6) Saromo nage ga ya hamenene melikwamo olyo nampili ngomu ga dilire kukara mbeli zaNdafita.—2 Sam. 3:2-5.

Eyi kapi yi na kutanta asi kukara mbeli kapi ya kere mulyo. Mbeli nga va zi fumadeke unene ntani yizo nga zi pingi situmbukira sokugendesa epata. Mbeli ngazi gwana hena upingwa wounzi kupitakana navenye.—Gen. 43:33; Deut. 21:17; Jos. 17:1.

Nye upingwa ou nga gwana mbeli pamwe ngava u pe gwapeke. Konyima zokutjida mbeli zendi Ismaeli, Abirahamu kwa rundwililire upingwa woumbeli kwaIsaka. (Gen. 21:14-21; 22:2) Ngomu tuna yi zogere nare, upingwa woumbeli waRubena kwa u geve kwaJosefa.

Tu tareni hena moVahebeli 12:16 ezi azi tanta asi: “Pa ha kara gokudira kukuruka ndi munzoni ngwendi Esau, ogu ga randesere po umbeli wendi konondya domuzuhwa gezuva limwe tupu.” Yisinke natu lirongera ko kovelise ezi?

Movelise ozo, mupostoli Paurusa kapi ga uyungire kuhamena elikwamo lyezimo lyaMesiyasa. Age kwa korangedere tupu Vakriste ‘mokuwapeka nompadi dawo monzira zokuvyuka.’ Mokuyirugana oyo, awo ngano va gwene “nkenda zaKarunga” ezi ngano va dilire kugwana pokulihameka moruhonda. (Heb. 12:12-16) Yirugana oyo ngano ya va ninkisire va ligwanekere noyitundwamo ngwendi yaEsau. Age kwa kere munzoni ntani kapi ga here yininke yokupongoka.

Esau kwa parukire posiruwo apa vagara ngava pangere velike, age ngano ga ya kere nositumbukira sokuzamba nonzambo. (Gen. 8:20, 21; 12:7, 8; Joba 1:4, 5) Nye edowo lyendi lya mu ninkisire a zumbanese nayinye oyo morwa ruhupwira romakunde. Age nampo hena kwa here kuhenduka ruhepo oru va pumbire asi ngaru ligwanekera naro ruvharo rwaAbirahamu. (Gen. 15:13) Esau kwa likidire hena asi kapi ga here yininke yokupongoka pokukwara vakadi vavali wovapagani, eyi kwa guvisire vakurona vendi. (Gen. 26:34, 35) Age kwa lisigire naJakopo ogu ga tokomenene kukwara mukadi ogu nga karere Karunga.—Gen. 28:6, 7; 29:10-12, 18.

Nye, yisinke natu lirongera ko kuhamena malikwamo gezimo lyaMesiyasa? Malikwamo aga mpamwe ngaga pitire mombeli, nye kapisi nkenye apa. Vajuda va yi dimbwilire eyi nokuyitambura ngamoomu va yi tambwire asi Kristusa kwa tundilire moruvharo rwaNdafita, munwaJese gonsiraura.—Mat. 22:42.