Lakgachunin, lichuwinanitaw umakgolh tachuwin xlakata niku minitancha. Uma xtasiya pi tatalakxtumi tuku lichuwinan Hebreos 12:16, niku lichuwinan pi Esaú ni lanka xtapalh akxilhli «tuku xasanto» chu wa «xpalakata xliwat ntililakgpalilh wa ntu xlilakgchanat xwanit mpi xapuxku», wa maxkilh Jacob. Uma tachuwin tasiya pi xkilhchanima pi akxni Jacob kgalhilh tuku xlilakgchanat xwanit xlakata xapuxku nachuna lakgchalh xlakata xmakgtapakgsilh niku xmincha Mesías (Mat. 1:2, 16; Luc. 3:23, 34).

Chuna akxni lakputsananiyaw umakgolh liʼakxilhtit xalak Biblia, akxilhaw pi ni xtalakaskin xapuxku nawana xlakata namakgtapakgsiya niku xmimacha Mesías. Kaʼakxilhwi makgapitsi tuku nalikatsiyaw.

Xapuxku xkgawasa Jacob (Israel) chu Lea wa Rubén. Alistalh xapulana xkgawasa nema takgalhilh xpuskat tiku tlakg xpaxki, Raquel, wa José. Akxni Rubén tlawalh talakgalhin, uma tuku xlilakgchanat xwanit, wa lakgchalh José (Gén. 29:31-35; 30:22-25; 35:22-26; 49:22-26; 1 Crón. 5:1, 2). Maski chuna, Mesías ni anta mincha kxfamilia Rubén nipara kxfamilia José, wata anta  lakachilh kxfamilia Judá xlikgalhtati xkgawasa nema Jacob takgalhilh Lea (Gén. 49:10).

Anta kLucas 3:32, lichuwinankan kgalhkitsis lakchixkuwin tiku kxfamiliajkan mincha Mesías. Max putum xlakan xanapuxkun xwankgonit. Boaz xtlat xwanit Obed chu xla xtlat xwanit Jesé (Rut 4:17, 20-22; 1 Crón. 2:10-12).

Atanu familia niku na mincha Mesías wa xla David. Pero ni wa xapuxku xwanit xkgawasa Jesé, wata wa tiku tlakg xaʼaktsujku xwanit (1 Sam. 16:10, 11; 17:12; Mat. 1:5, 6). Xtachuna tatalakxtumi tiku alistalh kstala, Salomón, nachuna ni wa xapuxku xwanit xkgawasa David (2 Sam. 3:2-5).

Uma ni xwamputun pi tiku xapuxku ni xlakaskinka xlitaxtu. Xapulana kgawasa tiku xlakachin kʼakgatunu kfamilia xmaxkikan kakni chu wa tiku alistalh xakgxakga familia xlitaxtu. Chu na wa tiku tlakg xmakglhtinan putawilh (Gén. 43:33; Deut. 21:17; Jos. 17:1).

Pero tuku xlakgchan tiku xapuxku tlan xmatitaxtinikan atanu. Akgtum liʼakxilhtit, Abrahán wanilh Ismael pi xʼalh chu makglhtilh tuku xlakgchan chu wa maxkilh Isaac (Gén. 21:14-21; 22:2). Chuna la lichuwinaw kxapulana, tuku xlakgchan Rubén wa maxkika José.

Kalichuwinamparaw Hebreos 12:16, niku apóstol Pablo tsokgli: «Ti ni chatum wixin, kaj kalawaj chixku nawan, su ni namaxkiy nkakni Dios, lantla Esaú, kaj xpalakata xliwat ntililakgpalilh wa ntu xlilakgchanat xwanit mpi xapuxku». ¿Tuku xwamputun?

Apóstol Pablo ni wa xlichuwinama familia niku mincha Mesías. Akxni nina xkawani uma, pulana xkawaninit kstalaninanin Cristo pi «chu na tsaj kalitlawantit mintuwankan» xlakata tiku xwilakgo «ni chatum natsankganiy xlipaxkatsinit Dios», wa tuku xtlawalh pi max xtsukukgolh tlawakgo talakgxtumit xalimaxana (Heb. 12:12-16). Komo xtlawakgolh uma lanka talakgalhin, xtachuna xlitaxtukgolh la Esaú, tiku ni lhuwa xtapalh liʼakxilhli «tuku xasanto» chu wata kaj lakgmakgalh.

Esaú latamalh kxkilhtamakujkan patriarcas, chu max asta xkgalhi talakgalhaman natlawa tamakamastan (Gén. 8:20, 21; 12:7, 8; Job 1:4, 5). Pero, chuna la xlakpuwan, tlawalh pi xlakgmakgalh tuku xlakgaya kaj xlakata liwat. Max ni xlipatiputun tuku xwankanit pi xʼama la xlakata xmakkamanan Abrahán (Gén. 15:13). Esaú lakgmakgalh tuku xkgalhi, kilhchanima pi lakgmakgalh tuku xasanto xkgalhi akxni katatamakgaxtokgli lakpuskatin tiku ni xkakninanikgo xaxlikana Dios, uma tlawalh pi lu xkamakgapatinalh xnatlatni (Gén. 26:34, 35). Pero Jacob nichuna xwanit, xla liwana laksakli tiku natatamakgaxtokga chu wa tiku xkakninani xaxlikana Dios (Gén. 28:6, 7; 29:10-12, 18).

Wa xlakata, ¿tuku kinkamasiyaniyan uma? Lakgachunin familia niku mincha Mesías ni ankgalhin wa xkalakgchan tiku xanapuxkun xwankgonit. Judíos xkatsikgo uma chu xkanajlakgo, akgtum liʼakxilhtit xkatsikgo pi Cristo anta xʼama min kxfamilia David, tiku tlakg xaʼaktsujku xkgawasa Jesé (Mat. 22:42).