1. Ka tariñagubei Bíbülia luagu ererehóuni?

DAN layusurún dimurei ererehóuni tidan Bíbülia mámarügü layanuhaña luagu abeichúni. Libe-agei dan, ariñagatu Bíbülia buidu lan ererehóuni woun. Anihein dan, úarati tayusuruni Bíbülia ererehóuni luma subudi, lichú-au, ínsiñeni luma ibagari (Ari. 1:2-7; 4:11-13). Arufudahati lererehan Bungiu woun hinsiñe wamá lun ani busén lan lun wawinwandun lun súnwandan (Ebü. 12:6). Inarüni gayara lan gagana lan lererehan Bungiu abeichúni, gama lumoun, mama lau furundei ladügei. Le linarün katei, arufudati le lílabei dimurei ererehóuni úara lan luma arufudahani, ítara kei larufudahan aban úguchili lun lisaani le hínsiñebei lun.

2, 3. Ka bián katei gayaraabei gagana lani ererehóuni? (Ariha humóun iyawaü to lídanboun lagumeseha arütíkulu).

² Samina wamá luagu aban sügǘ. Láhüreruña aban irahü gíriti Jefferson bali múnada. Aba tariñagun lúguchu lun: “Jefferson, subudi bumutitia siñá lan báhürerun bali ya múnada luéi babouchagun somu katei”. Sódini aba láfarun bali luagu aban lagei fuluri ábati labouchagun. Kaba tadüga lúguchu lun tererehan lun? Lau tarufudahan lun luma tabéichuni. Lun tarufudahan lun, aba tafuranguagüdüni lun wuriba lan le ladügübei. Busentu lun gunfuranda lani buidu lan lun gaganbadi lan houn lagübürigu ani le lan hamuriahabei luma mama aban katei le siñá lubéi adüga. Ani lun tíderaguni irahü lun  lafurendeirun, aba tagidaruni bali luéi luagu fiu dan. Íbini mínsiñe lan katei le lun Jefferson, larufudahaba lun mabuidun lan maganbadi.

³ Lílana damuriguaü kristiánu wagía (1 Tim. 3:15). Ligía inebe lubéi liricha Heowá woun lun líchugun gumadi woun luma lun lererehan woun lau ínsiñeni dan le maganbadi wamá lun. Gama lumoun, anhein wuriba lubéi lidin woun ladüga maganbadi wamá, laritaguagüdünbadiwa lererehan Wáguchi le siélubei súdini lan lun gaganbadi wamá lun (Gal. 6:7). Hínsiñetiwa lun Bungiu saragu ani mabusenrunti lun wasufurirun (1 Fe. 5:6, 7).

4. a) Ka luwuyeri arufudahani labinirubei Heowá? b) Kaba wakutiha lidan arütíkulu le?

⁴ Gayaraati wíderaguniña wasaanigu hama gürigia ha aturiahabarun Bíbülia wama lun lani hamá Kristu disipulugu lau wíchugun adundehani tídangiñeti Bíbülia houn. Lererun Bungiu tulu súdinitimaboun to wámaboun lugundun íderagua tumutiwa lun warufudahan “houn gürigia lidan richaguaü”. Gayaraati wíderaguniña isaanigu hama aturiahatiña Bíbülia lun gunfuranda hamani sun le lariñagubei Hesusu lun wadügüni ani gaganbadi hagíame lun (2 Tim. 3:16; Mat. 28:19, 20). Biní lumuti Heowá libe arufudahani le, le aranserubaliña aturiahatiña lunme hadügün hanwoun lani Kristu disipulugu (aliiha huméi Titu 2:11, 12, 14). Guentó wakutihaali lóunabagüle ǘrüwa álügüdahani súdiniti le: 1) Ida liña larufuduni ererehóuni le ñǘbuinbei lúmagiñe Bungiu hínsiñe wamá lun? 2) Ka wafurendeirubei lídangiñe le asuseredubei houn gürigia ha únbaña lererehan Bungiu? 3) Ida luba wáyeihani Heowá luma Hesusu dan le wererehan houn amu gürigia?

