Vẹrhẹ bi, ọwan i tare taghene omaran ọ havwọ. Fọkime ọrana o serhọ rhẹ oborẹ e se mẹrẹn uvuẹn Hebrews 12:16. Oghwẹmro ọrana ọ tare taghene Esau o “vwo ọdaremẹro kpahen ekwakwa eghoghanren” na-a, omarana nọ “rhẹ ẹrhẹ ọmọ ọkpako rọ havwọ [rẹn i Jacob] fọkiẹ emaren.” Ọnana nọ lẹrherẹ ọwan roro taghene ọke i Jacob o rhiẹ ọmọ ọkpako na, ọye nọ jeghwai vwo uphẹn ro no rhiẹ ọsẹ rode rẹn i Messiah na.—Matt. 1:2, 16; Luke 3:23, 34.

Ọrẹn, arha rharhumu ni ikuegbe i Baibol na so, ana mẹrẹnvwrurhe taghene o fo nẹ ohworho o rhiẹ ọmọ ọkpako vwẹre, no ki rhiẹ ọsẹ rode rẹn i Messiah na-a. Roro kpahen iyẹnrẹn ezẹko:

Reuben yẹ ọmọ ukukaro ri Leah o vwiẹ rẹn i Jacob (nọyẹ Israel). Ọmọ ukukaro ri Rachel ro rhiẹ ane i Jacob o vwo ẹguọlọ kpahen omamọ o vwiẹ riẹn, yi Joseph. Ọke i Reuben o ru oborẹ ọsọre, Joseph nọ yo rhiẹ ọmọ ọkpako. (Gen. 29:31-35; 30:22-25; 35:22-26; 49:22-26; 1 Chron. 5:1, 2) Ọrẹn, Messiah na o nẹ uvwioghwa i Reuben yanghene ọrẹ i Joseph  rhe-e. Messiah na o nẹ uvwioghwa i Judah ro rhiẹ ọmọ ọrẹ ẹne ri Leah o vwiẹre rhe.—Gen. 49:10.

Luke 3:32 nọ hunute awan isionrin erọrọ ri Messiah na ọ nyoma aye homaphia. Ọ họhọre taghene ehworhare isionrin na emọ ekpako. Omarana, Boaz no vwiẹ Obed, Obed no vwiẹ i Jesse.—Ruth 4:17, 20-22; 1 Chron. 2:10-12.

Ọrẹn, David ro rhiẹ ọmọ i Jesse rhẹ ọmọ ọkpako-o. Ọye yẹ ubrevwiẹ usuẹn emọ ẹrẹnren. Udabọ ọrana, Messiah na o nẹ uvwioghwa i David rhe. (1 Sam. 16:10, 11; 17:12; Matt. 1:5, 6) Omaran ọ ji havwọ, Solomon ri Messiah na o ji nẹ uvwioghwa ye rhe, rhẹ ọmọ ọkpako i Davidi-i.—2 Sam. 3:2-5.

Ọnana o mevirhọ taghene ẹrhẹ ọmọ ọkpako ọ ghanre-en. Ọmọ ọkpako o vwo ẹrhẹ ra họghọ riẹn uvuẹn oghwa ọsẹ ye, ọye yọ jeghwai sun uvwioghwa na ọsẹ na orho hwu ne. Ọye ọ ji ha akwava uku ọsẹ ye.—Gen. 43:33; Deut. 21:17; Josh. 17:1.

Ọrẹn, a sabu ha ẹrhẹ ọmọ ọkpako riuku. Jerẹ udje, ọke Abraham o le Ishmael nẹ oghwa, Isaac nọ yo rhiẹ ọmọ ọkpako. Jerẹ oborẹ a hunute ne, a ha ẹrhẹ ọmọ ọkpako i Reuben rẹn i Joseph.

Vwana, jenẹ a rharhumu ni oborẹ ọ ha uvuẹn Hebrews 12:16, rọ tare: “Are i ni oma so nẹ ohworho owuorowu usuẹn are o jo rho vwo uruemru ọfanrhiẹn, yanghene ohworho ro vwo vwo ọdaremẹro kpahen ekwakwa eghoghanren jerẹ Esau, rọ rhẹ ẹrhẹ ọmọ ọkpako rọ havwọ fọkiẹ emaren.” Me yo mevirhọ?

Ọnyikọ Paul ọ vwọ tẹmro kpahen uvwioghwa ri Messiah na o nurhe-e. Ukpomaran, Paul ọ ta rẹn Ilele Kristi nẹ aye i rhe ru oborẹ ọgbare ọke ephian. Aye i rhe ru ọnana, ẹghẹlẹ ọphẹ Osolobrugwẹ ọ vwọ samọ va aye obọ-ọ, ọrẹn, ọrana ọnọ sabu phia orhianẹ aye i vwobọrhọ irueruo ọfanrhiẹn. (Heb. 12:12-16) Aye i rhe vwobọrhọ irueruo ọfanrhiẹn, aye ni na họhọ Esau. Esau o vwo “ọdaremẹro kpahen ekwakwa eghoghanren” na-a, ọye nọ ha arudo ru emru aghwa.

Esau o nyerẹnren ọke idibo Osolobrugwẹ erẹ ahwanren, ọkezẹko, o ze izobo. (Gen. 8:20, 21; 12:7, 8; Job 1:4, 5) Esau nọ kpare uphẹn buebun fughwẹ fọkiẹ emaren. Ọkezẹko, ọ guọlọ kẹnoma rẹn ojẹriọ ra tare taghene ọnọ phia rẹn emọ i Abraham. (Gen. 15:13) Esau ọ jeghwai djephia taghene o vwo ọdaremẹro kpahen ẹkwaphiẹrhotọre Osolobrugwẹ-ẹ, nyoma ọ rọnmọ emẹse awanva ri rhiẹ egehọ, ọnana nọ suẹ omiamiamo vwe eri vwiẹriẹ. (Gen. 26:34, 35) Esau ọ họhọ i Jacob rọ rọnmọ emẹse ra ga Osolobrugwẹ urhomẹmro na-a!—Gen. 28:6, 7; 29:10-12, 18.

Omarana, me ya na sabu ta kpahen uvwioghwa ri Jesu ro rhiẹ Messiah na o nurhe? Ọkezẹko, ọmọ ọkpako yo rhiẹ ọsẹ rode rẹn i Messiah na, ọrẹn, o rhiẹ omaran ọke ephia-an. Itu i Jew na i mẹrẹn ọnana vwrurhe, aye i jeghwai kwerhọ ye, jerẹ oborẹ aye i vwo ekwerhọ taghene i Messiah na o nẹ uvwioghwa David ro rhiẹ ubrevwiẹ i Jesse rhe.—Matt. 22:42.