Kudi misangu ituvua bambe nanku. Bivua bimueneka ne: lungenyi alu luvua lupetangana ne tshidi Ebelu 12:16 wamba. Mvese au udi wamba ne: Esau kavua “wanyisha bintu bia tshijila” to, ne “uvua mulekele [Yakoba] bukenji buende bua buanabute, mubushintakaje ku tshiakudia tshimue.” Bivua biumvuika bu ne: pavua Yakoba muangate “bukenji . . . bua buanabute,” biakenza bua alue pende nkambua wa Masiya.​—Mat. 1:2, 16; Luka 3:23, 34.

Kadi dikonkonona kabidi dia miyuki ya mu Bible didi dileja ne: bua muntu kulua nkambua wa Masiya, kabivua bikengela ikale anu muanabute to. Tukonkononayi bimue bijadiki:

Mu bana ba Yakoba (Isalele), muanende muanabute wa kudi Lea uvua Lubena. Pashishe muana wa Yakoba wa kumpala wa kudi Lakele mukaji uvuaye mutambe kunanga uvua Jozefe. Pavua Lubena muenze bualu kampanda bubi, bukenji bua buanabute buakaya kudi Jozefe. (Gen. 29:31-35; 30:22-25; 35:22-26; 49:22-26; 1 Kul. 5:1, 2) Nansha nanku, mulongo wa bankambua ba Masiya kawuvua mupitshile mu Lubena nansha mu Jozefe to. Kadi uvua mupitshile mu Yuda muana muinayi wa Yakoba wa kudi Lea.​—Gen. 49:10.

Luka 3:32 udi utela bantu bakuabu batanu ba mu mulongo wa bankambua ba Masiya. Bidi bimueneka  ne: yonso wa kudibu uvua muanabute. Nunku Boaza wakalela Obeda, Obeda kulela pende Yishai.​—Luta 4:17, 20-22; 1 Kul. 2:10-12.

Kadi Davidi muana wa Yishai kavua muanabute to. Uvua wa ndekelu wa ku bana ba balume 8. Pabi mulongo wa bankambua ba Masiya uvua mupitshile mu Davidi. (1 Sam. 16:10, 11; 17:12; Mat. 1:5, 6) Bia muomumue, muntu wakalonda Davidi mu mulongo au uvua Solomo nansha muvuaye kayi muanabute wa Davidi.​—2 Sam. 3:2-5.

Kabiena bisua kumvuija ne: kuikala muanabute kakuvua ne mushinga to. Muanabute wa balume uvua ne muaba wa lumu ne misangu ya bungi yeye ke uvua ulua mfumu wa nzubu wa tatuende. Yeye ke uvua kabidi upiana bitupa bibidi bia bintu bia tatuende.​—Gen. 43:33; Dut. 21:17; Yosh. 17:1.

Kadi bavua mua kunyenga muntu bukenji bua buanabute kubupesha muntu mukuabu. Tshilejilu, Abalahama wakipata Yishemaele, kupeshaye Izaka bukenji bua buanabute. (Gen. 21:14-21; 22:2) Kabidi anu bu mutukadi bambe, bavua banyenge Lubena bukenji bua buanabute kubupeshabu Jozefe.

Mpindieu tupinganayi ku tshidi Ebelu 12:16 wamba: “Nudimuke bua munkatshi muenu kamuikadi muena masandi anyi muntu udi kayi wanyisha bintu bia tshijila anu bu Esau uvua mulekele bukenji buende bua buanabute, mubushintakaje ku tshiakudia tshimue.” Mvese eu udi usua kuamba tshinyi?

Mupostolo Paulo kavua wakula muaba eu bua bankambua ba Masiya to. Uvua ufuma kudikankamija bena Kristo bua ‘kululamijila makasa abu njila.’ Nunku kabavua mua ‘kupangila bua kupeta ngasa wa Nzambi’ to. Kadi diakabi bavua mua kumupangila bu bobu baditue mu tshiendenda tshia masandi. (Eb. 12:12-16) Bu bobu benze nanku, bavua bafuanangana ne Esau uvua kayi “wanyisha bintu bia tshijila,” ne wakadifila ku bintu bietu bia tshianana ebi.

Esau uvua ne muoyo tshikondo tshivua bankambua bimanyina bena mu nzubu yabu kumpala kua Nzambi, ne kuvua mene misangu ivuaye mua kuikala mupete diakalenga dia kulambula milambu. (Gen. 8:20, 21; 12:7, 8; Yobo 1:4, 5) Kadi bu muvua lungenyi luende lutuma anu ku malu a mubidi, wakalekela diakalenga dionso adi bua tshibakudi tshia nkunde. Uvua mua kuikala ukeba kuepuka dikenga dikavuabu balaye divua bana ba Abalahama ne bua kupeta. (Gen. 15:13) Esau wakaleja kabidi muvuaye munange malu a tshianana, kayi ne dianyisha bua bintu bia tshijila, pavuaye musele bakaji babidi bampangano, yeye kunyingalaja baledi bende. (Gen. 26:34, 35) Esau uvua mushilangane bikole ne Yakoba bualu Yakoba wakasela mutendeledi wa Nzambi mulelela.​—Gen. 28:6, 7; 29:10-12, 18.

Mpindieu tudi mua kukuata tshinyi bua mulongo wa bankambua ba Yezu Masiya? Kuvua misangu ivua mulongo au mupitshile kudi banabute ba balume, kadi kabivua anu nanku misangu yonso to. Bena Yuda bavua bamanye bualu ebu ne bavua babuitaba. Tshilejilu, bavua bitaba ne: Kristo uvua ne bua kupatukila mu ndelanganyi ya Davidi muana wa mukala wa Yishai.​—Mat. 22:42.