5. Ida liña larufuduni Heowá lau ligaburi lererehan woun hínsiñe wamá lun?

⁵ Ererehati ani arufudahati Heowá woun ladüga hínsiñe wamá lun. Busenti lun wasigirun gamadagua luma luma lun wawinwandun lun súnwandan (1 Huan 4:16). Manabun lumutiwa madügün ligía lun wasandiragun woungua mebegi wamá (Ari. 12:18). Lúntima lubuidun wagaburi letenira ani inebeti waricha lun lun wanúadiruni le wabusenrubei wadügün. Ítara liña san harihini lererehan Heowá le ñǘbuinbei tídangiñe Bíbülia, agumeiraguagüdüni, hámagiñe wéiyaaña lidan afiñeni luma hámagiñe agübürigu? Dan le wábürühan lan lidoun aban figóu míchugunga wagía fe áfaaguatiña wéiyaaña lidan afiñeni lun híderaguniwa lau ínsiñeni luma gurasu. Ítara, harufuduñein línsiñehabu Heowá (Gal. 6:1, TNM).

6. Íbini barǘ lan ererehóuni leferidiruni gürigia lani buligasion lidan damuriguaü, ka uagu gayara lubéi wariñagun larufuduña lan Bungiu ínsiñehabuni lun?

⁶ Anihein dan, mámarügübei eweridihani ichugúa lun gürigia dan le lererehóun lun. Anhein adügaali lubéi aban figóu wéiriti, háfuga leferidiruni buligasion le íchugubei lun lidan damuriguaü. Íbini lidan kesi le arihúati hínsiñe wamá lun Heowá. Lau leferidiruni afigouhati buligasion le libihinbei lidan damuriguaü gayaraabei líderaguni lun líchugun fe weiri lan lisudinin ladireirun dan lun laturiahan lábugua, lun lararamagun asaminara luagu le laliihabei luma lun lafurieidun. Líderagubei katei burí le lun lederebudagüdüni lumadagua luma Heowá (Sal. 19:7). Lau lásügürün dan, gayaraabei libihini buligasion le meha leferidirubei. Arufuda lumuti labugún gürigia lídangiñe damuriguaü línsiñehabu Heowá lugundun lóunigiruñein damuriguaü luéi wuribani (1 Kor. 5:6, 7, 11). Ani kei richá lubéi lererehan Heowá súnwandan gayaraati líderaguni labugún gürigia lun gunfuranda lani hanarime lan luriban figóu le ladügübei ínchahaleime lun lasakürihan (Adü. 3:19).

7. a) Ka meha Sebünábei? b) Ka meha igaburi wuribati lagumeserunbei Sebüná áyeiha?

⁷ Lun warufuduni lebegi ererehóuni, ariha  waméi hénpulu hawaguti bián gürigia ha únbaña lererehan Heowá: Sebüná, le awinwandubei lidan lidaani urúei Esekíasi, luma Graham, aban íbiri le awinwandubei lidan wadaani. Adimureha wamá furumiñe luagu Sebüná. Genegeti ligía lan meha arihibei tau luban urúei Esekíasi, ligíati, gabafuti meha saragu (Isa. 22:15). Ma lirun aba lan lagumeserun anaagua lungua gumese ligía áluaha uéiriguni lungua. Adügagüdati aban umúahaü le wéndeguti ani tidan karü hanarimetu léibuga (Isa. 22:16-18).

