Kemantika kiampa tikijtojtokej. Tlen tikijtouayayaj nesiyaya kinamiki ika tlen kiijtoua Hebreos 12:16. Nopa versículo kiijtoua Esaú amo kipatiitak “tlen toTeko techmakatok” uan “kitlauelkajki nochi nopa tlateochiuali tlen eliyaya iaxka para kiselis pampa eliyaya nopa achtouiejketl” uan “nochi kinemakiltik iikni [Jacob] ika se plato tlakuali kema mayanayaya”. Timoiljuiyayaj ni tlajtoli kinextia Jacob elki se tlen iuejkapantatauaj Mesías kema kimakakej “nopa tlateochiuali” (Mat. 1:2, 16; Luc. 3:23, 34).

Pampa timomachtijtokej ipan Biblia se keski tlapoualistli, tikitaj se akajya amo monekiyaya elis achtouiejketl uan kiampa elis se tlen Mesías iuejkapantatauaj. Ma tikitakaj se keski neskayotl.

Iachtouikone Jacob (Israel) elki Rubén, katli Lea kitlakatiltik. Teipa, nopa iachtouikone katli kipixki iuaya isiua Raquel, katli tlauel kiikneliyaya, elki José. Kema Rubén kiixpanok itata, nopa tlateochiuali tlen achtouiejketl kimakakej José (Gén. 29:31-35; 30:22-25; 35:22-26; 49:22-26; 1 Crón. 5:1, 2). Maske kiampa panok, Mesías amo ualajki tlen ichampoyouaj Rubén yon José, ualajki tlen Judá ichampoyouaj, seyok Jacob ikone katli Lea kitlakatiltik (Gén. 49:10).

Lucas 3:32 nojkia kiijtoua inintoka makuiltij  tlakamej katli elkej Mesías iuejkapantatauaj. Uelis nochi inijuantij eliyayaj achtouieuanij. Booz (o Boaz) eliyaya Obed itata, uan Obed eliyaya Isaí (o Jesé) itata (Rut 4:17, 20-22; 1 Crón. 2:10-12).

Seyok iuejkapantata Mesías elki David. Ya amo eliyaya Isaí iachtouikone. Tlen chikueyij ikoneuaj, ya elki nopa teipaejketl (1 Sam. 16:10, 11; 17:12; Mat. 1:5, 6). Nojkia kiampa pano ika Salomón, ya nojkia amo eliyaya David iachtouikone (2 Sam. 3:2-5).

Ni amo kiijtosneki amo ipati tlaj se akajya eliskia achtouiejketl. Katli achtoui tlakatiyaya tlauel kitlepanitayayaj uan teipa yaya kinyakanayaya nochi itata ichampoyouaj. Nojkia san ya kiseliyaya “ompa imiaka” tlen sekinok kiseliskiaj (Gén. 43:33; Deut. 21:17; Jos. 17:1).

Tlen kiseliskia se achtouiejketl ueliskia kimakasej seyok iikni. Kiampa panok kema Abraham kikixtik Ismael, tlen ya kinamikiyaya kiselis kimakakej Isaac (Gén. 21:14-21; 22:2). Uan kej tikijtojkej achtoui, José kiselik tlen Rubén kinamikiyaya kiselis.

Sampa ma tikitakaj tlen kiijtoua Hebreos 12:16: “Ximotlachilikaj para axaka ma kichiua tlamantli ika tlen axinamik. Ma axaka kiuejkamajkaua tlen toTeko techmakatok keja Esaú kichijki. Yajaya kitlauelkajki nochi nopa tlateochiuali tlen eliyaya iaxka para kiselis pampa eliyaya nopa achtouiejketl. Kena, nochi kinemakiltik iikni ika se plato tlakuali kema mayanayaya”. ¿Tlake kinekiyaya kipannextis apóstol Pablo?

Pablo amo kamanaltitoya tlen Mesías iuejkapantatauaj. Achtoui kiniljuijtoya Cristo itokilijkauaj ma “[ki]tokilikaj se ojtli tlen xitlauak”, kiampa kiitaskiaj kenijkatsa “ueyi iyolo toTeko” ininuaya. Inijuantij amo kiitaskiaj nopa tlaj momekatiskiaj (Heb. 12:12-16). Tlaj kichiuaskiaj nopa tlajtlakoli, eliskiaj kej Esaú, katli “kitlauelkajki nochi nopa tlateochiuali” pampa amo kipatiitak uan kitlapejpenik tlen amo kuali.

Uejkajkia, se tetaj kinyakanayaya ichampoyouaj uan nochi katli itstoyaj iuaya. Esaú ueltoskia kichiuas nopa uan kemantika temakaskia tlakajkaualistli kej se sacerdote (Gén. 8:20, 21; 12:7, 8; Job 1:4, 5). Pampa amo kuali tlaneltokayaya, kipatlak tlen kiseliskia san ika se tlakualistli. Uelis kiampa kichijki pampa amo kinekiyaya tlaijiyouis, pampa kimajtoya Abraham ichampoyouaj tlauel kintlaijiyouiltiskiaj (Gén. 15:13). Esaú nojkia kinextik amo kipatiitayaya tlen kiseliskia kema mosiuajtik ika omej siuamej katli amo kitekipanouayayaj toTeotsij. Tlen kichijki tlauel kinyolkokok itatauaj (Gén. 26:34, 35). Amo elki kej Jacob, katli mosiuajtik iuaya se akajya katli nojkia kitekipanouayaya toTeotsij katli melauak (Gén. 28:6, 7; 29:10-12, 18).

Kej tikitstokej, amo nochi iuejkapantatauaj Mesías eliyayaj achtouieuanij. Judíos kimajtoyaj nopa uan amo kenijki kiitayayaj. Ni tijmatij pampa kimajtoyaj Cristo ualaskia tlen David ichampoyouaj, katli eliyaya iteipakone Isaí (Mat. 22:42).