Omu mukiko tunalumbununanga lwola lumwe. Kaha kulumbununa kana chalitombola nachisoneka chaWavaHepeleu 12:16. Echi chisoneka chamba ngwacho, Esau ‘kasakwililile vyuma vyajilako’ ngocho “atambasanyine uswana wenyi wautwatwa [kuli Yakova] nakulya chakulya kamwe kaha.” Echi chili nakusolola nge omu Yakova apwile ‘nauswana wautwatwa’ hakiko jino atokwele kupwa kakuluka yaMeshiya.—Mateu 1:2, 16; Luka 3:23, 34.

Oloze omu tunahunanana kanawa hamijimbu yamuMbimbiliya, tunawane nge vatu vamwe vaze vapwile vakakuluka jaMeshiya kavapwile vatwatwako. Tukekesenu haunjiho umwe:

Havana vaYakova (chipwe ngwetu Isalele), twatwa apwile Luvene wakusema naLeya. Kaha mwanaYakova watwatwa kuli puwenyi Lakele uze azangile chikuma apwile Yosefwe. Jino omu Luvene alingile shili yayinene, uswana wautwatwa vauhanyine kuli Yosefwe. (Kupu. 29:31-35; 30:22-25; 35:22-26; 49:22-26; Miji. 1, 5:1, 2) Chipwe ngocho, Meshiya kasemukilile muchisaka chaLuvene chipwe chaYosefweko. Asemukilile muli Yuta uze apwile mwanaYakova wamuchiwana kuli Leya.—Kupu. 49:10.

 Hali Mateu 1:5 vavulukaho vatu vawana vaze vapwile vakakuluka jaMeshiya. Chasoloka nge ava malunga vosena vapwile vatwatwa. Ngocho Mbowaze asemene Ovete, kaha Ovete asemene Yese.—Lute 4:17, 20-22; Miji. 1, 2:10-12.

Oloze Ndavichi uze apwile mwanaYese kapwile twatwako. Apwile muchinyikila hali vana vaYese 8. Oloze Meshiya asemukilile muli Ndavichi. (Samwe. 1, 16:10, 11; 17:12; Mateu 1:5, 6) Chochimwe nawa, Solomone uze apwile kakuluka yaMeshiya kapwile mwanaNdavichi watwatwako.—Samwe. 2, 3:2-5.

Chipwe ngocho echi kacheshi nakulumbununa nge utwatwa wapwile wamokomokoko. Twatwa apwilenga wamulemu chikuma, kaha kakavulu ikiye apwilenga mutwe watanga nge chisemi nafu. Vamuhanyinenga nawa vyazano vivali kuluheto lwachisemi.—Kupu. 43:33; Lushi. 21:17; Yoshu. 17:1.

Oloze lwola lumwe utwatwa vauhanyinenga kumutu weka. Apalahama ahangile Ishimele, nakuhana utwatwa kuli Isaka. (Kupu. 21:14-21; 22:2) Kaha nganomu twahanjikanga lyehi, utwatwa waLuvene vauhanyine kuli Yosefwe.

Jino tukindulukenu kuchisoneka chaWavaHepeleu 12:16, chize chamba ngwacho: “Zangamenu kuchina hali enu nahapwa muka-ujila, chipwe mutu uze mwazeneka kusakwilila vyuma vyajila ngana mwaEsau uze atambasanyine uswana wenyi wautwatwa nakulya chakulya kamwe kaha.” Chishina muka vapwile nakushindakanya?

Kaposetolo Paulu hano kapwile nakuhanjika vyachisaka asemukilile Meshiyako. Apwile nakukafwa vaka-Kulishitu ‘vasungamise lika jijila jakutambukamo namahinji avo.’ Avalwezele ngwenyi kachi nge navalimbenja nakulinga ujila, kaha ‘navahona kutambula likoji lyalinene lyaKalunga.’ (Hepe. 12:12-16) Nge navalinga ngocho, kaha navalifwana naEsau. Esau ‘kasakwililile vyuma vyajilako,’ avimwene kupwa ‘vyakujiluluka.’

Hakuwana nge Esau ayoyelele kushimbu yakunyima, pamo nayikiye ahanyinenga mawana akulumba. (Kupu. 8:20, 21; 12:7, 8; Yopa 1:4, 5) Oloze mwomwo yakuhona kushinganyeka kanawa, Esau atambasanyine kutokwa kanechi nalilonga lyamakunde. Pamo kasakile kumona luyando luze vapolofwetele hali vana vaApalahamako. (Kupu. 15:13) Esau nawa asolwele ngwenyi kasakwililile vyuma vyajilako hakumbata mapwevo vavali vakumafuchi eka, kaha echi chevwishilenga visemi jenyi kupihya. (Kupu. 26:34, 35) Oloze omu keshi mukiko apwile Yakovako. Ikiye ambachile pwevo uze alemeselenga Kalunga wamuchano.—Kupu. 28:6, 7; 29:10-12, 18.

Shikaho natukukulula ngwetu ngachilihi hachihande echi chachisaka asemukilile Yesu, uze apwa Meshiya? Lwola lumwe chisaka kana chahichilile muli vatwatwa, oloze halwola lukwavo kachapwile ngochoko. VaYuleya vatachikijile chishina kanechi nakuchitavila, shikaho vafwelelele ngwavo Kulishitu mwakasemukila muli Ndavichi uze apwile mwanaYese wamuchinyikila.—Mateu 22:42.