8. Ida liña lererehan Heowá lun Sebüná, ani ida liña lidin lun?

⁸ Kei aba lubéi lagumeserun Sebüná áluaha uéiriguni lungua aba lagidaruni Bungiu lídangiñe lubara ábati líchuguni ubaraü ligía lun Eliakímü (Isa. 22:19-21). Susereti katei le dan le aniha lan urúei Senakeríbü áluaha láburuhan luagun Herusalén. Dan lárigiñe, aba lóunahaniña Senakeríbü aban sétanu wügüriña íñuti habara hama saragu súdaragu lun hanufudedagüdüniña huríu luma lun hadügün lun láburuhan larüna Esekíasi (2 Uru. 18:17-25). Aba lóunahani Esekíasi Eliakímü hámaya bián wügüriña lun houdin adunragua hama úfisigu asiriana. Aban hádangiñe wügüriña hagía Sebüná, leseriwiduña meha guentó kei lani urúei abürühati. Arufudati katei le mígiraguagüdün lan Sebüná lungua lun íruni, ni lun igarihabu ani aba ǘnabuguhaali lan ladüga ánhati lun aban ubaraü le maweirinti lisudinin kei meha le ídanbei leseriwida. Ka gayaraabei wafurendeiruni lídangiñe abahüdaguni le? Ariha wamá ǘrüwa katei.

9-11. a) Ka gayaraabei wafurendeiruni lídangiñe le asuseredubei lun Sebüná? b) Ida liña hasandiragun hungua lau harihini ligaburi lóuseruni Heowá Sebüná?

⁹ Furumiñe, kei féridi lumuti lan Sebüná lubara haritaguagüda lumutiwa le lárigi lan “pantaü liabin günringuaü; lárigi anaaguni unguaü liabin ábürühani” (Ari. 16:18). Másiñati gani humá buligasion lidan damuriguaü ani saminatiña amu luagu aban lan ubaraü súdiniti le gani hubéi. Anhein ítara liña lubéi, áfaaguatün san lun ǘnabugumeme humá? Híchugubei san uéiriguni lun Heowá luagu le hiyaraabei adüga luma luagu le ibiha humaalibei? (1 Kor. 4:7). Abürühati apostolu Pábulu: “Ariñagatina hun sun huguya, lun ua lan ni aban hídangiñe aritaguti luougua weiri sügǘ lau le lubeibei. Lubaragiñe lira, lunti lasubudiragun kada aban lungua según afiñeni le ru laalibei Bungiu lun” (Rom. 12:3).

¹⁰ Libiaman, másiñati arufuda lan ererehóuni le leresibirubei Sebüná subudi lani Heowá gayara lan lasansirun (Ari. 3:11, 12). Buiti hénpulu le houn ha eferidirubaña buligasion lidan damuriguaü uguñe weyu. Lubaragiñe hareidun igarihabu luma hagañidun lunti hasigirun eseriwida lun Bungiu lau sun hayaraati luma lun harihini ererehóuni keisi  larufuduñein lan Heowá línsiñehabu houn. Haritagua waméi líchuguba lan Wáguchi le siélubei wafayeiruaha ánhawa arufuda ǘnabuguni (aliiha huméi 1 Féduru 5:6, 7). Busentiwa ítara wamá kei múa lúhaburugu Heowá ígira wagíame lun lawadigimariduniwa dan lererehan woun lau ínsiñeni.

¹¹ Lǘrüwan, ruti ligaburi lóuseruni Heowá Sebüná aban lubuidun arufudahani houn ha gánibaña buligasion lun hererehan, kei burí agübürigu hama wéiyaaña lidan afiñeni. Íbini arufuda lan ererehóuni le líchugubei Heowá iyereegu lan figóu lun, arufudati giñe hínsiñegiña lan gürigia ha afigouhabaña lun. Téniti Heowá lun buiti le hadügübei gürigia. Anhein lunti lubéi hererehan lun somu gürigia, hadügübei san kei ladügüni Heowá? (Hud. 22, 23).

12-14. a) Ida liña hóunabun fiu gürigia dan le heresibirun ererehóuni lúmagiñeti Heowá? b) Ida liña tíderaguni Bíbülia aban íbiri asansirei ligaburi ani ka buiti lanügübei lun?

