Nega haida unu ta henanadai tomamu. Toana na una ese Heberu 12:16 ena hereva e hamomokaniamu. Una siri na e gwa, Esau ese “helaḡa ḡaudia na se lalodia bada” (NWT), bona “ena roboa ahuna na nau tamona e hoilaia [Iakob enai].” Una ese e hahedinaraia Iakob ese “roboa ahuna” e abia neganai, ia na Mesia tubuna ta ai ela danu.​—⁠Mat. 1:2, 16; Luka 3:23, 34.

To, Baibul sivaraidia ese e hahedinaraiamu dia roboa mo Mesia tubuna ai ela. Mani ihamomokanina sivaraidia haida aita herevalai:

Iakob (Israel) bona Lea natudia roboana na Ruben. Gabeai, Iakob adavana lalokauna, Rahela, ese e havaraia natu roboana na Iosef. Ruben e kara dika neganai, roboa ahuna na Iosef ese e abia. (Gen. 29:31-35; 30:22-25; 35:22-26; 49:22-26; 1 Sis. 5:1, 2) To, Mesia na dia Ruben bona Iosef edia bese amo e vara. Ia na Iakob bona Lea natudia merona namba 4, Iuda, ena bese amo e vara.​—⁠Gen. 49:10.

Luka 3:32 ese Mesia tubuna iboudiai 5 ladadia e gwaurai. Toana na idia ta ta na natu  roboadia. Boa natuna na Obed, bona Obed natuna na Iese.​—⁠Ruta 4:17, 20-22; 1 Sis. 2:10-12.

To, Iese natuna David na dia mero roboana. Natuna memerodia 8 amo David na dokona. To, Mesia na David ena bese amo e vara. (1 Sam. 16:10, 11; 17:12; Mat. 1:5, 6) Solomon danu unu bamona, ia na dia David natuna roboana, to Mesia na iena bese amo e vara.​—⁠2 Sam. 3:2-5.

To, basitato roboa ahuna na asi anina. Natu roboana na dagi badana ta bona nega momo ia na ruma bese kwarana iharuana ai e laova. Danu kohu iharina karana ai natu roboana ahuna na nega rua e habadaiava.​—⁠Gen. 43:33; Deu. 21:17; Ios. 17: 1.

To roboa ahuna na ma ta ese baine abia diba. Abraham ese Ismael e siaia oho neganai, roboa ahuna na Isaak ese e abia. (Gen. 21:14-21; 22:2) Bona matamanai ta herevalaia heḡereḡerena, Ruben ena roboa ahuna na Iosef ese e abia.

Mani Heberu 12:16 aita itaia lou, e gwaumu: “Bogaraḡimui ai tau ta baine heuda hanai na garina; eiava Dirava basine matauraia, Esau heḡereḡerena, ia ese Dirava se matauraia [“helaḡa ḡaudia na se lalodia bada,” NWT] a ena roboa ahuna na nau tamona e hoilaia.” Una hereva anina be dahaka?

Aposetolo Paulo na dia Mesia tubuna e herevalaia. Ia ese Kristen taudia e haḡanidia ‘aedia edia dala maoromaorodia bae kara.’ Unu amo “Dirava ena hebogahisi hereadaena” basie reaia; bema matabodaḡa karadia bae kara, una hebogahisi hereadaena bae reaia diba. (Heb. 12:12-16; NWT) Unu bae kara toma neganai, idia na Esau heḡereḡerena. Ia ese “helaḡa ḡaudia na se lalodia bada,” bona Dirava se matauraia.

Esau na idaunega iduhu kwaradia edia nega ai e nohova, bona reana nega haida boubou ḡaudia e heniva. (Gen. 8:20, 21; 12:7, 8; Iobu 1:4, 5) To tauani ḡaudia e lalova, bona vasiahu iabina totona unu hahenamo iboudiai e haboiodia. Reana se ura Abraham garana enai baine vara hisihisina baine davaria. (Gen. 15:13) Danu Esau ese kaivakuku e tomadiho heniva hahinedia rarua e adavadia neganai, Dirava se matauraia bona helaḡa ḡaudia se lalodia bada, una kara dainai tamana sinana na e lalohisihisi. (Gen. 26:34, 35) To, Iakob ena kara na idau, ia ese Dirava momokanina e tomadiho heniava hahinena ta e adavaia.​—⁠Gen. 28:6, 7; 29:10-12, 18.

Una dainai, Iesu o Mesia baine vara besena be ede baita dibaia toma? Nega haida natu roboana ena amo una bese baine vara, to dia hanaihanai. Iuda taudia ese una na e lalopararalaia bona e abia dae, David, Iese natuna dokona, ena bese amo Keriso e vara.​—⁠Mat. 22:42.