Zimwi ziindi oobo mbotwakali kwaamba. Eeco cakali kulibonya mbuli kuti cileendelana amajwi ngotubala kulugwalo lwa Bahebrayo 12:16. Kapango aako kaamba kuti Esau ‘tanaakabikkila maano kuzintu zisetekene’ alimwi “wakaaba [kuli Jakobo] zyoolwe zyakwe zyakuba mutaanzi kuzyalwa kwiinda mukuzicincanya acakulya comwe buyo.” Majwi aaya akali kulibonya kutondezya kuti ciindi Jakobo naakatambula “zyoolwe zyakwe zyakuba mutaanzi kuzyalwa,” alimwi wakaba mumulongo wakuba umwi wabamasyaanene ba Mesiya.—Mt. 1:2, 16; Lk. 3:23, 34.

Nokuba boobo, kulanga-langa zibalo zyamu Bbaibbele kutondezya kuti muntu tanaakeelede kuba mutaanzi kuzyalwa buya kutegwa abe syaanene wa Mesiya. Atulange-lange bumboni bumwi:

Akati kabana ba Jakobo (Israyeli), mwanaakwe mutaanzi kuzyalwa ngwaakazyala a Leya wakali Rubeni. Mukuya kwaciindi, mwana mutaanzi musankwa wa Jakobo ngwaakazyala amukaintu ngwaakali kuyandisya, Rakele, wakali Josefa. Ciindi Rubeni naakalubizya, coolwe cakuba mutaanzi kuzyalwa cakapegwa kuli Josefa. (Matl. 29:31-35; 30:22-25; 35:22-26; 49:22-26; 1Mak. 5:1, 2) Nokuba boobo, mulongo wazyalani lya Mesiya kunyina nowakainda muli Rubeni nomuba muli Josefa. Wakainda muli Juda,  imwana musankwa wane wa Jakobo ngwaakazyala a Leya.—Matl. 49:10.

Lugwalo lwa Luka 3:32 lulaamba milongo iimbi yosanwe iisololela kuli Mesiya. Kuboneka kuti mwaalumi umwi aumwi wakali mwana mutaanzi. Aboobo Boazi wakazyala Obedi, walo mwaanakwe iwakali Jese.—Rut. 4:17, 20-22; 1Mak. 2:10-12.

Nokuba boobo, Davida imwana wa Jese tanaakali mutaanzi kuzyalwa. Wakali wamamanino akati kabana basankwa ibali lusele. Pele mulongo wazyalani lya Mesiya wakali kwiinda muli Davida. (1Sam. 16:10, 11; 17:12; Mt. 1:5, 6) Mbubwenya buyo, uutobela mumulongo wakali Solomoni, nokuba kuti tanaakali mwana wa Davida mutaanzi kuzyalwa.—2Sam. 3:2-5.

Eeci tacaambi kuti ikuba mwana mutaanzi kuzyalwa tiikwakali kuyandika kapati. Mwana musankwa mutaanzi kuzyalwa wakajisi cuuno cilemekwa alimwi kanji-kanji wakali kuba mweendelezi wamukwasyi uutobela. Alimwi ngowakali kukona zipaanzi zyobilo zyazintu zyabausyi.—Matl. 43:33; Dt. 21:17; Jos. 17:1.

Pele coolwe cakuba mutaanzi kuzyalwa cakali kukonzya kulonzyegwa. Abrahamu wakamutanda Isimayeli, akupa Izaka coolwe cakuba mutaanzi kuzyalwa. Mbweena mbuli mbotwabona kale, coolwe cakuba mutaanzi kuzyalwa cakalonzyegwa kuzwa kuli Rubeni akupegwa kuli Josefa.

Lino atujokele kulugwalo lwa Bahebrayo 12:16, ilwaamba kuti: “Amucenjele kuti akati kanu kutabi sibwaamu naa muntu uuli woonse uutabikkili maano kuzintu zisetekene, mbuli Esau ooyo iwakaaba zyoolwe zyakwe zyakuba mutaanzi kuzyalwa kwiinda mukuzicincanya acakulya comwe buyo.” Ino ncinzi cakali kwaambwa aawa?

Imwaapostolo Paulo tanaakali kwaamba kujatikizya zyalani lya Mesiya pe. Wakazwide akwaambila Banakristo ‘kululamika nzila zyamaulu aabo.’ Aboobo tiibakali kukonzya ‘kukakilwa kujana luzyalo lwa Leza,’ calo icakali kukonzya kucitika ikuti nobakajatikizyigwa mumicito yabwaamu. (Heb. 12:12-16) Ikuti nobakacita oobo, nobakaba mbuli Esau. Wakakakilwa ‘kubikkila maano kuzintu zisetekene,’ cacigaminina wakacita cintu “cisampuzya.”

Esau wakapona muciindi cansiku, alimwi kweelede kuti zimwi ziindi wakalijisi coolwe cakupa zituuzyo. (Matl. 8:20, 21; 12:7, 8; Job. 1:4, 5) Pele akaambo kakuti wakajisi mizeezo yanyama, Esau wakazicincanya zyoolwe zyoonse zyamwana mutaanzi kuzyalwa amutiba wamusinza. Ambweni wakali kuyanda kuti atakamusikili mapenzi akaambwa kuti ayoobasikila balunyungu lwa Abrahamu. (Matl. 15:13) Alimwi Esau wakalitondezya kuti tanaakali kuziyanda zyabukombi, tanaakali kuzibikkila maano zintu zisetekene, kwiinda mukukwata bamakaintu bobilo ibatakali kukomba Leza, calo cakapa kuti bazyali bakwe bapenge kapati mumoyo. (Matl. 26:34, 35) Eelo kaka wakaliindene kapati a Jakobo, walo wakabona masimpe kuti wakwata mukombi wa Leza mwini-mwini wakasimpe!—Matl. 28:6, 7; 29:10-12, 18.

Aboobo, ino inga twaamba nzi kujatikizya mulongo wamazyalani wakasololela kuli Jesu, Mesiya? Zimwi ziindi mulongo ooyu wamazyalani wakali kwiinda mumwana musankwa mutaanzi kuzyalwa—pele kutali lyoonse pe. Ba Juda bakalizyi alimwi bakakazumina kaambo aaka, ciindi nobakazumina kuti Kristo wakali kuyoozyalwa kuzwa muzyalani lya Davida, imwana musankwa wamamanino wa Jese.—Mt. 22:42.