¹² Híruti, añahein lan gürigia aba hasandiragun houngua wuriba dan le lererehóun houn darí lun hadisedun luéi Heowá luma luéi damuriguaü (Ebü. 3:12, 13). Gayaraati san híderawagun gürigia ha? Lun gayara lan wóunabuni álügüdahani le ariha waméi le asuseredubei lun Graham. Aba labugún lídangiñe damuriguaü, lau lásügürün dan aba lagiribudun ani dan lárigiñe aba madamuridagunhali lan mapurichihan ligía. Fiu irumu lárigiñe, aba lariñagun lun aban wéiyaali lidan afiñeni ani gamadaguahaali luma busén lan laturiahanu Bíbülia luma.

¹³ Ariñagati wéiyaali lidan afiñeni: “Pantaü meha liturobunlibei Graham. Adimurehati wuriba hawagu wéiyaaña ha meha aguseragüdübalin. Dan le wagumeserunbei aturiaha akutiha wamuti le tariñagubei Bíbülia luagu pantaü luma wuribani le gayaraabei ladügüni. Aba furangutimahali lan larihini Graham le tariñagubei Lererun Bungiu ani sagati buiti lídangiñe le lafurendeirubei. Ruti fe ítara liña lan pantaü kei aban “durusu” le adügübei lun marihin lani liturobulin. Aba lasubudiruni wuriba lan layanuhóun hawagu amu ani ligía lan liturobulibei. Ábati lagumeserun asansirei ligaburi lau lóufudagun. Gumeseti adamuridagua sagü dimaasu, aturiahoun Bíbülia lau ubebeni luma afurieida sagü weyu. Aba giñe lagumeserun etenira lun hamadagua liduheñu luma Heowá, ítara kei le lunbei ladügüni hachügüdina iduheñu. Anihán katei le agundaaragüdübarun lani weiriou hama lisaanigu” (Luk. 6:41, 42; Sant. 1:23-25).

¹⁴ Sigiti wéiyaali lidan afiñeni ariñaga: “Aban weyu, aba lariñagun Graham aban katei le ánhingichubarun nanigi: ‘Barühadina saragu irumu lúmagiñe nasubudiruni inarüni ani prekursoru meha au. Gama lumoun, furumiñe wéiyaasu gayara lan nariñagun tídangiñe sun nanigi hínsiñe lan Heowá nun’. Murusun dan lárigiñe, aba hamuriahan luma lun lásügüragüdün mikürófonu lidan adamuridaguni ani gebegiti buligasion le lun saragu. Arufudahati lani hénpulu nun dan le lan lǘnabudaguagüdün gürigia lungua ligibugiñe Heowá anha ligía lun ererehóuni resibiti saragu abiniruni”.

15. Ka lunbei wadügüni lun hánharun amu lun ererehóuni le wíchugubei houn?

¹⁵ Lun buidu lan ligaburi warufudahan lunti waturiahan buidu (1 Tim. 4:15, 16). Ítarameme, anhein yusu lubadün Heowá lun hererehan houn amu gürigia lunti ǘnabugu humá ígira huguyame lun ladundehanün Heowá. Anhein hariha amu luagu ǘnabugu humá inebebadün houn ani ménrengunbei lun haganbuni heweridihan. Ariha waméi hénpulu le líchugubei Hesusu.

16. Ka gayaraabei wafurendeirun lídangiñe ligaburi larufudahan Hesusu luma lererehan?

¹⁶ Gaganbaditi meha Hesusu lun Lúguchi  lidan sun katei, íbini lidan katei le meha hénrenguti (Mat. 26:39). Subudi lumuti meha lúmagiñe lan Bungiu liabin lichú lau luma le larufudahabei (Huan 5:19, 30). Kei meha ǘnabugu lubéi Hesusu gaganbadi ligía ligía aban lubéi meha máisturu hínsiñehabuti, gudemehabuti ani buiti meha hasandiragun gürigia haruma tanigi lurugabu (aliiha huméi Lúkasi 4:22). Ruti meha lererun dǘgüdaguaü houn ha maguraasunbaña hama ha débilibaña kei aban maburu le baruguaali o kei aban lanpu le ñegumémeeli (Mat. 12:20). Íbini dan meha le harufudun lani apostolugu hawouguounrügü lan hasaminara luma wuriba lan hayumahan meferidirun lumuti luguraasun. Erereharügüti houn lau ínsiñehabuni (Mar. 9:33-37; Luk. 22:24-27).

