讀者來函
喺古代嘅以色列,彌賽亞嘅所有祖先係咪一定要係頭生子?
之前我哋根據希伯來書12:16作出咗一啲解釋。呢節經文話以掃“唔重視聖物”,“為咗一啲食物,就出賣自己嘅長子權[俾雅各]”。噉樣睇嚟,好似係因為雅各得到“長子權”,先可以成為彌賽亞嘅祖先。(馬太福音1:2,16;路加福音3:23,34)
不過,其他經文表明彌賽亞嘅祖先唔一定都係頭生子。請考慮吓以下嘅證據:
雅各(以色列)嘅頭生子係利亞所生嘅呂便。之後,雅各最鍾意嘅妻子拉結生咗佢第一個仔約瑟。呂便犯咗性不道德之後,雅各就將長子權交咗俾約瑟。(創世記29:31-35;30:22-25;35:22-26;49:22-26;歷代志上5:1,2)但係,彌賽亞嘅家系並唔係出自呂便或者約瑟,而係出自雅各第四個仔,由利亞所生嘅猶大。(創世記49:10)
路加福音3:32列出彌賽亞嘅其中五個祖先。每一個睇嚟都係頭生子。波阿斯生俄備得,俄備得生耶西。(路得記4:17,20-22;歷代志上2:10-12)
雖然大衛唔係耶西嘅頭生子,而係耶西八個仔當中最細嘅,不過彌賽亞就係出自大衛嘅家系。(撒母耳記上16:10,11;17:12;馬太福音1:5,6)同樣,所羅門係彌賽亞嘅祖先,不過佢都唔係大衛嘅頭生子。(撒母耳記下3:2-5)
呢個並唔係話做頭生子唔重要。頭生子享有尊貴嘅地位,亦都會成為下一位家主,又可以得到雙倍嘅産業。(創世記43:33;申命記21:17;約書亞記17:1)
但係,長子權係可以轉讓嘅。亞伯拉罕遣走以實瑪利,將長子權俾咗以撒。(創世記21:14-21;22:2)以上亦都提到,呂便嘅長子權被轉交俾約瑟。
而家我哋再睇翻希伯來書12:16,經文話:“免得有人淫亂,唔重視聖物,好似以掃一樣。佢竟然為咗一啲食物,就出賣自己嘅長子權。”呢度想强調乜嘢呢?
使徒保羅唔係想討論彌賽亞嘅家系,其實佢係想勸勉基督徒要“修平[佢哋]所走嘅道路”,以免犯下淫亂而“失去上帝嘅分外恩典”。(希伯來書12:12-16)如果佢哋唔聽從保羅嘅勸告,就會好似以掃一樣“唔重視聖物”。
以掃生活喺族長時期,可能佢都有機會為家人獻過祭。(創世記8:20,21;12:7,8;約伯記1:4,5)不過,為咗滿足肉體嘅需要,以掃寧願放棄佢嘅長子權去換取一碗紅羹。上帝曾經預告亞伯拉罕嘅後代會經歷苦難,可能以掃唔想承受呢啲痛苦。(創世記15:13)後來,以掃娶咗兩個異教女子,令佢父母好痛心,進一步表明佢唔重視聖物。(創世記26:34,35)雅各就完全唔同,佢下定決心要娶一個崇拜耶和華嘅女子為妻。(創世記28:6,7;29:10-12,18)
所以有關彌賽亞耶穌嘅祖先,我哋可以得出乜嘢結論?彌賽亞嘅祖先的確有啲係頭生子,但唔係所有都係。猶太人都承認基督係出自耶西嘅細仔大衛嘅,由此睇出佢哋並冇否認呢一點。(馬太福音22:42)