Insita izingi tukalandapo pa mulandu uu. Nomba vino tukalanda vikaloleka kwati vikauvwana ni vyaya pa Ayebulai 12:16. Ilembelo lii likalanda ukuti Esau ‘wasuuzile ivya muzilo’ nupya “wakazizye uyeli wakwe [kuli Yakobo] ni cakulya conga sile.” Ci cikalangilila ukuti lino Yakobo waposile “uyeli” wizile aya mu mutande wa kuya icikolwe cakwe Mesiya.—Mate. 1:2, 16; Luka 3:23, 34.

Nanti ciye vivyo, ivisinte vya muli Baibo vikalanga ukuti umonsi ataali nu kuya iyeli pakuti aye icikolwe cakwe Mesiya. Vimwi ivingalenga tusininkizye aevi:

Pa yana yakwe Yakobo (Izlaeli), iyeli wali a Lubeni uwavilwe kuli Leya. Pacisila, iyeli lyakwe Yakobo mu muci wino watemilwe sana Lakeli, wali a Yosefu. Lino Lubeni wazanyilwe nu mulandu wakucita ivipe, uyeli wakwe wapeezilwe kuli Yosefu. (Utan. 29:31-35; 30:22-25; 35:22-26; 49:22-26; 1 Mila. 5:1, 2) Nalyo kwene, mutande wakwe Mesiya utafumile muli Lubeni nanti muli Yosefu kwene. Wafumile muli Yuda, umwana wakwe  Yakobo uwalenga 4 muli Leya.—Utan. 49:10.

Pali Luka 3:32 paya antu 5 aya mu mutande wakwe Mesiya. Cikaloleka kwati aonsi yonsi yaa yali a mayeli. Boazi waviile Obedi uwizile aya isi wakwe Yese. —Luti 4:17, 20-22; 1 Mila. 2:10-12.

Nanti ciye vivyo, umwana wakwe Yese, Davidi ataali iyeli. Wali a nkwangu pa yana 8. Nomba umutande wakwe Mesiya wapisile muli Davidi. (1 Sam. 16:10, 11; 17:12; Mate. 1:5, 6) Vivyo kwene avino cali na kuli Solomoni, nanti icakuti nawe kwene atali iyeli lyakwe Davidi.—2 Sam. 3:2-5.

Ci cisikupiliula ukuti ukuya iyeli kutaali ukucindame. Umwana umonsi iyeli wakwatanga icifulo icicindame nupya wayanga wakwe ciili ku mutwe wa ng’anda mu lupwa. Nupya awino yaankanyanga ivingi ndi cakuti isi wafwa.—Utan. 43:33; Malan. 21:17; Yoswa 17:1.

Nomba uyeli yaupeelanga uku muntu muze. Lino Abulaamu wazinzile Isumeli, wapeezile uyeli kuli Isaki. (Utan. 21:14-21; 22:2) Nupya wakwe vino itulola, uyeli wakwe Lubeni yaupeezile kuli Yosefu.

Lyene lekini tulande pi lembelo lya Ayebulai 12:16, pano tukawelenga ukuti: ‘Mutaleka umuntu umwi aye cizelele nanti kusula vya muzilo ndi vino Esau wacisile, wino wakazizye uyeli wakwe ni cakulya conga sile.’ I cisinka ci icikalandwapo?

Umutumwa Paulo atalandanga pa vikolwe vyakwe Mesiya. Wacelulanga sile Aina Klistu ukuti yalinzile “kupita umu nzila zyololoke.” Fwandi yataali nu ‘kufutatila cikuku cakwe Leza,’ icintu ciipe cali nu kucitika ndi cakuti yatandika ukucita ulalelale. (Ayeb. 12:12-16) Ndi yacita vivyo yaali nu kuya wakwe Esau. Wasuuzile ‘ivya muzilo’ nu kulondelela ivintu ivitacindime.

Esau waliko mu nsita ino aonsi yakweti sana amaka mu lupwa, nupya afwile wakweti ni syuko lya kupeela impolelwa. (Utan. 8:20, 21; 12:7, 8; Yobo 1:4, 5) Nomba pa mulandu nu kukanaelenganya ningo, wakawizye isyuko lilyo lyonsi lino wakweti ni mbale ya musunyi sile. Limwi walondanga ataaluke ku ucuzi uwasowilwe ukuti wali nu kwiza pali ya mwana Abulaamu. (Utan. 15:13) Nupya Esau walangizye ukuti watemilwe ivintu ivitacindama nupya wasuuzile ivya muzilo, lino watwazile anaci yaili atapepanga Leza aalenzile avyazi yakwe ukuya nu ulanda. (Utan. 26:34, 35) Fwandi wapusine sana na vino Yakobo wali, uwaombisye pa kulonda uwakutwala uwapepanga Leza wa cumi.—Utan. 28:6, 7; 29:10-12, 18.

Uzye lyene, tungasondwelela uli pa mutande uwatungululanga kuli Yesu uwizile aya Mesiya? Insita zimwi mutande uwo wakonkanga mu mayeli nomba asi lyonsi. Ayuda iilwike vii nupya yazumile, lino yamanyile ukuti Klistu wafumile mu mutande wakwe Davidi, nkwangu wakwe Yese.—Mate. 22:42.