17. Ka lunbei hadügüni wéiyaaña lidan afiñeni lun hóunigiruniña lílana damuriguaü?

¹⁷ Lunti háyeihani wéiyaaña lidan afiñeni Hesusu lau hayusurunu Bíbülia dan hererehan. Lau igaburi le, harufuduña busén hamá lun Heowába lan luma Hesusu adundehaña. Abürühati apostolu Féduru: “Góunigi humaña lirahüñü Bungiu ha lábugiñebaña haríaahan keisi hóunigiruniña hóuniri mudún mudún. Adüga huméi lau ugundani keisi labusenruni Bungiu, mama ladüga hafosuruña lan; adüga huméi ladüga busén humá heseriwidun lun Bungiu, mama ladüga línsiñe seinsu hun. Móusera humá kamá hamuga haburiña ha lábugiñebaña haríaahan huguya; hóucharügü humá lun aban humá hénpulu buiti houn” (1 Fe. 5:2-4). Chóuruti dan le lan herederun wéiyaaña lidan afiñeni lábugiñe lagumadihan Heowá luma Hesusu, le lichügüdina damuriguaü, lau sun hagundan, sagatiña saragu buiti dandu hagía kei ha lábugiñebaña haríaahan (Isa. 32:1, 2, 17, 18).

18. a) Ka gumadi líchugubei Heowá houn agübürigu? b) Ida liña líderaguniña Heowá agübürigu lun hagunfuliruni hani buligasion?

¹⁸ Ka gayaraabei wariñagun luagu ererehóuni hadan iduheñu? Ariñagati Heowá houn hachügüdina iduheñu: “Magañidagüda humaña hisaanigu, agüriaharügü humaña buidu lun gaganbadi hamá, arufudaheina houn kei labusenruni Wabureme” (Efe. 6:4). Súdiniti katei le. Arufudahatu Bíbülia laguseragüdübaña lan Heowá agübürigu ánhaña mererehan houn hasaanigu (1 Sam. 3:12-14). Gama lumoun, ruti Heowá lichú aau luma erei houn agübürigu ha amuriahabaña ídemuei luma ígiraguagüda hagía houngua lun tadundehaniña Lererun luma lani sífiri sandu (aliiha huméi Santiagu 1:5).

19, 20. a) Ka burí abiniruni weresibirubei dan le wánharun lun ererehóuni lúmagiñeti Heowá? b) Kaba wariha lidan leweñegua arütíkulu?

¹⁹ Dan le wánharun lun lererehan Heowá woun erereha wagía kei ligaburi ladügüni luma ladügüni Hesusu weresibiruba abiniruni. Gúndaatiwa lau wawinwandun lau darangilaü hadan waduheñu luma hadan wíbirigu. Sun wagía sandiguatiwa woungua gebegi wamá, hínsiñegu wamá ani sin anufudei, arufuda lumuti le abiniruni le lunbei weresibiruni ámuñegü (Sal. 72:7). Aranseha lumutiwa lererehan Heowá lun wawinwandun lidan darangilaü luma lidan úarani lun súnwandan kei aban iduheñu lábugiñe laríaahan (aliiha huméi Isaíasi 11:9). Anhein gabaroun wabalin katei le gayaraabei warihini ererehóuni lúmagiñeti Heowá keisi lubudubu: aban lubuidun katei le achoururagüdübalin woun hínsiñe wamá lun.

²⁰ Lidan leweñegua arütíkulu, wafurendeiruba lanwoun ariñahani luagu ererehóuni hadan iduheñu luma lidan damuriguaü. Warihibei giñe ida luba lan wadügüni le buídubei arufuda wagíame ragüguaü unguaü luma ida luba lan méiguadun wamá lidoun katei le gáritimabei sügǘ luéi furumiñeguarügü ererehóuni le gayaraabei weresibiruni.